Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 8

O le ā le Malo o le Atua?

O le ā le Malo o le Atua?

1. O le ā le tatalo masani o le a tatou iloiloina?

E FAITAU miliona tagata e iloa le tatalo masani ua taʻua o le Tatalo a le Alii. Na faaaogā e Iesu lenei tatalo e aʻoaʻo ai ona soo i le auala e tatalo ai. O ā mea sa ia tatalo ai? Aiseā e tāua ai lenei tatalo iā i tatou i aso nei?

2. O ā vala tāua e tolu na aʻoaʻoina i tatou e Iesu e tatalo ai?

2 Na fetalai Iesu: “Ia faapea ona outou tatalo: ʻLo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.’” (Faitau le Mataio 6:9-13.) Aiseā na aʻoaʻoina ai i tatou e Iesu e tatalo mo na vala e tolu?—Tagaʻi i le Faaopoopoga 20.

3. O le ā e manaʻomia ona tatou iloa e faatatau i le Malo o le Atua?

3 Ua tatou aʻoaʻoina o le suafa o le Atua o Ieova. Na tatou iloiloina foʻi le finagalo o le Atua mo tagata ma le lalolagi. Ae o le ā le uiga o upu a Iesu e faapea: “Ia oo mai lou malo”? O le a tatou iloiloina po o le ā le Malo o le Atua, o mea o le a faia e lenā Malo, ma le auala o le a faapaiaina ai e lenā Malo le suafa o le Atua.

O LE Ā LE MALO O LE ATUA?

4. O le ā le Malo o le Atua, ma o ai le Tupu o lenā Malo?

4 Na faavaeina e Ieova se pulega i le lagi, ma  tofia Iesu e avea ma Tupu o lenā pulega. Ua taʻua i le Tusi Paia lenā pulega o le Malo o le Atua. O Iesu “le Tupu o tupu ma le Alii o alii.” (1 Timoteo 6:15) E sili atu mea lelei e mafai ona faia e Iesu, ma e sili atu lona malosi nai lo o isi pule uma faaletagata.

5. O fea e pule mai ai le Malo o le Atua, ma e pule i le ā?

5 Na toe afio Iesu i le lagi, ina ua mavae aso e 40 talu ona toe faatūina mai o ia. Mulimuli ane, na tofia o ia e Ieova e avea ma Tupu o le Malo. (Galuega 2:33) O le a pule le Malo o le Atua mai i le lagi i le lalolagi. (Faaaliga 11:15) O le māfuaaga lenā ua taʻua ai le Malo o le Atua i le Tusi Paia o le “malo i le lagi.”—2 Timoteo 4:18.

6, 7. Aiseā e sili atu ai Iesu nai lo o se isi lava tupu?

6 Ua taʻua i le Tusi Paia e sili atu Iesu nai lo o se isi lava tupu faaletagata, auā “e na o ia lava e lē mafai ona oti.” (1 Timoteo 6:16) E iai le taimi o le a feoti uma ai pule faaletagata, ae e lē oo lava le oti iā Iesu. E tumau e faavavau mea lelei uma o le a faia e Iesu mo i tatou.

7 Ua taʻua i valoaga o le Tusi Paia o le a avea Iesu o se Tupu e faamasinotonu ma alofa mutimutivale: “O le a oo iā te ia le agaga o Ieova ma tumau ai, o le agaga o le atamai ma le malamalama, o le agaga o le fautuaga ma le mana, o le agaga o le poto ma le mataʻu iā Ieova; e fiafia o ia i le mataʻu iā Ieova. O le a lē faamasino e ia e tusa ma mea e vaai i ai ona mata, e lē aʻoaʻi atu [pe fautua atu]  foʻi e tusa ma mea e faalogo i ai ona taliga. E faamasino e ia ma le amiotonu ē ua faatauvaa [pe matitiva].” (Isaia 11:2-4) Pe e te manaʻo i se tupu faapena?

8. E faapefea ona tatou iloa e iai isi o le a pule faatasi ma Iesu?

8 Ua filifilia e le Atua ni tagata e pule faatasi ma Iesu i le Malo i le lagi. O se faataʻitaʻiga, na faapea atu le aposetolo o Paulo iā Timoteo: “Afai tatou te tumau pea, e tatou te pule faatasi o ni tupu.” (2 Timoteo 2:12) E toʻafia i latou o le a pule faatasi ma Iesu o ni tupu?

