Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

Faaopoopoga

Faaopoopoga

1 IEOVA

O le suafa o le Atua o Ieova, ma e tusa ai ma saʻiliʻiliga ua talafeagai ona faapea atu o le uiga o lenā suafa: “E Gaoioi o Ia e Tusa ai ma Tulaga Manaʻomia.” O Ieova o le Atua e ona le malosi uma lava, ma na ia foafoaina mea uma. E iai iā te ia le mana e faia ai so o se mea e finagalo i ai.

Na tusia le suafa o le Atua i mataʻitusi e fā i le gagana Eperu. I le gagana faa-Peretania, o na mataʻitusi o le YHWH po o le JHVH. E toetoe 7,000 taimi e aliaʻe mai ai le suafa o le Atua i uluaʻi tusitusiga Eperu i le Tusi Paia. E eseese auala e sipelaina ai e tagata i le lalolagi le suafa o Ieova, ma e latou te faaleoina i le auala e masani ona tautatala ai tagata i la latou gagana.

Mataupu 1, palakalafa 15

2 O LE TUSI PAIA “E MAI I LE AGAGA O LE ATUA”

O le Atua o le Tusitala o le Tusi Paia, ae na ia faaaogā tane e tusiaina. E talitutusa lea ma se tagata faipisinisi o loo fai atu i lana failautusi e tusia se tusi, ae o faamatalaga o loo iai o manatu o le tagata faipisinisi. Na faaaogā e le Atua lona agaga paia, e taʻitaʻia ai tane na ia faaaogā e faamauina ona manatu i le Tusi Paia. E eseese auala na taʻitaʻia ai e le agaga o le Atua i latou. O nisi taimi na latou vaaia ai ni faaaliga po o ni miti, ona latou tusia lea o mea na latou vaaia.

Mataupu 2, palakalafa 5

3 MATAUPU SILISILI

O mataupu silisili o aʻoaʻoga ia mai i le Tusi Paia, lea e fesoasoani iā i tatou ina ia faia ai ni filifiliga lelei. O  se faataʻitaʻiga, o le mataupu silisili “o aumea [uō] leaga e faaleagaina ai mea lelei ua masani ai tagata.” E tatou te aʻoaʻoina mai ai, e mafai ona iai se aafiaga lelei po o se aafiaga leaga iā i tatou ona o tagata e tatou te faauō i ai. (1 Korinito 15:33) I le mataupu silisili “o le mea e lūlūina e le tagata, o le mea lava lea e na te seleseleina mai” ua tatou aʻoaʻoina mai ai, e lē mafai ona tatou ʻalofia iʻuga o a tatou gaoioiga.—Kalatia 6:7.

Mataupu 2, palakalafa 12

4 VALOAGA

O se feʻau mai i le Atua, lea e faamatalaina ai lona finagalo, se aʻoaʻoga e faatatau i amioga tatau, poloaʻiga po o se feʻau faafaamasinoga. E mafai foʻi ona faasino atu i se feʻau e faatatau i se mea o le a tupu i le lumanaʻi. E tele valoaga i le Tusi Paia ua uma ona faataunuuina.

Mataupu 2, palakalafa 13

5 VALOAGA E FAATATAU I LE MESIA

E tele valoaga o loo i le Tusi Paia e faatatau i le Mesia, ma na faataunuuina e Iesu na valoaga uma. Tagaʻi i le pusa “ Valoaga e Faatatau i le Mesia.”

Mataupu 2, palakalafa 17, faamatalaga pito i lalo

6 LE FINAGALO O IEOVA MO LE LALOLAGI

Na foafoaina e Ieova le lalolagi e avea o se parataiso e nonofo ai tagata e alolofa iā te ia. E leʻi suia lava le finagalo o Ieova mo le lalolagi. E lē o toe umi ona aveesea lea e le Atua o mea leaga ma foaʻi atu i ona tagata le ola e faavavau.

Mataupu 3, palakalafa 1

 7 SATANI LE TIAPOLO

O Satani le agelu na amataina le fouvalega i le Atua. Ua faaigoaina o ia o Satani o lona uiga “o Lē e tetee,” talu ai e faasagatau o ia iā Ieova. Ua taʻua foʻi o ia o le Tiapolo, o lona uiga “o Lē e taufaaleaga,” talu ai e na te faia talapepelo e faatatau i le Atua ma faasesēina tagata.

