Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 6

O le ā le Tulaga o Ē ua Maliliu?

O le ā le Tulaga o Ē ua Maliliu?

1-3. (a) O ā fesili e tuufesili ai tagata e faatatau i le tulaga o ē ua maliliu? (e) O ā auala ua taliina ai e nisi o lotu na fesili?

UA FOLAFOLA mai i le Tusi Paia e iai le taimi “e lē toe iai se oti. (Faaaliga 21:4) Na tatou aʻoaʻoina i le Mataupu 5, ua mafai ona tatou maua le avanoa e maua ai le ola e faavavau ona o le togiola. Peitaʻi, o loo feoti pea tagata. (Failauga 9:5) O lea, o se tasi lenei o fesili tāua: O le ā le tulaga o ē ua maliliu?

2 E sili ona tāua le tali o lenei fesili pe afai e maliu se tasi e pele iā i tatou. Atonu e tatou te tuufesili: ʻO le ā ua tupu iā te ia? Pe o mafai ona ia vaai mai iā i tatou? Pe e mafai ona ia fesoasoani mai iā i tatou? Po o le a iai se taimi e toe feiloaʻi ai ma ia?’

3 E eseese auala e taliina ai e lotu na fesili. E aʻoaʻo i nisi lotu pe afai e te amiolelei e te alu i le lagi, ae afai e te amioleaga e susunu oe i le afi. O nisi lotu e talitonu pe a e oti ona avea lea o oe ma agaga, ma nonofo faatasi ma ou tuaa ua maliliu. E faapea mai isi lotu pe a e maliu o le a faamasinoina oe, ona e toe fanau mai lea pe toe ola mai i se isi tino atonu o se tagata po o se manu.

4. O le ā le talitonuga e tasi o loo aʻoaʻoina e lotu e faatatau i le tulaga o le tagata pe a oti?

4 E foliga mai e eseese aʻoaʻoga e aʻoaʻo e lotu. Ae e toetoe o lotu uma e aʻoaʻoina se talitonuga e tasi e  faapea: Pe a oti le tagata, e iai sona agaga e ola pea. Pe e moni lenā aʻoaʻoga?

O LE Ā LE TULAGA O Ē UA MALILIU?

5, 6. O le ā le tulaga o ē ua maliliu?

5 E silafia e Ieova le tulaga o ē ua maliliu, ma na ia fetalai pe a oti le tagata e lē toe iai se ola iā te ia. O le oti o le tuufaafeagai o le ola. O lea, pe a oti le tagata e lē iai sona agaga e ola pea i se isi nofoaga, faatasi ma ona manatunatuga ma faalogona. * Pe a tatou feoti, e lē mafai ona tatou toe vāai, faalogo ma mafaufau.

6 Na tusi le tupu o Solomona “o ē ua oti, latou te lē iloa se mea.” E lē toe lagona e i latou ua feoti le alofa po o le ita, ma “e leai se galuega, po o ni fuafuaga, po o le poto, po o le atamai i le Tuugamau.” (Faitau le Failauga 9:5, 6, 10.) O loo faamatalaina foʻi i le Salamo 146:4 pe a oti le tagata, e faaumatia pe uma ai ma “ona manatunatuga.”

LE FETALAIGA A IESU E UIGA I LE OTI

Na foafoaina e Ieova tagata ina ia ola e faavavau i le lalolagi

7. O le ā le fetalaiga a Iesu e uiga i le oti?

7 Ina ua maliu le uō pele a Iesu o Lasalo, na ia fetalai atu i ona soo: “O loo mālōlō [moe] la tatou uō o Lasalo.” E leʻi uiga le fetalaiga a Iesu e faapea o loo mālōlō po o moe Lasalo. Na fetalai atili o ia: “Ua oti Lasalo.” (Ioane 11:11-14) O lea, na faatusa e Iesu le oti i le moe. E leʻi faapea atu o ia o loo i le lagi Lasalo, po o faatasi foʻi ma ona tuaa ua maliliu. E leʻi fetalai foʻi o ia o loo faapuapuagatia Lasalo i le afi, po ua toe  fanau pe toe ola mai i se isi tino atonu o se tagata po o se manu. Na uiga atu lana fetalaiga e faapea e pei lava o loo moe gase Lasalo. I isi mau o le Tusi Paia, o loo faatusaina ai le oti i le moe gase.—Salamo 13:3; Luka 8:52.

8. E faapefea ona tatou iloa e leʻi foafoaina e le Atua tagata ina ia feoti?

8 Pe na foafoaina e le Atua Atamu ma Eva ina ia feoti? E leai. Na foafoaina i laʻua e Ieova e ola e faavavau ma maua le soifua mālōlōina lelei atoatoa. Ina ua foafoaina e Ieova tagata, na ia tuuina iā i latou se  faanaunauga ina ia ola e faavavau. (Failauga 3:11) E lē mananaʻo mātua e vāai atu o mamaʻi ma feoti a latou fanau, ma o faalogona foʻi na o Ieova iā i tatou. Pe afai la na foafoaina i tatou e le Atua e ola e faavavau, aiseā la e tatou te feoti ai?

