Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 3

O le ā le Finagalo o le Atua mo Tagata?

O le ā le Finagalo o le Atua mo Tagata?

1. O le ā le finagalo o le Atua mo tagata?

E MATUĀ matagofie le finagalo o le Atua mo tagata. Na ia foafoaina le uluaʻi tamāloa ma le uluaʻi fafine o Atamu ma Eva, ina ia ola i se faatoʻaga matagofie. Na finagalo o ia ina ia maua ni a la fanau, galulue ina ia avea le lalolagi atoa o se parataiso ma tausia manu.—Kenese 1:28; 2:8, 9, 15; tagaʻi i le Faaopoopoga 6.

2. (a) E faapefea ona tatou iloa e faataunuu lava e le Atua le mea ua ia finagalo i ai? (e) O ai e finagalo le Atua e ola i le lalolagi, ma o le ā le umi e latou te ola ai?

2 O le ā sou manatu, pe o le a tatou ola i se parataiso? Ua faapea mai Ieova: “Ua ou faia lea faaiʻuga, ma ou te faia lava.” (Isaia 46:9-11; 55:11) Ioe, o le a faataunuu e Ieova lana faaiʻuga po o le mea ua ia finagalo i ai, ma e leai se mea e mafai ona taofia o ia. Na fetalai Ieova e na te “lē foafoaina fua” le lalolagi. (Isaia 45:18) Na ia foafoaina le lalolagi, ona o lona finagalo ia tumu le lalolagi atoa i tagata. O ai e finagalo le Atua e ola i le lalolagi? O le ā le umi e finagalo o ia e latou te ola ai? Ua faapea mai le Tusi Paia: “E fai lava le lalolagi mo ē e amiotonu [po o ē e usiusitaʻi], e nonofo [ola] ai pea i latou e oo i le faavavau.”Salamo 37:29; Faaaliga 21:3, 4.

3. Atonu o le ā se fesili e oso aʻe i lou mafaufau, talu ai o loo mamaʻi ma feoti tagata?

 3 Peitaʻi, o loo mamaʻi ma feoti tagata i aso nei. I le tele o vaipanoa, e fetauaʻi ma toe fasioti lava e le tasi le isi. E mautinoa e lē o le finagalo lea o le Atua. O le ā tonu la le mea na tupu? O le ā le māfuaaga o nei mea uma? E na o le Tusi Paia lava e maua ai le tali.

O SE FILI O LE ATUA

4, 5. (a) O ai na tautala atu iā Eva e ala i se gata i le faatoʻaga o Etena? (e) E faapefea ona avea se tagata faamaoni ma gaoi?

4 O loo taʻua i le Tusi Paia e iai le fili o le Atua, o lē ʻua igoa i le Tiapolo ma Satani.’ Na faaaogā e Satani se gata e tautala atu ai iā Eva i le faatoʻaga o Etena. (Faaaliga 12:9; Kenese 3:1) Na ia faafoliga atu e pei lava o loo tautala moni le gata.—Tagaʻi i le Faaopoopoga 7.

5 Pe na foafoaina e le Atua ia Satani le Tiapolo? E leai. Sa iai se tasi o agelu na iai i le lagi, a o saunia e le Atua le lalolagi mo Atamu ma Eva. Na liua e lenā agelu o ia lava ma avea ai ma Tiapolo. (Iopu 38:4, 7) Na faapefea ona tupu lenā mea? O se faataʻitaʻiga, e faapefea ona avea se tagata faamaoni ma gaoi? E leʻi fanau mai o ia o se gaoi. Peitaʻi e tuʻinanau pe manaʻonaʻo o ia i se mea e lē o sana meatotino. E faaauau pea ona ia mafaufau i ai, ma ua faasolo ina malosi lenā tuʻinanauga sesē. Pe a ia maua loa le avanoa e faatino ai lea tuʻinanauga sesē, ona ia faia loa lea o le gaoi. O lea, ua ia avea  ai o ia lava o se gaoi.—Faitau le Iakopo 1:13-15; tagaʻi i le Faaopoopoga 8.

6. Na faapefea ona avea se agelu ma fili o le Atua?

6 O le tulaga lenā na tupu i le agelu lea na taʻua muamua. Ina ua uma ona foafoaina e le Atua o Atamu ma Eva, ona ia fetalai atu lea iā i laʻua ina ia fanafanau ma “ia tumu ai le lalolagi.” (Kenese 1:27, 28) Atonu na manatu lenā agelu e faapea, ʻE mafai e nei tagata uma ona tapuaʻi mai iā te aʻu nai lo o Ieova.’ O le faaauau pea ona ia mafaufau i lenā mea, o le malosi foʻi lenā o lona tuʻinanau ina ia tapuaʻi atu tagata iā te ia, lea e na o Ieova e tatau ona avatu i ai. Na manaʻo lenā agelu ina ia tapuaʻi atu tagata iā te ia. O lea na ia pepelo ai iā Eva ma faasesēina ai o ia. (Faitau le Kenese 3:1-5.) O lona faia faapea, na avea ai o ia ma Satani le Tiapolo, le fili o le Atua.