Mataupu 3, palakalafa 4

8 AGELU

Ua leva ona foafoaina e Ieova agelu, a o leʻi foafoaina le lalolagi. Na foafoaina agelu e ola i le lagi, ma e silia i le selau miliona i latou. (Tanielu 7:10) E iai o latou igoa ma e eseese o latou uiga. E teena ma le lotomaulalo e agelu faamaoni le tapuaʻi atu o tagata iā i latou. E eseese o latou tulaga ma galuega ua tofia i ai i latou. O nisi o nei galuega e aofia ai le auauna i luma o le nofoālii o Ieova, faaoo atu ana feʻau, puipui ma taʻitaʻia ana auauna o loo i le lalolagi, faaoo mai ana sala faafaamasinoga ma lagolagoina le galuega talaʻi. (Salamo 34:7; Faaaliga 14:6; 22:8, 9) I le lumanaʻi, o le a latou tau faatasi ai ma Iesu i le taua o Amaketo.—Faaaliga 16:14, 16; 19:14, 15.

Mataupu 3, palakalafa 5; Mataupu 10, palakalafa 1

9 AGASALA

O le agasala, e faasino atu i so o se faalogona, mafaufauga po o gaoioiga e tatou te faia e lē fiafia i ai Ieova, pe e lē tusa foʻi ma lona finagalo. Talu ai e faaleagaina e le agasala la tatou faiā ma le Atua, o lea ua ia aumaia ai tulafono ma mataupu silisili e fesoasoani iā i tatou e ʻalofia ai le faia ma le loto i ai o  se agasala. I le amataga, na lelei atoatoa mea uma na foafoaina e Ieova. Ae ina ua filifili Atamu ma Eva e lē usiusitaʻi iā Ieova, na la agasala ai ma e leʻi toe lelei atoatoa i laʻua. Na la ola matutua ma feoti. E tatou te ola matutua foʻi ma feoti, ona ua tuufaasolo mai iā i tatou le agasala mai iā Atamu.

Mataupu 3, palakalafa 7; Mataupu 5, palakalafa 3

10 AMAKETO

O le taua lea a le Atua e faaumatia ai le lalolagi a Satani ma mea leaga uma.

Mataupu 3, palakalafa 13; Mataupu 8, palakalafa 18

11 MALO O LE ATUA

O le Malo o le Atua o se pulega ua faavaeina e Ieova i le lagi. O Iesu Keriso le Tupu o lenā Malo. I le lumanaʻi, o le a faaaogā ai e Ieova le Malo e aveesea mea leaga uma. O le a pule le Malo o le Atua i le lalolagi.

Mataupu 3, palakalafa 14

12 IESU KERISO

Na muamua foafoaina e le Atua Iesu i lo o isi mea uma lava. Na auina mai e Ieova Iesu i le lalolagi ina ia maliu mo tagata uma. Ina ua uma ona fasiotia Iesu, na toe faatūina o ia e Ieova. O loo pule nei Iesu i le lagi o le Tupu o le Malo o le Atua.

Mataupu 4, palakalafa 2

 13 LE VALOAGA E UIGA I VAIASO E FITU SEFULU

Na valoia mai pe muaʻi faailoa mai i le Tusi Paia le taimi e aliaʻe mai ai le Mesia. O le a tupu lenei mea i le faaiʻuga o le vaitaimi e taʻua o vaiaso e 69, lea na amata i le 455 T.L.M. ae faaiʻu i le 29 T.A. *

 E faapefea ona tatou iloa na faaiʻuina lenā vaitaimi i le 29 T.A.? Na amata vaiaso e 69 i le 455 T.L.M., ina ua taunuu Neemia i Ierusalema ma amata ona toe fausia le aai. (Tanielu 9:25; Neemia 2:1, 5-8) E pei lava ona tatou mafaufau i le fuainumera e 12 pe a taʻu le upu “taseni,” e faapena foʻi ona tau o tatou mafaufau i le fuainumera e 7 pe a taʻu le upu “vaiaso.” O vaiaso o loo taʻua i lenei valoaga e lē o uiga atu i vaiaso e taʻi fitu aso le umi, ae e faasino atu i vaiaso e taʻi fitu tausaga le umi, e tusa lea ma le auala e tele ina faitauina ai aso o valoaga i le Tusi Paia e faapea, o “le aso mo le tausaga.” (Numera 14:34; Esekielu 4:6) O lona uiga, e fitu tausaga le umi o vaiaso taʻitasi. Pe a faatele vaiaso e 69 i tausaga e fitu, ona maua ai lea o tausaga e 483. Pe a tatou faitauina la tausaga e 483 e amata mai i le 455 T.L.M., ona taunuu ai lea i le 29 T.A. O le tausaga tonu lava lenā na papatisoina ai Iesu ma avea ai ma Mesia.—Luka 3:1, 2, 21, 22.