LE MĀFUAAGA UA MALILIU AI TAGATA

9. Aiseā na talafeagai ai le faatonuga sa avatu e Ieova iā Atamu ma Eva?

9 I le faatoʻaga o Etena, na fetalai atu ai Ieova iā Atamu: “E mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kenese 2:9, 16, 17) E leʻi faigatā ona usitaʻia lenā faatonuga manino, ma na iai le aiā a Ieova e faatonu ai Atamu ma Eva i le mea e lelei ma le mea e leaga. O lo laʻua usiusitaʻi iā Ieova, e faaalia ai lo la faaaloalo i lana pule. E faaalia ai foʻi lo la lotofaafetai mo mea uma ua ia foaʻiina mai mo i laʻua.

10, 11. (a) Na faapefea ona faasesēina e Satani Atamu ma Eva? (e) Aiseā e matuā leai ai lava se faamolemolega mo le gaoioiga na faia e Atamu ma Eva?

10 Ae pagā lea, na filifili Atamu ma Eva e lē usiusitaʻi iā Ieova. Na fai atu Satani iā Eva: “E moni ea na fetalai mai le Atua, e aua neʻi lua aai mai i fua o laau uma o le faatoʻaga?” Na tali mai Eva: “O fua o laau o le faatoʻaga, e mafai ona ma aai ai. A o le fua o le laau o loo i le ogatotonu o le faatoʻaga, na fetalai mai le Atua, ʻAua lava neʻi oulua aai ai, aua foʻi neʻi oulua papaʻi i ai, ina neʻi oulua feoti.’”—Kenese 3:1-3.

11 Ona fai atu lea o Satani: “E lua te lē oti lava. Auā  ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.” (Kenese 3:4-6) Na manaʻo Satani ina ia mafaufau Eva, e mafai e ia lava ona filifili le mea e lelei ma le mea e leaga. I le taimi e tasi, na pepelo Satani e faatatau i le mea e tupu pe a lē usiusitaʻi Eva. Na fai atu o ia e lē oti Eva. O lea, na ʻai ai e Eva le fua o le laau ma avatu i lana tane. Na iloa e Atamu ma Eva na faatonu e Ieova i laʻua e aua le ʻai i le fua o le laau. Ina ua la aai ai, sa la filifili ai e lē usiusitaʻi i le faatonuga manino ma talafeagai na avatu. Na la faaalia ai foʻi le lē faaaloalo i lo la Tamā alofa i le lagi. E matuā leai lava se faamolemolega mo le gaoioiga na la faia.

12. Aiseā o se tulaga e faanoanoa ai le lē usiusitaʻi o Atamu ma Eva iā Ieova?

12 Pagā le faanoanoa ona e leʻi faaalia e o tatou uluaʻi mātua le faaaloalo i Lē na foafoaina i laʻua! O ā ni ou faalogona ae fouvale iā te oe sou alo na e taumafai malosi e tausia aʻe, ma faia gaoioiga e feteenaʻi ma mea na e aʻoaʻoina ai o ia? Pe e te lē lagona ai le matuā faanoanoa?

Na faia Atamu mai i le efuefu, ma na toe foʻi o ia i le efuefu

13. O le ā le uiga o le fetalaiga a Ieova “e te toe foʻi atu lava i le efuefu”?

13 Ina ua lē usiusitaʻi Atamu ma Eva, na la melea ai le avanoa e ola ai e faavavau. Na fetalai Ieova iā Atamu: “Auā o le efuefu oe, e te toe foʻi atu lava i le efuefu.” (Faitau le Kenese 3:19.) O lona uiga o le a toe liu efuefu Atamu, e pei lava e leʻi foafoaina o ia. (Kenese 2:7) Ina ua agasala Atamu, na oti o ia ma e leʻi toe iai lava se Atamu.

14. Aiseā e tatou te feoti ai?

 14 Pe ana faapea na usiusitaʻi Atamu ma Eva i le Atua, semanū o loo la soifua pea e oo mai lava i le taimi nei. Ae ona o lo la lē usiusitaʻi, na la agasala ai ma oo atu ai i le oti. Ua pei le agasala o se faamaʻi mataʻutia na tuufaasolo mai iā i tatou mai i o tatou uluaʻi mātua. O i tatou uma lava e fananau mai o ni tagata agasala, ma o le māfuaaga lenā e tatou te feoti ai. (Roma 5:12) Peitaʻi, e lē o le finagalo lenā o le Atua mo tagata. E leʻi finagalo lava o ia ina ia feoti tagata, ma o loo taʻua i le Tusi Paia le oti o se “fili.”—1 Korinito 15:26.

