Skip to content

Skip to secondary menu

Skip to table of contents

Molimau a Ieova

Faa-Samoa

O ā Aʻoaʻoga Mai i le Tusi Paia?

 MATAUPU 11

Aiseā ua Matuā Tele ai Mafatiaga?

Aiseā ua Matuā Tele ai Mafatiaga?

1, 2. O le ā e tuufesili ai le toʻatele o tagata?

UA FAATAMAʻIA e se galulolo se nuu. Ua tafana e se tamāloa ni tagata i totonu o se falesā, ma ua manunuʻa ma maliliu ai le toʻatele. Ua maliu se tinā ona o le kanesa, ae tuua ai lana fanau e toʻalima.

2 Pe a tutupu ni mala po o ni faalavelave faapea, e tuufesili le toʻatele pe aiseā ua tutupu ai nei mea, ma pe aiseā foʻi ua tumu ai le lalolagi i le feitagaʻi ma mafatiaga. Pe sa iai se taimi na e mafaufau ai faapena?

3, 4. (a) O ā fesili na tuufesili ai Sapakuka? (e) Na faapefea ona taliina e Ieova fesili a Sapakuka?

3 Ua faamatalaina i le Tusi Paia ni tagata na malolosi lo latou faatuatua i le Atua, ae sa latou tuufesili foʻi faapena. O se faaaʻoaʻoga, na fesili le perofeta o Sapakuka iā Ieova: “Aiseā ea ua e faaali mai ai iā te aʻu o mea tigā ma ua e silasila mai ai pea i puapuaga? Aiseā ua faoa ai mea ma faia faiga sauā i oʻu luma, aiseā foʻi ua faia ai fefinauaʻiga ma tulaʻi mai ai misa?”—Sapakuka 1:3.

4 I le Sapakuka 2:2, 3, e tatou te faitau ai i le tali a le Atua i le fesili a Sapakuka, ma Lana folafolaga o le a ia faasaʻo le tulaga o mea. E matuā alofa Ieova i tagata. Ua faapea mai le 1 Peteru 5:7: “O loo manatu mamafa mai o ia iā te outou.” O le mea moni, e sili  atu ona tigā le finagalo o le Atua i mafatiaga o tagata nai lo o i tatou. (Isaia 55:8, 9) O lea, seʻi o tatou iloiloina le fesili lenei: Aiseā ua matuā tele ai mafatiaga i le lalolagi?

AISEĀ UA MATUĀ TELE AI MAFATIAGA?

5. (a) O le ā ua aʻoaʻoina e le tele o aʻoaʻo faalelotu e faatatau i mafatiaga? (e) O le ā le aʻoaʻoga a le Tusi Paia?

5 E masani ona faapea mai faifeʻau, patele ma aʻoaʻo faalelotu, o le finagalo o le Atua ia oo mafatiaga i tagata. E ono faapea mai foʻi nisi, o mea uma e tutupu i tagata e aofia ai mala, ua uma ona filifilia e le Atua ma e lē mafai ona tatou malamalama i le māfuaaga ua ia faia ai faapea. Atonu e faapea mai isi e maliliu tagata e aofia ai ma tamaiti, ina ia mafai ai ona faatasi ma le Atua i le lagi. Peitaʻi e lē moni na manatu, talu ai e lē faatupuina e le Atua mea leaga. Ua taʻua i le Tusi Paia: “E mamao lava i le Atua moni ona faia o se mea leaga, ma Lē e ona le malosi uma lava ona faia o se mea e lē tonu!”—Iopu 34:10.

6. Aiseā e tuuaʻia ai e le toʻatele le Atua mo mafatiaga uma o loo tutupu i le lalolagi?

6 E tuuaʻia e le toʻatele o tagata le Atua mo mafatiaga uma o loo tutupu i le lalolagi, ona e latou te manatu o loo pulea e le Atua le lalolagi. Ae e pei ona tatou aʻoaʻoina mai i le Mataupu 3, o lē o loo pulea moni le lalolagi o Satani le Tiapolo.

7, 8. Aiseā ua matuā tele ai mafatiaga i le lalolagi?

7 O loo faamatala mai i le Tusi Paia, “o le lalolagi atoa o loo nofo toʻilalo i le pule a lē o loo leaga.” (1 Ioane 5:19) E ita tele ma sauā Satani le pule o lenei lalolagi, ma ua ia “faasesēina le lalolagi atoa.”  (Faaaliga 12:9) E faataʻitaʻi le toʻatele o tagata iā te ia, ma o se tasi lenā o māfuaaga ua tumu ai le lalolagi i pepelo, feitagaʻi ma le sauā.