I lenei valoaga, na valoia ai foʻi se isi vaiaso, o lona uiga o isi tausaga e fitu. A o faagasolo lenā vaitaimi, e fasiotia ai le Mesia i le 33 T.A., ma e amata i le 36 T.A. ona talaʻia le tala lelei o le Malo o le Atua i atunuu uma ae e lē na o tagata Iutaia.—Tanielu 9:24-27.

Mataupu 4, palakalafa 7

14 LE AʻOAʻOGA SESĒ O LE TOLUTASI

Ua aʻoaʻoina i le Tusi Paia o Ieova le Atua o Lē na foafoaina mea, ma na ia foafoaina muamua Iesu i lo o isi mea uma lava. (Kolose 1:15, 16) O Iesu e lē o le Atua e Ona le malosi uma lava. E leʻi iai se taimi na ia faapea ai e tutusa o ia ma le Atua, auā na ia taʻutino: “E sili le Tamā iā te aʻu.” (Ioane 14:28; 1 Korinito 15:28) E lē o iai i le Tusi Paia le upu “Tolutasi.” Peitaʻi  ua aʻoaʻoina e nisi lotu o le Atua e tolu atua ae e tasi lava i latou: o le Atua o le Tamā, le Alo ma le agaga paia. E sesē lenā aʻoaʻoga.

O le agaga paia o le mana galue lea o le Atua. O lona mana galue lea e lē vaaia, e na te faaaogā e faataunuu ai lona finagalo. E lē o se atua le agaga paia ma e leai se tino. O se faaaʻoaʻoga, na “faatutumuina” uluaʻi Kerisiano “i le agaga paia” ma na fetalai Ieova: ʻOu te liligi ifo loʻu agaga i luga o ituaiga uma o tagata.’—Galuega 2:1-4, 17.

Mataupu 4, palakalafa 12; Mataupu 15, palakalafa 17

15 LE KOLUSE

E lē faaaogāina e Kerisiano moni le koluse pe a tapuaʻi atu i le Atua. Aiseā e latou te faia ai faapea?

  1. Ua leva ona faaaogā le koluse i tapuaʻiga sesē. I taimi anamua sa faaaogā ai i tapuaʻiga i mea faalenatura, ma sauniga faapaupau na faia ai feusuaʻiga. I totonu o le 300 tausaga ina ua mavae le maliu o Iesu, e leʻi faaaogāina e Kerisiano le koluse i la latou tapuaʻiga. Mulimuli ane, na faaaogā ai e le emeperoa o Roma o Konesetatino le koluse e fai ma faailoga o le faa-Kerisiano. Sa faaaogā lenā faailoga ina ia taliagofie ai le faa-Kerisiano, ae e leai ma se fesootaʻiga iā Iesu Keriso. Ua taʻua i le New Catholic Encyclopedia: “Sa faaaogā le koluse i vaitaimi a o lumanaʻi le faa-Kerisiano ma sa faaaogā foʻi e tagata e lē o ni Kerisiano.”

  2.  E leʻi maliu Iesu i luga o se koluse. O upu Eleni ua faaliliuina i le “koluse” o lona uiga “o se laau tū saʻo,” “o se laupapa” po “o se laau.” O loo faamatalaina i le  The Companion Bible: “E leai lava ma se vaega o le [Feagaiga Fou] sa tusia i le gagana Eleni, o taʻua ai ni laupapa se lua.” Na maliu Iesu i se laau tū saʻo.

  3. E lē finagalo Ieova e tatou te faaaogāina ni tupua po o ni faatusa i la tatou tapuaʻiga.—Esoto 20:4, 5; 1 Korinito 10:14.

