Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 15

Le Auala e Tatau Ona Tapuaʻi ai i le Atua

Le Auala e Tatau Ona Tapuaʻi ai i le Atua

1. O ai e tatau ona faailoaina mai le auala e tatau ona tatou tapuaʻi atu ai i le Atua?

O LE tele o lotu e faapea mai o loo latou aʻoaʻoina le mea moni e uiga i le Atua. Peitaʻi, e lē o le tulaga moni lenā. O le māfuaaga, ona e matuā eseese lava mea o loo aʻoaʻoina e lotu e faatatau i le Atua, faapea le auala e tatau ona tapuaʻi ai iā te ia. E faapefea la ona tatou iloa le auala e tatau ona tapuaʻi ai iā Ieova le Atua? E na o Ieova lava e mafai ona ia faailoa mai.

2. E faapefea ona e aʻoaʻoina le auala e tatau ona tapuaʻi atu ai i le Atua?

2 Ua tuuina mai e Ieova le Tusi Paia, ina ia mafai ai ona tatou aʻoaʻoina le auala e tatau ona tapuaʻi atu ai iā te ia. O lea, ia suʻesuʻe le Tusi Paia, ona fesoasoani mai lea o Ieova iā te oe ina ia maua aogā o ana aʻoaʻoga, talu ai e silasila alofa mai o ia iā te oe.—Isaia 48:17.

3. O le ā e finagalo le Atua e tatou te faia?

3 Ua faapea mai isi tagata e talia e le Atua lotu uma, ae e lē o le mea lenā na aʻoaʻoina e Iesu. Na fetalai o ia: “E lē ulu atu i le malo o le lagi i latou uma o ē fai mai iā te aʻu, ʻLe Alii e, le Alii e,’ ae e na o lē na te faia le finagalo o loʻu Tamā.” O lea, e  manaʻomia ona tatou iloa po o le ā le finagalo o le Atua, ona fai lea. E tāua tele lenei mea, talu ai na faatusa e Iesu i latou e lē usiusitaʻi i le Atua i tagata solitulafono, “o ē faia mea leaga.”—Mataio 7:21-23.

4. O le ā le fetalaiga a Iesu e faatatau i le faia o le finagalo o le Atua?

4 Na fetalai Iesu, o le a lē faigofie i taimi uma le faia o le finagalo o le Atua. Na fetalai o ia: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.” (Mataio 7:13, 14) O le auala lauitiiti po o le auala e tatau ona tapuaʻi ai i le Atua, e iʻu atu i le ola e faavavau. Ae o le auala lautele po o le auala e lē tatau ona tapuaʻi ai i le Atua, e iʻu atu i le oti. Peitaʻi, e lē finagalo Ieova e oti se tasi. Ua ia tuuina mai i tagata uma le avanoa e aʻoaʻoina ai e faatatau iā te ia.—2 Peteru 3:9.

LE AUALA E TATAU ONA TAPUAʻI AI I LE ATUA

5. E faapefea ona e iloa i latou o loo mulimuli i le auala e tatau ona tapuaʻi ai i le Atua?

5 Na fetalai Iesu e mafai ona tatou iloa i latou o loo mulimuli i le auala e tatau ona tapuaʻi ai i le Atua, e ala i le iloiloina o o latou talitonuga ma gaoioiga. Na faapea mai o ia: “Tou te iloa i latou i o latou fua.” Na fetalai atili o ia: ʻE fua mai e laau lelei uma o fua lelei.’ (Mataio 7:16, 17) E lē o le  uiga o lenei mea, o i latou e tapuaʻi i le Atua e lelei atoatoa. Peitaʻi, e taumafai auauna a le Atua e faia i taimi uma le mea saʻo. O le a tatou iloiloina nei po o le ā e fesoasoani iā i tatou, ina ia iloa ai i latou o loo mulimuli i le auala e tatau ona tapuaʻi ai i le Atua.

6, 7. (a) Aiseā e faavae ai aʻoaʻoga a le tapuaʻiga moni i le Tusi Paia? (e) O le ā e tatou te aʻoaʻoina mai i le faaaʻoaʻoga a Iesu?

