Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 1

O Ai le Atua?

O Ai le Atua?

1, 2. O ā fesili e masani ona fesili ai tagata?

E TELE fesili e faia e tamaiti. Atonu e te faamalamalama atu iā i latou se mea, ae e masani ona latou fesili mai, ʻO le ā le māfuaaga?’ Pe a e taumafai foʻi e avatu se tali, atonu e latou te toe fesili mai ʻAiseā?’

2 E tusa pe e tatou te matutua pe lāiti, ae o i tatou uma lava e tuufesili i lea mea ma lea mea. Atonu e tatou te fesili po o ā a tatou mea e ʻai, o ofu e fai, ma po o ā mea e faatau. Pe atonu foʻi e iai ni a tatou fesili tāua e faatatau i le olaga ma le lumanaʻi. Peitaʻi, a tatou lē maua ni tali faamalieloto i nei fesili, atonu o le a tatou lē toe saʻili loa mo ni tali.

3. Aiseā e manatu ai le toʻatele e lē mafai ona latou maua tali i a latou fesili tāua?

3 Pe e maua i le Tusi Paia tali o fesili tāua o loo tatou saʻilia? Ua faapea mai nisi atonu e maua i le Tusi Paia tali o a latou fesili tāua. Peitaʻi, e latou te manatu e faigatā tele ona malamalama i le Tusi Paia. E latou te ono manatu e na o faiaʻoga po o taʻitaʻi lotu e maua ai tali i na fesili. E matamumuli foʻi isi e taʻutino mai e latou te lē iloa tali i na fesili. Ae o le ā sou manatu?

4, 5. (a) O ā ni fesili tāua o loo e fia maua ni tali? (e) Aiseā e tatau ai ona e saʻili pea mo tali i na fesili?

4 Atonu e te manaʻo e maua tali o fesili e pei o le:  Pe e iai se fuafuaga o le olaga? O le ā e tupu i tagata pe a feoti? O ā uiga o le Atua? Na fetalai le Faiaʻoga taʻutaʻua o Iesu: “Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou.” (Mataio 7:7) Aua e te fiu, ae ia saʻili pea seʻia oo ina e maua tali e mafai ona e talitonuina.

5 O le mea moni pe afai e te “saʻili atu pea,” o le a e maua tali i le Tusi Paia. (Faataoto 2:1-5) E lē faigatā tele ona malamalama i nei tali. O mea e te aʻoaʻoina o le a e maua ai se olaga e sili ona fiafia i le taimi lenei, faapea se faamoemoe matagofie mo le lumanaʻi. Seʻi o tatou iloiloina nei se tasi o fesili e lē o malamalama i ai le toʻatele.

PO O SILASILA ALOFA MONI MAI LE ATUA?

6. Aiseā e manatu ai nisi tagata e lē o silasila alofa mai le Atua i o latou mafatiaga?

6 E manatu le toʻatele, e lē o silasila alofa mai le Atua iā i tatou. E latou te manatu, pe ana alofa mai le Atua semanū e ese le tulaga o le a iai le lalolagi. Peitaʻi o loo iai le tele o faigātaua, le feitagaʻi ma mafatiaga. E faasolo ina mamaʻi tagata, puapuagatia ma feoti ai. E manatu nisi, ʻPe afai e silasila alofa mai le Atua iā i tatou, aiseā la ua ia lē taofia ai nei mafatiaga?’

7. (a) Ua faapefea ona aʻoaʻo e taʻitaʻi lotu tagata e manatu e sauā le Atua? (e) Aiseā e tatou te mautinoa ai e lē tuuaʻia le Atua mo mea leaga o loo tutupu?

7 O nisi taimi e faatalitonu ai e taʻitaʻi lotu  tagata e manatu e sauā le Atua. Pe a iai se mea leaga e tupu, e latou te faapea mai o le finagalo lea o le Atua. E tusa ua latou tuuaʻia le Atua. Peitaʻi, o loo aʻoaʻoina i le Tusi Paia e lē o le Atua le pogai o mea leaga. Ua faapea mai le Iopu 34:12: “E lē faia e le Atua se mea leaga.” O lona uiga, e ui lava o loo silafia e le Atua mea leaga o loo tutupu, ae e na te lē faatupuina na mea leaga. O lea, e na te lē tofotofoina i tatou i mea leaga. (Faitau le Iakopo 1:13.) Seʻi fai se faataʻitaʻiga.

8, 9. Aiseā e lē saʻo ai le tuuaʻia o le Atua i o tatou faafitauli? Aumai se faataʻitaʻiga.

