Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 2

Le Tusi Paia—O le Tusi Mai i le Atua

Le Tusi Paia—O le Tusi Mai i le Atua

1, 2. Aiseā ua avea ai le Tusi Paia o se meaalofa matagofie?

O Ā NI ou faalogona pe a avatu e sau uō se meaalofa iā te oe? E mautinoa lou matuā naunau e tatala lenā meaalofa, ma e te fiafia ona sa mafaufau atu lau uō iā te oe. O lea, e te faafetai atu ai iā te ia mo le meaalofa.

2 O le Tusi Paia o se meaalofa mai i le Atua. O loo aumaia ai faamatalaga e tatou te lē mauaina i se isi lava mea. O se faataʻitaʻiga, o loo taʻu mai ai na foafoaina e le Atua le lagi, le lalolagi faapea le uluaʻi tane ma le fafine. O loo aumaia ai foʻi taʻiala po o mataupu silisili e mafai ona fesoasoani iā i tatou pe a iai ni o tatou faafitauli. E tatou te aʻoaʻoina mai i le Tusi Paia, le auala o le a faataunuuina ai e le Atua lona finagalo ina ia faaleleia le tulaga o mea i le lalolagi. Ioe, o le Tusi Paia o se meaalofa matagofie.

3. O le ā o le a e iloa a o e suʻesuʻeina le Tusi Paia?

3 A o e suʻesuʻeina le Tusi Paia, o le a e iloa ai e finagalo le Atua e avea oe ma ana uō. O le tele o mea e te aʻoaʻoina e faatatau iā te ia, o le atili māfana foʻi lenā o la oulua faiā.

4. O le ā se mea e sili ona mataʻina ai le Tusi Paia iā te oe?

4 Ua faaliliuina le Tusi Paia i le silia ma le 2,800 gagana, ma e faitau piliona kopi ua lomiaina. E faitau piliona tagata i le lalolagi ua mafai ona faitau i le Tusi Paia i a latou lava gagana. I vaiaso taʻitasi, e silia ma le  miliona kopi o le Tusi Paia e tufatufaina i tagata. O le mea moni, e leai ma se tusi e pei o le Tusi Paia.

5. Aiseā e mafai ai ona tatou faapea atu o le Tusi Paia “e mai i le agaga o le Atua”?

5 O le Tusi Paia “e mai i le agaga o le Atua.” (Faitau le 2 Timoteo 3:16.) Peitaʻi e ono manatu nisi, ʻE faapefea ona faapea atu e mai i le Atua le Tusi Paia a o lea sa tusia e tagata?’ O loo aumai le tali i le Tusi Paia: “Na tautatala tagata i mea na faailoa mai e le Atua e ala i le taʻitaʻiga a le agaga paia.” (2 Peteru 1:21) E talitutusa lenei tulaga ma se alii faipisinisi o lē e fai atu i lana failautusi e tusia se tusi, ae o faamatalaga o loo iai o manatu o le alii faipisinisi. O ai e ona manatu o loo tusia i le tusi? O le alii faipisinisi, ae e lē o le failautusi. I se  tulaga tutusa, o Lē e ona le Tusi Paia o le Atua ae e lē o tane na ia faaaogā e tusia. Na taʻitaʻia i latou e le Atua e tusia ona manatu. O le mea moni, o le Tusi Paia “o le afioga a le Atua.”—1 Tesalonia 2:13; tagaʻi i le Faaopoopoga 2.

E SAʻO ATOATOA LE TUSI PAIA

6, 7. Aiseā e tatou te faapea atu ai e lē feteenaʻi faamatalaga o loo i le Tusi Paia?

6 E silia i le 1,600 tausaga na tusia ai le Tusi Paia. E eseese vaitaimi na soifua ai tusitala o le Tusi Paia. O isi sa lelei tulaga tauaʻoaʻoga, ae o isi e leai. O se faataʻitaʻiga, o se tasi o tusitala o se fomaʻi. O isi tusitala o tagata faifaatoʻaga, o faifaiva, o leoleo mamoe, o perofeta, o faamasino ma tupu. E ui lava la e eseese tusitala, ae e leai ma se vaega o le Tusi Paia e feteenaʻi. E lē faapea e ese faamatalaga e aumai i le isi mataupu, ese faamatalaga mai i le isi mataupu. *