9. (a) E toʻafia i latou o le a pule faatasi ma Iesu? (e) O anafea na amata ai ona filifilia i latou e le Atua?

9 E pei ona tatou aʻoaʻoina i le Mataupu 7, na vaaia e le aposetolo o Ioane se vaaiga na ia iloa atu ai Iesu o se Tupu i le lagi faatasi ma isi tupu e toʻa 144,000. O ai nei tupu e 144,000? Ua faamatala e Ioane, o i latou nei ua tusia le “suafa [o Iesu] ma le suafa o lona Tamā i o latou muāulu.” Ua toe faaauau lana faamatalaga: “O i latou foʻi nei ua mulimuli atu i le Tamaʻi Mamoe [o Iesu lea] i mea uma e alu i ai o ia. O i latou ia ua faatauina mai i tagata.” (Faitau le Faaaliga 14:1, 4.) O le 144,000, o Kerisiano faamaoni ia ua filifilia e le Atua, e ʻpule mai o ni tupu i le lalolagi’ faatasi ma Iesu. Pe a maliliu i latou, o le a toe faatutūina aʻe i latou i le lagi. (Faaaliga 5:10) Talu mai le taimi o le ʻauaposetolo, ua filifilia ai e Ieova Kerisiano faamaoni e faia aʻe ai lenā vaega o tupu e 144,000.

10. Aiseā o se fuafuaga alofa ai le filifilia e Ieova o Iesu ma le 144,000 e pule mai i tagata?

 10 O le alofa tele mai o Ieova iā i tatou, na ia filifilia ai tagata e pule faatasi ma Iesu. O le a avea Iesu o se pule lelei ona e malamalama o ia iā i tatou. Talu ai sa soifua Iesu i le lalolagi, e na te silafia lelei la faalogona o se tagata, ma tigā e oo i ai pe a feagai ma mafatiaga. Na faapea mai Paulo e “tigā alofa faatasi [Iesu] ma i tatou i o tatou vaivaiga,” ma “sa tofotofoina o ia i mea uma lava e pei o i tatou.” (Eperu 4:15; 5:8) E malamalama foʻi le 144,000 i tulaga o tagata. Sa latou tauivi foʻi ma le tulaga lē lelei atoatoa ma maʻi. O lea, e mafai ona tatou mautinoa e malamalama Iesu ma le 144,000 i o tatou faalogona, faapea foʻi faafitauli e tatou te fesagaʻia.

O LE Ā O LE A FAIA E LE MALO O LE ATUA?

11. Aiseā na aʻoaʻoina ai e Iesu ona soo e tatalo ina ia faia le finagalo o le Atua i le lagi?

11 Sa aʻoaʻoina e Iesu ona soo e tatalo ina ia faia le finagalo o le Atua i le lagi. Aiseā? Na tatou aʻoaʻoina i le Mataupu 3, sa fouvale Satani le Tiapolo iā Ieova. Ina ua māeʻa lana fouvalega, na faatagaina e Ieova o ia ma agelu lē faamaoni po o temoni, e nonofo ai pea i le lagi mo sina taimi. O lea, e lē o i latou uma i le lagi sa faia le finagalo o le Atua. I le Mataupu 10, o le a tatou aʻoaʻoina atili ai e faatatau iā Satani ma temoni.

12. O ā mea tāua e lua na tutupu o loo faamatalaina i le Faaaliga 12:10?

 12 O loo faamatalaina i le Tusi Paia e leʻi umi ona avea Iesu ma Tupu o le Malo o le Atua, ae agaʻi atu loa e tau ma Satani. (Faitau le Faaaliga 12:7-10.) O loo taʻua i le fuaiupu e 10 ni mea tāua se lua na tutupu. Muamua, ua amata ona pule le Malo o le Atua lea o loo avea ai Iesu Keriso ma Tupu. Lua, ua lafo ese Satani mai i le lagi i le lalolagi. Mulimuli ane, o le a tatou iloiloina ai ua māeʻa ona tutupu nei mea.