6 E tatau ona faavae a tatou aʻoaʻoga i le Tusi Paia. Ua taʻua i le Tusi Paia: “O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea, e faatonu ai i le amiotonu, ina ia matuā agavaa ai le tagata o le Atua, e lava saunia mo galuega lelei uma.” (2 Timoteo 3:16, 17) Na tusi le aposetolo o Paulo i Kerisiano e faapea: “Ina ua outou maua le afioga a le Atua, na outou faalogo ai mai iā i matou, ona outou talia lea, e lē o le upu a tagata, a o le mea moni, o le afioga a le Atua.” (1 Tesalonia 2:13) E na o le Afioga lava a le Atua, le Tusi Paia e faavae ai le tapuaʻiga moni. E lē faavae i ni manatu o tagata, aganuu po o se isi lava mea.

7 O mea uma lava sa aʻoaʻoina e Iesu na faavae mai i le Afioga a le Atua. (Faitau le Ioane 17:17.) Sa masani ona ia taʻua Tusitusiga Paia. (Mataio 4:4, 7, 10) E mulimuli auauna moni a le Atua i le faaaʻoaʻoga a Iesu, ma faavae mea e latou te aʻoaʻoina atu i le Tusi Paia.

8. O le ā ua tatou aʻoaʻoina mai iā Iesu e faatatau i le auala e tapuaʻi atu ai iā Ieova?

 8 E tatau ona tatou tapuaʻi tau lava o Ieova. O loo taʻua i le Salamo 83:18: “O oe e ou le suafa o Ieova, e na o oe lava o Lē e Silisili Ese i le lalolagi uma.” Na finagalo Iesu ina ia iloa e tagata po o ai tonu le Atua moni, ma na ia aʻoaʻo atu le suafa o le Atua. (Faitau le Ioane 17:6.) Na fetalai Iesu: “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Mataio 4:10) O lea, i le avea ai ma auauna a le Atua, e tatou te mulimuli i le faaaʻoaʻoga a Iesu. E tatou te tapuaʻi tau lava o Ieova, faaaogā lona suafa, ma aʻoaʻo isi i le suafa o le Atua ma mea o le a ia faia mo i tatou.

9, 10. E faapefea ona faaalia le alofa o le tasi i le isi?

9 E manaʻomia ona tatou faaalia le alofa moni o le tasi i le isi. Na aʻoaʻoina e Iesu ona soo ina ia alofa le tasi i le isi. (Faitau le Ioane 13:35.) E lē tāua po o fea le atunuu e tatou te ō mai ai, po o ā a tatou aganuu, ma pe e tatou te mauʻoa pe matitiva. O lo tatou alofa o le tasi i le isi, e tatau ona autasia ai i tatou o se ʻauuso. (Kolose 3:14) O lea, e tatou te lē auai ai i taua ma fasiotia ai tagata. Ua taʻua i le Tusi Paia: “E iloa le fanau a le Atua ma le fanau a le Tiapolo i le mea moni lenei: O lē ua lē faaauau ona faia le amiotonu e lē mai i le Atua o ia, e faapena foʻi le tagata ua lē alofa i lona uso.” Ua faapea atili mai le mau: “E tatau  ona tatou alolofa o le tasi i le isi; e lē pei o Kaino o lē e mai i lē o loo leaga, lea na ia fasiotia lona uso.”—1 Ioane 3:10-12; 4:20, 21.

10 E tatou te faaaogā o tatou taimi, malosi ma alagāʻoa e fesoasoani ma faalaeiau ai le tasi i le isi. (Eperu 10:24, 25) E tatou te “faia mea lelei i tagata uma.”—Kalatia 6:10.

