Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 5

Le Togiola—Le Meaalofa Silisili a le Atua

Le Togiola—Le Meaalofa Silisili a le Atua

1, 2. (a) E faapefea ona e iloa le tāua o se meaalofa? (e) Aiseā ua avea ai le togiola o le meaalofa silisili a le Atua?

O LE ā se meaalofa sili na e mauaina? E lē faapea seʻiloga e taugatā le meaalofa ona faatoʻā tāua lea iā te oe. Pe a e fiafia i se meaalofa po o se mea foʻi e sili ona e manaʻomia, e te lagonaina le lotofaafetai.

2 E tele meaalofa ua foaʻiina mai e le Atua iā i tatou. Peitaʻi, e tasi lava le meaalofa e sili ona tatou manaʻomia, o lana meaalofa silisili lea mo tagata. O le a tatou aʻoaʻoina i lenei mataupu, na auina mai e Ieova lona Alo o Iesu Keriso ina ia mafai ai ona tatou ola e faavavau. (Faitau le Mataio 20:28.) O le auina mai o Iesu i le lalolagi o se togiola, ua faamaonia ai e Ieova lona alofa moni mo i tatou.

O LE Ā LE TOGIOLA?

3. Aiseā ua feoti ai tagata?

3 O le togiola, o le auala lea a Ieova e faasaʻoloto ai tagata mai i le agasala ma le oti. (Efeso 1:7) Ina ia malamalama i le māfuaaga e manaʻomia ai le togiola, e tatau ona tatou iloa le mea na tupu i le faitau afe o tausaga ua mavae i le faatoʻaga o Etena. Na agasala o tatou uluaʻi mātua o Atamu ma Eva. Talu ai na la agasala, o le iʻuga, na la feoti ai. E tatou te feoti foʻi ona ua tuufaasolo mai iā i tatou le tulaga agasala o Atamu ma Eva.—Tagaʻi i le Faaopoopoga 9.

4. O ai Atamu, ma o ā mea na foaʻi atu iā te ia?

 4 Ina ua foafoaina e Ieova le uluaʻi tagata o Atamu, na Ia foaʻi atu iā te ia se mea e sili ona tāua, o le ola lelei atoatoa. Sa lelei atoatoa lona mafaufau ma lona tino. Sa lē tatau ona oo iā Atamu le maʻi, le tino matua faapea le oti. Talu ai na foafoaina Atamu e Ieova, na pei ai la Ieova o se tamā iā te ia. (Luka 3:38) Sa masani ona fetalai atu Ieova iā Atamu. Na faailoa manino atu e le Atua iā te ia le mea e na te faatalitalia mai iā te ia, ma tuuina atu galuega e na te faia e maua ai le fiafia.—Kenese 1:28-30; 2:16, 17.

5. O le ā le uiga o le faaupuga i le Tusi Paia, na faia Atamu “i le faatusa o le Atua”?

5 Na faia Atamu “i le faatusa o le Atua.” (Kenese 1:27) Na tuuina e le Atua iā te ia uiga e pei o Ona uiga e aofia ai le alofa, atamai, faamasinotonu ma le malosi. Na ia tuuina atu foʻi iā Atamu le saʻolotoga e filifili ai. E leʻi pei Atamu o se masini e faatonutonu. Na foafoaina o ia e le Atua i se auala e mafai ai ona ia filifili pe fai le mea saʻo po o le mea sesē. Pe ana filifili Atamu e usiusitaʻi i le Atua, semanū o loo ola pea e faavavau o ia i le Parataiso.

6. (a) O le ā na melea e Atamu ina ua lē usiusitaʻi i le Atua? (e) Ua faapefea ona aafia ai i tatou?

