Skip to content

Skip to secondary menu

Skip to table of contents

Molimau a Ieova

Faa-Samoa

Faaa‘oa‘o i lo Latou Faatuatua

 MATAUPU E SEFULUIVA

Na Puipui, Tausi, ma Tumau

Na Puipui, Tausi, ma Tumau

1, 2. (a) O ā suiga na fesagaʻia e Iosefa ma lona aiga? (e) O le ā le tala lē lelei sa tatau ona taʻu atu e Iosefa i lana avā?

UA TUU e Iosefa le isi avega i luga o le asini. Seʻi mafaufau i le fetilofaʻi solo o Iosefa i le pogisa i le nuu o Peteleema, ma pōpō le itu o le manu ave avega. E mautinoa sa mafaufau o ia i le malaga umi o le a latou ō ai i Aikupito, auā o le a feagai ma tagata ese, e ese le gagana, ma e ese foʻi tū ma aga masani. O le a faapefea la i si ona aiga toʻaitiiti ona faamasani i le tele o na suiga?

2 E leʻi faigofie iā Iosefa ona taʻu atu le tala lē lelei i si ana avā pele o Maria, ae na ia faamalosi lava ma taʻu atu i ai. Sa ia faamatala atu i si ana avā lana miti lea na taʻu mai ai e le agelu a le Atua le feʻau e faapea: O loo saʻili le tupu o Herota e fasiotia si a la tama! Ua tatau loa ona latou sosola ese. (Faitau le Mataio 2:13, 14.) Na matuā popole Maria. E faapefea ona manaʻo se tasi e fasiotia si ana tama, e lē o iloa se mea? E leʻi malamalama Maria ma Iosefa i le mea ua tupu, ae na la faatuatua atu pea iā Ieova ma sauni loa e ō ese.

3. Faamatala le taimi ma lagona na oo iā Iosefa a o sosola ese ma lona aiga mai Peteleema. (Tagaʻi foʻi i le ata.)

3 A o momoe le aai o Peteleema, ae sosola ese loa Iosefa, Maria ma Iesu i le pogisa. Atonu na tau mafaufau Iosefa po o le ā o le a tupu, a o ia taʻitaʻiina atu lona aiga i le itu i saute ma ua amata ona tafa mai ata i le itu i sasaʻe. O le a faapefea ona puipuia e se kamuta faatauvaa lona aiga mai i taʻitaʻi malolosi? Po o le a mafai pea ona ia saunia mea e manaʻomia mo lona aiga? Po o le a mafai ona ia tauaveina lenei tiute tāua mai iā Ieova le Atua, e vaavaai ma tausia aʻe lenei tamaitiiti faapitoa? Na feagai Iosefa ma le tele o luʻi. A o tatou iloiloina auala na ia fesagaʻia ai na luʻi, o le a tatou iloa ai le māfuaaga e tatau ai i tamā i aso nei ma i tatou uma, ona faaaʻoaʻo i lona faatuatua.

Na Puipuia e Iosefa Lona Aiga

4, 5. (a) Na faapefea ona suia le olaga o Iosefa? (e) O le ā le faamatalaga a le agelu na faamalosia ai Iosefa?

4 I ni masina muamua atu i lona nuu i Nasareta, na suia ai le  olaga atoa o Iosefa ina ua faamau atu i le afafine o Heli. Na iloa lelei e Iosefa o Maria o se taupou lelei ma faamaoni, ae o lenei ua tō o ia! Na taumafai Iosefa e faateʻa faalilolilo Maria ina ia puipuia ai o ia mai i le faalumaina. * Peitaʻi na faaali atu se agelu iā te ia e ala i se miti, ma faamatala atu o le tō a Maria e mai i le agaga paia o Ieova. Na faapea atu foʻi le agelu, o le pepe lea o le a fanau mai e “faaolaina e ia ona tagata mai i a latou agasala.” Na ia faamautinoa atili atu iā Iosefa: “Aua e te fefe e ave Maria lau avā i lou aiga.”—Mata. 1:18-21.

