Skip to content

Skip to secondary menu

Skip to table of contents

Molimau a Ieova

Faa-Samoa

Tala Lelei Mai i le Atua!

 Lesona 8

Aiseā ua Lē Taofia ai e le Atua Mea Leaga ma Mafatiaga?

Aiseā ua Lē Taofia ai e le Atua Mea Leaga ma Mafatiaga?

Ua faatagaina e le Atua tagata e pule mo se taimi, ina ia iloa ai e lē mafai e tagata ona aveesea faafitauli

1. Na faapefea ona amata mai le leaga?

Na amata ona iai le leaga i le lalolagi ina ua faia e Satani le uluaʻi pepelo. Sa avea o ia o se agelu e lelei atoatoa, peitaʻi e “leʻi tumau lava o ia i le upu moni.” (Ioane 8:44) Na tuʻinanau o ia i le tapuaʻiga e na o le Atua e tatau ona avatu i ai. Na ia ʻolegia ma faasesēina le uluaʻi fafine o Eva, ma uunaʻia le fafine e usitaʻi iā te ia nai lo o le Atua. Na faatasi atu Atamu i le lē usitaʻi o Eva i le Atua. O le filifiliga a Atamu, na iʻu ai i mafatiaga ma le oti.Faitau le Kenese 3:1-6, 19.

Na uunaʻia e Satani Eva e aua le usiusitaʻi i le Atua, ma ua ia foua ai le pule silisili ese a le Atua, po o lona tulaga o Lē e Silisili Ese. O le toʻatele o tagata ua aufaatasi ma Satani i le teena o le Atua, o ia o le Pule. O lea la, ua avea ai Satani ma “pule o le lalolagi.”Faitau le Ioane 14:30; 1 Ioane 5:19.

2. Pe sa ponā foafoaga a le Atua?

Na lelei atoatoa foafoaga uma a le Atua. Na mafai e tagata ma agelu na foafoaina e le Atua ona usiusitaʻi atoatoa iā te ia. (Teuteronome 32:4, 5) Na foafoaina e le Atua i latou ina ia iai le saʻolotoga e filifili ai, i le faia o le mea e lelei ma le mea e leaga. O lenā saʻolotoga ua tuu mai ai iā i tatou le avanoa, e faaalia ai lo tatou alolofa i le Atua.Faitau le Iakopo 1:13-15; 1 Ioane 5:3.

3. Aiseā ua lē taofia ai e le Atua puapuaga seʻia oo mai i aso nei?

O loo onosaʻi mai pea Ieova i ē e tetee i lana pule silisili ese. Aiseā? Ina ia faaalia ai, e lē taulau pulega a tagata pe a aunoa ma ia. (Failauga 7:29; 8:9) I le mavae ai o le 6,000 tausaga o le talafaasolopito o tagata, ua manino mai ai e lē o mafai e pulega faaletagata ona aveesea  taua, solitulafono, le lē faamasinotonu, ma faamaʻi.Faitau le Ieremia 10:23; Roma 9:17.

E ese mai i pulega faaletagata, o i latou e taliaina le pulega a le Atua o le a maua faamanuiaga. (Isaia 48:17, 18) Ua lē o toe umi ona faaumatia lea e Ieova o faigāmalo uma faaletagata. E na o ē e usiusitaʻi i le pulega a le Atua e tumau pea i lenei lalolagi.—Isaia 11:9.Faitau le Tanielu 2:44.

O a tatou filifiliga, e iloa ai pe e tatou te mananaʻo e avea le Atua ma o tatou Pule

4. O le ā le avanoa ua tatou maua ona o le onosaʻi mai pea o le Atua?

Na taʻutino mai e Satani, e leai se tasi e mafai ona auauna iā Ieova e aunoa ma le alofa lē manatu faapito. Pe e te manaʻo e faamaonia le sesē o lenā manatu? E mafai! O le onosaʻi o le Atua ua tatou maua ai le avanoa e faaalia ai, pe e tatou te mananaʻo i le pule a le Atua po o pulega a tagata. E faailoa atu la tatou filifiliga, e ala i le auala o loo tatou ola ai.Faitau le Iopu 1:8-12; Faataoto 27:11.

5. E faapefea ona tatou filifili e avea le Atua ma Pule?

E mafai ona tatou filifili e avea le Atua ma o tatou pule, e ala i le saʻili ma aʻoaʻoina le tapuaʻiga moni lea e faavae i lana Afioga, le Tusi Paia. (Ioane 4:23) E mafai ona ʻalofia le avea o Satani ma o tatou taʻitaʻi, pe a solitū i faiga faapolotiki ma taua, e pei ona sa faia e Iesu.Faitau le Ioane 17:14.

E faaaogā e Satani lona mana e uunaʻia ai amioga ma faiga lē mamā. O le ʻalofia o nei faiga, e teena ma ulagia ai i tatou e nisi o o tatou tauaiga ma uō. (1 Peteru 4:3, 4) Ua iā i tatou la se filifiliga. Po o le a tatou aufaatasi ea ma ē e alolofa i le Atua? Po o le a tatou usitaʻia ana tulafono atamai ma alofa? O le faia faapea, ua tatou faamaonia ai le pepelo o le tuuaʻiga a Satani, e leai se isi e usitaʻi i le Atua pe a fesagaʻi ma omiga.Faitau le 1 Korinito 6:9, 10; 15:33.

O le alofa o le Atua i tagata, e faamaonia ai o le a ia faamutaina le leaga ma puapuaga. O i latou e talitonu i lenei folafolaga, o le a olioli i le ola e faavavau i le lalolagi.Faitau le Ioane 3:16.

 

Faitau Atili

O Ā AʻOAʻOGA MONI A LE TUSI PAIA

Aiseā ua Lē Taofia ai e le Atua Puapuaga?

E manatu le toʻatele o le Atua ua māfua ai puapuaga uma i le lalolagi. O le ā sou manatu? Iloilo le fetalaiga a le Atua e faatatau i māfuaaga ua tutupu ai puapuaga.