8 Seʻi faapea o loo nonofo faatasi se alii talavou ma ona mātua. E matuā alofa lava lona tamā iā te ia, ma sa aʻoaʻoina foʻi o ia i le auala e faia ai filifiliga lelei. Peitaʻi, ua fouvale le atalii i lona tamā ma tuua lona aiga. Ua ia faia mea leaga ma ua oo ai faafitauli iā te ia. Pe e te tuuaʻia le tamā i le mea ua tupu i lona atalii, ona o lona lē taofia o ia mai i le tuua o le aiga? E mautinoa e leai. (Luka 15:11-13) I le pei o le tamā, e leʻi taofia foʻi e le Atua tagata ina ua latou filifili e fouvale iā te ia ma faia mea leaga. O lea, pe a tupu se mea leaga, e tatau ona tatou manatua e lē o le Atua na faatupuina. E lē saʻo le tuuaʻia o le Atua i na mea.

9 E iai se māfuaaga e sili ona tāua ua lē taofia ai e le Atua le tutupu o mea leaga. I le Mataupu 11, o le a e aʻoaʻoina ai faamatalaga a le Tusi Paia e faatatau i lea manatu. Ae ia e mautinoa e alofa le Atua  iā i tatou, ma e lē tuuaʻia o ia i o tatou faafitauli. O le mea moni, e na o ia lava e mafai ona foʻia na faafitauli.—Isaia 33:2.

10. E faapefea ona tatou mautinoa o le a faaleleia e le Atua mea leaga uma ua faia e tagata leaga?

10 E paia le Atua. (Isaia 6:3) O lona uiga, o mea uma e na te faia e lelei atoatoa, e mamā ma lelei. O lea, e mafai ona tatou talitonu atoatoa iā te ia. Ae e lē faapena tagata, auā e iai taimi e latou te faia ai mea sesē. E oo lava i se pule e sili ona faamaoni, e leai sona malosi e faaleleia ai mea leaga uma ua faia e tagata leaga. E leai se tasi e iai sona mana e pei o le Atua. E mafai ona faaleleia e le Atua mea leaga uma ua faia e tagata leaga, ma e mautinoa o le a ia faia faapea. O le a ia aveesea atoatoa mea leaga uma.—Faitau le Salamo 37:9-11.

O Ā FAALOGONA O LE ATUA PE A MAFATIA TAGATA?

11. O ā faalogona o le Atua e faatatau i ou mafatiaga?

11 O ā faalogona o le Atua pe a silasila mai i mea o loo tutupu i le lalolagi, faapea mea o loo e fesagaʻia? Ua faapea mai le Tusi Paia, “e fiafia [le Atua] i le faamasinogatonu.” (Salamo 37:28) O lea, e tāua tele i le silafaga a le Atua le mea saʻo ma le mea sesē. E lē fiafia o ia pe a mafatia tagata. Ua faapea mai le Tusi Paia, i aso anamua ʻna tigā lona finagalo’ ina ua ia silasila mai i le lalolagi ua tumu i le amioleaga. (Kenese 6:5, 6) E lē fesuisuiaʻi pe liliu le Atua. (Iakopo 1:17) O loo  faapea mai foʻi le Tusi Paia, e manatu mamafa pe silasila alofa mai le Atua iā te oe.—Faitau le 1 Peteru 5:7.

Ua aʻoaʻoina i le Tusi Paia o Ieova e alofa ma o Lē na foafoaina le lagi ma le lalolagi

12, 13. (a) Aiseā e tatou te alolofa ma manatu mamafa ai i isi? (e) O ā ni o tatou faalogona e faatatau i mafatiaga o tagata i le lalolagi? (i) Aiseā e mafai ai ona tatou mautinoa o le a aveesea e le Atua mafatiaga ma faiga lē tonu uma?

12 Ua faapea mai foʻi le Tusi Paia na faia i tatou e le Atua i lona faatusa. (Kenese 1:26) O lona uiga, na foafoaina i tatou e le Atua ma tuuina iā i tatou uiga lelei e pei o ona uiga. Pe afai la e te faanoanoa ona o mea leaga o loo tutupu i tagata lelei, e mautinoa lava e sili atu le faanoanoa o Ieova pe a ia silasila mai i na tulaga. E faapefea ona tatou iloa e moni lea manatu?

13 Ua tatou aʻoaʻoina mai i le Tusi Paia, “o le Atua o le alofa lava ia.” (1 Ioane 4:8) O so o se mea lava e faia e le Atua, e māfua ona o le alofa. E tatou te alolofa ona e alofa foʻi le Atua. Seʻi mafaufau i le tulaga lenei: Pe ana iai se mana iā te oe, pe e te aveesea mafatiaga ma faiga lē tonu uma o loo i le lalolagi? E mautinoa e te faia faapea, ona e te alofa i tagata. Ae faapefea la le Atua? E iai lona mana, ma ona o lona alofa iā i tatou, o le a ia aveesea ai mafatiaga ma faiga lē tonu uma o loo iai. E mafai ona e mautinoa e faataunuuina folafolaga uma lava a le Atua, o loo taʻua i le amataga o lenei tusi. Ae ina ia mafai ona e talitonuina nei folafolaga, e manaʻomia ona e iloa atili e faatatau i le Atua.