5 O le mea tonu lenā na faia e lenei tamāloa faamaoni ma usiusitaʻi o Iosefa. Na ia tauaveina lenei tiute tauave tāua: o le tausia aʻe ma le vaavaaia lelei o se tamaitiiti e lē o sona atalii, ae o sē e matuā tāua lava i le Atua. Mulimuli ane, o lona usiusitaʻi i le poloaʻiga a le malo, na ia ave ai lana avā i Peteleema mo le tusigāigoa, ma o i inā na fanau ai le pepe.

6-8. (a) O ā mea na tutupu na toe suia ai olaga o Iosefa ma lona aiga? (e) E faapefea ona tatou iloa o Satani na auina mai le “fetu”? (Tagaʻi foʻi i le faaopoopoga.)

6 E leʻi toe foʻi Iosefa ma lona aiga i Nasareta. Nai lo lea, sa latou faamautū i Peteleema, e tusa ma ni nai maila le mamao ese mai i Ierusalema. E ui ina matitiva, ae na faia e Iosefa mea uma e na te mafaia ina ia puipuia Maria ma Iesu, mai i le mafatia po o le mananaʻo foʻi i ni mea. E leʻi leva ae latou nonofo loa i se tamaʻi fale. O le taimi lenā ua avea Iesu o se tamaitiiti, atonu ua silia ma le tausaga lona matua, ae faafuaseʻi loa ona toe suia o latou olaga.

7 Na ō atu i lo latou fale ni tamāloloa e saʻiliʻili i fetu mai i Sasaʻe, atonu mai i Papelonia. Na latou mulimuli i se “fetu” seʻia oo mai i le fale o Iosefa ma Maria, ma na latou saʻili mo le tamaitiiti o le a fai ma tupu o tagata Iutaia. Na faaalia e nei tamāloloa le faaaloalo.

8 E tusa lava pe na latou iloa pe e leai foʻi, ae o le gaoioiga na latou faia na lamatia ai le ola o Iesu. Na taʻitaʻiina muamua i latou e le “fetu” i Ierusalema ae e lē i Peteleema. * O i inā na latou taʻuina atu ai i le tupu leaga o Herota, o loo latou saʻilia le tamaitiiti o le a avea ma tupu o Iutaia, ma na atili ai ona lotoleaga ma ita Herota.

9-11. (a) O ā auala na sili atu ai ona malosi Ieova nai lo o Herota ma Satani? (e) O le ā le auala o loo faamatalaina ai le malaga i Aikupito i aʻoaʻoga faa-apokerifa?

9 Ae e tatou te fiafia ona e iai se isi malosiaga e sili atu nai lo o Herota ma Satani. E faapefea? Na aumaia e nei tagata saʻiliʻili fetu  ni meaalofa ma e leʻi mananaʻo i se taui. E mautinoa o se mea uiga ese iā Iosefa ma Maria le faafuaseʻi ona mauaina o “meaalofa o auro, o mea manogi ma muro”—o ni ʻoa e taugatā tele! Na fuafua tagata e saʻiliʻili i fetu e toe foʻi e taʻu i le tupu o Herota le nofoaga tonu o loo iai le tamaitiiti. Peitaʻi, na faasalavei ane Ieova e ala i se miti, ma faatonuina tagata e saʻiliʻili i fetu ina ia toe foʻi i o latou aiga i se isi auala.—Faitau le Mataio 2:1-12.

10 E leʻi leva ona ō ese le ʻau saʻiliʻili i fetu, ae maua loa e Iosefa se lapataʻiga mai i se agelu a Ieova e faapea: “Inā tulaʻi ia ma ave le tamaitiiti ma lona tinā ma sosola i Aikupito, ma nonofo ai seʻia ou toe fai atu; auā o loo saʻili Herota e fasioti i le tamaitiiti.” (Mata. 2:13) O lea, e pei ona taʻua i le amataga o le mataupu, na vave lava ona usiusitaʻi Iosefa. Sa ia faamuamua le saogalemu o lona atalii nai lo o se isi lava mea, ma ave lona aiga i Aikupito. Ona sa tuuina atu e le ʻausaʻiliʻili i fetu faapaupau ni meaalofa taugatā i le aiga, o lea la ua latou maua ai ni tupe e fesoasoani iā i latou i le nofoaga o le a aumau ai.