7 O loo faamatalaina i le tusi muamua o le Tusi Paia, na foafoaina e le Atua le uluaʻi ulugalii o Atamu ma Eva. Na la fouvale i le Atua, ma o le iʻuga, na la oo atu ai i le soifua matua, maua i maʻi ma oo atu ai i le oti. I le 4,000 tausaga mulimuli ane, na tusia ai e le aposetolo o Ioane le tusi mulimuli o le Tusi Paia. O loo faamatalaina ai le gaoioiga o le a faia e le Atua ina ia toe maua ai e tagata le soifua mālōlōina, le ola e faavavau ma le fiafia. Ua faaalia mai i le Tusi Paia e faataunuuina lava le finagalo o le Atua.

8. Aumai ni faaaʻoaʻoga e faamaonia ai le saʻo atoatoa o faamatalaga faasaienisi o loo i le Tusi Paia.

 8 E leʻi tusia le Tusi Paia ina ia aʻoaʻoina ai le faasaienisi pe avea foʻi o se tusi aʻoga. Peitaʻi, o faamatalaga faasaienisi o loo iai e matuā saʻo atoatoa. O le mea lenā e tatou te faatalitalia i se tusi mai i le Atua. O se faaaʻoaʻoga, o loo iai i le tusi o Levitiko faatonuga a le Atua mo tagata Isaraelu, i auala e taofia ai le pipisi atu o faamaʻi i isi. Ua leva ona iai nei faatonuga i le Tusi Paia, a o leʻi oo ina malamalama tagata i le auala e faatupu ai e siama ma vairusi faamaʻi. E saʻo foʻi le aʻoaʻoga o loo i le Tusi Paia e faapea, e leai se mea o tautau ai le lalolagi. (Iopu 26:7) Na talitonu foʻi le toʻatele e mafolafola le lalolagi, ae ua faapea mai le Tusi Paia o le lalolagi e lapotopoto.—Isaia 40:22.

9. O le ā ua tatou malamalama i ai ona o le faamaoni o tusitala o le Tusi Paia ?

9 Pe a faamatalaina i le Tusi Paia mea na tutupu i le talafaasolopito, e saʻo atoatoa faamatalaga e aumaia ai. Ae o le tele o tusi o le talafaasolopito e lē saʻo atoatoa faamatalaga o loo iai, auā e leʻi faamaoni tusitala na tusiaina. O se faataʻitaʻiga, e latou te leʻi tusia taimi uma na faatoʻilaloina ai o latou nuu i se taua. Ae e ese mai ai tusitala o le Tusi Paia, auā e latou te faamaoni ma tusia faamatalaga uma e oo lava i taimi na faatoʻilaloina ai le nuu o Isaraelu. Sa latou faamauina foʻi o latou masei. O se faataʻitaʻiga, i le tusi o Numera o loo faamatala mai ai e Mose se mea sesē matuiā na ia faia, ma sa aʻoaʻia ai o ia e le Atua. (Numera 20:2-12) O le faamaoni o tusitala o le Tusi Paia ua faaalia manino mai ai, o le Tusi Paia e mai i le Atua ma e mafai ona tatou talitonuina.

 O SE TUSI O LOO IAI LE TELE O FAUTUAGA LELEI

10. Aiseā e aogā ai fautuaga o loo i le Tusi Paia mo i tatou i aso nei?

10 O le Tusi Paia “e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea.” (2 Timoteo 3:16) O le mea moni e aogā fautuaga o loo i le Tusi Paia mo i tatou i aso nei. E silafia e Ieova le auala na foafoaina ai i tatou. O lea, e malamalama o ia i o tatou faalogona faapea le auala e tatou te mafaufau ai. E sili atu lona silafia o i tatou nai lo o i tatou lava, ma e finagalo o ia ina ia tatou fiafia. E na te silafia le mea e lelei ma le mea e leaga mo i tatou.

11, 12. (a) O ā fautuaga lelei a Iesu o loo i le Mataio mataupu e 5 e oo i le 7? (e) O ā isi lesona e mafai ona tatou aʻoaʻoina mai i le Tusi Paia?

11 I le Mataio mataupu e 5 e oo i le 7, e tatou te faitau ai i fautuaga e sili ona lelei a Iesu i le auala e maua ai le fiafia, le auala e faatumauina ai pea ni faiā lelei ma isi, le auala e tatalo ai ma le vaaiga e tatau ona iai i tupe. E ui lava na ia avatu na fautuaga i le pe ā ma le 2,000 tausaga ua mavae, ae o loo telē pea sona aafiaga ma aogā i aso nei.

