Skip to content

Skip to secondary menu

Skip to table of contents

Molimau a Ieova

Faa-Samoa

Tala Lelei Mai i le Atua!

 Lesona 10

E Faapefea Ona E Iloa le Tapuaʻiga Moni?

E Faapefea Ona E Iloa le Tapuaʻiga Moni?

“Ia mataala pea i perofeta pepelo.”MATAIO 7:15.

“Ua latou taʻutino atu i luma o tagata ua latou iloa le Atua, ae peitaʻi, ua latou faafitia o ia e ala i a latou galuega.”TITO 1:16.

1. Pe e na o le tasi le tapuaʻiga moni?

E tasi le tapuaʻiga na aʻoaʻo e Iesu i ona soo, o le tapuaʻiga moni lea. Ua faatusaina i se auala e tau atu i le ola e faavavau. Na fetalai Iesu e uiga i lenā auala: “E toʻaitiiti foʻi i latou o ē e maua.” (Mataio 7:14) E na o le tapuaʻiga e faavae i le Tusi Paia e talia e le Atua. Ua autasi foʻi tagata tapuaʻi moni uma i le faatuatuaga e tasi.Faitau le Ioane 4:23, 24; 14:6; Efeso 4:4, 5.

2. O le ā le faamatalaga a Iesu e uiga i Kerisiano pepelo?

Na lapataʻi mai Iesu o le a faaleagaina le faa-Kerisiano e perofeta pepelo. I le vaaiga i fafo, e foliga mai i latou e peiseaʻī o ni tagata tapuaʻi moni. Ua faapea mai a latou lotu, o i latou o ni Kerisiano. Ae e mafai ona e iloa le ituaiga o tagata e iai i latou. E faapefea? E na o le tapuaʻiga moni e maua ai Kerisiano moni e faaalia uiga ma amioga lelei.Faitau le Mataio 7:13-23.

3. E faapefea ona e mātauina tagata tapuaʻi moni?

Mātau faailoga e lima nei:

  • O tagata tapuaʻi moni, e manatu i le Tusi Paia o le Afioga lea a le Atua. E latou te taumafai lava e ola e tusa ma mataupu silisili o loo iai. O lea la, e ese le tapuaʻiga moni mai i tapuaʻiga o loo faavae i manatu o tagata. (Mataio 15:7-9) E ola tagata tapuaʻi moni e tusa ma mea o loo latou talaʻia.Faitau le Ioane 17:17; 2 Timoteo 3:16, 17.

  •   E faamamaluina e soo o Iesu le suafa o le Atua, o Ieova. Na faamamaluina e Iesu le suafa o le Atua e ala i le faalauiloaina atu. Na fesoasoani o ia i tagata ina ia iloa le Atua, ma aʻoaʻo i latou ina ia tatalo e faapaia le suafa o le Atua. (Mataio 6:9) I le vaipanoa o loo e alaala ai, o lē fea lotu o loo faalauiloaina atu le suafa o le Atua?Faitau le Ioane 17:26; Roma 10:13, 14.

  • E talaʻi e Kerisiano moni le Malo o le Atua. Na auina mai e le Atua Iesu ina ia talaʻi atu le tala lelei o le Malo. E na o le Malo o le Atua le faamoemoe mo tagata. Na faaauau pea ona talaʻi atu e Iesu lenā Malo seʻia oo i le aso na maliu ai. (Luka 4:43; 8:1; 23:42, 43) Na fetalai o ia e faapea, o le a talaʻi atu foʻi e ona soo lenei Malo. Pe a talanoa atu se tasi iā te oe e uiga i le Malo o le Atua, faamata o le ā lana lotu?Faitau le Mataio 24:14.

  • E leai se vaegafai a soo o Iesu i lenei lalolagi amioleaga. E mafai ona e mātauina Kerisiano moni, ona e latou te lē auai i faiga faapolotiki po o feeseeseaʻiga a le lautele. (Ioane 17:16; 18:36) E lē gata i lea, e latou te lē mulimuli i amioga ma uiga leaga o lenei lalolagi.Faitau le Iakopo 4:4.

  • E matilatila Kerisiano moni i le alofa o le tasi i le isi. Ua aʻoaʻoina i latou i le Afioga a le Atua ina ia faaaloalo i tagata eseese. E ui e masani ona lagolago malosi e lotu pepelo faigātaua, ae e lē faia faapea e tagata tapuaʻi moni. (Mika 4:1-3) Nai lo lea, e fiafia Kerisiano moni e faaaogā o latou taimi ma alāmanuia e fesoasoani ma faalaeiau ai i isi.Faitau le Ioane 13:34, 35; 1 Ioane 4:20.

4. Pe e mafai ona e iloa le tapuaʻiga moni?

O lē fea lotu o loo faavae a latou aʻoaʻoga uma i le Afioga a le Atua, faamamaluina le suafa o le Atua, ma faalauiloa atu le Malo o le Atua, e na o le pau lea o le faamoemoe mo tagata? O lē fea lotu e faaalia le alofa ae ʻalofia faigātaua? O le ā sou manatu?Faitau le 1 Ioane 3:10-12.