Mataupu 5, palakalafa 12

16 LOTOFUATIAIFO

O le lotofuatiaifo o se lagona i totonu o i tatou e iloa ai le mea saʻo ma le mea sesē. E mafai ona taʻitaʻia ai i tatou e faia le mea lelei, ma taofia i tatou mai i le faia o mea leaga. Pe a tatou toleniina o tatou lotofuatiaifo ma usiusitaʻi i ai, o le a faatuputeleina ai lo tatou alofa ma lo tatou faatuatua iā Ieova.

Mataupu 5, palakalafa 16; Mataupu 16, palakalafa 15

17 LE FAAMANATUGA

Na faatonuina e Iesu ona soo e faamanatu le Faamanatuga o lona maliu. E latou te faia lenā mea i tausaga taʻitasi iā Nisani 14. O le aso foʻi lea na faamanatuina ai e tagata Isaraelu le Paseka. E faasolo atu i tagata uma e iai i le Faamanatuga le areto ma le uaina, lea e faaāta ai le tino ma le toto o Iesu. O i latou o le a pule faatasi ma Iesu i le lagi, e aai i le areto ma inu i le uaina. Ae o i latou e iai le faamoemoe e ola e faavavau i le lalolagi, e auai ma le faaaloalo i le Faamanatuga, ae e lē aai i le areto pe inuina le uaina.

Mataupu 5, palakalafa 21

 18 AGAGA

I nisi o faaliliuga o le Tusi Paia e pei o le Faaliliuga a le Lalolagi Fou, e eseese mea e faasino atu i ai le upu ua faaliliuina i le “agaga” mai i le gagana Eperu ma le gagana Eleni. Ae o taimi uma e faasino atu ai i se mea e lē mafai ona vaaia e tagata, e pei o le savili po o le ea o loo mānavaina e tagata ma manu. E ono faasino atu foʻi nei upu i tino agaga, ma le agaga paia po o le mana galue o le Atua. E mafai foʻi ona faasino atu le agaga i se uunaʻiga malosi mai i le loto o le tagata, lea e uunaʻia ai o ia e fai atu ni faamatalaga ma gaoioi i se auala patino.—Numera 14:24; Failauga 3:21; Mataio 12:43; Luka 1:17; 11:13.

E talitonu le toʻatele, pe a oti le tagata e iai sona agaga e lē vaaia e ola pea, ma e faaauau pea ona ola i se isi nofoaga e pei o le lagi po o le afi i seoli. E talitonu foʻi nisi e mafai e le agaga o le tagata ua oti, ona fesoasoani pe faia se gaoioiga e lamatia ai ola o tagata o loo soifua pea.

Peitaʻi, e lē o aʻoaʻoga na a le Tusi Paia. O loo taʻua i le Tusi Paia, pe a oti le tagata e leai sona agaga e ola pea, auā ua toe foʻi o ia i le efuefu. Ina ua faailoa mai e Ieova le faasalaga iā Atamu, e leʻi fetalai o ia e alu le agaga o Atamu i se isi nofoaga. Nai lo o lea, na fetalai o ia o le a toe foʻi Atamu i le efuefu lea na faia mai ai o ia, e leai se ola. (Kenese 3:19) E manino le aʻoaʻoga i le Tusi Paia, pe a oti le tagata e na te lē toe iloa se mea. E lē mafai ona ia faia se gaoioiga e afāina ai tagata, pe fesoasoani mai foʻi iā i latou. Nai lo o lea, “e toe foʻi atu o ia i le eleele; e faaumatia i lea lava aso ona manatunatuga.”—Salamo 104:29; 146:4; Failauga 9:5, 6, 10.

Mataupu 6, palakalafa 5; Mataupu 15, palakalafa 17

 19 KENA

O Kena o le igoa o se vanu e lata i Ierusalema na susunu ma faatamaʻia ai lapisi. E lē o iai lava se faamaoniga sa faapuapuagatia pe susunuolaina manu po o tagata i lenei vanu i aso o Iesu. O lea, e lē o faaāta mai e Kena se nofoaga e lē mafai ona vaaia, lea e faapuapuagatia pe susunuina ai e faavavau tagata ua maliliu. Ina ua taʻua e Iesu i latou e lafoina i Kena, sa uiga atu lana fetalaiga i le faaumatiaga atoatoa.—Mataio 5:22; 10:28.