12 Ua aʻoaʻoina foʻi i tatou e Ieova i le Tusi Paia e faatatau i mataupu silisili, e fesoasoani iā i tatou e maua ai se olaga faaleaiga e sili ona lelei, avea o ni tagata galulue malolosi, ma nonofo ai ma le filemu ma isi. E mafai e mataupu silisili o le Tusi Paia ona fesoasoani iā i tatou i so o se taimi, po o le ā lava lo tatou tulaga, po o fea e tatou te nonofo ai ma po o ā faafitauli o loo tatou fesagaʻia.—Faitau le Isaia 48:17; tagaʻi i le Faaopoopoga 3.

 E MAFAI ONA E TALITONUINA VALOAGA A LE TUSI PAIA

Na valoia e le tusitala o le Tusi Paia o Isaia o le a faatoʻilaloina Papelonia

13. O le ā na valoia e Isaia o le a tupu i le aai o Papelonia?

13 E tele valoaga a le Tusi Paia ua uma ona faataunuuina. O se faaaʻoaʻoga, na valoia e Isaia o le a faatoʻilaloina Papelonia. (Isaia 13:19) Na ia faamatalaina  le auala tonu o le a faatoʻilaloina ai lea aai. Na puipuia le aai i pā tetele ma se vaitafe. Peitaʻi, na valoia e Isaia o le a faapaʻumātūina le vaitafe ma o le a lē tapunia foʻi faitotoʻa o le aai. O le a nofoia le aai e aunoa ma se taua. Sa valoia foʻi e Isaia o le a faatoʻilaloina Papelonia e se tagata e suafa iā Kuresa.—Faitau le Isaia 44:27–45:2; tagaʻi i le Faaopoopoga 4.

14, 15. Na faapefea ona faataunuuina le valoaga a Isaia?

14 I le 200 tausaga mulimuli ane talu ona tusia lenā valoaga, ae taunuu ane loa se ʻautau ua nofosauni e osofaʻia Papelonia. O ai na taʻitaʻia le ʻautau? E pei lava ona valoia, o Kuresa le tupu o Peresia. Ae pe o le a mafai e le ʻautau a Kuresa ona osofaʻia Papelonia, e pei ona valoia e le perofeta o Isaia?

15 I le pō lea na osofaʻia ai le aai, na faia ai se tausamiga a tagata Papelonia. Sa latou manatu na malupuipuia i latou, ona o pā tetele o le aai ma le vaitafe. Ae i fafo atu o le aai, na eli ai e Kuresa ma lana ʻautau se alāvai ina ia faatafe ese ai le vaitafe. Na oo ina papaʻu le vaitafe ma mafai ai loa e fitafita Peresia ona asā  le vai. Ae o le a faapefea ona sao atu lenei ʻautau i pā o Papelonia? E pei lava ona valoia, e leʻi tapunia faitotoʻa o le aai. O lea, na ō atu ai loa le ʻautau ma nofoia le aai e aunoa ma se taua na faia.

16. (a) O le ā na valoia e Isaia e faatatau i le mea o le a oo iā Papelonia? (e) E faapefea ona tatou iloa sa faataunuu le valoaga a Isaia?

16 Sa valoia e Isaia o le a leai lava se tasi e toe nofo i Papelonia mulimuli ane, e ala i le faapea mai: “O le a lē toe ʻainā lenā aai, pe tumau [nonofo] ai i lea tupulaga ma lea tupulaga.” (Isaia 13:20) Pe na taunuu lenā valoaga? I le vaipanoa lea sa iai Papelonia, pe tusa ma le 50 maila (pe ā ma le 80 km) i le itu i saute o Baghdad i Iraq, e na o toega lava o mea o loo iai. E oo mai lava i aso nei, e lē o toe iai se tasi o nofo ai i inā. Na ʻsaluina [tafiesea] e Ieova Papelonia i le salu o le faaumatiaga.’—Isaia 14:22, 23. *