6 Ina ua lē usiusitaʻi Atamu i le Atua ma faasalaina o ia i le oti, e matuiā iʻuga na oo i ai. Na ia melea lana faiā faapitoa ma Ieova, lona ola lelei atoatoa, ma le Parataiso lea sa nofo ai. (Kenese 3:17-19) Na filifili Atamu ma Eva e lē usiusitaʻi i le Atua, o lea, e lē iai se faamoemoe mo i laʻua. Ona o le gaoioiga sa faia e Atamu, ua ʻoo mai ai le agasala i le lalolagi, o le oti  foʻi ona o le agasala, ona oo mai ai lea o le oti i tagata uma auā ua agasala uma lava.’ (Roma 5:12) Ina ua agasala Atamu, na ia “faatauina atu” o ia ma i tatou e avea ma pologa i le agasala ma le oti. (Roma 7:14) Pe e iai se faamoemoe mo i tatou? Ioe, na saunia e Ieova le togiola.

7, 8. O le ā le togiola?

7 O le ā le togiola? E lua mea e aofia ai i le togiola. Muamua, o le togiola o se tau lea e totogi e faasaʻolotoina ai se tagata, pe toe faatau mai ai se mea. Lua, o le togiola o se tau e tutusapau ma le tau o le mea lea o loo totogi.

8 E leai se tagata e mafai ona ia faasaʻolotoina i tatou mai i iʻuga mataʻutia ua oo i ai, ina ua agasala Atamu ma tuufaasolo mai ai le oti iā i tatou. Peitaʻi, na saunia e Ieova le auala e faasaʻolotoina ai i tatou mai i le agasala ma le oti. Seʻi o tatou iloiloina po o le ā le tāua o le togiola, ma pe e faapefea ona tatou maua mai ai aogā.

LE AUALA NA SAUNIA AI E IEOVA LE TOGIOLA

9. O le ā e manaʻomia ina ia totogi ai le togiola?

9 E leai se tasi o i tatou e mafai ona totogiina le togiola mo le ola lelei atoatoa lea na melea e Atamu. Aiseā? Talu ai o i tatou uma lava e lē lelei atoatoa. (Salamo 49:7, 8) O le togiola sa tatau ona totogiina, o se isi foʻi ola lelei atoatoa. O le māfuaaga lenā e taʻua ai o le “togiola e fetaui lelei.” (1 Timoteo 2:6) Sa tatau ona tutusa lelei le ola lelei atoatoa e totogi atu, ma le ola lelei atoatoa lea sa melea e Atamu.

10. Na faapefea ona saunia e Ieova le togiola?

 10 Na faapefea ona saunia e Ieova le togiola? Na auina mai e Ieova i le lalolagi lona Atalii e sili ona pele. O lona Atalii lea o Iesu, o ia o lana foafoaga muamua lava. (1 Ioane 4:9, 10) Sa finagalo malie Iesu e tuua lona afioaga i le lagi ma lona Tamā. (Filipi 2:7) Na tuuina e Ieova le ola o Iesu i le manava o Maria, ma fanau mai ai Iesu o se tagata e lelei atoatoa e aunoa ma se agasala.—Luka 1:35.

Na foaʻi mai e Ieova lona Atalii pele o se togiola mo i tatou

11. E faapefea ona avea se tagata se toʻatasi ma togiola mo tagata uma?

11 Ina ua lē usiusitaʻi le uluaʻi tagata o Atamu iā Ieova, na ia melea ai le ola lelei atoatoa mo tagata uma. Pe e mafai e se isi tagata ona aveesea le oti mo i latou uma na tupuga mai iā Atamu? Ioe, e mafai. (Faitau le Roma 5:19.) Na foaʻi e Iesu o lē e leai se agasala, lona ola lelei atoatoa e fai ma togiola. (1 Korinito 15:45) E mafai e lona ola lelei atoatoa ona aveesea ai le oti mo fanau uma a Atamu.—1 Korinito 15:21, 22.