13. O le ā na tupu i le lagi ina ua lafo ese Satani?

13 Ua faamatalaina i le Tusi Paia le olioli o agelu faamaoni, ina ua lafo ese Satani ma ana temoni mai i le lagi. Ua faapea mai le Faaaliga 12:12: ʻIa olioli le lagi ma outou o loo nonofo ai!’ O le taimi la lenei, ua iai le filemu atoatoa ma le autasi i le lagi, talu ai ua faia e i latou uma le finagalo o le Atua.

Ua faateteleina mafatiaga i le lalolagi talu mai le taimi na lafo ese ai Satani ma ana temoni mai i le lagi. E lē o toe umi ona faamuta lea o nei mafatiaga

14. O le ā ua tupu i le lalolagi talu ona lafo ese Satani mai i le lagi?

14 Peitaʻi, e matuā ese lava le tulaga o loo iai le lalolagi. E mataʻutia mea o loo tutupu i tagata ʻauā ua alu ifo le Tiapolo’ ma “ua lotoa [ita] tele, auā ua na iloa ua puupuu lona taimi.” (Faaaliga 12:12) Ua matuā ita Satani. Ua lafo ese o ia mai i le lagi, ma ua ia iloa e lē o toe umi ona faaumatia lea o ia. O lea, ua ia faia ai taumafaiga uma e faatupuina ai faafitauli, tigā ma mafatiaga i le lalolagi atoa.

15. O le ā le finagalo o le Atua mo le lalolagi?

 15 Peitaʻi, e lē o suia ai lava le finagalo o le Atua mo le lalolagi. O loo finagalo pea o ia ina ia ola e faavavau tagata lelei atoatoa, i le lalolagi parataiso. (Salamo 37:29) E faapefea la ona faataunuuina e le Malo o le Atua lenei mea?

16, 17. O le ā ua faailoa mai i le Tanielu 2:44 e faatatau i le Malo o le Atua?

16 O loo taʻua i le valoaga i le Tanielu 2:44: “O aso o ia tupu, o le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.” O le ā e tatou te aʻoaʻoina mai i lenei valoaga e faatatau i le Malo o le Atua?

17 Muamua, ua taʻu mai ai o le a amata ona pule le Malo o le Atua i “aso o ia tupu.” O lona uiga, na amata ona pule le Malo o le Atua a o pule pea isi malo i le lalolagi. Lua, ua taʻu mai ai o le a tumau pea e faavavau le Malo o le Atua, ma e leai se isi faigāmalo e mafai ona suitulaga i ai. O le manatu lona tolu, ua faailoa mai ai o le a iai le taua i le va o le Malo o le Atua ma malo o lenei lalolagi. O le a manumalo le Malo o le Atua ma avea ai ma malo e tasi e pule i le lalolagi, ona faatoʻā mafai ai lea ona maua e tagata le malo e sili ona lelei.

18. O le ā le igoa o le taua faaiʻu i le va o le Malo o le Atua ma malo o lenei lalolagi?

18 O le ā o le a tupu a o leʻi amata le taua i le va  o malo o lenei lalolagi ma le Malo o le Atua? O le a faasesēina e temoni “tupu o le lalolagi uma, e faapotopoto i latou i le taua o le aso tele o le Atua o Lē e ona le malosi uma lava.” O le mea moni, o le a faasagatau malo o lenei lalolagi i le Malo o le Atua, ae o le a manumalo le Malo o le Atua. O lenei taua faaiʻu e taʻua o Amaketo.—Faaaliga 16:14, 16; tagaʻi i le Faaopoopoga 10.

19, 20. Aiseā e tatou te manaʻomia ai le Malo o le Atua e pule i le lalolagi?