8 E iai isi māfuaaga ua tele ai mafatiaga i le lalolagi. Ina ua uma ona fouvale Atamu ma Eva, ona tuufaasolo mai lea o le agasala i le la fanau. O le iʻuga, ua oo ai mafatiaga i isi tagata ona o mea e faia e isi. E masani ona latou mananaʻo e sili atu i latou nai lo o isi. E latou te femisaaʻi, fetauaʻi ma sauāina isi tagata. (Failauga 4:1; 8:9) O isi taimi e māfua ona mafatia tagata ona ʻe tutupu faafuaseʻi mea i le taimi e leʻi faatalitalia.’ (Failauga 9:11) Pe afai e sesē le nofoaga e latou te iai i le taimi sesē, e mafai ona aafia i latou i ni faalavelave faafuaseʻi po o nisi mea leaga.

9. Aiseā e mafai ai ona tatou mautinoa e iai se māfuaaga tāua ua lē taofia ai e le Atua le tutupu pea o mafatiaga?

9 E lē taitai faatupuina e Ieova mafatiaga. E lē tuuaʻia o ia mo taua, soligatulafono ma faiga lē tonu. E na te lē faatupuina mala e pei o mafuiʻe, afā ma lologa. Ae atonu e te tuufesili, ʻPe afai la o Ieova o lē e silisili ona malosi i le lagi ma le lalolagi, aiseā la ua ia lē taofia ai le tutupu o nei mea mataʻutia?’ E tatou te iloa e silasila alofa mai le Atua iā i tatou. O lea, e mautinoa e iai se māfuaaga tāua ua ia lē taofia ai le tutupu pea o mafatiaga.—1 Ioane 4:8.

AISEĀ UA LĒ TAOFIA AI E LE ATUA MAFATIAGA?

10. Na faapefea ona luʻia e Satani le pule a Ieova?

10 I le faatoʻaga o Etena, na faasesēina ai Atamu ma Eva e le Tiapolo. Na tuuaʻia e Satani le Atua i le  avea o ia o se Pule leaga. Na ia faapea atu o loo taofia e le Atua se mea lelei mai iā Atamu ma Eva. Na manaʻo Satani e talitonu Atamu ma Eva, e sili atu ona lelei le auala e na te pule ai nai lo o Ieova, ma e la te lē manaʻomia foʻi le Atua.—Kenese 3:2-5; tagaʻi i le Faaopoopoga 27.

11. O le ā le fesili e manaʻomia ona tatou taliina?

11 Na lē usiusitaʻi Atamu ma Eva iā Ieova ma la fouvale ai iā te ia. Na la manatu o loo iā i laʻua le aiā e filifili ai le mea e saʻo ma le mea e sesē. O le a faapefea ona faamaonia e Ieova e sesē Atamu ma Eva, ma e na te silafia le mea e lelei mo i tatou?

12, 13. (a) Aiseā e leʻi faaumatia ai e Ieova Atamu ma Eva, e ui na la agasala? (e) Aiseā ua tuu atu ai e Ieova le avanoa iā Satani e avea ai ma pule o lenei lalolagi, ma tuu atu le avanoa i tagata e latou te pulea ai i latou lava?

12 Ina ua agasala Atamu ma Eva, e leʻi faaumatia e Ieova i laʻua. Nai lo o lea, sa ia faatagaina i laʻua e fai sa la fanau. Ona faatagaina lea e Ieova o le fanau a Atamu ma Eva, e filifili po o ai e latou te mananaʻo e avea ma o latou pule. O le finagalo o Ieova ia tumu le lalolagi i tagata lelei atoatoa, ma e taunuu lava lenā mea e tusa po o ā taumafaiga a le Tiapolo.—Kenese 1:28; Isaia 55:10, 11.

13 Na luʻia e Satani Ieova i luma o le faitau miliona o agelu. (Iopu 38:7; Tanielu 7:10) O lea, sa tuu atu e Ieova iā Satani le avanoa e faamaonia ai pe moni lana tuuaʻiga. Na tuuina atu foʻi e Ieova i tagata le avanoa e faavae ai a latou lava faigāmalo i lalo o le taʻitaʻiga a Satani, e faaalia ai pe e mafai ona latou taulau e aunoa ma le fesoasoani a le Atua.

14. A o faagasolo taimi, o le ā ua faamaonia mai ai?

 14 Na taumafai tagata e pulea i latou lava mo le faitau afe o tausaga, ae e lē o taulau lava a latou taumafaiga. Ua faamaonia ai o Satani o le pepelo. E matuā manaʻomia e tagata le fesoasoani a le Atua. Ua moni ai upu a le perofeta o Ieremia: “Ieova e, ua ou iloa lelei, e lē o i le tagata lona ala. E lē o i le tagata foʻi e savali, ona faatonuina le mea e ui ai o ia.”—Ieremia 10:23.

AISEĀ UA UMI AI LE TAIMI O FAATAGA PEA E IEOVA LE IAI O MAFATIAGA?

15, 16. (a) Aiseā ua umi ai le taimi o faataga pea e Ieova le iai o mafatiaga? (e) Aiseā ua lē faaleleia ai e Ieova faafitauli ua māfua ona o Satani?