 E FINAGALO LE ATUA INA IA E ILOA O IA

Pe a fia avea oe ma uō a se tasi, e te taʻu atu iā te ia lou igoa. Ua faailoa mai e le Atua iā i tatou lona suafa i le Tusi Paia

14. O ai le suafa o le Atua, ma e faapefea ona tatou iloa e tatau ona tatou faaaogāina?

14 Pe a fia avea oe ma uō a se tasi, o le ā le mea e masani ona e taʻu muamua atu iā te ia? O lou igoa. Pe e iai se suafa o le Atua? O le tele o lotu e fai mai o lona suafa o le Atua po o le Alii, peitaʻi e lē o ni suafa na o le Atua. O mea na e pei o ni faalupega po o taʻu, e pei o le “tupu” po o le “palemia.” Ua uma ona faailoa mai e le Atua o lona suafa o Ieova. Ua faapea mai le Salamo 83:18: “Ina ia iloa ai e tagata o oe e ou le suafa o Ieova, e na o oe lava o Lē e Silisili Ese i le lalolagi uma.” E sili atu ma le 7,000 taimi na faaaogā ai e tusitala o le Tusi Paia le suafa o le Atua. E finagalo Ieova ina ia e iloa lona suafa ma faaaogā. Ua ia faailoa mai iā te oe lona suafa ina ia mafai ai ona avea oe ma ana uō.

15. O le ā le uiga o le suafa o le Atua, o Ieova?

15 E iai se uiga loloto o le suafa o le Atua, o  Ieova. O le suafa Ieova o lona uiga, e mafai e le Atua ona faataunuu ana folafolaga uma, ma e mafai ona ia faataunuu lona finagalo. E leai se mea e mafai ona taofia o ia mai i le faia faapea. E na o Ieova e ona lenei suafa. *

16, 17. O le ā le uiga o le faaupuga (a) “Lē e ona le malosi uma lava”? (e) “Tupu o le vavau”? (i) “Lē na foafoaina mea uma lava”?

16 E pei ona taʻua i se palakalafa ua muamua atu, ua faapea mai le Salamo 83:18 e faatatau iā Ieova: “E na o oe lava o Lē e Silisili Ese.” O loo iai foʻi i le Tusi Paia isi faalupega e na o Ieova e faasino atu i ai. O se faataʻitaʻiga, ua faapea mai le Faaaliga 15:3: “Ieova e, le Atua, o Lē e ona le malosi uma lava, e mataʻina ma ofoofogia au galuega. E tonu ma faamaoni ou ala, le Tupu o le vavau e.” O le ā le uiga o le faalupega “Lē e ona le malosi uma lava”? O lona uiga, e sili atu le malosi o Ieova nai lo o se isi lava i le lagi ma le lalolagi. Ae o le faalupega “Tupu o le vavau,” o lona uiga e leai se amataga o Ieova. Ua faapea mai le Salamo 90:2, o ia e mai i le vavau e oo i le faavavau. Maʻeu le ofoofogia o lenā tulaga!

17 E na o Ieova o Lē na foafoaina mea uma lava. Ua faapea mai le Faaaliga 4:11: “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea  uma lava, ma o lou finagalo foʻi ua iai nei mea ma na foafoaina ai.” Ioe, na foafoaina e Ieova mea uma lava e pei o agelu, fetu, fua o laau ma iʻa o le sami.

PE E MAFAI ONA AVEA OE MA UŌ A IEOVA?

18. (a) Aiseā atonu e manatu ai nisi tagata e lē mafai ona avea i latou ma uō a le Atua? (e) O le ā le faamatalaga a le Tusi Paia e faatatau i lenā manatu?

18 Pe a faitau isi tagata i uiga ofoofogia o Ieova,  e latou te fefefe ma manatu e faapea, ʻE malosi tele le Atua, e mamalu tele ma e mamao ese o ia. Aiseā la o le a ia silasila alofa mai ai fua iā te aʻu?’ Ae po o le auala lenā e finagalo le Atua e tatou te mafaufau ai? E leai. E finagalo o ia ina ia mafuta vavalalata mai iā i tatou. Ua faapea mai le Tusi Paia “e lē o mamao [le Atua] mai iā i tatou taʻitoʻatasi.” (Galuega 17:27) E finagalo le Atua ina ia e mafuta vavalalata atu iā te ia, ma ua ia folafola mai o le a ia ʻmafuta vavalalata mai iā te oe.’—Iakopo 4:8.

19. (a) O le ā e tatau ona e faia ina ia avea ai oe ma uō a le Atua? (e) O le ā le uiga o Ieova e sili ona e fiafia i ai?