7. (a) Aiseā na feoti ai Atamu ma Eva? (e) Aiseā ua tatou ola matutua ai ma feoti?

7 Na lē usiusitaʻi Atamu ma Eva i le Atua, ma la aai ai i le fua o le laau. (Kenese 2:17; 3:6) Na la agasala iā Ieova, ma na mulimuli ane la feoti e pei lava o le fetalaiga a Ieova. (Kenese 3:17-19) Sa avea le fanau a Atamu ma Eva ma tagata agasala, o lea na feoti ai i latou. (Faitau le Roma 5:12.) Ina ia fesoasoani iā i tatou e malamalama i le māfuaaga na avea ai foʻi le fanau a Atamu ma Eva o ni tagata agasala, seʻi mātau le faataʻitaʻiga lenei. Seʻi faapea o lea ua tao se falaoa i se ʻapa e iai se omo. O falaoa uma lava e maua mai ai, o le a iai lea omo po  o se tulaga ua lē lelei atoatoa ai le falaoa. Ina ua lē usiusitaʻi Atamu i le Atua, na lē lelei atoatoa ai o ia ma avea ai ma tagata agasala. Talu ai o i tatou uma na tupuga mai iā Atamu, ua tuufaasolo mai la iā i tatou le tulaga lē lelei atoatoa, ma ua avea ai i tatou ma tagata agasala. Ona o i tatou uma la e agasala, ua tatou ola matutua ai ma feoti.—Roma 3:23; tagaʻi i le Faaopoopoga 9.

8, 9. (a) O le ā na manaʻo Satani e talitonu i ai Atamu ma Eva? (e) Aiseā na lē faaumatia ai e Ieova ē na fouvale?

8 Na amata e Satani se fouvalega iā Ieova, ina ua ia uunaʻia Atamu ma Eva e lē usiusitaʻi i le Atua. Na manaʻo o ia e talitonu Atamu ma Eva o Ieova e pepelo, ma o se pule leaga e lē manaʻo i se olaga lelei mo i laʻua. E tusa o lea na faapea atu Satani, e lē manaʻomia e tagata le Atua e faatonu i latou i le mea e fai, ma e tatau iā Atamu ma Eva ona filifili lava e i laʻua le mea e lelei ma leaga. O le ā la le gaoioiga o le a faia e Ieova? Sa ono mafai lava ona ia faaumatia loa i le taimi lenā nei tagata fouvale, ma faamuta ai le fouvalega. Ae po o le a faamaonia ai o Satani o sē e pepelo? E leai.

9 O lea, e leʻi faaumatia e Ieova nei tagata fouvale. Nai lo o lea, na ia tuu atu se taimi i tagata e latou te pule ai iā i latou lava. E faamaonia ai i inei e pepelo Satani, ma e silafia e Ieova le mea e sili ona lelei mo tagata. E tatou te aʻoaʻoina nisi faamatalaga e faatatau i lenā manatu i le Mataupu 11. Ae o le ā sou manatu e faatatau i le filifiliga a Atamu ma Eva? Pe na tonu mo i laʻua ona  talitonu iā Satani ae lē usiusitaʻi i le Atua? Na foaʻi atu e Ieova iā Atamu ma Eva mea uma lava. Na ia tuuina iā i laʻua le ola lelei atoatoa, o se nofoaga matagofie e ola ai, ma galuega e la te fiafia ai. Peitaʻi, e leʻi iai lava se taimi na faia ai e Satani se mea  lelei mo i laʻua. Pe ana e iai i inā, o le ā lau gaoioiga e fai?

10. O le ā le filifiliga tāua ua iai iā i tatou taʻitoʻatasi?

10 Ua iai foʻi iā i tatou taʻitoʻatasi se filifiliga faapena, ma e faalagolago i ai lo tatou ola. E mafai ona tatou filifili e usiusitaʻi iā Ieova e avea ma o tatou Pule, ma faia se sao e faamaonia ai e pepelo Satani. E ono mafai foʻi ona tatou filifili e avea Satani ma o tatou pule. (Salamo 73:28; faitau le Faataoto 27:11.) E toʻaitiiti lava tagata i lenei lalolagi o loo usiusitaʻi i le Atua. O le mea moni, e lē o le Atua le pule o lenei lalolagi. Pe afai la o le tulaga lenā, o ai la le pule o lenei lalolagi?

