Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 9

Po ua Lata Mai le Iʻuga o le Lalolagi?

Po ua Lata Mai le Iʻuga o le Lalolagi?

1. O fea e tatou te iloa ai mea o le a tutupu i le lumanaʻi?

PE NA e matamata i tala fou ma mafaufau e faapea, ʻPo o le a atili ona leaga le tulaga o mea i le lalolagi?’ O le faatupulaʻia o faigatā ma faiga sauā, ua māfua ai ona talitonu nisi ua lata mai le iʻuga o le lalolagi. Pe e moni lenā manatu? Pe e iai se auala e iloa ai mea o le a tutupu i le lumanaʻi? Ioe e iai. E ui lava e lē mafai e tagata ona valoia mea o le a tutupu i le lumanaʻi, ae e mafai e Ieova ona faia faapea. Ua ia faailoa mai i le Tusi Paia e faatatau i lo tatou lumanaʻi faapea mea o le a tutupu i le lalolagi.—Isaia 46:10; Iakopo 4:14.

2, 3. O le ā na fia iloa e soo o Iesu, ma o le ā le tali a Iesu?

2 Pe a tatou faitau i le Tusi Paia e faatatau i le iʻuga o le lalolagi, e lē o uiga atu i le iʻuga o le lalolagi paneta, ae o le iʻuga o faiga amioleaga i le lalolagi. Na aʻoaʻo e Iesu tagata e faapea, o le a pule le Malo o le Atua i le lalolagi. (Luka 4:43) Na fia iloa e ona soo po o afea e oo mai ai le Malo o le Atua. Na latou fesili iā Iesu: “Pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le  lalolagi?” (Mataio 24:3) E leʻi taʻu atu e Iesu iā i latou le taimi tonu, ae e na o mea o le a tutupu a o leʻi oo mai le iʻuga o lenei lalolagi. O mea sa fetalai Iesu o le a tutupu, o loo tutupu i le taimi nei.

3 O le a iloiloina i lenei mataupu faamaoniga e iloa ai o loo tatou ola i le taimi a o toeitiiti lava oo i le iʻuga o le lalolagi. Muamua, seʻi o tatou iloiloina se taua na tupu i le lagi, ina ia mafai ai ona tatou malamalama i le māfuaaga ua faateteleina ai le tulaga leaga i le lalolagi.

SE TAUA I LE LAGI

4, 5. (a) O le ā na tupu i le lagi ina ua māeʻa ona avea Iesu ma Tupu? (e) E tusa ai o le Faaaliga 12:12, o le ā ua tupu i le lalolagi ina ua lafo mai i ai Satani?

4 I le Mataupu 8, na tatou aʻoaʻoina ai na avea Iesu ma Tupu i le lagi i le 1914. (Tanielu 7:13, 14) Ua faamatala mai i le tusi o Faaaliga le mea na tupu: “Ona tau ai lea o le taua i le lagi: O Mikaele [po o Iesu] ma ana agelu ua tau ma le tarako [Satani], ua tau foʻi le tarako ma ana agelu ma i latou.” * Na faatoʻilaloina Satani ma ana temoni ma na lafo mai i latou i le lalolagi. Seʻi manatu i le olioli o agelu i lenā taimi! Ae faapefea tagata i le lalolagi? Ua taʻua i le Tusi Paia, talu mai le taimi na lafo mai ai Satani ma ana temoni i le  lalolagi ma faasolo mai ai, ua avea o se vaitaimi o puapuaga mo le fanau a tagata. Aiseā? Talu ai ua ita tele le Tiapolo, “auā ua na iloa ua puupuu lona taimi.”—Faaaliga 12:7, 9, 12.

5 O loo faia e le Tiapolo le mea e gata ai lona mafai e faatupuina ai puapuaga i le lalolagi. Ua ita tele Satani auā e lē o toe umi se taimi, ona taofia loa lea e le Atua o ana gaoioiga i le lalolagi. Seʻi o tatou iloiloina le fetalaiga a Iesu e faatatau i mea o le a tutupu a o faagasolo aso e gata ai.—Tagaʻi i le Faaopoopoga 24.

