Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 19

Ia Mafuta Vavalalata Atu Pea iā Ieova

Ia Mafuta Vavalalata Atu Pea iā Ieova

1, 2. O fea e mafai ona tatou maua ai le puipuiga i aso nei?

SEʻI faapea o loo e savali i le auala, ae agi malosi mai se matagi. Ua amata ona pōuliuli le lagi, emo uila, pāpā faititili ma totō mai timuga. Ua e faatopetope atu e suʻe se mea e te lafi ai, ma ua e iloa atu se nofoaga e te malu ai. E mautinoa lou matuā fiafia.

2 I se tulaga talitutusa, e faapena foʻi le tulaga ua iai le lalolagi i aso nei, o loo faateteleina le leaga. E te ono mafaufau, ʻO fea e mafai ona ou maua ai le puipuiga?’ Na tusi se faisalamo o le Tusi Paia: “Ou te fai atu iā Ieova: ʻO oe o loʻu sulufaʻiga ma o loʻu ʻolo malosi, o loʻu Atua o lē ou te faatuatua i ai.’” (Salamo 91:2) O le mea moni, e mafai e Ieova ona aumaia se mapusaga mo o tatou faafitauli i le taimi lenei, ma ua ia aumaia se faamoemoe matagofie mo le lumanaʻi.

3. E faapefea ona avea Ieova ma o tatou sulufaʻiga?

3 E faapefea ona puipuia i tatou e Ieova? E mafai ona ia fesoasoani mai iā i tatou ina ia taulimaina so o se faafitauli o loo tatou fesagaʻia. E sili atu foʻi lona malosi nai lo o se isi lava atonu o loo taumafai e faia se mea e tatou te afāina ai. E tusa foʻi pe e tupu se mea leaga iā i tatou i le taimi lenei, ae e tatou te mautinoa o le a faaleleia e Ieova i le lumanaʻi mea  uma ua faaleagaina. Ua faalaeiauina i tatou i le Tusi Paia: “Ia outou faatumau iā te outou i le alofa o le Atua.” (Iuta 21) E manaʻomia ona tatou mafuta vavalalata atu iā Ieova, ina ia mafai ai ona maua lana fesoasoani i taimi faigatā. Ae e faapefea ona tatou faia lenā mea?

TALI ATU I LE ALOFA O LE ATUA

4, 5. Ua faapefea ona faaalia mai e Ieova lona alofa mo i tatou?

4 Ina ia faatumauina la tatou faiā vavalalata ma Ieova, e manaʻomia ona tatou iloa le tele o lona alofa iā i tatou. Seʻi mafaufau i mea uma ua faia e Ieova mo i tatou. Ua ia aumaia se lalolagi matagofie ma faatumulia i laau matagofie ma laau eseese. Ua ia aumaia foʻi meaʻai susua ma vai mamā e feinu ai. E ala i le Tusi Paia, ua aʻoaʻoina ai e Ieova i tatou i ona uiga matagofie ma lona suafa. E sili atu i lenā, na ia faaalia lona alofa iā i tatou ina ua ia auina mai lona Alo pele o Iesu i le lalolagi, e foaʻi mai lona ola mo i tatou. (Ioane 3:16) Ona o lenā taulaga, ua tatou maua ai se faamoemoe matagofie mo le lumanaʻi.

5 Ua faatulagaina e Ieova lona Malo lea e pule ai Keriso, o se pulega i le lagi lea ua toeitiiti aveesea mafatiaga uma. E ala i le Malo, o le a avea le lalolagi o se parataiso, lea o le a nonofo ai tagata uma i le filemu ma le fiafia e oo i le faavavau. (Salamo 37:29) O se isi auala ua faaalia mai ai e Ieova lona alofa, o le aʻoaʻoina lea o i tatou i le auala sili e ola ai i le taimi lenei. Ua ia valaaulia foʻi i tatou e tatalo  atu iā te ia, ma e nofosauni o ia i taimi uma e faafofoga mai i a tatou tatalo. Ua faaalia mai ma le manino e Ieova lona alofa mo i tatou uma taʻitoʻatasi.

