Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Faaa‘oa‘o i lo Latou Faatuatua

Faatomuaga

Faatomuaga

“Ia faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.”—EPERU 6:12.

1, 2. (a) O le ā le vaaiga a se ovasia femalagaaʻi i tane ma fafine faatuatua i le Tusi Paia? (e) Aiseā e tatou te fiafia ai pe a avea i latou ma a tatou uō?

INA ua faalogologo se tuafafine i se lauga sa faia e se ovasia femalagaaʻi, na ia faapea mai: “O le auala na ia faamatalaina mai ai tagata o le Tusi Paia, e pei lava o loo ia talanoa e faatatau i ni ana uō mamae.” O le mea moni lenā auā e tele tausaga sa suʻesuʻeina ai e lenei uso le Afioga a le Atua, ma faavae mai ai ana aʻoaʻoga. Ua pei ai o ni ana uō mamae tane ma fafine faatuatua o loo taʻua i le Tusi Paia.

2 Pe e te fiafia pe a avea na auauna faamaoni ma au uō? Pe e moni nei tagata iā te oe? Seʻi faaāta le faifaimea faatasi ma i latou e pei o Eseta, Ruta, Noa, Aperaamo ma Elia, ma malamalama i o latou uiga. Seʻi mafaufau i ni aafiaga lelei o i latou na i lou olaga, faapea fautuaga ma faalaeiauga e latou te ono aumaia.—Faitau le Faataoto 13:20.

3. (a) E faapefea ona tatou maua aogā mai i le aʻoaʻoina e faatatau i tane ma fafine faatuatua i le Tusi Paia? (e) O ā fesili o le a iloiloina?

3 E mafai ona maua lenā ituaiga o faauōga i le taimi e ʻtoetutū mai ai tagata amiotonu.’ (Galu. 24:15) Peitaʻi, e oo mai lava i aso nei o loo tatou mauaina pea aogā, e ala i le aʻoaʻoina e faatatau i tane ma fafine faatuatua o loo i le Tusi Paia. E faapefea? Ua faapea mai Paulo i le Eperu 6:12: “Ia faaaʻoaʻo iā i latou o ē ua maua le folafolaga ona o lo latou faatuatua ma le onosaʻi.” A o tatou suʻesuʻe e faatatau i tane ma fafine faatuatua, seʻi iloilo nisi o fesili ua faamanatu mai e upu a Paulo iā i tatou. O le ā le faatuatua? Aiseā e tatou te manaʻomia ai? E faapefea ona tatou faaaʻoaʻo i auauna faamaoni o loo i le Tusi Paia?

O le ā le Faatuatua ma Aiseā e Tāua Ai?

4. O ā talitonuga o tagata e faatatau i le faatuatua, ma aiseā e sesē ai na manatu?

4 O le faatuatua o se uiga matagofie, lea na matuā faatāuaina e tane ma fafine o le a talanoaina i lenei lomiga. O le toʻatele i aso nei e lē malamalama i le uiga moni o le faatuatua. E latou te manatu, o le faatuatua e uiga atu i le talitonu i so o se mea e aunoa ma ni faamaoniga. Peitaʻi, ua faasesēina i latou. O le faatuatua e lē pei o se tagata e talitonu i so o se mea e faalogo i ai, auā e ono iʻu atu ai i ni lamatiaga. E lē na o se faalogona, auā o faalogona o se mea e lē tumau. O le faatuatua foʻi, e lē na o le talitonu  i le Atua, auā e oo lava i temoni e latou te “talitonu” i le Atua ma “tetemū.”—Iako. 2:19.

5, 6. (a) O ā vala e lua e lē o mafai ona vaaia e mata o loo faatatau i ai le faatuatua? (e) O le ā le malosi e tatau ona iai lo tatou faatuatua? Aumai se faataʻitaʻiga.

5 O le faatuatua moni, e sili mamao atu i lo o manatu faaletagata na taʻua. O le auala lenei o loo faamatalaina ai i le Tusi Paia. (Faitau le Eperu 11:1.) E lua ni vala e lē mafai ona vaaia e mata na taʻua e Paulo o loo faatatau i ai le faatuatua. (1) O mea o loo iai i le taimi nei ae e tatou te “lē o vaaia,” e pei o Ieova le Atua, lona Alo, ma le Malo o loo pule nei i le lagi. (2) O “mea ua faamoemoe i ai,” po o mea ua toeitiiti ona faataunuuina lea, e pei o le lalolagi fou lea o le a aumaia e le Malo o le Atua. Po o lona uiga la e leai ni faamaoniga o mea o loo tatou faamoemoe i ai?