ASO E GATA AI

6, 7. O ā ni faamatalaga moni e faatatau i taua ma oge i aso nei?

6 Taua. Na fetalai Iesu: “O le a siitaua atu isi atunuu i isi atunuu, ma isi malo i isi malo.” (Mataio 24:7) E sili atu le toʻatele o tagata ua fasiotia i taua i o tatou taimi, nai lo o se isi lava taimi i le talafaasolopito. Ua taʻua i se lipoti mai i se faalapotopotoga e suʻesuʻe i mea o loo tutupu, talu mai le 1914, e silia ma le 100 miliona tagata ua fasiotia i taua. E faatoluina le aofaʻi o tagata na fasiotia i taua i le 100 tausaga ua mavae i le va o le 1900 ma le 2000, nai lo o tagata na fasiotia i le 1,900 tausaga muamua atu. Seʻi manatu i puapuaga ma tigā ua oo i le faitau miliona o tagata ona o taua.

7 Oge. Na fetalai Iesu: ʻO le a iai oge.’ (Mataio 24:7) E ui lava i le tele o meaʻai ua maua i  le taimi lenei nai lo o se isi lava taimi, ae o loo fia aai pea tagata. Aiseā? E lē o lava tupe e faatau ai a latou meaʻai, po o fanua foʻi e fai ai faatoʻaga. E silia ma le piliona tagata e itiiti ifo i le tālā le tupe e latou te maua i le aso, e faatau ai mea e latou te manaʻomia. Ua faapea mai le Faalapotopotoga o le Soifua Mālōlōina i le Lalolagi (WHO), e faitau miliona tamaiti e maliliu i tausaga taʻitasi. O le māfuaaga autū, e lē lava meaʻai ina ia maua ai pea le soifua mālōlōina.

8, 9. E faapefea ona faamaonia ua taunuu valoaga a Iesu e faatatau i mafuiʻe ma faamaʻi?

8 Mafuiʻe. Na valoia e Iesu: ʻO le a iai mafuiʻe tetele.’ (Luka 21:11) E faatalitalia i tausaga taʻitasi le tele o mafuiʻe malolosi. Talu mai le tausaga e 1900, e silia i le lua miliona tagata  ua maliliu ona o mafuiʻe. E ui lava o loo iai masini faaonapōnei lea e ono mafai ona muaʻi iloa ai mafuiʻe a o leʻi tutupu, ae o loo maliliu pea le toʻatele o tagata.

9 Faamaʻi. Na valoia e Iesu o le a iai “faamaʻi.” O le a vave le pipisi o faamaʻi mataʻutia ma maliliu ai le toʻatele. (Luka 21:11) E ui lava ua iloa e fomaʻi auala e togafitia ai le tele o faamaʻi, ae o loo iai pea faamaʻi e lē o maua se vaifofō. O le mea moni, ua taʻua i se tasi o lipoti, i tausaga taʻitasi e maliliu ai le faitau miliona mai i faamaʻi e pei o le fatafata vaivai, malalia ma le manava tatā mataʻutia. E lē gata i lea, i le 40 tausaga ua mavae, e silia i le 30 isi faamaʻi fou ua maua e fomaʻi, ma o nisi o nei faamaʻi e lē mafai ona togafitia.

 UIGA O TAGATA I ASO E GATA AI

10. Ua faapefea ona faataunuuina le 2 Timoteo 3:1-5 i aso nei?

10 Ua taʻua i le 2 Timoteo 3:1-5: “O aso e gata ai e oo mai ai aso e sili ona faigatā.” Na faamatalaina e le aposetolo o Paulo uiga o le a faaalia e le toʻatele o tagata i aso e gata ai. Na ia taʻua o le a avea tagata ma ē

