Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 5

Ua Faasusulu Mai e le Tupu le Malamalama e Faatatau i le Malo

Ua Faasusulu Mai e le Tupu le Malamalama e Faatatau i le Malo

MANATU AUTŪ O LE MATAUPU

Ua malamalama tagata o le Atua i upu moni tāua e faatatau i le Malo, o ona pule ma tagatānuu, faapea le manaʻomia ona faaalia o le faamaoni

1, 2. O le ā le itu na avea ai Iesu o se taʻitaʻi atamai?

SEʻI faapea o loo e iai i se vaega o tagata o loo maimoa i se aai matagofie, ma o loo taʻitaʻia outou e se tagata ua lava le poto masani i lea galuega. E manaʻomia ona e mulimuli i le taʻitaʻiga mai i lenei tagata, auā e fou lenei aai iā te oe. A o faagasolo le maimoaga, atonu e tou te fesili atu ma nisi o turisi iā te ia e faatatau i nisi o vaega o le aai e leʻi oo i ai le matamataga. Peitaʻi, e na te lē faamatalaina mai iā te outou na vala, ona e faatali o ia seʻia oo i le taimi talafeagai. E te maofa i le atamai tele o lea tagata, auā e faatoʻā ia faamatalaina mai le tele o mea i le taimi e tatau ona e iloa ai.

2 E taitutusa le tulaga o nei turisi ma Kerisiano moni i aso nei. E tatou te naunau e iloa le tele o mea matagofie e faatatau i le Malo o le Atua, o “se aai e iai ona faavae moni.” (Epe. 11:10) A o iai Iesu i le lalolagi, sa ia faailoa atu i ona soo le tele o mea loloto e faatatau i le Malo. Ae pe na ia taliina a latou fesili ma faamatala atu iā i latou mea uma i le taimi e tasi? E leai. Na ia fetalai i le Ioane 16:12: “E tele mea ou te fia taʻu atu iā te outou, ae e lē mafai ona outou malamalama i na mea uma i le taimi nei.” O le atamai tele o Iesu, na ia lē faamatalaina ai i ona soo le tele o mea e leʻi oo i le taimi e latou te malamalama ai.

3, 4. (a) Na faapefea ona aʻoaʻoina pea e Iesu ona soo e faatatau i le Malo o le Atua? (e) O le ā o le a iloiloina i lenei mataupu?

3 Na fetalai Iesu i upu o loo i le Ioane 16:12, i lona pō mulimuli i le lalolagi. Na faapefea ona ia aʻoaʻoina tagata faamaoni e faatatau i le Malo o le Atua, ina ua mavae lona maliu? Na ia faamautinoa atu i ona aposetolo, ʻo le agaga o le upu moni, o le a taʻitaʻia i latou i upu moni uma.’ * (Ioa. 16:13) E tai pei le agaga paia o se tagata onosaʻi o loo taʻitaʻia i tatou. O le auala lea ua faaaogā e Iesu e aʻoaʻoina ai ona soo, i mea uma e latou te fia malamalama ai e faatatau i le Malo i le taimi talafeagai.

4 Seʻi o tatou iloiloina le auala o loo taʻitaʻia ai e le agaga paia o Ieova, Kerisiano faamaoni i le poto moni e faatatau i le Malo. Muamua, o le a tatou iloiloina le malamalamaga e  faatatau i le taimi na faavaeina ai le Malo. E lē gata i lea, o ai o le a pule i le Malo ma o ai e faia aʻe ai tagatānuu, faapea le faamoemoe mo nei vaega e lua. Ae o le vala mulimuli, o le auala na iloa ai e soo moni o Keriso le malamalamaga saʻo e faatatau i le faamaoni e tatau ona latou faaalia.

Malamalama i se Tausaga Iloga

5, 6. (a) O ā manatu sesē sa iai i Tagata Aʻoga o le Tusi Paia e faatatau i le faavaeina o le Malo ma le seleselega? (e) Aiseā e lē tatau ai ona tatou faapea atu e leʻi taʻitaʻia e Iesu ona soo faamaoni ona o na manatu sesē?