Na gaoioi ma le faautauta ma le lē manatu faapito Iosefa ina ia puipuia lona atalii

11 Ua taʻua mulimuli ane i talatuu ma aʻoaʻoga faa-apokerifa, na faavavega ona faapuupuu e Iesu la latou faigāmalaga i Aikupito, puipuia i latou mai i tagata gāoi, ma loloʻu faavavega le laau o le pama ina ia maua ai e lona tinā ni fua. * Ae o le mea moni, o se faigāmalaga umi, faigatā, ma sa latou agaʻi atu i se mea e lē masani ai.

Na lotomalie Iosefa e tuua se olaga lelei ina ia puipuia lona aiga mai tulaga lamatia

12. O le ā ua aʻoaʻoina e mātua mai iā Iosefa?

12 E tele ni mea e aʻoaʻoina e mātua mai iā Iosefa. Na lotomalie o ia e tuua lana galuega ma se olaga lelei ina ia puipuia lona aiga mai i tulaga e lamatia ai. E manino mai, na vaai o ia i lona aiga o se meaalofa tautele mai iā Ieova. O loo tausia aʻe foʻi e mātua i aso nei a latou fanau i se lalolagi leaga, o loo tumu i taaʻiga e mafai ona lamatia ma faaleagaina ai fanau. Maʻeu le lelei o faaaʻoaʻoga a tamā ma tinā ia o loo gaoioi ma le faautauta e pei o Iosefa, e ala i le taumafai malosi e puipuia a latou fanau mai i aafiaga leaga!

Na Tausia e Iosefa Lona Aiga

13, 14. Aiseā na toe foʻi ai Iosefa ma lona aiga i Nasareta?

13 E foliga mai e leʻi umi ona nonofo le aiga i Aikupito, ona sa  taʻu atu e le agelu iā Iosefa ua maliu Herota, o lea na toe ave ai e Iosefa lona aiga i lo latou nuu. Na taʻua i se valoaga anamua o le a valaauina e Ieova lona atalii “mai Aikupito.” (Mata. 2:15) Na fesoasoani Iosefa i le faataunuuina o lenā valoaga, ae o fea nei o le a ave i ai lona aiga?

14 Na faautauta Iosefa. Na popole o ia i lē na sui atu iā Herota, o Arekilao, o lē e faasauā foʻi ma fasioti tagata. O le taʻitaʻiga a le Atua na ave ai e Iosefa lona aiga i le itu i mātū ina ia mamao ese mai i Ierusalema ma ana taaʻiga, ma toe foʻi atu i lona nuu i Nasareta i Kalilaia. O i inā na tausia aʻe ai lo la aiga ma Maria.—Faitau le Mataio 2:19-23.

15, 16. Na faapeʻī le galuega a Iosefa, ma atonu o ā meafaigaluega sa ia faaaogāina?

15 Sa faafaigofie le auala na latou ola ai, ae mamafa galuega sa latou faatinoina. O loo taʻua i le Tusi Paia Iosefa o se kamuta, ma o loo faaaogāina ai se upu e uiga atu i auala eseese e pei o le tātuuina i lalo o laau, toso mai ma sauni e fausia ai se fale, o vaa, o auala laupapa lāiti, o taavale toso, uili, amo, ma meafaigaluega uma e faaaogā i le faatoʻaga. (Mata. 13:55) O se galuega e faigatā. I taimi o le Tusi Paia, sa masani ona galulue kamuta i luma o o latou fale, po o se isi fale i tafatafa ane.

16 Na faaaogā e Iosefa le tele o meafaigaluega eseese, lea e foliga mai na tuu atu e lona tamā. Atonu na ia faaaogāina se sikuea, fua e tautau, o se penisina, toʻi, ʻili, agaese, samala uʻamea, samala laau, o se auvili, o kelū eseese, ma atonu ma ni nai fao, e ui lava ina taugatā.

17, 18. (a) O le ā sa aʻoaʻoina e Iesu mai i lona tamāfai? (e) Aiseā na tatau ai ona galue mamafa Iosefa?

17 Seʻi mafaufau iā Iesu a o laʻitiiti, o loo matamata atu i lona tamāfai a o galue. E mautinoa sa maofa Iesu a o tulimataʻia gaoioiga uma a lona tamā, i le malolosi o ona tauʻau ma lima, ma lona tomai tele. Atonu na amata ona faasino e Iosefa i lona atalii laʻitiiti le auala e faia ai nisi o mea faigofie, e pei o le faalamolemole o laupapa i se paʻu iʻa ua mago. Atonu foʻi na ia aʻoaʻoina Iesu i le eseesega o laupapa o loo ia faaaogāina, e pei o le laau o le sukamoru mati, tapeneto, po o le olive.