19 O le ā e tatau ona e faia ina ia avea ai oe  ma uō a le Atua? Na fetalai Iesu: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.” (Ioane 17:3) Ia faaauau pea ona e aʻoaʻoina e faatatau iā Ieova ma Iesu, ona e iloa ai lea o mea e uiga iā i laʻua. O se faaaʻoaʻoga, ua uma ona tatou aʻoaʻoina “o le Atua o le alofa lava ia.” (1 Ioane 4:16) Peitaʻi, e tele foʻi isi uiga matagofie o Ieova. Ua faapea mai le Tusi Paia o Ieova “e alofa mutimutivale ma alofa fua, e telegese lona toʻasā ae e tele lona alofa faamaoni ma fai mea moni.” (Esoto 34:6) ʻE lelei Ieova ma e nofosauni e faamagalo.’ (Salamo 86:5) E onosaʻi ma faamaoni le Atua. (2 Peteru 3:9; Faaaliga 15:4) E tele isi mea o le a e aʻoaʻoina e faatatau i uiga matagofie o le Atua, a o e faitau e uiga iā te ia i le Tusi Paia.

20, 21. E faapefea ona tatou faalatalata atu i le Atua e ui e lē mafai ona tatou vāai atu iā te ia?

20 E faapefea ona e faalatalata atu i le Atua e ui e lē mafai ona e vaai atu iā te ia? (Ioane 1:18; 4:24; 1 Timoteo 1:17) A o e faitau e faatatau iā Ieova i le Tusi Paia, o le a atili ai ona e iloa moni o ia ma ona uiga. (Salamo 27:4; Roma 1:20) A o faateleina pea mea e te aʻoaʻoina e faatatau iā Ieova, o le a faatuputeleina ai lou alofa mo ia ma atili ai ona e mafuta vavalalata atu iā te ia.

E alofa se tamā i lana fanau, ae e sili atu le alofa o lo tatou Tamā i le lagi iā i tatou

21 O le a oo ina e malamalama o Ieova o lo tatou Tamā. (Mataio 6:9) Na ia foaʻi mai le ola,  ma e finagalo foʻi ina ia tatou maua se olaga e sili ona lelei. O le mea lenā e manaʻo i ai se tamā alofa mo lana fanau. (Salamo 36:9) O le mea moni, ua aʻoaʻoina i le Tusi Paia e mafai ona avea oe ma uō a Ieova. (Iakopo 2:23) Seʻi mafaufau i lenā mea! E finagalo Ieova, o Lē na foafoaina le lagi ma le lalolagi, ina ia avea oe ma ana uō.

22. O le ā e tatau ona e faia pe a mananaʻo isi tagata ina ia tuu lou suʻesuʻeina o le Tusi Paia?

22 Atonu o le a mananaʻo isi tagata ina ia tuu lou suʻesuʻeina o le Tusi Paia. E ono faapopoleina i latou ina neʻi suia lau tapuaʻiga. Ae aua lava neʻi e faatagaina so o se tasi e taofia oe mai i le avea ma uō a Ieova. O ia o le Uō e aupito sili ona lelei e mafai ona e mauaina.

23, 24. (a) Aiseā e tatau ai ona e fesili atu pea? (e) O le ā o le a tatou iloiloina i le mataupu o sosoo mai?

23 A o e suʻesuʻeina le Tusi Paia, o le a iai mea e te lē malamalama i ai. Peitaʻi, aua e te mā e fesili pe saʻili mo se fesoasoani. Na fetalai Iesu e tatau ona tatou faaalia le lotomaulalo e pei o tamaiti. E tele fesili e faia e tamaiti. (Mataio 18:2-4) E finagalo le Atua ina ia e maua tali i au fesili. O lea, ia suʻesuʻe ma le māeʻaeʻa le Tusi Paia, ina ia faamautinoa ai o mea o loo e aʻoaʻoina o mea moni.—Faitau le Galuega 17:11.

24 O le auala sili e aʻoaʻoina ai mea e faatatau iā Ieova, o le suʻesuʻe lea o le Tusi Paia. I le mataupu o sosoo mai, o le a tatou iloiloina ai le māfuaaga e ese ai le Tusi Paia mai i isi tusi.

^ pala. 15 Pe afai e te fia iloa nisi faamatalaga e faatatau i le uiga ma le faaleoina o le suafa o le Atua, faamolemole tagaʻi i le Faaopoopoga 1.

Faitau Atili

TALA LELEI MAI I LE ATUA!

Pe e Iai se Suafa o le Atua?

E tele faalupega e ave i le Atua, e pei o le Silisili Ese, Alii, ma le Tupu o le vavau. Peitaʻi, e pe ā ma le 7,000 taimi o loo faaaogā ai le suafa patino o le Atua i le Tusi Paia.