Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Faaa‘oa‘o i lo Latou Faatuatua

 MATAUPU E LUASEFULUTASI

Sa Ia Tauivi Faasaga i le Fefe ma le Masalosalo

Sa Ia Tauivi Faasaga i le Fefe ma le Masalosalo

1-3. O ā mea sa vaaia e Peteru o tutupu a o faagasolo le aso, ma o le ā na tupu a o iai o ia i le vaa?

SA TAUALO malosi e Peteru le vaa, ma pulatoʻa atu i le pō. Po o si malamalama itiiti lea na ia iloa atu i le talafatai i sasaʻe, o se faailoga o le tafa mai o ata? Ua tigā lona tua ma tauʻau i le umi o alo le vaa. Ua agi mai le matagi ma ua lelea solo ai ona lauulu, ma ua amata ona sousou le Sami o Kalilaia. Ua taia e galu le taumua o le vaa, ma ua susū ai o ia i le pisi mai o le suāsami, ae ua faaauau pea ona alo.

2 O se vaimea i inā i uta i le matafaga, na tuua ai e Peteru ma ana aumea Iesu. I lenā aso, na latou vāai ai o fafaga e Iesu le faitau afe o le motu o tagata ua fia aai, i ni nai falaoa ma iʻa. Sa tali mai tagata e ala i le taumafai e fai Iesu ma tupu, ae e leʻi manaʻo o ia e aafia i a latou faiga faapolotiki. Sa ia maumaututū foʻi ia lē iai i ona soo ni faanaunauga faapena. Ina ia alu ese mai le motu o tagata, na ia augani atu i ona soo e feosofi i le vaa ma agaʻi atu i le matafaga i le isi itu, ae alu na o ia i le mauga e tatalo ai.—Mare. 6:35-45; faitau le Ioane 6:14-17.

3 Ua lata ina atoa le masina i lenā pō, ma ua agaʻi mālie atu nei le vaa i le talafatai i sisifo. Peitaʻi, e leʻi leva ona alu ese le vaa, ae amata loa ona malosi ma gogolo leotele le savili ma galu, ma na faigatā ai ona fetalanoaaʻi. Ae e foliga mai, sa leʻi talanoa ane Peteru ae na manatunatu loloto na o ia.

Sa tele pea mea sa tatau ona aʻoaʻoina e Peteru, e ui i le tele o mea sa ia aʻoaʻoina mai iā Iesu i le na o le lua tausaga

4. Aiseā ua avea ai Peteru o se faaaʻoaʻoga mataʻina mo i tatou?

4 Sa matuā anoanoaʻi mea e mafaufau i ai Peteru! E tele mea  na tutupu i le silia ma le lua tausaga, a o ia mulimuli iā Iesu le Nasareta. E tele mea na ia aʻoaʻoina, ma o loo tele pea mea e na te aʻoaʻoina. O lona lotomalie e feagai ma tulaga faigatā e pei o le masalosalo ma le fefe, ua avea ai o ia ma faaaʻoaʻoga mataʻina mo i tatou. Seʻi o tatou vaai pe faapefea.

“Ua Ma Maua le Mesia”!

5, 6. Na faapeʻī le olaga o Peteru?

5 E lē mafai ona galo iā Peteru le aso na la feiloaʻi ai ma Iesu. O lona uso o Aneterea, o ia lea na muamua faailoa atu se tala fiafia e faapea: “Ua ma maua le Mesia.” O na upu, na suia atoatoa ai le olaga o Peteru.—Ioa. 1:41.

6 Sa nofo Peteru i Kapanaumi, o se aai i le itu i mātū o le Sami o Kalilaia. Sa la faia ma Aneterea se pisinisi faifaiva, faatasi ma atalii o Sepetaio o Iakopo ma Ioane. Sa nonofo faatasi Peteru ma lana avā, faapea foʻi le tinā o lana avā ma lona uso o Aneterea. Ina ia saunia mea e manaʻomia e lona aiga e ala i faiga faiva, e manaʻomia ona galue mamafa, ma le tomai. E mafai ona tatou mafaufau i le tele o pō e fai ai nei galuega mamafa—e lafo atu upega i le va o vaa e lua ma toso aʻe i luga po o ā lava iʻa e maua. E mafai foʻi ona faaāta i le mafaufau aso o galuega fitā, a o faavasega iʻa ma faatau atu, ma fono a latou upega ma faamamā.