Na toleni e Iosefa lona atalii ina ia avea ma kamuta

 18 Na iloa e Iesu, o na lima malolosi na tātuuina i lalo laau, vaneina ogālaau, ma tuʻituʻiina faatasi laupapa, o lima foʻi na na tausia ma faamāfanafanaina o ia, o lona tinā, ma ona uso ma tuafāfine. Ioe, ua toʻatele le aiga o Iosefa ma Maria, ma a itiiti mai e toʻaono la la fanau, atoa ai ma Iesu. (Mata. 13:55, 56) Na tatau ona galue mamafa Iosefa ina ia tausia ma fafagaina i latou uma.

Na iloa e Iosefa e sili ona tāua le tausia o lona aiga i le itu faaleagaga

19. Na faapefea ona tausia e Iosefa lona aiga i le itu faaleagaga?

19 Peitaʻi, na iloa lelei e Iosefa e sili atu ona tāua le tausia o lona aiga i le itu faaleagaga, o lea na ia faaalu ai se taimi e aʻoaʻoina ai lana fanau e uiga iā Ieova le Atua ma ana tulafono. E masani ona ia ave lona aiga i le sunako, lea na faitau leotele ma faamatalaina ai le Tulafono. Atonu na tele ni fesili a Iesu, ma na taumafai malosi Iosefa e faamalieina le galala faaleagaga o le tama. Na ave foʻi e Iosefa lona aiga i Ierusalema i tausamiga faalelotu. Ina ia auai i le Paseka faaletausaga, atonu na manaʻomia e Iosefa ni vaiaso se lua e malaga atu ai mo le tusa ma le 75 maila (120 km), ma toe foʻi mai.

Sa masani ona ave e Iosefa lona aiga e tapuaʻi i le malumalu i Ierusalema

20. E faapefea ona mulimuli ulu o aiga Kerisiano i le faaaʻoaʻoga a Iosefa?

20 O loo mulimuli foʻi ulu o aiga Kerisiano i aso nei i lenā lava faaaʻoaʻoga. E latou te faia mea uma mo a latou fanau, ma faamuamua toleniga faaleagaga nai lo o se isi lava mea, e aofia ai ma le tausiga i le itu faaletino. E latou te faimalaga foʻi mo se taimi umi ina ia auai ma a latou fanau i sauniga ma fonotaga faa-Kerisiano. E pei o Iosefa, e latou te iloa e leai se isi mea e sili atu ona lelei e latou te faia mo a latou fanau.

“Ua Ma Fiu”

21. (a) O ā sauniuniga sa faia e Iosefa ma lona aiga i le vaitaimi o le Paseka? (e) O le ā le taimi na iloa ai e Iosefa ma Maria e latou te lē o faatasi ma Iesu?

21 I le 12 tausaga o Iesu, na ave ai e Iosefa lona aiga i Ierusalema e pei ona masani ai. O le taimi lea o le tausamiga o le Paseka ma e faimalaga faatasi atu aiga toʻatele i a latou taavale toso, e ui atu i aai e lauolaola ai laau. E usuina e le toʻatele salamo a ē ō aʻe, a o latou lata atu i fanua maupuʻepuʻe e lē mamao ese mai i Ierusalema. (Sala. 120-134) Sa ono faatumulia le aai i le faitau selau afe o tagata. Mulimuli ane, ona toe foʻi atu lea o aiga ma a latou taavale toso i o latou nuu. E lē taumatea na tele ni mea na fai e Iosefa ma Maria, o lea na manatu ai atonu o loo ō mai faatasi Iesu  ma isi tagata, po o tauaiga. Peitaʻi, ina ua mavae le aso atoa talu ona latou tuua Ierusalema, ae faatoʻā iloa e lē o iai Iesu!—Luka 2:41-44.

22, 23. (a) O le ā na faia e Iosefa ma Maria ina ua iloa e latou te lē o faatasi ma Iesu? (e) O le ā le faamatalaga a Maria ina ua maua Iesu?