5 E pei ona taʻua i le Mataupu e 2, ua leva ona iloa e Tagata Aʻoga o le Tusi Paia, o le 1914 o se tausaga iloga i le faataunuuina o valoaga o le Tusi Paia. Sa latou talitonu na amata le faatasi mai o Keriso i le 1874. Na amata ona ia pule i le lagi i le 1878, ae na pule atoatoa le Malo iā Oketopa i le 1914. Na latou talitonu foʻi na amata le seleselega mai le 1874 seʻia oo i le 1914, ma o le a faaiʻu i le aoaoina o le ʻaufaauuina i le lagi. Pe e mafai la ona faapea atu e leʻi taʻitaʻia e Iesu tagata faamaoni e ala i le agaga paia, ona o manatu sesē na latou talitonu i ai? E leai.

6 Seʻi o tatou toe mafaufau i le talafaatusa i le amataga. Pe e mafai ona faapea atu e lē maufaatuatuaina le tagata o loo taʻitaʻia le maimoaga, ona o le lē taliina o fesili fia iloa a turisi? E leai. I se tulaga talitutusa, e iai taimi e taumafai ai tagata o le Atua e malamalama i nisi o vala o lona finagalo, a o leʻi oo i le taimi e taʻitaʻia ai i latou e le agaga paia i na upu moni. E mautinoa o loo taʻitaʻia e Iesu i latou. O lea, ua lotomalilie tagata faamaoni e faasaʻoina i latou, ma lotomaulalo foʻi e fetuutuunaʻi o latou manatu.—Iako. 4:6.

7. O le ā le malamalama faaleagaga na faamanuiaina ai tagata o le Atua?

7 Ina ua mavae le 1919, na faamanuiaina ai tagata o le Atua i le faateleina o le malamalama faaleagaga. (Faitau le Salamo 97:11.) I le 1925, na iai i le Watch Tower se mataupu iloga na faamatuaina, “Ua Fanau Mai le Nuu.” Na aumaia i lenā mataupu faamaoniga faale-Tusi Paia o le faavaeina o le Malo faa-Mesia i le 1914, lea e faataunuuina ai le valoaga e faatatau i le fanau o le fafine faalelagi a le Atua, o loo faamauina i le Faaaliga e 12. * Na faailoa mai foʻi i lenā mataupu, o sauāga ma puapuaga na oo i tagata o le Atua a o faagasolo le Taua Muamua a le Lalolagi, na faamaonia ai na lafoina ese Satani mai i le lagi, ma ua ia “lotoa tele, auā ua na iloa ua puupuu lona taimi.”—Faaa. 12:12.

8, 9. (a) Na faapefea ona iloa le tāua o le Malo o le Atua? (e) O ā fesili o le a tatou iloiloina?

8 O le ā le tāua o le Malo? I le 1928, na amata ai ona faamatilatila i le Watch Tower, e sili atu ona tāua le Malo nai lo o lo tatou faaolataga e ala mai i le togiola. O le māfuaaga, o le Malo faa-Mesia o le a faapaiaina ai e Ieova lona suafa, faamaonia ai le tonu o lana pule, ma faataunuu ai lona finagalo mo le fanau a tagata.

9 O ai o le a pule faatasi ma Keriso i lenā Malo? O ai e  faia aʻe ai tagatānuu o le Malo? O le ā le galuega o le a faia e soo o Keriso?

Ua Taulaʻi Atu le Seleselega i le ʻAufaauuina

10. O le ā ua leva ona iloa e tagata o le Atua e faatatau i le 144,000?

10 I tausaga a o leʻi oo i le 1914, ua leva ona iloa e Kerisiano moni, o le a pule faatasi Iesu ma ona soo faamaoni e 144,000 i le lagi. * Na iloa e Tagata Aʻoga o le Tusi Paia, o lenā numera o se fuainumera moni, ma na amata ona filifilia mai i le uluaʻi senituri T.A.

11. Na faapefea ona faasolo ina malamalama sui o le tamaʻitaʻi faaipoipo a Keriso, e faatatau i lo latou tofiga i le lalolagi?

11 O le ā e tatau ona faia e nei sui o le tamaʻitaʻi faaipoipo a Keriso a o iai i le lalolagi? Sa latou iloa na faamatilatila e Iesu le galuega talaʻi, ma e fesootaʻi atu i le vaitau o le seleselega. (Mata. 9:37; Ioa. 4:35) E pei ona taʻua i le Mataupu e 2, sa latou manatu e 40 tausaga le umi o le vaitau o le seleselega, ma e faaiʻu i le aoaoina o le ʻaufaauuina i le lagi. Peitaʻi, sa faaauau pea le galuega talaʻi ina ua mavae lenā 40 tausaga. O lea, na manaʻomia ai se isi fetuunaʻiga atili o lo tatou malamalamaga. Peitaʻi, ua tatou iloa nei na amata le vaitau o le seleselega i le 1914. O lenā vaitaimi na tuueseese ai saito ma le vao leaga, po o le vavaeesea o Kerisiano moni mai i Kerisiano faatagāfai. O lea, ua oo i le taimi e aoaoina ai isi sui o loo totoe o le vasega faalelagi.