6 E leai. Na taʻua e Paulo, o le faatuatua moni e mautū lona faavae. Ina ua ia faapea mai o le faatuatua “o le faatalitali lea ma le mautinoa,” na ia faaaogāina foʻi le faaupuga e uiga atu i se pepa e faamaonia ai e ana e se tasi se fanua. Seʻi faapea ua filifili se tasi e avatu se fale mo oe. Atonu e na te avatu pepa o le fale ma faapea atu o lou fale lea. O lona uiga, o lenā pepa o se faamaoniga maumaututū o oe e ana le fale, ma e talitutusa lava lou mauaina o lenā pepa ma lou mauaina o le fale. I se tulaga talitutusa, o lo tatou faatuatua ua tatou mautinoa ai, o mea uma ua folafola mai e le Atua i lana Afioga e mautinoa o le a faataunuuina.

7. O le ā e aofia i le faatuatua moni?

7 O lea, e aofia i le faatuatua moni se talitonuga mautinoa i mea na tutupu i taimi ua mavae, aemaise iā Ieova le Atua. O le faatuatua e uunaʻia ai i tatou e vaai iā te ia o lo tatou Tamā alofa, ma maufaatuatuaina e taunuu uma ana folafolaga. Peitaʻi, e sili atu mea e aofia i le faatuatua moni. Ina ia malosi lo tatou faatuatua, e manaʻomia ona faia ni a tatou gaoioiga. Pe a aunoa ma ni galuega, o le a mate lo tatou faatuatua.—Iako. 2:26.

8. Aiseā e tāua ai le faatuatua?

8 Aiseā e tāua ai le faatuatua? Na aumaia e Paulo se tali mautinoa. (Faitau le Eperu 11:6.) Seʻi vaganā e iai iā i tatou le faatuatua, ona mafai lea ona tatou faalatalata atu iā Ieova pe faamalie foʻi lona finagalo. E tāua tele le iai o le faatuatua pe a tatou mananaʻo e faataunuu le faaeaga e sili ona tāua, o le mafuta vavalalata atu iā Ieova lo tatou Tamā i le lagi, ma faamamaluina o ia.

9. E faapefea ona faaalia mai e Ieova o loo ia silafia e tatou te manaʻomia le faatuatua?

9 E silafia e Ieova le tele e tatou te manaʻomia ai le faatuatua. O lea, ua ia aumaia  ai ni faaaʻoaʻoga ina ia aʻoaʻoina ai i tatou i le auala e atiaʻe ma faaalia ai le faatuatua. O se faamanuiaga le iai o ni tane faamaoni e taʻimua i faapotopotoga. Ua faapea mai lana Afioga: “Faaaʻoaʻo i lo latou faatuatua.” (Epe. 13:7) Na taʻua foʻi e Paulo se “vaega e toʻatele o molimau,” o tane ma fafine i taimi ua teʻa o ē na mataʻina lo latou faatuatua. (Epe. 12:1) O loo lisiina mai e Paulo i le Eperu mataupu e 11 nisi o auauna faatuatua a Ieova. O loo iai i le Tusi Paia ni tala moni e uiga i tane, fafine, talavou ma ē matutua, o ē e eseese o latou tulaga ma o ni tagata faatuatua. E mautinoa le tele o lesona e tatou te aʻoaʻoina mai iā i latou, a o tatou ola ai i nei taimi ua tau leai se faatuatua.

E Faapefea Ona Tatou Faaaʻoaʻo i le Faatuatua o Isi?

10. E faapefea i a tatou suʻesuʻega loloto ona fesoasoani iā i tatou e faaaʻoaʻo ai i auauna faamaoni i le Tusi Paia?

10 E lē mafai ona e faaaʻoaʻo i se tasi, seʻi vaganā ua e malamalama lelei e faatatau i lenā tagata. A o e faitauina lenei tusi, o le a e mātauina ai le tele o faamatalaga na maua mai i suʻesuʻega sa faia e faatatau i nei auauna faamaoni. Aiseā e te lē taumafai ai e suʻesuʻe atili e faatatau iā i latou na? Ia faia ni au suʻesuʻega loloto o le Tusi Paia, ma faaaogā auala eseese o loo iai e faia ai au saʻiliʻiliga atili. A o e manatunatu loloto i mea o loo e suʻesuʻeina, taumafai e faaāta mea o loo tutupu e pei lava o loo e iai i inā. Taumafai e malamalama i faalogona ma tulaga o tagata o loo iai. O le faia faapea, o le a pei ai nei auauna faamaoni o ni a tatou uō mamae.

11, 12. (a) E faapefea ona tatou aʻoaʻoina le tele o mea e faatatau iā Aperamo ma Sarai? (e) O ā ni aogā e maua mai i faaaʻoaʻoga a Hana, Elia, ma Samuelu?