22 Na matuā popole Iosefa ma Maria, ma toe foʻi i Ierusalema e saʻili Iesu. Seʻi manatu i le gaogao ma le taaligoligoa o le aai a o la tauvalaau atu le igoa o la la tama. Faamata o fea o iai le tama? Pe na taumānatu Iosefa ua lē taulau o ia i le tausia o lenei meaalofa tāua mai iā Ieova, ina ua mavae aso e tolu e leʻi maua lava le tama? Mulimuli ane ona la ō atu loa lea i le malumalu. Na la saʻili solo seʻia oo ina tau atu i se potu o loo talanoa ai tamāloloa e atamamai  i le Tulafono, ae o loo lotolotoi ai le talavou o Iesu. Seʻi manatu i le mapu o faalogona o Iosefa ma Maria!—Luka 2:45, 46.

23 Na faalogologo atu Iesu i nei tamāloloa atamamai ma tuufesili atu iā i latou. Na matuā ofo tamāloloa i le poto o Iesu ma ana tali, ma na matuā maofa foʻi Iosefa ma Maria. E lē o taʻua i le Tusi Paia se tala a Iosefa na fai, ae na tautala atu ma le manino Maria mo i laʻua ma faapea atu: “Laʻu tama e, o le ā le mea ua e faapea mai ai iā i maʻua? Ua ma fiu ma lou tamā e suʻe oe.”—Luka 2:47, 48.

24. O le ā le faamatalaga moni a le Tusi Paia e faatatau i le tausiga a mātua?

24 O loo tusia i le Tusi Paia se ata manino o le mea moni e uiga i le tausiga a mātua. E iai taimi e matuā faigatā ai, e tusa lava pe e lelei atoatoa le tamaitiiti! O le tausiga faamatua i aso nei i se lalolagi  leaga e ono oo mai ai le “fiu,” ae e faamāfanafanaina tamā ma tinā i le iloa, o loo faailoa mai i le Tusi Paia luʻi o loo latou fesagaʻia.

25, 26. O le ā le tali atu a Iesu i ona mātua, ma atonu o ā faalogona na oo iā Iosefa?

25 Sa iai Iesu i le nofoaga e na te lagonaina ai le vavalalata iā Ieova, lona Tamā i le lagi, ma naunau e taofimau mea uma na ia aʻoaʻoina. O lea na tali atu ai o ia i ona mātua ma le faamaoni: “Aiseā na lua suʻeina ai aʻu? Pe lua te lē iloa ea e tatau ona ou iai i le fale o loʻu Tamā?”—Luka 2:49.

26 E mautinoa na mafaufau Iosefa i na upu i le tele o taimi, ma atonu na ia lagona ai le mitamita. O le mea moni, na galue malosi o ia e aʻoaʻoina lona ataliifai ina ia iai ni ona faalogona faapena e uiga iā Ieova le Atua. E oo ane i lenā taimi o le olaga o Iesu, ua ia iloa le ituaiga o “tamā” e alofa, ona o lana faiā ma Iosefa.

27. Pe afai o oe o se tamā, o le ā le faaeaga ua tuu atu iā te oe, ma aiseā e tāua ai ona manatua le faaaʻoaʻoga a Iosefa?

27 Pe afai o oe o se tamā, o loo iā te oe le faaeaga o le aʻoaʻo o lau fanau, ina ia iloa po o oe o se tamā alofa ma tausia lelei lou aiga. I se tulaga tutusa, pe afai e iai sau fanaufai, ia manatua le faaaʻoaʻoga a Iosefa ma ia tausia i latou taʻitoʻatasi i se auala faapitoa ma faapelepele. Ia fesoasoani iā i latou ina ia mafuta vavalalata atu i lo latou Tamā i le lagi, o Ieova le Atua.—Faitau le Efeso 6:4.

Na Tumau ma le Faamaoni Iosefa

28, 29. (a) O le ā o loo taʻua i le Luka 2:51, 52 e faatatau iā Iosefa? (e) Na faapefea ona fesoasoani Iosefa iā Iesu ina ia tuputupu aʻe i le atamai?

