Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tala Lelei Mai i le Atua!

 Lesona 9

E Faapefea Ona Maua e Lou Aiga le Fiafia?

E Faapefea Ona Maua e Lou Aiga le Fiafia?

1. Aiseā e tāua ai le faaipoipo i le mauaina o se aiga fiafia?

O le tala lelei e mai iā Ieova, le Atua fiafia, o lē e finagalo ina ia maua e aiga le fiafia. (1 Timoteo 1:11) O ia na amataina le faaipoipoga. E tāua tele le faaipoipo faaletulafono, ona e maua ai le fiafia i le aiga, ma se siʻomaga malupuipuia e tausia aʻe ai fanau. E tatau i Kerisiano ona usitaʻia tulafono a le atunuu e tusa ai ma le lesitalaina o faaipoipoga.Faitau le Luka 2:1, 4, 5.

O le ā le silafaga a le Atua i le faaipoipoga? E finagalo o ia ina ia avea o se tuufaatasiga e tumau i le va o le tane ma le avā. E finagalo Ieova i tane ma avā ina ia faamaoni le tasi i le isi. (Eperu 13:4) E ʻinoʻino o ia i talagā faaipoipoga. (Malaki 2:16) Ae e na te faatagaina Kerisiano ina ia tatala le faaipoipoga ma toe faaipoipo, pe afai e mulilua lana paaga.Faitau le Mataio 19:3-6, 9.

2. O le ā le auala e tatau ona feutagaʻi ai le tane ma le avā?

Na foafoaina e Ieova le tamāloa ma le fafine ina ia galulue soosootauʻau i le faaipoipoga. (Kenese 2:18) I le avea ai ma ulu o le aiga, e tatau i le tane ona taulamua i le tausia o lona aiga i le itu faaletino, ma aʻoaʻoina i latou e uiga i le Atua. E tatau ona iā te ia se uiga faataulaga ona o lona alofa i lana avā. E tatau i tane ma avā ona alolofa ma faaaloalo le tasi i le isi. Talu ai e lē lelei atoatoa uma tane ma avā, o lea la, o le taumafai e faaalia le loto faamagalo, o le a maua ai le fiafia i le faaipoipoga.Faitau le Efeso 4:31, 32; 5:22-25, 33; 1 Peteru 3:7.

3. Pe afai ua e lē fiafia i lau faaipoipoga, pe e tatau ona e tuua lau paaga?

Pe a tulaʻi mai ni faafitauli i le va o oulua ma lau paaga, ia taumafai oulua uma e feagai ma le isi i le alofa. (1 Korinito  13:4, 5) E lē o faapea mai le Afioga a le Atua, o le nonofo eseese, o se auala lea e foʻia ai faafitauli masani i le faaipoipoga.Faitau le 1 Korinito 7:10-13.

4. Fanau e, o le ā le finagalo o le Atua mo oe?

E finagalo Ieova ina ia e fiafia. E na te aumaia fautuaga e sili ona lelei i le auala e maua ai le fiafia i lou olaga talavou. O lona finagalo ia e maua aogā mai i le atamai ma le tomai o ou mātua. (Kolose 3:20) E finagalo foʻi Ieova, o Lē na foafoaina oe, ina ia e maua le fiafia mai i le faia o mea mo ia, atoa ai ma lona Alo.Faitau le Failauga 11:9–12:1; Mataio 19:13-15; 21:15, 16.

5. Mātua e, e faapefea ona maua e lau fanau se olaga fiafia?

E tatau ona e galue malosi ina ia saunia meataumafa, fale, ma lavalava mo lau fanau. (1 Timoteo 5:8) Peitaʻi, ina ia maua e lau fanau le fiafia, e tatau foʻi ona e aʻoaʻo i latou ina ia alolofa i le Atua, ma ia aʻoaʻoina ni lesona mai iā te Ia. (Efeso 6:4) O lau faaaʻoaʻoga i le faaalia o le alofa i le Atua, e mafai ona iai se aafiaga tele i le loto o lau tama. Pe a faavae au faatonuga i le Afioga a le Atua, e mafai ona fesoasoani i lau tama ina ia iloa le mea tonu e tatau ona fai.Faitau le Teuteronome 6:4-7; Faataoto 22:6.

E maua e lau fanau aogā, pe a e faalaeiau ma faamālō atu iā i latou. E latou te manaʻomia foʻi faasaʻoga ma aʻoaʻiga. O le faia faapea, o le a puipuia ai i latou mai i amioga e ono mou atu ai le fiafia. (Faataoto 22:15) Peitaʻi, e lē tatau ona avatu aʻoaʻiga i se auala inainā pe sauā.Faitau le Kolose 3:21.

Ua lomia e Molimau a Ieova le tele o tusi e fesoasoani faapitoa ai i mātua ma fanau. E faavae faamatalaga o loo i nei tusi mai i le Tusi Paia.Faitau le Salamo 19:7, 11.

 

Faitau Atili

Faalagolago i le Atua mo se Faaipoipoga Fiafia

E lua ni fesili tāua e mafai ona fesoasoani iā te oe e faaleleia ai lau faaipoipoga.

Le Auala e Foʻia ai Faafitauli

O le saʻo o le auala e taulima ai faafitauli e iloa ai le eseesega o se faaipoipoga malosi ma fiafia mai i se faaipoipoga e vaivai ma leai se fiafia.

Le Auala e Fiafia ai o Tatou Aiga

E mafai e tane, avā, mātua ma fanau ona faaaʻoaʻo i le alofa na faaalia e Iesu. O le ā e tatou te aʻoaʻoina mai iā te ia?