O AI O LOO PULEA LE LALOLAGI?

Pe na mafai e Satani ona ofoina atu malo uma o le lalolagi iā Iesu pe ana faapea e lē o ia e ona nei malo?

11, 12. (a) O le ā e tatou te aʻoaʻoina mai i mea na ofoina atu e Satani iā Iesu? (e) O ā mau o le Tusi Paia e faamaonia ai o Satani le pule o le lalolagi?

11 Na silafia e Iesu lē o loo pulea moni le lalolagi. I se tasi taimi, na “faaali atu [e Satani] iā te ia o malo uma o le lalolagi ma o latou mamalu.” Ona folafola atu lea e Satani: “Ou te avatu nei mea uma iā te oe, pe afai e tau lava ina e faapaʻū [pe ifo] ma tapuaʻi mai iā te aʻu.” (Mataio 4:8, 9; Luka 4:5, 6) Ia fesili ifo iā te oe lava, ʻPe na mafai e Satani ona ofoina atu na malo iā Iesu pe ana faapea e lē o ia e ona nei malo?’ E leai. O Satani e ona malo uma.

12 E te ono manatu: ʻE faapefea ona avea Satani ma pule o le lalolagi? Pe e lē o Ieova o le Atua o Lē e ona le malosi uma lava na foafoaina le lagi ma le  lalolagi?’ (Faaaliga 4:11) O le mea moni lenā. Peitaʻi na taʻua ma le manino e Iesu, o Satani o ia o “le pule o lenei lalolagi.” (Ioane 12:31; 14:30; 16:11) Na taʻua e le aposetolo o Paulo ia Satani le Tiapolo o “le atua o lenei faiga o mea a le lalolagi.” (2 Korinito 4:3, 4) Na tusi foʻi le aposetolo o Ioane, “o le lalolagi atoa o loo nofo toʻilalo i le pule a lē o loo leaga.”—1 Ioane 5:19.

O LE A FAAPEFEA ONA FAAUMATIA LE LALOLAGI A SATANI?

13. Aiseā e tatou te manaʻomia ai se lalolagi fou?

13 Ua faateteleina le tulaga leaga i lenei lalolagi. O loo tatou vaaia i so o se mea taua, faiga piʻopiʻo, le pepelo ma faiga sauā. E lē mafai e tagata ona aveesea nei tulaga leaga, e tusa lava po o ā a latou taumafaiga. Peitaʻi, ua toeitiiti ona faaumatia lea e le Atua o lenei lalolagi amioleaga e ala i lana taua o Amaketo, ma o le a ia suia i se lalolagi fou e nonofo ai tagata amiotonu.—Faaaliga 16:14-16; tagaʻi i le Faaopoopoga 10.

14. O ai na tofia e le Atua e avea ma Tupu o lona Malo, ma o le ā na valoia e le Tusi Paia e faatatau iā Iesu?

14 Na tofia e Ieova ia Iesu Keriso e avea ma Tupu o Lona malo i le lagi. I le faitau afe o tausaga ua mavae, na valoia ai e le Tusi Paia o le a pule Iesu o se “Perenise o le Filemu” ma e tumau e faavavau lona malo. (Isaia 9:6, 7) Na aʻoaʻo e Iesu ona soo e tatalo mo lenei malo ina ua ia fetalai: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) I le Mataupu 8, o le a  tatou iloiloina ai le auala o le a avea ai le Malo o le Atua ma malo e tasi o le a pulea le lalolagi. (Faitau le Tanielu 2:44.) Mulimuli ane, o le a faia e le Malo o le Atua le lalolagi e avea o se parataiso matagofie.—Tagaʻi i le Faaopoopoga 11.

E LĒ O TOE UMI ONA IAI LEA O SE LALOLAGI FOU

15. O le ā le “lalolagi fou”?

15 Ua folafola mai i le Tusi Paia: “E tatou te faatalitali i le lagi fou ma le lalolagi fou,” ma “e mau ai le amiotonu.” (2 Peteru 3:13; Isaia 65:17) O nisi taimi pe a taʻua i le Tusi Paia le upu “lalolagi,” o loo faasino atu i tagata o loo nonofo i le lalolagi. (Kenese 11:1) O lea, e faasino atu “le lalolagi fou” amiotonu, i tagata uma e usiusitaʻi i le Atua ma maua faamanuiaga mai iā te ia.

16. (a) O le ā le meaalofa matagofie o le a foaʻi mai e le Atua mo i latou e nonofo i lana lalolagi fou? (e) O le ā e tatau ona tatou faia ina ia maua ai lenā meaalofa?