7. O ā faamatalaga sa uaʻi atu i ai Peteru e faatatau iā Iesu, ma aiseā sa avea ai o se tala fiafia?

7 Ua taʻu mai e le Tusi Paia o Aneterea o le soo o Ioane le Papatiso. E mautinoa na uaʻi Peteru i faamatalaga a lona uso e faatatau i le feʻau a Ioane. I se tasi aso, na vaai ai Aneterea iā Ioane o faapea lana faamatalaga e faatatau iā Iesu le Nasareta: “Faauta, o le Tamaʻi Mamoe a le Atua!” O inā na avea ai Aneterea ma soo o Iesu ma taʻu atu ma le naunau iā Peteru lenei tala fiafia: Ua i inei le Mesia! (Ioa. 1:35-41) Ina ua mavae le fouvalega i Etena pe tusa o le 4,000 tausaga muamua atu, na folafola mai e Ieova le Atua o le a iai se tagata faapitoa e sau e saunia le faamoemoe mo tagata. (Kene. 3:15) Na feiloaʻi Aneterea ma lenei Faaola, ma o ia lava o le Mesia! Na faanatinati atu loa Peteru e feiloaʻi iā Iesu.

8. O le ā le uiga o le igoa o Kefa, ma aiseā o loo fesiligia ai pea e nisi lenā igoa?

8 E oo ane i le taimi lenā, sa iloa Peteru i le igoa o Simona po o Simeona. Ae na silasila atu Iesu iā te ia ma faapea atu: “ʻO oe o Simona le atalii o Ioane; o le a faaigoa oe o Kefa’ (pe a faaliliuina, o Peteru).” (Ioa. 1:42) O “Kefa” o se nauna taatele e uiga atu i le “maa,” po o le “papa.” E mautinoa, o na upu a Iesu sa  faavaloaga. Sa ia muaʻi silafia o le a avea Peteru e pei o se papa—o se tagata e tumau, mautū, ma faatuatuaina lana taaʻiga i soo o Keriso. Pe na vaai faapena Peteru iā te ia? E leai. E oo lava i nisi e faitau i Evagelia i aso nei, e latou te lē manatu iā Peteru o se tagata e tumau ma faatuatuaina. O nisi e latou te faapea mai o le ituaiga o tagata e iai Peteru i le Tusi Paia, e femoumouaʻi ma lē mautonu.

9. O le ā e silasila mai iai Ieova ma lona Alo, ma aiseā e tatau ai ona tatou maufaatuatuaina i laʻua?

9 E iai vaivaiga o Peteru ma na malamalama lelei i ai Iesu. Ae o Iesu, e vaai i uiga lelei o tagata e pei ona silasila i ai lona Tamā o Ieova. Na mātauina e Iesu uiga lelei o Peteru, ma na ia fesoasoani iā te ia ina ia atiaʻe na uiga lelei. E silasila foʻi Ieova ma lona Alo i o tatou uiga lelei. Atonu e faigatā ona tatou talitonu e tele ni uiga lelei e la te mauaina iā i tatou. Ae peitaʻi, e manaʻomia ona tatou maufaatuatuaina i laʻua, ma lotomalilie e la te aʻoaʻoina ma suia i tatou e pei o Peteru.—Faitau le 1 Ioane 3:19, 20.

“Aua E te Toe Fefe”

10. O ā mea atonu sa molimauina e Peteru, ae o le ā le olaga sa toe foʻi i ai?

10 E foliga mai na faatasi Peteru ma Iesu i se vaega o la latou talaʻiga sa fai. Atonu na ia vaai o faia e Iesu lana uluaʻi vavega, o le faaliliuina o le vai e avea ma uaina i se tausamaaga o se faaipoipoga na faia i Kana. Ae o le mea e sili ona tāua, na ia faalogo i le feʻau mataʻina e faatatau i le Malo o le Atua. E ui i na mea, ae na ia tuua Iesu ma toe foʻi i lana pisinisi faifaiva. I ni nai masina mulimuli ane ai, na toe feiloaʻi ai Peteru ma Iesu, ma na valaaulia ai loa o ia e Iesu e mulimuli atu iā te ia i lona olaga atoa.