28 E ui e itiiti ni tala o le olaga o Iosefa o loo taʻua i le Tusi Paia, ae e tāua tele ona iloiloina ma le totoʻa. E tatou te faitau e faapea na “gauaʻi pea [Iesu] iā i laʻua,” po o ona mātua. E tatou te iloa ai foʻi na “tupu le atamai ma le tino o Iesu, ma ua alofaina o ia e  le Atua atoa ma tagata.” (Faitau le Luka 2:51, 52.) O le ā e tatou te iloa mai i na upu e uiga iā Iosefa? E mautinoa e tele ni mea. E tatou te aʻoaʻoina ai sa faaauau pea ona taʻimua Iosefa i le tausia o lona aiga, auā o lea na faaaloalogia lana pule e lona atalii lelei atoatoa, ma tumau pea ona gauaʻi i ai.

29 Na tatou aʻoaʻoina foʻi na faaauau ona tuputupu aʻe le atamai o Iesu, ma e mautinoa sa telē se vaegafai a Iosefa i lea itu. I na aso, sa iai se faataoto a tagata Iutaia e faapea, e na o tagata mauoloa e mafai ona mauaina le atamai; ae o tagata faigaluega e pei o kamuta, faifaatoʻaga, po o tagata fai uʻamea, “e lē mafai ona latou faia ni faamasinogatonu; ma e lē tatau ona iai i latou i mea o loo talanoaina ai faataoto.” Na mulimuli ane faamaonia e Iesu le sesē o lenā faataoto. A o laʻitiiti, e mautinoa na masani ona faalogo o ia i lona tamāfai o se kamuta faatauvaa, o aʻoaʻoina i latou e uiga iā Ieova ma lana “faamasinogatonu”! O le mea moni, sa masani ona faia faapea e Iosefa.

30. O le ā le faaaʻoaʻoga ua faataatia e Iosefa mo ulu o aiga i aso nei?

30 E mafai foʻi ona tatou iloa ni faamaoniga o le vaegafai a Iosefa i le tuputupu aʻe o le tino o Iesu. Ona sa lelei ona tausia Iesu, sa tuputupu aʻe o ia ma avea o se alii malosi ma mālōlōina. E faaopoopo atu i lenā, na aʻoaʻoina e Iosefa lona atalii ina ia lelei i galuega faaletino. E lē gata ina iloa Iesu o le atalii o se kamuta, ae o ia foʻi “o le kamuta.” (Mare. 6:3) Na taulau manuia toleniga a Iosefa. E faaaʻoaʻo foʻi ma le atamai ulu o aiga iā Iosefa, e ala i le tausia o a latou fanau, ma faamautinoa ua mafai ona latou tausia i latou lava.

31. (a) O le ā ua faaalia i suʻesuʻega e faatatau i le taimi na maliu ai Iosefa? (Faaaofia ai ma le  pusa.) (e) O le ā le faaaʻoaʻoga ua faataatia e Iosefa mo i tatou?

31 O le taimi lava na taʻua ai i le Tusi Paia ua papatiso Iesu i le 30 o ona tausaga, e leʻi toe taʻua ai lava Iosefa. E foliga mai na avea Maria o se fafine ua oti lana tane i le taimi na amata ai le faiva a Iesu. (Tagaʻi i le pusa “O Anafea na Maliu ai Iosefa?”) Peitaʻi, ua faataatia e Iosefa se faaaʻoaʻoga manino o se tamā e puipui i lona aiga, tausia i latou, ma tumau ma le faamaoni seʻia oo i le iʻuga. E mafai e so o se tamā, so o se ulu o se aiga, po o so o se Kerisiano ona maua aogā mai i le faaaʻoaʻo i le faatuatua o Iosefa.

^ pala. 4 I na aso, na manatu i se faamau e taitutusa ma se faaipoipoga.

^ pala. 8 O lenei “fetu” e lē o se fetu e masani ona vaaia, ma e leʻi auina mai foʻi e le Atua. Nai lo lea, o se tasi lea o vala o le fuafuaga a Satani na faaaogā ina ia fasiotia ai Iesu.

^ pala. 11 O loo taʻua manino i le Tusi Paia, na faatoʻā faia le vavega muamua a Iesu, ʻo le amataga o ana faailoga,’ ina ua uma lona papatisoga.—Ioa. 2:1-11.