  • e manatu faapito

  • e mananaʻo tele i tupe

  • e lē usiusitaʻi i mātua

  • e lē faamaoni

  • e lē alolofa i aiga

  • e lē amio pulea

  • e sauā

  • e sili ona naunau i mea faafiafia nai lo o le alolofa i le Atua

  • e faafoliga mai e alolofa i le Atua ae e lē mananaʻo e usiusitaʻi iā te ia

11. E tusa ai ma le Salamo 92:7, o le ā o le a tupu i tagata amioleaga?

11 Po o uiga ma amioga nei a le toʻatele o  tagata i la outou vaipanoa? O le tulaga lea i le lalolagi atoa. Peitaʻi, e iai le gaoioiga o le a faia e le Atua e faatatau i nei tulaga. Ua ia folafola mai: “Pe a tupu olaola o ē e amioleaga e pei o le vao ma fuga mai i latou uma o ē e faia mea e tigā ai, ina ia faaumatia i latou e faavavau.”—Salamo 92:7.

TALA LELEI I ASO E GATA AI

12, 13. O ā mea ua aʻoaʻoina ai i tatou e Ieova a o faagasolo aso e gata ai?

12 Na valoia i le Tusi Paia a o faagasolo aso e gata ai, o le a faateteleina tigā ma mafatiaga. Ae na taʻua ai foʻi o le a iai mea lelei o le a tutupu ai.

“O le a talaʻiina atu lenei tala lelei o le malo i le lalolagi atoa.”—Mataio 24:14

13 Malamalamaga i le Tusi Paia. Na tusi le perofeta o Tanielu e faatatau i aso e gata ai e faapea: “O le a faatuputeleina le poto saʻo.” (Tanielu 12:4) I le taimi lea, o le a foaʻi ai e le Atua i ona tagata le tomai e atili ai ona malamalama lelei i le Tusi Paia, nai lo o se isi lava taimi. Na faia faapea e Ieova aemaise lava talu mai le 1914. O se faataʻitaʻiga, ua ia aʻoaʻoina i tatou e faatatau i le tāua o lona suafa ma lona finagalo mo le lalolagi, faapea le aʻoaʻoga moni e faatatau i le togiola, le tulaga o ē ua maliliu, ma le toetū. Na tatou aʻoaʻoina e na o le Malo o le Atua e mafai ona foʻia faafitauli uma o loo tatou fesagaʻia. Na tatou aʻoaʻoina foʻi le auala e maua ai le fiafia, ma pe e faapefea ona ola i se auala e ōgatusa ma  le finagalo o le Atua. Ae o le ā la e tatau ona faia e auauna a le Atua i mea ua latou aʻoaʻoina? E tatou te maua le tali i se isi valoaga.—Tagaʻi i Faaopoopoga 21 ma le 25.

14. O fea o loo talaʻia ai le tala lelei o le Malo, ma o ai o loo faia lea galuega talaʻi?

14 Le galuega talaʻi i le lalolagi aoao. Na fetalai Iesu e faatatau i aso e gata ai e faapea: “O le a talaʻiina atu lenei tala lelei o le malo i le lalolagi atoa.” (Mataio 24:3, 14) Ua talaʻia le tala lelei o le Malo i le silia i le 230 atunuu ma i le silia ma le 700 gagana. I le lalolagi atoa, o loo fesoasoani Molimau a Ieova mai ʻi atunuu uma, ma ituaiga uma,’ i tagata ina ia malamalama po o le ā le Malo, ma o le ā o le a faia e lea Malo mo le fanau a tagata. (Faaaliga 7:9) E latou te faia lenei auaunaga e aunoa ma se totogi. E ui lava e itagia ma sauāina i latou e le toʻatele o tagata, ae e leai se mea e mafai ona taofia le galuega talaʻi e pei lava ona valoia e Iesu.—Luka 21:17.

O LE Ā LAU GAOIOIGA E FAI?

15. (a) Pe e te talitonu o loo tatou ola i aso e gata ai, ma aiseā? (e) O le ā o le a tupu iā i latou e usiusitaʻi iā Ieova ma ē e lē usiusitaʻi iā te ia?