Toega o mea i Papelonia

17. Aiseā e mafai ai ona tatou talitonuina folafolaga uma a le Atua?

17 O le faataunuuga o le tele o valoaga o le Tusi Paia, ua mafai ai ona tatou talitonuina faamatalaga a le Tusi Paia e faatatau i le lumanaʻi. E tatou te mautinoa e faataunuu lava e Ieova lana folafolaga, o le faia lea o le lalolagi ia avea ma parataiso. (Faitau le Numera 23:19.) O le mea moni, ua iā i tatou le faamoemoe o le “ola e faavavau lea na folafola mai i aso anamua e le Atua, e lē mafai ona tala pepelo.”—Tito 1:2. *

 E MAFAI E LE TUSI PAIA ONA SUIA LOU OLAGA

18. O le ā le faamatalaga a Paulo e faatatau i “le afioga a le Atua”?

18 Ua tatou aʻoaʻoina e leai lava se isi tusi e pei o le Tusi Paia. E lē feteenaʻi faamatalaga o loo iai. E saʻo atoatoa foʻi faamatalaga faasaienisi o loo iai faapea faamatalaga e faatatau i le talafaasolopito. E tatou te maua ai foʻi fautuaga lelei ma le tele o valoaga ua uma ona faataunuuina. Peitaʻi, e iai se isi aogā e sili atu o le Tusi Paia. Na tusi le aposetolo o Paulo: “O loo ola le afioga a le Atua ma e matuā malosi foʻi.” O le ā le uiga o lenā faamatalaga?—Faitau le Eperu 4:12.

19, 20. (a) E faapefea ona fesoasoani le Tusi Paia iā te oe, ina ia e iloa ai le ituaiga tagata moni e te iai? (e) E faapefea ona e faaalia le lotofaafetai mo le meaalofa o le Tusi Paia?

19 E mafai e le Tusi Paia ona suia lou olaga. E mafai ona fesoasoani iā te oe ina ia suʻesuʻe ai e oe lava lou tulaga, ma e iloa ai le ituaiga tagata moni e te iai. E mafai foʻi ona fesoasoani iā te oe ina ia e malamalama ai i manatu o loo i lou loto ma ou faalogona moni. O se faataʻitaʻiga, atonu e tatou te manatu e tatou te alolofa i le Atua. Peitaʻi, ina ia faamaonia atu e tatou te alolofa iā te ia, e manaʻomia ona tatou faatatauina mea o loo fai mai ai le Tusi Paia.

20 O le mea moni, o le Tusi Paia o le tusi mai i le Atua. E finagalo o ia ina ia e faitau i ai, suʻesuʻe i ai ma ia avea o se mea e te fiafia i ai. Ia faaalia le lotofaafetai mo lenei meaalofa ma faaauau pea ona suʻesuʻe i ai. O lou faia faapea, o le a e malamalama ai i le finagalo o le Atua mo tagata. I le mataupu o sosoo mai, o le a tatou iloiloina ai isi faamatalaga e faatatau i le finagalo o le Atua.

^ pala. 6 Ua faapea mai isi tagata e feteenaʻi faamatalaga o loo i le Tusi Paia, ae e lē moni lenā manatu. Tagaʻi i Le Olomatamata o Iuni 1, 2012, itulau e 7 ma le Ala Mai! o Aperila 2008, itulau e 25 lomia e Molimau a Ieova.

^ pala. 16 Pe a e fia iloa atili e faatatau i valoaga o le Tusi Paia, e mafai ona e faitau i ai i le Ala Mai! o Iulai 2012, itulau e 20-22; Le Olomatamata o Ianuari 1, 2008, itulau e 22-24, ma le Oketopa 1, 2008, itulau e 3-4 ua lomia e Molimau a Ieova.

^ pala. 17 O le faaumatiaga o Papelonia ua na o se tasi lea o valoaga ua faataunuuina. E te maua faamatalaga i valoaga e faatatau iā Iesu Keriso i le Faaopoopoga 5.

Faitau Atili

TALA LELEI MAI I LE ATUA!

Pe e Saʻo Aʻiaʻi le Tusi Paia?

Afai o le Tusi Paia e mai le Atua, e tatau la ona sili atu i lo o se isi lava tusi.

O AI O LOO FAIA LE FINAGALO O IEOVA I ASO NEI?

Na Faapefea Ona Toe Faafoʻisia Aʻoaʻoga Moni o le Tusi Paia?

E faapefea ona tatou mautinoa o loo iā i tatou le malamalamaga saʻo i mea moni o loo aʻoaʻoina i le Tusi Paia?