Na amata le vaitau o le seleselega i le 1914 (Tagaʻi i le palakalafa 11)

12, 13. Na faapefea ona faataunuuina i aso e gata ai, le valoaga a Iesu e faatatau i taleni ma taupou e toʻasefulu?

12 Talu mai le 1919, o loo faaauau pea ona taʻitaʻia e Iesu le pologa faamaoni ma le faautauta ina ia faatāua le galuega talaʻi. Sa ia tofia i latou e galulue i lenā galuega i le uluaʻi senituri. (Mata. 28:19, 20) Na ia faailoa atu foʻi uiga e manaʻomia e ona soo faauuina e faatinoina ai le galuega talaʻi. E faapefea? I le talafaatusa e faatatau i taupou e toʻasefulu, na faailoa mai ai e Iesu e tatau ona mataala faaleagaga le ʻaufaauuina, ina ia taulau ai lo latou sini o le iai i le ʻaiga o le faaipoipoga i le lagi. I lenā faaipoipoga, o loo faaāta mai ai e le ʻaufaauuina le “tamaʻitaʻi faaipoipo.” (Faaa. 21:2) I lana talafaatusa foʻi e faatatau i taleni, na ia faailoa mai ai  o le a maelega ona soo faauuina i le galuega talaʻi, lea ua tuuina atu iā i latou.—Mata. 25:1-30.

13 A o faagasolo le selau tausaga ua mavae, na faamaonia atu e le ʻaufaauuina lo latou mataala ma le maelega. O le a tauia lo latou mataala. Ae pe e na o le pau le fuafuaga o le galuega o le seleselega, o le aoaoina lea o sui o loo totoe o le 144,000?

Ua Aoaoina e le Malo Ona Tagatānuu i le Lalolagi!

14, 15. O ā vaega e fā na talanoaina i le tusi The Finished Mystery?

14 Ua loa tausaga o fia malamalama tagata faamaoni e faatatau i le “motu o tagata e toʻatele,” lea o loo taʻua i le Faaaliga 7:9-14. Peitaʻi, a o leʻi oo i le taimi a Keriso e faailoa mai ai po o ai lenei vaega, e tele manatu sesē sa iai e faatatau i lenei aʻoaʻoga manino o le upu moni, lea ua tatou aeae ai i le taimi lenei.

15 I le 1917, na taʻua ai i le The Finished Mystery e “lua vaega o le a maua le faaolataga i le lagi, e lua foʻi vaega o le a maua le faaolataga i le lalolagi.” O ai e faia aʻe ai nei vaega e fā? Muamua, o le 144,000, o i latou ia e pule faatasi ma Keriso. Lona lua, o le motu o tagata e toʻatele. I le taimi muamua, sa iai le manatu o le vaega lenei e faia aʻe i ē e faapea mai o Kerisiano, ae o loo auai pea i na lotu. Sa manatu foʻi o i latou nei e itiiti lo latou faatuatua e mafai ai ona tutumau faamaoni, ma o le māfuaaga lea na maulalo ai o latou tulaga i le lagi. Ae mo le lalolagi, sa latou manatu o le vaega lona tolu, e faia aʻe i auauna faamaoni anamua a Ieova, e pei o Aperaamo, Mose ma isi. O i latou na o le a vaavaaia le vaega lona fā, lea e faia aʻe i le fanau a tagata.

16. O ā malamalamaga faaleagaga na faasusuluina mai i le 1923 ma le 1932?

16 Na faapefea ona taʻitaʻia e le agaga paia soo faamaoni o Keriso, i le aʻoaʻoga manino o le upu moni lea ua tatou sapi ai i le taimi nei? Na faasolosolo lava ona susulu mai le malamalama faaleagaga. I le 1923, na taulaʻi atu ai le Watch Tower i se vaega e leai so latou faanaunauga e ola i le lagi, ae o le a ola e faavavau i le lalolagi. I le 1932, na talanoaina ai foʻi i le Watchtower Ionatapa, o lē na aufaatasi atu e lagolagoina Ieu le tupu faauuina o Isaraelu, i le taua faasaga i tapuaʻiga sesē. (2 Tu. 10:15-17) Na taʻua i lenā mataupu, e iai se vaega o tagata i aso nei e pei o Ionatapa. Na taʻua ai e faapea, o le a faasaoina e Ieova lenei vaega “mai iā Amaketo,” ma o le a ola i luga o le lalolagi.