15 Pe e te talitonu o loo tatou ola i aso e gata ai? O le tele o valoaga a le Tusi Paia e faatatau i aso e gata ai ua faataunuuina. E lē o toe umi ona filifili lea o Ieova e faamuta le talaʻiina o le tala lelei, ona oo mai ai lea “o le iʻuga.” (Mataio 24:14)  O le ā le iʻuga? O loo faasino atu iā Amaketo lea o le a aveesea ai e le Atua mea leaga uma. O le a faaaogā e Ieova Iesu ma ana agelu malolosi, e faaumatia so o se tasi e lē manaʻo e usiusitaʻi iā te Ia ma lona Alo. (2 Tesalonia 1:6-9) Pe a māeʻa lenā, o le a lē toe faasesēina e Satani ma ana temoni tagata. O i latou uma e mananaʻo e usiusitaʻi i le Atua ma lagolagoina atoatoa lona Malo, o le a vāai i le faataunuuga o folafolaga uma a le Atua.—Faaaliga 20:1-3; 21:3-5.

16. Talu ai ua lata tele mai le iʻuga, o le ā e tatau ona e faia?

16 E lē o toe umi ona faaumatia lea o lenei lalolagi o loo pulea e Satani. O lea, e tāua tele ai ona tatou fesili ifo iā i tatou lava, ʻO le ā e tatau ona ou faia?’ E finagalo Ieova ina ia e aʻoaʻoina le tele o mea e te mafaia mai i le Tusi Paia. E lē tatau ona e manatu māmā i lau suʻesuʻega. (Ioane 17:3) E faia sauniga a Molimau a Ieova i vaiaso taʻitasi, e fesoasoani ai i tagata ina ia malamalama i le Tusi Paia. Ia taumafai e auai e lē aunoa i na sauniga. (Faitau le Eperu 10:24, 25.) Pe afai ua e iloa e tatau ona faia ni suiga i lou olaga, aua e te fefe e faia faapea. A o e faia nei suiga, o le a atili faamalosia ai la oulua faiā ma Ieova.—Iakopo 4:8.

17. Aiseā o le a faateʻia ai le toʻatele pe a oo mai le iʻuga?

17 Na faamatala e le aposetolo o Paulo o le a oo mai le faaumatiaga o tagata amioleaga, i se taimi  e lē faatalitalia e le toʻatele lea “e pei o se gaoi i le pō.” (1 Tesalonia 5:2) Na valoia e Iesu o le a filifili le toʻatele e lē ano i faamaoniga o loo tatou ola i aso e gata ai, i lona faapea mai: “E pei lava o aso o Noa, o le a faapena foʻi le faatasi mai o le Atalii o le tagata [po o aso e gata ai]. Auā e pei o na aso a o leʻi oo i le lolo, na latou aai ma inu, na faaipoipo alii ma tamaʻitaʻi, seʻia oo lava i le aso na ulu atu ai Noa i le vaa; ma latou te leʻi ano i ai seʻia oo mai le lolo ma tafiesea ai i latou uma.”—Mataio 24:37-39.

18. O le ā le lapataʻiga na aumaia e Iesu?

18 Na lapataʻi mai Iesu e lē tatau ona faalavelavea i tatou “i le ʻai tele, ma le inu tele, ma le popole i mea o le olaga nei.” Na fetalai o ia o le a faafuaseʻi ona oo mai le iʻuga “e pei o se mailei,” ma o le a “oo mai iā i latou uma o ē o nonofo i le lalolagi atoa.” Ona fetalai atili lea o ia: “O lea la, ia mataala pea, ma ia faatoga atu i taimi uma [pe tatalo faatauanau], ina ia outou sao mai i nei mea uma o le a oo mai, ma ia tutū i luma o le Atalii o le tagata.” (Luka 21:34-36) Aiseā e tāua tele ai le utagia o le lapataʻiga a Iesu? Talu ai e lē o toe umi ona faaumatia lea o le lalolagi amioleaga a Satani. E na o i latou e finagalo malie i ai Ieova ma Iesu o le a faasaoina mai i le iʻuga, ma ola e faavavau i le lalolagi fou.—Ioane 3:16; 2 Peteru 3:13.

^ pala. 4 O Mikaele le isi igoa mo Iesu Keriso. Mo nisi faamatalaga, faamolemole tagaʻi i le Faaopoopoga 23.