Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Faaa‘oa‘o i lo Latou Faatuatua

Le Tusi Mai le Vaega Pule

Le Tusi Mai le Vaega Pule

Mo Uso ma Tuafāfine Pele:

I Le Olomatamata o Ianuari 1, 2008, lea e tufaina atu i le lautele, na amataina ai se faasologa o mataupu e faaulutalaina “Faaaʻoaʻo i lo Latou Faatuatua.” Talu mai lenā taimi, e taʻitolu masina ma lomia se mataupu fou i lenā faasologa o mataupu, ma o se tulaga ua faafiafiaina ai i matou.

O le ā le tali mai a le ʻaufaitau? Na faapea mai se tasi o le ʻaufaitau e faatatau i le mataupu iā Mareta: “Na ou ʻata ina ua ou faitau i ai, auā e taitutusa i maʻua. E ma te fiafia e talimālō ma pisi i mea e fai o le olaga, ae galo ai i nisi taimi e manaʻomia ona fai se mālōlōga ma fiafia faatasi ma uō.” Na taʻua e se talavou se lesona aogā na ia aʻoaʻoina mai le tala iā Eseta: ʻOu te ioe i le manatu, e mafai ona tatou manaʻonaʻo i lāʻei ma āʻega fou. O le mea moni, e tatau ona onomea o tatou lāʻei ma teuga, ae i le taimi e tasi e lē tatau foʻi ona soona teuanoaʻi. E tāua iā Ieova lo tatou tagata lilo i totonu.’ Ina ua māeʻa ona faitauina e se tuafafine se tasi o mataupu e faatatau i le aposetolo o Peteru, na ia faapea mai ma le naunau: “Sa matuā pāʻia loʻu loto ina ua ou faitauina le tala. Sa faaāta i loʻu mafaufau le mea na tupu, ma taumafai e maua le manatu autū o le tala.”

Na faaalia e nei tagata faapea isi le lotofaafetai mo nei mataupu, ma ua faamaonia ai le faamatalaga a Paulo i le Roma 15:4, “o mea uma na tusia i aso ua mavae, na tusia e faatonu ai i tatou.” Ua saunia e Ieova nei faamatalaga, ina ia tatou aʻoaʻoina ai ni lesona aogā, e tusa po o le ā le umi talu ona tatou iai i le upu moni.

E faalaeiauina ma le māfana outou e faitau lenei tusi i le taimi e maua ai. Ia faaaofia i la outou Tapuaʻiga a le Aiga, ma e mautinoa o le a fiafia i ai tamaiti. Aua lava neʻi misia se vaiaso, pe a talanoaina i Suʻesuʻega Faale-Tusi Paia a le Faapotopotoga. Aua le faatopelau ona faitauina, ae ia manatunatu loloto i ai. Ia faaāta i lou mafaufau mea na tutupu i auauna a le Atua, e pei o loo e iai i lenā taimi. Faatusatusa le auala na latou fesagaʻia ai mea na tulaʻi mai, ma le auala e te ono tali atu ai.

O se fiafiaga mo i matou le saunia o lenei lomiga. Tau ina ia avea o se faamanuiaga tele mo oe ma lou aiga. Alofaaga māfana,

Le Vaega Pule o Molimau a Ieova