19 Aiseā e tatou te manaʻomia ai le Malo o le Atua? O nisi nei o māfuaaga e tolu. Muamua, o i tatou o tagata agasala. O lea, e tatou te mamaʻi ai ma feoti. Ae ua taʻua i le Tusi Paia, o le a tatou ola e faavavau i le pulega a le Malo o le Atua. O le mea moni lenā, auā ua faapea mai le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”

20 O le māfuaaga lona lua, ona o loo siʻomia i tatou i tagata amioleaga. O le toʻatele e talapepelo, taufaaʻoleʻole ma ola i ni olaga lē mamā taufeusuaʻiga. E leai se mea e mafai ona tatou faia e aveese ai i latou, ae o le a mafai ona faia faapea e le Atua. O i latou e faaauau pea ona faia mea leaga, o le a faaumatia iā Amaketo. (Faitau le Salamo 37:10.) O le māfuaaga lona tolu e  tatou te manaʻomia ai le Malo o le Atua, ona e lē taulau pulega a malo faaletagata, e sauā ma faapiʻopiʻo. E latou te lē o naunau e fesoasoani i tagata ina ia usiusitaʻi i le Atua. Ua taʻua i le Tusi Paia ʻua pule le tagata i le isi tagata ma ua matuā afāina ai o ia.’—Failauga 8:9.

21. O le a faapefea ona faamautinoa e le Malo o le Atua ua faia le finagalo o le Atua i le lalolagi?

21 Pe a uma Amaketo, ona faamautinoa lea e le Malo o le Atua ua faia le finagalo o le Atua i le lalolagi. O se faataʻitaʻiga, o le a aveesea e le Malo o le Atua Satani ma ana temoni. (Faaaliga 20:1-3) O le a lē toe iai se tasi e maʻi pe oti. O le a mafai e tagata faamaoni uma ona ola e faavavau i le Parataiso  ona o le togiola. (Faaaliga 22:1-3) O le a faapaiaina e le Malo o le Atua le suafa o le Atua. O le ā le uiga? O lona uiga pe a pule le Malo o le Atua i le lalolagi, o le a faamamaluina e tagata uma le suafa o Ieova.—Tagaʻi i le Faaopoopoga 21.

O ANAFEA NA AVEA AI IESU MA TUPU?

22. E faapefea ona tatou iloa e leʻi avea Iesu ma Tupu a o iai i le lalolagi, po o le taimi lava na toe afio ai i le lagi?

22 Na aʻoaʻo e Iesu ona soo e tatalo: “Ia oo mai lou malo.” E manino mai la, e faatoʻā oo mai le Malo o le Atua i le lumanaʻi. E faavae muamua e Ieova lona malo, ma tofia Iesu e avea ma Tupu o  lenā Malo. Pe na avea Iesu ma Tupu i le taimi lava na toe afio ai i le lagi? E leai. Sa tatau ona ia faatali. Ina ua mavae sina taimi talu ona toe faatūina mai Iesu, na faamanino mai e Peteru ma Paulo lenei manatu ina ua la faasino atu le valoaga i le Salamo 110:1 iā Iesu. I le valoaga, na fetalai ai Ieova: “Ia e nofo i loʻu itu taumatau seʻia ou faia ou fili ma mea e tū ai ou vae.” (Galuega 2:32-35; Eperu 10:12, 13) O le ā le umi e tatau ona faatali ai Iesu, ona faatoʻā fai lea o ia e Ieova ma Tupu?

O le a faamautinoa e le Malo o le Atua ua faia le finagalo o le Atua i le lalolagi

23. (a) O anafea na amata ai ona pule Iesu o le Tupu o le Malo o le Atua? (e) O le ā o le a tatou aʻoaʻoina i le mataupu o sosoo mai?

23 Mo le tele o tausaga a o leʻi oo i le 1914, sa malamalama se vaega o Kerisiano faamaoni, o lenā tausaga o se tausaga tāua i valoaga o le Tusi Paia. O mea na tutupu i le lalolagi talu mai le 1914, ua faamaonia ai le saʻo o nei Kerisiano faamaoni. Na amata ona pule Iesu o se Tupu i lenā tausaga. (Salamo 110:2) E leʻi umi talu ona pule Iesu o se Tupu, ae lafo mai Satani i le lalolagi ma “ua puupuu lona taimi.” (Faaaliga 12:12) I le mataupu o sosoo mai, o le a tatou iloiloina ai nisi faamaoniga o loo tatou ola i lenā taimi. O le a tatou aʻoaʻoina ai foʻi, e lē o toe umi ona faamautinoa lea e le Malo o le Atua ua faia le finagalo o le Atua i le lalolagi.—Tagaʻi i le Faaopoopoga 22.