Mataupu 7, palakalafa 20

20 LE TATALO A LE ALII

O le tatalo lea sa faia e Iesu ina ua ia aʻoaʻoina ona soo i le auala e tatalo ai. Ua taʻua foʻi lenā tatalo o le tatalo faaaʻoaʻo. O se faaaʻoaʻoga, na aʻoaʻoina i tatou e Iesu ina ia tatalo e faapea:

  • “Ia faapaiaina lou suafa”

    O loo tatou tatalo ina ia taʻumamāina e Ieova lona suafa mai i pepelo uma, ina ia faamamaluina ai e i latou uma i le lagi ma le lalolagi lona suafa.

  • “Ia oo mai lou malo”

    O loo tatou tatalo ina ia faaumatia e le Malo o le Atua le lalolagi amioleaga a Satani, pule i le lalolagi atoa, ma suia le tulaga o mea i le lalolagi ina ia avea o se parataiso.

  • “Ia faia lou finagalo i le lalolagi”

    O loo tatou tatalo ina ia faataunuuina le finagalo o le Atua mo le lalolagi, ina ia mafai ai e tagata lelei atoatoa ona ola e faavavau i le Parataiso, e pei lava ona finagalo i ai Ieova ina ua ia foafoaina tagata.

Mataupu 8, palakalafa 2

 21 LE TOGIOLA

Na saunia e Ieova le togiola ina ia faasaʻolotoina ai tagata mai i le agasala ma le oti. O le togiola, o le tau lea sa manaʻomia ona totogi ina ia toe maua mai ai le ola lelei atoatoa lea sa melea e le uluaʻi tagata o Atamu, ma toe faaleleia ai le faiā ua faaleagaina i le va o tagata ma Ieova. Na auina mai e Ieova Iesu i le lalolagi ina ia maliu mo tagata agasala uma. Ona o le maliu o Iesu, ua maua ai e tagata uma le avanoa e ola ai e faavavau ma maua le tulaga lelei atoatoa.

Mataupu 8, palakalafa 21; Mataupu 9, palakalafa 13

22 AISEĀ E TĀUA TELE AI LE TAUSAGA 1914?

E tatou te aʻoaʻoina mai i le valoaga o loo i le Tanielu mataupu e 4, sa faavaeina e le Atua lona Malo i le 1914.

Le valoaga: Na faaali atu e Ieova i le tupu o Nepukanesa se miti faavaloaga e faatatau i se laau telē na tātuu i lalo. Sa fusi le pogati o le laau i se fusi uʻamea ma se fusi apamemea, ina ia taofia ai le tupu aʻe o le laau mo se vaitaimi lea e taʻua o “taimi e fitu,” po o tausaga e fitu. Pe a māeʻa lenā vaitaimi ona toe tupu aʻe lea o le laau.—Tanielu 4:1, 10-16.

Le uiga o le valoaga mo i tatou: Ua faaāta mai e le laau le pulega a le Atua. Sa faaaogā e Ieova mo le tele o tausaga ni tupu i Ierusalema, e pule i le nuu o Isaraelu. (1 Nofoaiga a Tupu 29:23) Ae e leʻi tumau pea ona faamaoni na tupu, ma na faamutaina ai a latou pulega. Na faaumatia Ierusalema i le 607 T.L.M., ma o le tausaga lea na amata ai “taimi e fitu.” (2 Tupu 25:1, 8-10; Esekielu 21:25-27) Ina ua fetalai Iesu: ʻE solia Ierusalema e nuu ese seʻia  faataunuuina taimi atofaina o nuu ese,’ na faasino atu o ia i na “taimi e fitu.” (Luka 21:24) O lea, e leʻi faaiʻuina “taimi e fitu” a o iai Iesu i le lalolagi. Na folafola e Ieova o le a ia tofia se Tupu i le faaiʻuga o “taimi e fitu.” O le a aumaia e le pulega a lenei Tupu fou o Iesu, le tele o faamanuiaga mo tagata o le Atua i le lalolagi atoa e oo i le faavavau.—Luka 1:30-33.

Le umi o “taimi e fitu”: E 2,520 tausaga le umi o “taimi e fitu.” Pe a amata ona tatou faitauina tausaga e 2,520 e amata mai i le 607 T.L.M., ona tatou oo ai lea i le tausaga e 1914. O le tausaga lenā na faanofotupu ai e Ieova, Iesu le Mesia e avea ma Tupu o lona Malo i le lagi.