16 Na fetalai Iesu o le a maua e i latou e nonofo i le lalolagi fou a le Atua le “ola e faavavau.” (Mareko 10:30) O le ā e tatau ona tatou faia ina ia tatou maua ai lenā meaalofa? Faamolemole faitau le Ioane 3:16 ma le Ioane 17:3 ina ia maua ai le tali. Seʻi o tatou iloiloina nei le faamatalaga a le Tusi Paia i le olaga o le a iai i le Parataiso i le lalolagi.

17, 18. E faapefea ona tatou iloa o le a iai le filemu i le lalolagi atoa, ma o le a tatou lagonaina foʻi le saogalemu?

17 O le a lē toe iai le amioleaga, taua, soligatulafono ma faiga sauā. O le a lē toe iai ni tagata  amioleaga i le lalolagi. (Salamo 37:10, 11) O le a “faaiʻuina [e le Atua] taua i tuluʻiga o le lalolagi.” (Salamo 46:9; Isaia 2:4) O le a tumu le lalolagi i tagata e alolofa i le Atua ma usiusitaʻi iā te ia. O le a tumau e faavavau le filemu.—Salamo 72:7.

18 O le a saogalemu tagata o Ieova. I taimi o le Tusi Paia, a o usiusitaʻi le fanauga a Isaraelu i le Atua, sa saogalemu i latou auā sa puipuia i latou e Ieova. (Levitiko 25:18, 19) I le Parataiso, e tatou te lē toe fefefe i se mea po o se tasi. O le a tatou lagonaina pea le saogalemu.—Faitau le Isaia 32:18; Mika 4:4.

19. E faapefea ona tatou mautinoa o le a anoanoaʻi meataumafa i le lalolagi fou a le Atua?

19 O le a anoanoaʻi meataumafa. “O le a tele saito i le laueleele; o le a fau ma soloi i tumutumu o mauga.” (Salamo 72:16) O le a ʻfaamanuia i tatou e Ieova lo tatou Atua,’ ma “e fua mai lava e le laueleele ona fua.”—Salamo 67:6.

20. E faapefea ona tatou iloa o le a avea le lalolagi ma parataiso?

20 O le a avea le lalolagi atoa ma parataiso. O le a iai fale mananaia o tagata ma togālaau matagofie. (Faitau le Isaia 65:21-24; Faaaliga 11:18.) O le a matagofie le lalolagi atoa e pei o le faatoʻaga o Etena. O le a foaʻi mai lava e Ieova mea uma e tatou te manaʻomia. Ua faapea mai le Tusi Paia e faatatau iā te ia: “Ua e faamafola lou aao ma faamalie le manaʻo o mea ola uma lava.”—Salamo 145:16.

21. E faapefea ona tatou iloa o le a nonofo filemu tagata ma manu?

 21 O le a nonofo filemu tagata ma manu. O le a lē toe osofaʻia e manu tagata. O le a saogalemu tamaiti ma lē toe fefefe i manu, e oo lava i manu o loo feʻai i aso nei.—Faitau le Isaia 11:6-9; 65:25.

22. O le ā o le a faia e Iesu mo i latou e mamaʻi?

22 O le a lē toe maʻi se tasi. A o iai Iesu i le lalolagi, sa ia faamālōlōina le toʻatele o tagata. (Mataio 9:35; Mareko 1:40-42; Ioane 5:5-9) Ae i le avea ai o ia ma Tupu o le Malo o le Atua, o le a ia faamālōlōina tagata uma. E leai se tasi e toe faapea mai: “Ou te maʻi.”—Isaia 33:24; 35:5, 6.

23. O le ā o le a faia e le Atua mo i latou ua maliliu?

23 O le a toetutū mai ē ua feoti. Ua folafola mai e le Atua o le a ia toe faatutūina mai le faitau miliona o tagata ua maliliu. Ua taʻua i le Galuega 24:15: “E toetutū mai tagata amiotonu ma tagata amiolētonu.”—Faitau le Ioane 5:28, 29.

24. O ā ni ou faalogona e faatatau i le ola ai i le Parataiso?

24 Ua iai iā i tatou uma se filifiliga. E mafai ona tatou filifili e aʻoaʻoina e faatatau iā Ieova ma auauna iā te ia, pe e filifili foʻi e fai o tatou lava loto. Pe a tatou filifili e auauna iā Ieova, e mafai ona tatou maua se lumanaʻi matagofie. Na fetalai atu Iesu i se tamāloa ua lata ina maliu o loo i ona autafa e faapea: “O le a ta faatasi ma oe i le Parataiso.” (Luka 23:43) Seʻi o tatou aʻoaʻoina atili e uiga iā Iesu Keriso, ma le auala o le a ia faataunuuina ai folafolaga matagofie a le Atua.