6. O le ā le auala e tatau ona e tali atu ai i le alofa o Ieova?

6 O le ā le auala e tatau ona e tali atu ai i le alofa o Ieova? Ia faailoa atu iā te ia lou lotofaafetai mo mea uma ua ia faia mo oe. Pagā lea, o le toʻatele o tagata i aso nei e lē o faaalia le lotofaafetai. O le tulaga foʻi lenā sa iai a o soifua Iesu i le lalolagi. I se tasi taimi, na faamālōlō ai e Iesu lepela e toʻasefulu, ae e na o le toʻatasi na faafetai atu iā te ia. (Luka 17:12-17) E tatou te mananaʻo ia pei o le tamāloa na faafetai iā Iesu, ma faaalia pea le lotofaafetai iā Ieova.

7. O le ā le tele e tatau ona tatou alolofa ai iā Ieova?

7 E manaʻomia foʻi ona tatou faaali atu lo tatou alofa mo Ieova. Na fetalai Iesu i ona soo e tatau ona latou alolofa iā Ieova ma o latou lotoatoa, ola atoa ma le mafaufau atoa. (Faitau le Mataio 22:37.) O le ā le uiga o lenā manatu?

8, 9. E faapefea ona tatou faaalia atu iā Ieova e tatou te alolofa iā te ia?

8 Pe e lava le tau ina faapea atu e tatou te alolofa iā Ieova? E leai. Pe afai e tatou te alolofa iā Ieova ma o tatou lotoatoa, ola atoa ma le mafaufau atoa, e tatou te faaalia le alofa iā te ia e ala i a tatou gaoioiga. (Mataio 7:16-20) Ua aʻoaʻoina ma le manino i le Tusi Paia, pe afai e tatou te alolofa i le Atua, e tatou te usiusitaʻi i ana poloaʻiga. Pe e faigatā ona  faia lenā mea? E leai, auā ʻe lē mamafa poloaʻiga’ a Ieova.—Faitau le 1 Ioane 5:3.

9 E tatou te maua ni olaga fiafia ma faamalieina, pe afai e tatou te usiusitaʻi iā Ieova. (Isaia 48:17, 18) Ae o le ā o le a fesoasoani iā i tatou ina ia mafuta vavalalata atu ai pea iā Ieova? Seʻi o tatou iloiloina lenā fesili.

IA MAFUTA VAVALALATA ATU PEA IĀ IEOVA

10. Aiseā e tatau ai ona e aʻoaʻoina pea e faatatau iā Ieova?

10 Na faapefea ona avea oe ma uō a Ieova? E ala i lou suʻesuʻeina o le Tusi Paia, ua tele ai mea ua e iloa e uiga iā Ieova ma atiaʻe ai se faauōga ma ia. O lenei faauōga e pei o se afi e te manaʻo e mumū pea. E pei lava ona manaʻomia o ni fafie ina ia mumū ai pea le afi, e faapena foʻi ona manaʻomia ona e aʻoaʻoina pea e faatatau iā Ieova, ina ia faatumauina ai pea le malosi o la oulua faauōga ma Ia.—Faataoto 2:1-5.

E pei ona manaʻomia o ni fafie ina ia mumū ai pea le afi, e faapena foʻi ona manaʻomia ni taumafaiga ina ia faamalosia ai pea lou alofa mo Ieova

11. O le ā le aafiaga o aʻoaʻoga o le Tusi Paia iā te oe?

11 A o faaauau ona e suʻesuʻeina le Tusi Paia, o le a e aʻoaʻoina ai mea e matuā pāʻia ai lou loto. Seʻi mātau lagona o soo e toʻalua o Iesu a o ia faamatalaina atu iā i laʻua valoaga o le Tusi Paia. Na la faapea ane: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?”—Luka 24:32.

12, 13. (a) O le ā e ono tupu i lo tatou alofa mo le Atua? (e) E faapefea ona tatou faatumauina pea lo tatou alofa mo Ieova?

12 E pei lava ona pāʻia loto o soo o Iesu ina ua la  malamalama i Tusitusiga Paia, atonu e faapena foʻi lou naunau ina ua amata ona e malamalama i le Tusi Paia. Na fesoasoani lea iā te oe e iloa ai Ieova ma alofa iā te ia. E te lē manaʻo e maalili lenā alofa.—Mataio 24:12.