12. Aiseā na tatau ai ona matuā puapuagatia Iesu?

12 O loo faamatalaina i le Tusi Paia le ogaoga o mafatiaga na oo iā Iesu a o leʻi maliu. Na sasa faamoʻamoʻa o ia, tutuʻi i luga o se laau ma onosaia se maliu e sili ona tigā. (Ioane 19:1, 16-18, 30) Aiseā na tatau ai ona matuā puapuagatia Iesu? Talu ai o le faamatalaga a Satani e faapea, e leai se tagata e mafai ona faamaoni pea i le Atua pe a feagai ma tofotofoga ogaoga. Na faamaonia e Iesu e mafai e se tagata lelei atoatoa ona faamaoni pea i le Atua, e tusa lava pe oo iā te ia  mafatiaga e sili ona ogaoga. Seʻi mafaufau i le matuā fiafia o le finagalo o Ieova iā Iesu.—Faataoto 27:11; tagaʻi i le Faaopoopoga 15.

13. O ā mea na aofia ai i le totogiina o le togiola?

13 O ā mea na aofia ai i le totogiina o le togiola? I le 33 T.A. iā Nisani 14 e tusa ai ma le kalena faa-Iutaia, na faatagaina ai e Ieova fili o Iesu e fasiotia o ia. (Eperu 10:10) Ina ua mavae aso e tolu, na toe faatūina Iesu e Ieova, e lē i se tino faaletagata ae i se tino agaga. O le vaega faaiʻu o le totogiina o le togiola, na toe afio ai Iesu i le lagi i le Atua. (Eperu 9:24) Na talia e le Atua le gaoioiga na faia e Iesu, o le foaʻi atu lea o lona ola e fai ma taulaga. Talu ai ua uma ona totogi le togiola, ua tatou maua la le avanoa e saʻoloto ai mai i le agasala ma le oti.—Faitau le Roma 3:23, 24.

O AOGĀ O LE TOGIOLA MO OE

14, 15. O le ā e tatau ona tatou faia ina ia faamagaloina ai a tatou agasala?

14 O lea ua tatou maua aogā mai i le meaalofa silisili a le Atua. Seʻi o tatou iloiloina pe e faapefea ona aogā le togiola iā i tatou i le taimi lenei faapea le lumanaʻi.

15 E faamagaloina a tatou agasala. E faigatā ona tatou faia le mea saʻo i taimi uma, ma i nisi taimi e tatou te faia ai ni faamatalaga ma ni gaoioiga sesē. O ā gaoioiga e manaʻomia ona tatou faia ina ia faamagaloina ai i tatou? E tatau ona tatou salamō moni mai i la tatou gaoioiga sesē ua fai, ma talosaga atu ma le lotomaulalo iā Ieova e faamagalo i tatou.  Pe a faia faapea, ona tatou mautinoa ai lea ua faamagaloina a tatou agasala.—Kolose 1:13, 14; 1 Ioane 1:8, 9.

16. O le ā e tatau ona tatou faia ina ia maua ai se lotofuatiaifo lelei?

16 E tatou te maua se lotofuatiaifo lelei. Pe afai e taʻu mai e o tatou lotofuatiaifo ua tatou faia se gaoioiga sesē, e oo iā i tatou lagona nofosala, ma atonu e lagona foʻi ua leai so tatou faamoemoe ma pei ua leai so tatou aogā. Ae e leai se māfuaaga e tatou te fiu ai. Pe afai e tatou te ōle atu iā Ieova mo le faamagaloga, e tatou te mautinoa o le a ia faafofoga mai ma faamagalo i tatou. (Eperu 9:13, 14) E finagalo Ieova e tatou te talanoa atu iā te ia e faatatau i o tatou faafitauli ma vaivaiga. (Eperu 4:14-16) O le iʻuga, e mafai ona tatou maua ai se lotofuatiaifo lelei i le silafaga a le Atua.—Tagaʻi i le Faaopoopoga 16.

17. O ā faamanuiaga e mafai ona tatou maua ona o le maliu o Iesu mo i tatou?

17 Ua tatou maua le faamoemoe o le ola e faavavau. Ua taʻua i le Roma 6:23: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.” Talu ai na maliu Iesu mo i tatou, e mafai la ona tatou ola e faavavau ma maua le soifua mālōlōina lelei atoatoa. (Faaaliga 21:3, 4) Ae o le ā e tatau ona tatou faia ina ia maua ai na faamanuiaga?