11 E tele mea e tatou te aʻoaʻoina mai i nei auauna faamaoni, pe a faaaʻoaʻo iā i latou. Seʻi faapea ua valaaulia oe e faalautele lau auaunaga, atonu e te siitia atu i se isi oganuu o loo iai se manaʻoga mo le ʻautalaʻi, pe faataʻitaʻi se isi auala fou e molimau atu ai. A o e mafaufau ma tatalo e faatatau i lenā tofiga, pe e lē fesoasoani iā te oe le manatunatu loloto i le faaaʻoaʻoga a Aperamo? Na lotomalilie i laʻua ma Sarai e tuua le olaga tamaoaiga sa iai i Uro, ma sa matuā faamanuiaina i laʻua. O lea, a o tatou faaaʻoaʻo iā i laʻua, ua tele atu mea ua mafai ona tatou aʻoaʻoina mai ai.

12 Ae faapefea pe a faileagaina oe e se tasi ma e lagona ai le lotovaivai, ma iʻu ai lava ina e lē toe auai i ni sauniga? E mafai ona fesoasoani iā te oe le faaaʻoaʻoga a Hana e faia le filifiliga atamai, ma pei ai o ia o sau uō mamae. E leʻi avea uiga taufaifai o Penina  ma itu e taofia ai o ia mai i le tapuaʻi iā Ieova. Pe a e lagona foʻi le lotovaivai ona o faalogona o le lē aogā, e mafai ona faalaeiauina oe i le faaaʻoaʻoga a Elia, i le auala na faamāfanafanaina ai o ia e Ieova i taimi o ona puapuaga. E faamalosia foʻi talavou o loo feagai ma omiga i totonu o aʻoga i le faaaʻoaʻoga a Samuelu, i le auala na ia gaoioi ai e teena amioga leaga na faaalia e atalii o Eli i le faleʻie paia o Ieova.

13. Pe e avea lo tatou faaaʻoaʻo i le faatuatua o isi i le Tusi Paia ma itu e faapea ai ua itiiti lo tatou faatuatua? Faamatala.

13 Pe e avea lo tatou faaaʻoaʻo i le faatuatua o isi i le Tusi Paia ma itu e faapea ai ua itiiti lo tatou faatuatua iā Ieova? E leai. Ua faalaeiauina i tatou i lana Afioga e faaaʻoaʻo i ē na faaalia le faatuatua. (1 Kori. 4:16; 11:1; 2 Tesa. 3:7, 9) E iai foʻi nisi o le a tatou suʻesuʻeina i lenei tusi, sa faaaʻoaʻo i le faatuatua o isi auauna faamaoni sa muamua soifua iā i latou. O se faaaʻoaʻoga, i le Mataupu e 17 e foliga mai na taʻua e Maria upu a Hana, e faaalia ai sa faaaʻoaʻo Maria iā te ia. Po ua manatu ai iā Maria o sē e itiiti le faatuatua? E leai, na fesoasoani le faaaʻoaʻoga a Hana e atiaʻe ai le faatuatua o Maria, ma faamalosia ai le la faiā ma Ieova le Atua.

14, 15. O ā nisi o vaega mataʻina o lenei tusi, ma e faapefea ona tatou faaaogāina lelei?

14 Ua saunia lenei tusi e fesoasoani ina ia faamalosia ai lou faatuatua. O mataupu o loo mulimuli mai o se tuufaatasiga o mataupu mai le faasologa o mataupu “Faaaʻoaʻo i lo Latou Faatuatua,” lea na amata ona lomia i Le Olomatamata i le 2008 seʻia oo mai le 2013. Peitaʻi, o lea ua faaopoopo i ai fesili mo talanoaga ma manatunatu loloto i ai. O se tasi vala ua faia faapitoa mo lenei tusi, o le tele o ata felanulanuaʻi lea e faaalia ai talafaatusa, ae o isi ata sa lomia muamua ua faatetelē ma toe teuteu. Ua iai foʻi faasologa o taimi ma faafanua. Ua fuafuaina lenei tusi e faia ai suʻesuʻega a le tagata lava ia, suʻesuʻega a le aiga, faapea suʻesuʻega a le faapotopotoga. Atonu e iai foʻi nisi e mananaʻo e faitau leotele faatasi o se aiga tala o loo iai i lenei tusi.

15 Tau ina ia fesoasoani lenei tusi iā te oe, e faaaʻoaʻo ai i le faatuatua o auauna faamaoni a Ieova i taimi ua teʻa, ma faamalosia ai lou faatuatua a o e mafuta vavalalata atu iā Ieova lou Tamā i le lagi.