13 O le taimi lava e avea ai oe ma uō a le Atua, e manaʻomia ona e taumafai malosi e faatumauina pea le malosi o lenā faauōga. E tatau ona faaauau pea ona e aʻoaʻoina mea e faatatau iā Ieova ma Iesu, ma manatunatu i mea o loo e aʻoaʻoina ma le auala e faatatauina ai i lou olaga. (Ioane 17:3) Pe a e faitau pe suʻesuʻe i le Tusi Paia, fesili ifo iā te oe lava: ʻO le ā ua ou aʻoaʻoina mai i lenei mea e faatatau iā Ieova le Atua? Aiseā e tatau ai ona ou alofa iā te ia ma loʻu lotoatoa ma loʻu ola atoa?’—1 Timoteo 4:15.

14. E faapefea i le tatalo ona faatumauina ai pea le malosi o lo tatou alofa mo Ieova?

 14 Pe a iai sau uō mamae, e te talanoa iā te ia i taimi uma ma o lenā mea e faamalosia ai pea la oulua faauōga. E faapena foʻi pe a tatou talanoa e lē aunoa iā Ieova e ala i le tatalo, e faatumauina ai pea le malosi o lo tatou alofa mo ia. (Faitau le 1 Tesalonia 5:17.) O le tatalo o se meaalofa matagofie mai i lo tatou Tamā i le lagi. E tatau ona tatou tatalo atu iā te ia i taimi uma mai i o tatou loto. (Salamo 62:8) E lē tatau ona aʻo faatauloto a tatou tatalo, ae e tatau ona moni upu e faia i a tatou tatalo. Ioe, pe afai e faaauau pea ona tatou suʻesuʻe i le Tusi Paia ma tatalo mai i o tatou loto, o le a faatumauina ai pea le malosi o lo tatou alofa mo Ieova.

TALANOA ATU I ISI E FAATATAU IĀ IEOVA

15, 16. O le ā lau vaaiga i le galuega talaʻi?

15 Pe a tatou mananaʻo e mafuta vavalalata atu pea iā Ieova, e manaʻomia foʻi ona tatou talanoa atu i isi e faatatau i lo tatou faatuatua iā te ia. O le talanoa atu i isi e faatatau iā Ieova, o se faaeaga matagofie. (Luka 1:74) O se tiute tauave foʻi na tuuina mai e Iesu i Kerisiano moni uma. E tatau iā i tatou taʻitoʻatasi ona talaʻi atu le tala lelei o le Malo o le Atua. Po ua e faia lenā mea?—Mataio 24:14; 28:19, 20.

16 Na vaai le aposetolo o Paulo i le galuega talaʻi o se galuega e tautele, ma na ia taʻua lenā galuega o se “ʻoa.” (2 Korinito 4:7) O le talanoa atu i isi e faatatau iā Ieova ma lona finagalo, o le galuega sili lea  ona tāua e mafai ona e faia. O se auala lea e te auauna ai iā Ieova, ma e na te faatāua galuega o loo e faia mo ia. (Eperu 6:10) E aogā foʻi le talaʻiga iā te oe ma i latou e faalogo iā te oe, auā e te fesoasoani ai i isi ma oe lava ina ia mafuta vavalalata atu iā Ieova ma ia maua le ola e faavavau. (Faitau le 1 Korinito 15:58.) Pe e iai se isi galuega e te maua ai le fiafia moni nai lo o lenei galuega?

17. Aiseā ua faanatinati ai le galuega talaʻi?

17 Ua matuā faanatinati lava le galuega talaʻi. E tatau ona tatou “talaʻi atu le upu” ma ia faia ma le “maelega.” (2 Timoteo 4:2) O le upu i le uluaʻi gagana Eleni ua faaliliuina i le “maelega,” e faasino atu i le faia o mea ma se uiga faanatinati. E manaʻomia ona faalogo tagata e faatatau i le Malo o le Atua. Ua taʻua i le Tusi Paia: “O loo latalata mai le aso tele o Ieova. O loo lata mai lava, e matuā televave mai lava.” “E lē faatuai mai” le iʻuga. (Sefanaia 1:14; Sapakuka 2:3) Ioe, e lē o toe umi ona faaumatia lea e Ieova o le lalolagi amioleaga a Satani. Ae a o leʻi tupu lenā mea, e manaʻomia ona lapataʻia tagata ina ia mafai ai ona latou filifili e auauna iā Ieova.