15 Aiseā ua umi ai le taimi o faataga pea e Ieova le iai o mafatiaga? Aiseā e na te lē taofia ai le tutupu o mea leaga? E umi se taimi e manaʻomia ina ia faamaonia ai e lē taulau le pule a Satani. Ua uma taumafaiga a tagata i a latou faigāmalo eseese ae e lē o taulau lava. E ui lava ua alualu i luma le atamai i faiga faasaienisi ma masini faaonapōnei, ae o loo faatupulaʻia pea faiga lē tonu, mativa, soligatulafono ma taua. E lē mafai ona tatou pulea i tatou lava e aunoa ma le fesoasoani a le Atua.

16 Peitaʻi, e lē o faaleleia e Ieova faafitauli ua māfua ona o Satani, ona o le a pei ai o loo ia lagolagoina le pulega a Satani, ae e lē taitai faia e le Atua lenā mea. E talitonu foʻi tagata e mafai ona latou pulea i latou lava e aunoa ma se faafitauli. Peitaʻi e pepelo lenā manatu, ma e lē lagolagoina foʻi e Ieova, auā e lē talapepelo lava o ia.—Eperu 6:18.

17, 18. O le ā o le a faia e Ieova i faafitauli ua māfua ona o Satani?

 17 Pe e mafai e Ieova ona faaleleia faafitauli ua māfua ona o le fouvalega a Satani ma tagata? Ioe e mafai, auā e leai se mea e faigatā i le Atua. E silafia e Ieova le taimi e faamuta ai le avanoa o loo tuu atu e faamaonia ai le sesē o tuuaʻiga uma a Satani. Ona sosoo ai lea ma le suia e Ieova o le lalolagi e avea o se parataiso, e pei lava ona sa muaʻi finagalo i ai o ia. O le a toe faatutūina mai ē uma “o loo i tuugamau.” (Ioane 5:28, 29) E lē toe mamaʻi pe feoti tagata. O le a toe faaleleia e Iesu mea uma sa faaleagaina e Satani. O le a faaaogā e Ieova Iesu “ina ia faalēaogāina ai galuega a le Tiapolo.” (1 Ioane 3:8) E tatou te lotofaafetai iā Ieova ona o loo onosaʻi mai pea iā i tatou, ina ia mafai ai ona tatou iloa lelei o ia ma filifili o ia e avea ma o tatou Pule. (Faitau le 2 Peteru 3:9, 10.) E tusa pe e tatou te mafatia, ae e fesoasoani mai o ia iā i tatou ina ia onosaʻi.—Ioane 4:23; faitau le 1 Korinito 10:13.

18 E lē faamalosia e Ieova i tatou e filifili o ia e avea ma o tatou Pule. Na ia tuuina mai i tagata le meaalofa o le saʻolotoga e filifili ai. Seʻi o tatou iloiloina po o le ā le aogā o lenei meaalofa tautele iā i tatou.

E FAAPEFEA ONA E FAAAOGĀ LE MEAALOFA O LE SAʻOLOTOGA E FILIFILI AI?

19. (a) O le ā le meaalofa matagofie ua tuuina mai e Ieova iā i tatou? (e) Aiseā e tatau ai ona tatou talisapaia lenei meaalofa?

19 E matuā eseese lava i tatou ma manu, ona o le meaalofa matagofie a Ieova o le saʻolotoga e filifili  ai. E gaoioi manu e fua i le auala na foafoaina ai i latou. Ae e mafai ona tatou filifili le auala e tatou te mananaʻo e ola ai, ma filifili pe e tatou te mananaʻo e faamalie le finagalo o Ieova. (Faataoto 30:24) E lē pei foʻi i tatou o masini e faia mea ua uma ona faapolokalameina e fai. Ua iā i tatou le saʻolotoga e filifili ai po o ā uiga e tatou te faaalia, po o ai a tatou uō ma po o le ā le auala e tatou te faaaogā ai o tatou olaga. E finagalo Ieova e tatou te maua le olioli i le olaga.

20, 21. O le ā le filifiliga e sili ona lelei e mafai ona e faia i le taimi lenei?

20 E finagalo Ieova e tatou te alolofa iā te ia. (Mataio 22:37, 38) E pei o ia o se tamā e fiafia e faalogo atu o faapea mai lona alo “Ou te alofa iā te oe,” o se faamatalaga e sau mai i lona loto ae e lē o faamalosia o ia e faia faapea. Ua tuu mai e Ieova iā i tatou le saʻolotoga e filifili ai pe auauna iā te ia pe leai. Na filifili Satani, Atamu ma Eva e teena Ieova. Ae e faapefea oe, o le a lē auala o le a e faaaogāina ai lau meaalofa o le saʻolotoga e filifili ai?

21 Ia faaaogā lou saʻolotoga e filifili ai e auauna ai iā Ieova. E faitau miliona i latou ua filifili e faafiafia le finagalo o le Atua, ae tetee iā Satani. (Faataoto 27:11) O le ā le gaoioiga e mafai ona e faia i le taimi lenei, ina ia e iai i le lalolagi fou a le Atua pe a ia aveesea mafatiaga uma? O le a taliina lenā fesili i le mataupu o sosoo mai.