17. (a) O le ā le malamalama faaleagaga na faasusulu mai i le 1935? (e) Na faapefea ona aafia Kerisiano faamaoni i le malamalamaga fou e faatatau i le motu o tagata e toʻatele? (Tagaʻi i le pusa “ Sa Matuā Fiafia le Toʻatele.”)

17 O le 1935, na faasusulu mai ai se malamalama faaleagaga. I le tauaofiaga na faia i Washington, D.C., na faailoa mai ai o le motu o tagata e toʻatele o se vaega e ola i le lalolagi, ma e tutusa ma mamoe lea na taʻua i le talafaatusa a Iesu e faatatau i mamoe ma ʻoti. (Mata. 25:33-40) O i latou o se vaega o “isi mamoe,” lea na fetalai Iesu: “E tatau foʻi  ona ou aumaia i latou.” (Ioa. 10:16) Na faapea mai le uso o Rutherford: “Pe e mafai ona tutulaʻi mai i latou e faamoemoe e ola e faavavau i le lalolagi?” Na tutulaʻi le silia ma le ʻafa o le aofia. Na ia toe faapea mai: “Faauta! O le motu o tagata e toʻatele.” Na faagaeetia le toʻatele ina ua latou malamalama i lo latou faamoemoe i le lumanaʻi.

18. Na faapefea ona uaʻi atu soo o Keriso i le faiva i le fanua, ma o ā iʻuga na maua mai ai?

18 Talu mai le 1935, na amata ai ona taʻitaʻia e Iesu ona soo e uaʻi atu i le aoaoina o le motu o tagata e toʻatele, lea o le a faasaoina mai le puapuaga tele. I le taimi muamua, e foliga mai e leʻi toʻatele ni sui o le motu o tagata e toʻatele. Na faapea mai le uso o Rutherford: “E foliga mai e lē toʻatele le motu o tagata.” Peitaʻi, ua tatou vaaia i aso nei le faamanuia a Ieova i le galuega o le seleselega. O le taʻitaʻiga a Iesu ma le agaga paia, ua mafai ai ona avea le ʻaufaauuina ma a latou aumea o “isi mamoe” ma “lafu e tasi,” i lalo o le vaavaaiga a le “leoleo mamoe e toʻatasi,” e pei ona valoia e Iesu.

E leʻi faatalitalia e le uso o Rutherford o le a toʻatele le motu o tagata (Mai i le agavale i le taumatau: Nathan H. Knorr, Joseph F. Rutherford, ma Hayden C. Covington)

19. E faapefea ona faia so tatou sao i le faatoʻateleina o le motu o tagata e toʻatele?

19 O le toʻatele o tagata faamaoni o le a ola e faavavau i le lalolagi parataiso, lea o le a pule ai Keriso ma le 144,000. Pe e lē o se faaeaga le mafaufau loloto i le auala ua taʻitaʻia ai e Keriso tagata o le Atua, ina ia malamalama i lea faamoemoe faale-Tusi Paia? O se faaeaga foʻi mo i tatou le faailoa atu o lenā faamoemoe i ē e tatou te feiloaʻi i le talaʻiga. O lea, ia tatou maelega e faia so tatou sao i lea galuega i le tele e mafai ai, ina ia faatoʻateleina ai pea le motu o tagata e toʻatele, ma atili ai ona viiviia le suafa o Ieova.—Faitau le Luka 10:2.

O loo faatupulaʻia pea le fuainumera o le motu o tagata e toʻatele

O Mea e Aofia i le Faamaoni i le Malo

20. O ā vaega ua faia aʻe ai le faalapotopotoga a Satani, ma e faapefea ona aafia ai le faamaoni o Kerisiano?

20 A o faaauau pea ona aʻoaʻoina tagata o le Atua e faatatau i le Malo, na manaʻomia foʻi ona latou malamalama lelei i mea e aofia ai i lo latou faamaoni i lenā Malo. I le 1922, na taʻua ai i le Watch Tower, e lua faalapotopotoga o loo iai i le taimi lenei. O le faalapotopotoga a Ieova, ma le faalapotopotoga a Satani, lea e faia aʻe i faiga faapisinisi, faiga faalotu faapea faiga faapolotiki. O i latou e faamaoni i le Malo o le Atua, e lē tatau ona aafia i vala o le faalapotopotoga a Satani. (2 Kori. 6:17) O le ā le uiga o lenā manatu?