11, 12. (a) O ā galuega sa faia e Peteru i le pō? (e) Atonu o ā fesili sa mafaufau i ai Peteru a o faalogologo atu i le aʻoaʻo a Iesu?

11 Na faatoʻā uma mai lava se galuega faigatā ma le faavaivai loto i le pō. E ui lava i taumafaiga a le ʻaufaifaiva, ae toso mai lava le upega e leai ni iʻa. E mautinoa na faaaogā e Peteru lona poto masani, e ala i le fagota i isi vaega o le sami e suʻe po o fea o aai ai iʻa. E mautinoa, e iai taimi na pei ai o ia o le toʻatele o isi tagata faifaiva, e moomoo maʻimau pe ana mafai ona ia iloa atu le ʻauiʻa ma tataʻi mai i lana upega. O lona mafaufau pea i lenā tulaga, na atili ona ia lotovaivai. E leʻi fagota Peteru e avea o se mea e mālōlō i ai; sa faalagolago lona aiga iā te ia e maua mai ni iʻa. Ae na toe foʻi mai lava e leai ni iʻa. E ui i lea, sa tatau lava ona faamamā upega. O lea, sa pisi ai o ia e faamamā upega i le taimi na maliu atu ai Iesu.

E leʻi fiu Peteru e faalogologo atu a o faalautele e Iesu le matua autū o lana talaʻiga—le Malo o le Atua

12 Na fetuleni atu tagata iā Iesu ma faalogologo totoʻa atu i  ana fetalaiga. Ona o le toʻatele o tagata, na ia oso ai i le vaa a Peteru ma talosaga atu e tuutuu teisi ese le vaa mai le matafaga, ina ia mafai ona lagona lelei atu lona siʻufofoga a o ia aʻoaʻo atu. Sa faalogologo lelei Peteru e pei o le motu o tagata o loo i le matafaga. E leʻi fiu o ia e faalogologo a o faalautele e Iesu le matua autū o lana talaʻiga—le Malo o le Atua. Maʻeu se faaeaga o le fesoasoani i le Keriso e folafola atu lenei feʻau o le faamoemoe i le atunuu atoa! Ae pe e talafeagai lenā tulaga? O le a faapefea ona ia tausia lona aiga? Atonu na mafaufau Peteru, e lē mafai ona ia galue o se faifaiva ma auai i le galuega talaʻi.—Luka 5:1-3.

13, 14. O le ā le vavega na faia e Iesu, ma o le ā le tali atu a Peteru?

13 Ina ua uma ona aʻoaʻo atu Iesu, ona ia faapea atu lea iā Peteru: “Ia tuutuu atu le vaa i le mea loloto, ma lafo ifo ai o outou upega, ina ia maua ai ni iʻa.” Sa lē mautonu Peteru, ma na ia faapea mai: “Le Faiaʻoga e, ua alu le pō atoa o matou fagogota ae e leai se mea na maua, ae ona o lau fetalaiga, ou te toe lafo ifo ai upega.” O lea faatoʻā uma na faamamā e Peteru le upega. Atonu o le māfuaaga lea na ia lē manaʻo ai e toe lafo le upega i le sami, aemaise o le taimi lea e lē o aai iʻa! Peitaʻi, sa ia usitaʻi pea, ma e foliga mai na ia faailoa atu i lana ʻaufaifaiva o loo i le isi vaa e mulimuli mai iā i laʻua.—Luka 5:4, 5.

14 Ua teʻi Peteru ina ua ia faalogoina le mamafa o le upega a o ia taumafai e toso malosi aʻe i luga. E leʻi umi, ae ia vaaia le anoanoaʻi o iʻa o loo tafiti solo i totonu o le upega! Ua ia talo faanatinati atu i lana ʻaufaifaiva o loo i le isi vaa e ō mai e fesoasoani. Ina ua latou ō mai, na iloa ai e lē gafatia e le vaa e tasi nei iʻa uma. Na tumu uma vaa e lua, ae na tele pea iʻa. O lea na amata ai ona tau magoto ifo a latou vaa. Na matuā faateʻia Peteru i lenei mea. Na ia vaaia muamua galuega mamana a Keriso, ae o lenei mea na aafia totino ai o ia! E iai iā Iesu le mana e tataʻi ai iʻa i totonu o le upega! Ua amata ona fefe Peteru. O lea, na ia tootuli ai ma faapea atu: “Le Alii e, ia e maliu ese atu, auā o aʻu o se tagata agasala.” E faapefea ona faamaonia atu e Peteru e agavaa o ia e aufaatasi ma Lē o loo iai le pule e faaaogā ai le mana o le Atua i na auala?—Faitau le Luka 5:6-9.