11. Aiseā e tatou te talitonu ai e na o Iesu Keriso le auala e mafai ona maua ai le faaolataga?

11 E tatou te talitonu e na o Iesu Keriso le auala e mafai ona maua ai le faaolataga. Ua taʻua i le Tusi Paia: ʻE leai se isi e mafai ona maua ai le faaolataga, auā e leai se isi igoa i lalo o le lagi ua tuuina mai e le Atua i tagata, e tatau ona faaolaina ai i tatou.’ (Galuega 4:12) I le Mataupu 5 o lenei tusi, na tatou aʻoaʻoina ai na auina mai e Ieova Iesu ina ia foaʻi lona ola o se togiola mo tagata usiusitaʻi. (Mataio 20:28) Ua filifilia e Ieova Iesu e pule o se Tupu mai i le lagi i le lalolagi. O le māfuaaga lenā ua faailoa mai ai i le Tusi Paia, e tatau ona tatou usiusitaʻi iā Iesu pe afai e tatou te mananaʻo e ola e faavavau.—Faitau le Ioane 3:36.

12. Aiseā e leai ai sa tatou vaegafai i faiga faapolotiki?

12 E lē tatau ona faia sa tatou vaega i faiga faapolotiki. E leʻi iai se vaegafai a Iesu i faiga faapolotiki. A o faia lona faamasinoga, na ia faapea atu i le kovana Roma o Pilato: “O loʻu malo e lē mai le lalolagi lenei.” (Faitau le Ioane 18:36.) E pei o Iesu, e tatou te faamaoni i le Malo o le Atua i  le lagi. O le māfuaaga lea e leai ai sa tatou vaegafai i faiga faapolotiki, e tusa lava po o fea e tatou te nonofo ai. Peitaʻi, ua faatonuina i tatou i le Tusi Paia ina ia usiusitaʻi i “faipule silisili” po o faigāmalo. (Roma 13:1) E tatou te usitaʻia tulafono a atunuu o loo tatou nonofo ai. Ae pe afai e feteenaʻi na tulafono ma tulafono a le Atua, ona tatou faaaʻoaʻo lea i le ʻauaposetolo o ē na faapea atu: “E tatau ona matou usiusitaʻi i le Atua o le pule, nai lo o tagata.”—Galuega 5:29; Mareko 12:17.

13. O le ā e tatou te talaʻia atu e faatatau i le Malo o le Atua?

13 E tatou te talitonu e na o le Malo o le Atua e mafai ona foʻia faafitauli i le lalolagi. Na fetalai Iesu o le a talaʻiina le “tala lelei o le malo” i le lalolagi atoa. (Faitau le Mataio 24:14.) E leai se malo faaletagata e mafai ona faia mea o le a faia e le Malo o le Atua mo i tatou. (Salamo 146:3) Na aʻoaʻoina i tatou e Iesu e tatalo mo le Malo o le Atua e faapea: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) Ua taʻua i le Tusi Paia o le a faaumatia e le Malo o le Atua malo faaletagata uma, ma “e tumau lea malo e faavavau.”—Tanielu 2:44.

14. O ai e te talitonu o loo mulimuli i le auala e tatau ona tapuaʻi ai i le Atua?

14 I le māeʻa ai ona e iloiloina o nei manatu, ia fesili ifo iā te oe lava: ʻO ai o loo faavae a latou aʻoaʻoga i le Tusi Paia? O ai o loo faailoaina atu i isi le suafa o le Atua? O ai o loo faaalia le alofa moni o  le tasi i le isi, ma talitonu na auina mai e le Atua Iesu ina ia faaolaina i tatou? O ai e lē o iai sa latou vaegafai i faiga faapolotiki? O ai o loo talaʻia e na o le Malo o le Atua e mafai ona foʻia o tatou faafitauli?’ E na o Molimau a Ieova.—Isaia 43:10-12.

O LE Ā LE GAOIOIGA E AO ONA E FAIA?

15. O le ā e tatau ona tatou faia pe a tatou mananaʻo e talia e le Atua le auala e tatou te tapuaʻi ai?

15 E lē lava le tau ina talitonu o loo soifua le Atua, auā e oo foʻi i temoni e latou te talitonu o loo soifua o ia, ae e latou te lē usiusitaʻi iā te ia. (Iakopo 2:19) Pe a tatou mananaʻo e talia e le Atua le auala e tatou te tapuaʻi ai, e tatau ona tatou talitonu o loo soifua o ia ma faia mea e finagalo i ai o ia.