E faapefea ona maua le fuainumera o le 2,520? Ua taʻua i le Tusi Paia o le tolu ma le ʻafa taimi po o tausaga, e tutusa lea ma aso e 1,260. (Faaaliga 12:6, 14) O lea, pe a faaluaina lenā fuainumera ona maua lea o “taimi e fitu” po o aso e 2,520. E tutusa aso e 2,520 ma tausaga e 2,520, ona o le auala e tele ina faitauina ai aso o valoaga i le Tusi Paia e faapea, o “le aso mo le tausaga.”—Numera 14:34; Esekielu 4:6.

Mataupu 8, palakalafa 23

 23 MIKAELE LE AGELU SILI

O le faaupuga “agelu sili,” o lona uiga “o le taʻitaʻi o agelu.” E na o le tasi le agelu sili o loo taʻua i le Tusi Paia, ma o lona suafa o Mikaele.—Tanielu 12:1; Iuta 9.

O Mikaele le Taʻitaʻi o le ʻautau o agelu faamaoni a le Atua. O loo taʻua i le Faaaliga 12:7: ʻO Mikaele ma ana agelu ua tau ma le tarako ma ana agelu.’ O loo faamatalaina i le tusi o Faaaliga o le Taʻitaʻi o le ʻautau a le Atua o Iesu, o lea la, o Mikaele o se isi igoa lea mo Iesu.—Faaaliga 19:14-16.

Mataupu 9, palakalafa 4

24 ASO E GATA AI

E faasino atu lenei faaupuga i le vaitaimi o le a tutupu ai mea iloga i le lalolagi, a o leʻi faaumatia e le Malo o le Atua le lalolagi a Satani. O loo faaaogā foʻi i valoaga o le Tusi Paia isi faaupuga talitutusa, e pei o “le taufaaiʻuiʻuga o le faiga o mea a le lalolagi” ma “le faatasi mai o le Atalii o le tagata,” e faasino atu i lenā lava vaitaimi. (Mataio 24:3, 27, 37) Na amata “aso e gata ai” ina ua amata ona pule le Malo o le Atua i le lagi i le 1914, ma o le a faaiʻuina pe a faaumatia le lalolagi a Satani iā Amaketo.—2 Timoteo 3:1; 2 Peteru 3:3.

Mataupu 9, palakalafa 5

25 TOETŪ

O le upu toetū, e faasino atu i le toe faafoʻisia e le Atua o le ola i se tasi ua maliu. E iva toetū o loo faamauina i le Tusi Paia. Na toe faatutūina e Elia, Elisaia, Iesu, Peteru ma Paulo tagata mai i le oti. Na mafai ona faia nei vavega ona o le mana o le Atua. Ua folafola mai e  Ieova o le a ia toe faatutūina “tagata amiotonu ma tagata amiolētonu” e ola i le lalolagi. (Galuega 24:15) O loo taʻua foʻi i le Tusi Paia se toetū i le lagi. E tupu lenei mea, pe a toe faatutūina e le Atua i le lagi i latou ua ia filifilia, e ola faatasi ai ma Iesu.—Ioane 5:28, 29; 11:25; Filipi 3:11; Faaaliga 20:5, 6.

Mataupu 9, palakalafa 13

26 FAIGA FAATEMONI (FAIGA FAAAGAGA)

O faiga faatemoni po o faiga faaagaga, o se faiga leaga lea o le taumafai e fesootaʻi ma agaga, a lē i se auala tuusaʻo pe auala atu foʻi i se isi tagata e pei o se tasi e faia fofō faataulāitu, o sē e fesootaʻi ma agaga, po o sē e valoia le lumanaʻi. E faia e tagata faiga faaagaga ona e latou te talitonu i le aʻoaʻoga sesē e faapea, pe a feoti tagata e ola pea o latou agaga ma avea o ni agaga malolosi. E taumafai foʻi temoni e taaʻina tagata ina ia lē usiusitaʻi i le Atua. O faiga uma foʻi nei e fesootaʻi atu i faiga faatemoni: saʻili i fetu, faiga faaagaga, faiga faataulāitu, ma talitonuga ma faiga faanuupō. E faaalia nei faiga i le tele o tusi, mekasini, tusi ma faasalalauga i nusipepa e faatatau iā te oe ma lou fetu, ata tifaga, ata, e oo lava i pese. O nei auala ua foliga mai ai e pei e leai se afāina o faiga faataulāitu, temoni ma faiga faaagaga, ma o se mea e fiafia i ai. O le tele o tū ma aga mo maliu e pei o taulaga mo ē ua maliliu, faafiafiaga pe a uma ona teu le maliu, talagā teu ma nisi gaoioiga fai mo le leoleoina o le maliu, e iai foʻi le sootaga i temoni. E tele ina faaaogā e tagata fualaau faasāina, pe a taumafai e faaaogā le mana o temoni.—Kalatia 5:20; Faaaliga 21:8.