ʻLe Alii e, o aʻu o se tagata agasala’

15. O le ā na faamautinoa atu e Iesu iā Peteru?

15 Sa faapea atu ma le agalelei Iesu: “Aua e te toe fefe, e amata atu nei ona e maua tagata.” (Luka 5:10) E lē o se taimi lenei e  masalosalo ma fefe ai. Sa tatau iā Peteru ona taulaʻi atu i le galuega talaʻi lea e sili ona tāua, nai lo o le manatu e faapea e lē agavaa i le faia o lenā galuega. E lē tatau foʻi ona popole pe e mafai ona ia tausia lona aiga. Sa telē se galuega sa tatau ona faia e Iesu, o le faiva lea o le a aafia ai le lumanaʻi o tagata. Sa auauna Peteru i se Atua o lē e “na te matuā faamagaloina lava.” (Isa. 55:7) O le a tausia e Ieova ona manaʻoga faaletino ma manaʻoga faaleagaga.—Mata. 6:33.

16. O le ā le tali atu a Peteru, Iakopo ma Ioane i le valaaulia a Iesu, ma aiseā na atamai ai lenei filifiliga?

16 Sa vave ona tali atu Peteru, e pei foʻi o Iakopo ma Ioane. ʻUa ave i uta a latou vaa, ua tuua mea uma lava, ae mulimuli atu iā te ia.’ (Luka 5:11) Na faia e Peteru se filifiliga e sili ona lelei, o  le faatuatua lea iā Iesu faapea Ieova. E faaalia foʻi e Kerisiano i aso nei lo latou faatuatua, e ala i le auauna i le Atua e aunoa ma le uiga masalosalo ma le fefe. E tausia e Ieova i latou e faatuatua iā te ia.—Sala. 22:4, 5.

“Aiseā ua E Masalosalo Ai?”

17. O ā mea sa mafaufau i ai Peteru i le lua tausaga talu ona la feiloaʻi ma Iesu?

17 E pei ona taʻua i le amataga o le mataupu, o loo alo atu e Peteru lona vaa i se pō savili i le Sami o Kalilaia. O le mea lenā na tupu, pe tusa o le lua tausaga talu ona la feiloaʻi ma Iesu. E tele mea na ono mafaufau i ai Peteru! Na faamālōlō e Iesu le tinā o lana avā. O le lauga a Iesu sa faia i le mauga. Sa faaalia foʻi i ana aʻoaʻoga ma ana galuega mamana, o ia o Lē na Filifilia, ma o le Mesia. A o faagasolo taimi, e leʻi faatagaina e Peteru nei uiga o le masalosalo ma le fefe e pulea o ia. Sa filifilia foʻi e Iesu Peteru e avea ma se tasi o ona aposetolo e 12! Peitaʻi, e iai se mea o le a tupu na aʻoaʻoina ai e Peteru, o loo iai pea iā te ia nei uiga o le masalosalo ma le fefe.

18, 19. (a) Faamatala le mea sa vaaia e Peteru i le Sami o Kalilaia. (e) Na faapefea ona tali atu Iesu i le manaʻoga o Peteru?

18 I le taimi o le leoleoga lona fā i lenā pō, pe tusa o le va o le tolu i le vaveao ma le oso aʻe o le lā, sa faafuaseʻi ai ona taofi le aloina e Peteru o le vaa ae nofo saʻo i luga. Ua ia iloa atu se mea o loo gaoioi! Po o le fafati o galu lea e iloa atu i le pō masina? E leai, o se tagata o loo savali mai i luga o le sami! A o latalata mai, e foliga mai o le a pasia la latou vaa e lenei tagata. Ua latou fefefe, ma ua latou manatu i lenei tagata o se agaga. Peitaʻi, ina ua faapea mai le tagata, “o aʻu lenei, ia outou lototetele ma aua tou te fefefe,” na latou iloa ai o lea tagata o Iesu.—Mata. 14:25-27.