16. Aiseā e tatau ai ona tatou teena lotu sesē?

16 Ina ia talia e le Atua le auala e tatou te tapuaʻi ai, e tatau ona tatou teena lotu sesē. Na tusi le perofeta o Isaia: “Ia ō ese mai i totonu iā te ia, ia outou tausisi i le mamā.” (Isaia 52:11; 2 Korinito 6:17) O le māfuaaga lea e tatau ai ona tatou teena so o se mea e iai se sootaga i tapuaʻiga sesē.

17, 18. (a) O le ā e faasino atu i ai “Papelonia le Aai Tele”? (e) Aiseā e manaʻomia ai ona vave ō ese mai i lotu sesē?

17 O ai e faasino atu i ai lotu sesē? E faasino atu lea i so o se lotu lava o loo aʻoaʻoina tagata, ina ia tapuaʻi i le Atua i se auala e lē tusa ai ma lana Afioga. Ua taʻua i le Tusi Paia lotu sesē uma o  Papelonia le Aai Tele.” (Faaaliga 17:5) O le ā le māfuaaga? Ina ua mavae le Lolo i aso o Noa, na amata ai ona aliaʻe mai le tele o aʻoaʻoga sesē faalotu i le aai o Papelonia. Ua salalau atu nei aʻoaʻoga sesē i le lalolagi atoa. O se faataʻitaʻiga, na tapuaʻi tagata sa nonofo i Papelonia i atua e tolutasi. I aso foʻi nei, o loo aʻoaʻoina ai e le tele o lotu o le Atua o le Tolutasi. Peitaʻi, e manino lava le aʻoaʻoga i le Tusi Paia e na o le toʻatasi lava le Atua moni o Ieova, ma o Iesu lona Alo. (Ioane 17:3) Sa talitonu foʻi tagata na nonofo i Papelonia, e iai se agaga o le tagata e ola pea pe a maliu o ia, ma e mafai ona faapuapuagatia lenā agaga i le afi. Peitaʻi, e lē moni na talitonuga.—Tagaʻi i Faaopoopoga 14 ma le 18.

18 Na valoia e le Atua e lē o toe umi ona faaumatia lea o lotu sesē uma. (Faaaliga 18:8) Po ua e malamalama i le māfuaaga e tatau ai ona e vave alu ese mai i lotu sesē? E finagalo Ieova le Atua e te faia lenā mea a o leʻi tuai.—Faaaliga 18:4.

O lou auauna iā Ieova faatasi ma ona tagata, o le a avea ai oe o se vaega o se ʻauaiga i le lalolagi atoa

19. O le a faapefea ona tausia oe e Ieova, pe a e filifili e auauna iā te ia?

19 Pe a e filifili e tuua lotu sesē ma auauna iā Ieova, atonu o le a lē malamalama nisi o au uō ma tagata o lou aiga i lau filifiliga, ma atonu o le a latou faapogaia ni tulaga faigatā i lou olaga. E ui i na tulaga, e lē tuulafoaʻia lava oe e Ieova. O le a avea oe o se vaega o lona aiga i le lalolagi aoao, lea e iai le faitau miliona o tagata e alolofa moni  le tasi i le isi. O le a e maua foʻi le faamoemoe o le ola e faavavau i le lalolagi fou a le Atua. (Mareko 10:28-30) Atonu i se taimi mulimuli ane, o le a filifili ai nisi o au uō ma tagata o lou aiga sa tetee muamua iā te oe ma lau filifiliga ina ia auauna iā Ieova, e suʻesuʻe le Tusi Paia.

20. Aiseā e tāua ai ona tapuaʻi i le Atua i le auala e finagalo i ai o ia?

20 E lē o toe umi ona tafiesea lea e le Atua o mea leaga uma, ma o le a pule ai loa lona Malo i le lalolagi. (2 Peteru 3:9, 13) E mautinoa o se taimi sili ona fiafia lenā. O le a tapuaʻi tagata uma iā Ieova i le auala e finagalo i ai o ia. O lea, e tāua tele ai ona faia nei loa sau gaoioiga, ma tapuaʻi i le Atua i le auala e finagalo i ai o ia.