18. Aiseā e tatau ai ona tatou tapuaʻi atu iā Ieova faatasi ma isi Kerisiano moni?

18 E finagalo Ieova e tatou te tapuaʻi atu iā te ia faatasi ma isi Kerisiano moni. Ua taʻua i le Tusi Paia: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a  isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.” (Eperu 10:24, 25) E tatau ona tatou faia le mea e gata ai lo tatou mafai ina ia auai ai i sauniga uma. O sauniga ua tatou maua ai le avanoa e faalaeiau ma faamalosia ai e le tasi le isi.

19. O le ā e mafai ona fesoasoani iā i tatou ina ia alolofa ai i o tatou uso ma tuafāfine Kerisiano?

19 Pe a e auai i sauniga, o le a e maua ai ni uō lelei e fesoasoani atu iā te oe e tapuaʻi iā Ieova. O le a e feiloaʻi ai i uso ma tuafāfine eseese, o ē e pei o oe o loo taumafai e faia le mea e gata ai lo latou mafai e auauna ai iā Ieova. E lē lelei atoatoa i latou e pei o oe, ma e latou te faia mea sesē. Pe a latou faia se mea sesē, ia e nofosauni e faamagalo i latou. (Faitau le Kolose 3:13.) Ia taulaʻi atu pea i uiga lelei o ou uso ma tuafāfine Kerisiano. O lou faia faapea, o le a fesoasoani iā te oe e alofa ai iā i latou ma atili mafuta vavalalata atu ai iā Ieova.

LE OLA MONI

20, 21. O le ā “le ola moni”?

20 E finagalo Ieova ina ia maua e ana uō uma se olaga e sili ona lelei. Ua tatou aʻoaʻoina mai i le Tusi Paia, o le a matuā ese lava lo tatou olaga o le a iai i le lumanaʻi, mai i le olaga o loo iai i le taimi nei.

E finagalo Ieova ina ia e maua “le ola moni.” Po o le a e mauaina lenā ola moni?

21 I le lumanaʻi, o le a tatou ola ai e faavavau ae e lē mo na o ni nai tausaga se 70 pe 80. O le a tatou maua le “ola e faavavau” i se olaga soifua mālōlōina atoatoa, filemu ma fiafia i le parataiso. O loo  taʻua i le Tusi Paia lenā olaga o “le ola moni.” Ua folafola e Ieova o le a ia foaʻi mai lenā ola moni, ae e tatau ona tatou faia taumafaiga uma i le taimi lenei ina ia “taofimau” ai i lenā ola moni.—1 Timoteo 6:12, 19.

22. (a) E mafai faapefea ona tatou “taofimau i le ola moni”? (e) Aiseā e faapea atu ai o le ola e faavavau e lē o se totogi mo a tatou taumafaiga?

22 E mafai faapefea ona tatou “taofimau i le ola moni”? E tatau ona tatou “faia mea lelei” ma “ia tamaoaiga i galuega lelei.” (1 Timoteo 6:18) O lona uiga, e manaʻomia ona tatou faatatauina mea e tatou te aʻoaʻoina mai i le Tusi Paia. Peitaʻi, e lē faalagolago le mauaina o le ola moni i a tatou lava taumafaiga, talu ai o le ola e faavavau e lē o se totogi mo a tatou taumafaiga. O le ola e faavavau o se meaalofa foaʻifua mai iā Ieova mo ana auauna faamaoni, o se faaaʻoaʻoga lea o lona “agalelei faifua.” (Roma 5:15) E naunau moni lo tatou Tamā i le lagi e foaʻi mai lenei meaalofa i ana auauna faamaoni.

23. Aiseā e manaʻomia ai ona saʻo filifiliga e te faia i le taimi lenei?

23 Ia fesili ifo, ʻPo o oʻu tapuaʻi i le Atua i le auala o loo ia finagalo ai?’ Pe afai e te iloa e manaʻomia ona e faia ni suiga, e tatau loa ona e faia faapea. Pe a tatou faalagolago iā Ieova ma faia le mea e gata ai lo tatou mafai ina ia usiusitaʻi ai iā te ia, o le a avea o ia ma o tatou sulufaʻiga. O le a ia puipuia ona tagata faamaoni a o faagasolo aso e gata ai o le lalolagi amioleaga a Satani. Ona faamautinoa lea e Ieova e  tatou te ola i le Parataiso e faavavau e pei lava o lana folafolaga. Ioe, e mafai ona e maua le ola moni pe afai e saʻo filifiliga e te faia i le taimi lenei.