19 Na faapea atu Peteru: “Le Alii e, afai o oe, ia e fai mai iā te aʻu ou te alu atu iā te oe i luga o le vai.” (Mata. 14:28) Na faaalia i le tali a Peteru lona lototele. O lona fiafia tele, na ia naunau ai e iai sana vaega i lenei vavega mataʻina, ina ia mafai ona faamalosia ai lona faatuatua. Na fetalai atu ma le agalelei Iesu iā Peteru, ina ia savali atu iā te ia. O lea, na oso ese ai Peteru mai le vaa. Seʻi manatu i ona lagona ina ua mafai ona tū ona vae i luga o le sami. Atonu sa maofa o ia a o savali atu iā Iesu. Ae peitaʻi, e leʻi tumau lona lototele.—Faitau le Mataio 14:29.

“Ina ua vaai atu i le matagi malosi, ona fefe ai lea o ia”

20. (a) Aiseā na mou ese ai le faatuatua o Peteru, ma o le ā le iʻuga? (e) O le ā le lesona tāua sa faamamafa e Iesu iā Peteru?

20 Sa tatau ona taulaʻi atu pea le vaai a Peteru iā Iesu. Sa  faaaogā e Iesu le mana o Ieova, ina ia mafai ai ona tū Peteru i luga o le sami. Sa faia faapea e Iesu ona o le faatuatua o Peteru iā te ia. Ae sa oo ina tosina ese le vaai a Peteru. E tatou te faitau e faapea: “Ina ua vaai atu i le matagi malosi, ona fefe ai lea o ia.” O lona fefe, na itiiti ai lona faatuatua ma manatu ai o le a malemo o ia. Ua amata nei ona magoto ifo Peteru ona o le itiiti o lona faatuatua. O Peteru o se tagata e lelei le aau, ae na lē mafai ona laveaʻiina ai o ia. Na ia alaga atu: “Le Alii e, ta fia ola!” Na aapa atu Iesu iā te ia ma toso aʻe i luga. O lea, a o iai pea i luga o le vai, sa faamamafa ai e Iesu se lesona tāua iā Peteru: “O oe lenā o lē e faatuatua itiiti, aiseā ua e masalosalo ai?”—Mata. 14:30, 31.

21. Aiseā e mataʻutia ai le masalosalo, ma e faapefea ona tatou manumalo ai?

21 “Masalosalo”—maʻeu se faaupuga talafeagai! E telē se aafiaga o le masalosalo. O le lolo atu i ai, e mafai ona tatou magoto ifo ai faaleagaga. O lea, e manaʻomia ai ni a tatou taumafaiga malolosi. E faapefea? E ala i le saʻo o le mea e taulaʻi atu i ai. Pe a fai e tatou te mafaufau pea i mea e tatou te fefefe ai, mea e lotovaivai ai, ma mea e tosina ese ai mai iā Ieova ma lona Alo, o le a oso aʻe ai lo tatou masalosalo. Pe a tatou taulaʻi atu i mea na faia e Ieova ma lona Alo, i taimi ua mavae, taimi nei, faapea ma le lumanaʻi, o le a leai la so tatou masalosalo lea e faavaivaia ai lo tatou faatuatua.

22. Aiseā e tāua ai le faaaʻoaʻo i le faatuatua o Peteru?

22 A o agaʻi atu Iesu ma Peteru i le vaa, na vaaia ai ua fāiifo le malosi o le matagi. Ua toʻafimālie le Sami o Kalilaia. Ona auai faatasi lea o Peteru ma isi soo e taʻutino atu e faapea: “E moni o oe lava o le Alo o le Atua.” (Mata. 14:33) A o tafa mai ata o le vaveao, na matuā faatumulia Peteru i le lotofaafetai. Ua ia aʻoaʻoina e aua neʻi avea lona fefe ma mea e masalosalo ai iā Ieova ma Iesu. Ioe, e tele ni suiga e manaʻomia ona ia faia ina ia avea ai o ia e pei o se papa lea na muaʻi valoia e Iesu. Na ia maumauaʻi foʻi e atiaʻe lona itu faaleagaga. Po o iā te oe lenā naunautaʻiga? E mautinoa o le a aogā iā te oe le faaaʻoaʻo i le faatuatua o Peteru.