E TUUSAʻOLOTO I TATOU E LE AʻOAʻOGA MONI E FAATATAU I Ē UA MALILIU

15. Ua faapefea i le aʻoaʻoga moni e faatatau i le tulaga o ē ua maliliu ona tuusaʻoloto ai i tatou?

15 Ua tuusaʻoloto i tatou mai i le tele o manatu sesē, ona o le aʻoaʻoga moni e faatatau i le tulaga o ē ua maliliu. Ua aʻoaʻoina i tatou i le Tusi Paia e faapea, e lē lagona e i latou ua maliliu le tigā po o le faanoanoa. E lē mafai ona tatou talanoa ma i latou, e lē mafai foʻi ona latou talanoa mai iā i tatou. E lē mafai  ona tatou fesoasoani iā i latou, e lē mafai foʻi ona latou fesoasoani mai iā i tatou. E lē mafai ona latou faia se mea e tatou te afāina ai, o lea, e lē tatau ai ona tatou fefefe iā i latou. Peitaʻi ua aʻoaʻoina e le tele o lotu e faapea, o loo ola pea ē ua maliliu i se isi nofoaga, ma e mafai ona tatou fesoasoani iā i latou pe a tatou avatu tupe i patele ma taʻitaʻi lotu. Ae pe a tatou iloa le aʻoaʻoga moni e faatatau i le tulaga o ē ua maliliu, o le a lē faasesēina ai la i tatou i na pepelo.

16. O le ā le aʻoaʻoga sesē o loo aʻoaʻoina i le tele o lotu e faatatau i ē ua maliliu?

16 E faaaogā e Satani lotu sesē e faasesēina i tatou ma manatu ai o loo feola pea ē ua maliliu. O se faataʻitaʻiga, ua aʻoaʻoina e isi lotu pe a tatou feoti, e ola pea o tatou agaga i se isi nofoaga. Po o le mea lenā o loo aʻoaʻoina i lau lotu, pe o aʻoaʻoina ai oe i le faamatalaga a le Tusi Paia e faatatau i ē ua maliliu? E faaaogā e Satani pepelo ina ia liliuese ai tagata mai iā Ieova.

17. E faapefea ona taʻuleagaina Ieova i le aʻoaʻoga e faapea e susunuina tagata i le afi i seoli?

17 E mataʻutia mea o loo aʻoaʻoina e le tele o lotu. O se faataʻitaʻiga, ua aʻoaʻoina e isi lotu e susunu e faavavau tagata leaga i le afi i seoli. O lenā aʻoaʻoga pepelo e taʻuleagaina ai Ieova, auā e lē taitai ona ia faapuapuagatia tagata. (Faitau le 1 Ioane 4:8.) O ā ni ou faalogona pe a faasalaina e se tasi se tamaitiiti e ala i le susunuina o ona lima i se afi? E te manatu e matuā sauā lenā tagata, ma e te lē fia faamasani  foʻi iā te ia. O faalogona tonu lava na e manaʻo Satani e oo iā i tatou e faatatau iā Ieova.

18. Aiseā e lē tatau ai ona tatou fefefe i ē ua maliliu?

18 Ua faapea mai nisi lotu, pe a feoti tagata e avea i latou o ni agaga. E aʻoaʻo e nei lotu, e tatau ona tatou faaaloalo i na agaga ma ia fefefe foʻi iā i latou, auā e mafai ona avea i latou o ni uō malolosi po o ni fili e sili ona leaga. O le toʻatele o tagata e talitonu i lenā aʻoaʻoga pepelo. E latou te fefefe i tagata ua maliliu, o lea, ua latou tapuaʻi atu ai iā i latou pe taumafai e faamalie i latou nai lo o Ieova. Ia manatua, e lē o toe lagona e i latou ua maliliu se mea. O lea la, e lē tatau ona tatou fefefe iā i latou. E tatau ona tatou faamalie le finagalo o Ieova ma tapuaʻi tau lava o ia, auā o ia o Lē na foafoaina i tatou ma o ia o le Atua moni.—Faaaliga 4:11.

19. O le ā le aogā o lo tatou iloaina o le aʻoaʻoga moni e faatatau i le oti?

19 E tuusaʻoloto i tatou mai i aʻoaʻoga sesē a lotu, pe a tatou iloa le aʻoaʻoga moni e faatatau i le oti. O le a fesoasoani lenei aʻoaʻoga moni iā i tatou, ina ia malamalama ai i folafolaga matagofie a Ieova e faatatau i lo tatou olaga ma lo tatou lumanaʻi.

20. O le ā o le a tatou iloiloina i le mataupu o sosoo mai?

20 I aso anamua, na fesili ai Iopu o se auauna a le Atua e faapea: “Pe a oti le tagata, pe e toe ola mai ea o ia?” (Iopu 14:14) Pe e mafai moni lava ona toe ola mai se tagata ua oti? E faaosofia lo tatou naunau i le tali ua saunia mai e Ieova i le Tusi Paia, e faatatau i lea tulaga. O le a tatou iloiloina lenā manatu i le mataupu o sosoo mai.

^ pala. 5 E talitonu nisi tagata pe a oti se tasi, e iai sona agaga e ola pea. Mo nisi faamatalaga tagaʻi i le Faaopoopoga 18.