Mataupu 10, palakalafa 10; Mataupu 16, palakalafa 4

 27 LE PULE SILISILI ESE A IEOVA

O Ieova o le Atua o Lē e ona le malosi uma lava, ma na ia foafoaina le lagi ma le lalolagi. (Faaaliga 15:3) O le māfuaaga lea ua taʻua ai o ia o Lē e ona mea uma lava, ma e iā te ia le pule atoatoa, e pulea ai ana foafoaga uma. (Salamo 24:1; Isaia 40:21-23; Faaaliga 4:11) Na ia faia tulafono mo mea uma na ia foafoaina. Ua iai foʻi iā te ia le pule e tofia ai isi e avea o ni pule. E tatou te lagolagoina le pule silisili ese a le Atua, pe a tatou alolofa ma usiusitaʻi iā te ia.—1 Nofoaiga a Tupu 29:11.

Mataupu 11, palakalafa 10

28 FAAPAʻŪ TAMA

O le faapaʻū tama o se gaoioiga e faia ma le loto i ai, ina ia oo ai le oti i se pepe e leʻi fanau mai. E lē māfua ona o se faalavelave faafuaseʻi, po o se mea e tupu i totonu o le tino o le tinā. E amata mai lava i le taimi e afuafua ai le pepe, o lenā pepe e lē na o se vaega o le tino o le tinā, ae ua avea o se tagata ola.

Mataupu 13, palakalafa 5

29 TUIGĀTOTO

O se togafitiga faafomaʻi lea e tui ai le toto po o ni vaega autū e fā o le toto o se tagata i se isi tagata, pe auala mai foʻi i paina toto sa teuina. O vaega autū nei e fā o le toto: o le vaega faasuāvai toto, sela mūmū, sela papaʻe ma vaega faatoʻa toto.

Mataupu 13, palakalafa 13

 30 AʻOAʻIGA

I le Tusi Paia, o le upu “aʻoaʻiga” e lē na o faasalaga e faasino atu i ai. Pe a aumaia aʻoaʻiga, e faatonuina, aʻoaʻoina ma faasaʻoina i tatou. E lē agaleaga pe sauā Ieova iā i latou e na te avatu i ai aʻoaʻiga. (Faataoto 4:1, 2) Ua faataatia e Ieova se faaaʻoaʻoga matagofie mo mātua. Ona e tele aogā e maua mai i aʻoaʻiga e aumai e Ieova, e mafai ona faaosofia ai le naunau o le tagata e talia aʻoaʻiga. (Faataoto 12:1) E alofa Ieova i ona tagata ma e na te aʻoaʻoina ma toleniina i latou. E na te aumaia faatonuga e faasaʻo ai o latou manatu sesē, ma fesoasoani ai iā i latou e toleniina o latou mafaufau ma gaoioi i se auala e fiafia i ai lona finagalo. O aʻoaʻiga e avatu e mātua i a latou fanau, e aofia ai le fesoasoani iā i latou e malamalama i māfuaaga e tatau ai ona latou usiusitaʻi. E aofia ai foʻi le aʻoaʻoina o fanau ina ia alolofa iā Ieova, naunau i lana Afioga le Tusi Paia, ma malamalama i mataupu silisili o loo iai.

Mataupu 14, palakalafa 13

31 TEMONI

O temoni o ni agelu leaga. O i latou o ni agaga leaga e lē vaaia, ma e uigaese lo latou malosi. Na avea ma agelu leaga, ina ua latou filifili i latou lava e avea o ni fili o le Atua, e ala i le lē usiusitaʻi iā te ia. (Kenese 6:2; Iuta 6) Na latou aufaatasi ma Satani i lana fouvalega faasaga iā Ieova.—Teuteronome 32:17; Luka 8:30; Galuega 16:16; Iakopo 2:19.

Mataupu 16, palakalafa 4

^ pala. 40 O le T.L.M. o lona uiga o “Tausaga a o Lumanaʻi le Mesia,” a o le T.A. o lona uiga o “Tausaga o le Alii.”