PO O LE A E TALIA LE TOGIOLA?

18. E faapefea ona tatou iloa e alofa Ieova iā i tatou?

18 Seʻi mafaufau i ou faalogona pe a avatu e se tasi iā te oe se meaalofa matagofie. O le togiola o le  meaalofa lea e sili ona tautele, ma e tatau ona tatou matuā lotofaafetai ai iā Ieova. Ua faapea mai le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi.” Ioe, o le alofa tele o Ieova iā i tatou ua ia foaʻi mai ai lona Atalii pele o Iesu. E tatou te iloa foʻi e alofa Iesu iā i tatou, auā na finagalo malie o ia e maliu mo i tatou. (Ioane 15:13) O le meaalofa o le togiola e tatau ona faatalitonuina ai oe, e alofa moni lava Ieova ma Iesu iā te oe.—Kalatia 2:20.

A o tatou aʻoaʻoina mea e faatatau iā Ieova, o le a avea ai i tatou ma ana uō ma faalolotoina ai foʻi lo tatou alofa mo ia

19, 20. (a) E faapefea ona avea oe ma uō a Ieova? (e) E faapefea ona e faaalia le faatuatua i le taulaga togiola a Iesu?

19 O lea la ua e aʻoaʻoina e faatatau i le silisili ese o le alofa o le Atua. Ae e faapefea la ona avea oe ma ana uō? E lē faigofie ona e alofa i se tasi e te lē iloa. Ua faapea mai le Ioane 17:3, e mafai ona tatou iloa Ieova. A o e faia lenei mea, o le a faalolotoina ai lou alofa mo ia, o le a e manaʻo e faafiafia lona finagalo, ma o le a avea oe ma ana uō. O lea, ia faaauau pea ona aʻoaʻoina e faatatau iā Ieova e ala i le suʻesuʻe i le Tusi Paia.—1 Ioane 5:3.

20 Ia faaalia le faatuatua i le taulaga togiola a Iesu. Ua faapea mai le Tusi Paia, “o lē e faatuatua i le Alo e maua e ia le ola e faavavau.” (Ioane 3:36) O le ā le uiga o le faaalia o le faatuatua? O lona uiga, o le faia lea o mea na aʻoaʻoina i tatou e Iesu e fai. (Ioane 13:15) E lē lava le tau ina faapea atu e tatou te talitonu iā Iesu. E tatau ona tatou gaoioi ina ia faamaonia atu lo tatou faatuatua. Ua faapea mai le Iakopo 2:26: “[E] mate le faatuatua pe a leai ni galuega.”

21, 22. (a) Aiseā e tatau ai ona tatou auai i le Faamanatuga o le maliu o Keriso i tausaga taʻitasi? (e) O le ā o le a iloiloina i le Mataupu 6 ma le 7?

 21 Auai i le Faamanatuga o le maliu o Keriso. I le afiafipō a o leʻi maliu Iesu, na ia aʻoaʻoina ai e tatau ona tatou faamanatuina lona maliu. E tatou te faia lenei sauniga i tausaga taʻitasi, ma ua taʻua o le Faamanatuga po o “le talisuaga afiafi a le Alii.” (1 Korinito 11:20; Mataio 26:26-28) E finagalo Iesu ina ia tatou manatua na ia foaʻiina mai lona ola lelei atoatoa o se togiola mo i tatou. Na fetalai o ia: “Ia faia pea lenei mea e fai ma faamanatuga iā te aʻu.” (Faitau le Luka 22:19.) O lou auai i le Faamanatuga, e faaalia ai o loo e manatua le togiola ma le silisili ese o le alofa o Ieova ma Iesu mo i tatou.—Tagaʻi i le Faaopoopoga 17.

22 O le togiola o le meaalofa silisili lea e mafai ona tatou mauaina. (2 Korinito 9:14, 15) O lenā meaalofa tautele, o le a maua ai foʻi e le faitau miliona ua maliliu aogā. O le a iloiloina i le Mataupu 6 ma le 7 pe e faapefea ona tupu lenā mea.