21. (a) Na faapefea ona lapataʻia e le pologa faamaoni tagata o le Atua e faatatau i pisinisi tetele? (e) I le 1963, o le ā na faailoa mai e le Watchtower e faatatau iā “Papelonia le Aai Tele”?

21 O meaʻai faaleagaga mai le pologa faamaoni, ua faaalialia ai faiga piʻopiʻo a pisinisi tetele, ma ua lapataʻia tagata o le Atua e aua neʻi aafia ai i o latou uiga matapeʻapeʻa. (Mata. 6:24) Ua aumaia foʻi i a tatou lomiga faamatalaga manino e faatatau i le vaega faalotu o le faalapotopotoga a Satani. I le 1963, na taʻua ai i le Watchtower o “Papelonia le Aai Tele,” ua faaāta mai ai lotu ua faapea mai o Kerisiano, faapea le emepaea o lotu sesē uma. O le a iloiloina i le  Mataupu e 10, le auala na “ō ese” ai tagata o le Atua mai iā Papelonia, ma faamamāina ai i latou mai i tū faalotu uma.—Faaa. 18:2, 4.

22. A o faagasolo le Taua Muamua a le Lalolagi, o le ā le malamalamaga sa iai i le toʻatele o tagata o le Atua e faatatau i le Roma 13:1?

22 Ae faapefea le vaega faapolotiki o le faalapotopotoga a Satani? Pe e mafai ona faia se sao o Kerisiano moni i taua ma fevaevaeaʻiga a le lalolagi? A o faagasolo le Taua Muamua a le Lalolagi, na malamalama Tagata Aʻoga o le Tusi Paia e lē tatau i soo o Keriso ona fasiotia isi tagata. (Mata. 26:52) Peitaʻi, o le toʻatele na mafaufau o le usiusitaʻi i “faipule silisili” e pei ona taʻua i le Roma 13:1, e aofia ai le auai i vaegaʻau, faia o togiga a fitafita ma tauave foʻi meatau. Ae pe a faatonuina i latou e fasiotia se fili, ona faapāpā lea o fana i le ʻea.

23, 24. (a) O le ā lo tatou malamalamaga e faatatau i le Roma 13:1, a o faagasolo le Taua Lona Lua a le Lalolagi? (e) O le ā le malamalamaga saʻo na faailoa mai e Iesu i ona soo?

23 E fetaui le gāpā o le Taua Lona Lua a le Lalolagi i le 1939, ae aumaia loa i se tasi o Watchtower se faamatalaga auʻiliʻili e faatatau i le solitū. Na faaalia manino i lenā lomiga, e lē tatau i Kerisiano ona faia sa latou vaega i taua ma fevaevaeaʻiga i le lalolagi a Satani. Sa fetaui lelei le taimi na aumai ai lenā taʻiala, auā na puipuia ai tagata o le Atua mai le faamasaatoto a o faagasolo le taua. Peitaʻi, na amata mai i le 1929 ona taʻua i a tatou lomiga, e lē faasino atu faipule silisili o loo taʻua i le Roma 13:1 i pule faaletagata, ae e faasino atu iā Ieova ma Iesu. O lea, sa manaʻomia ai ona suia lo tatou malamalamaga.

 24 I le 1962, na maua ai e soo o Keriso se isi faamalamalamaga o le Roma 13:1-7, e ala i le taʻitaʻiga a le agaga paia, lea sa lomia i le Watchtower o Novema 15 ma Tesema 1. Na faatoʻā malamalama ai tagata o le Atua i le uiga moni o le mataupu silisili e faatatau i le gauaʻi, lea na taʻua i le fetalaiga iloga a Iesu: “Ia totogi atu mea a Kaisara iā Kaisara, a o mea a le Atua ia avatu i le Atua.” (Luka 20:25) Ua iloa nei e Kerisiano moni, o faipule silisili e faasino atu i taʻitaʻi o le lalolagi, ma e tatau i Kerisiano ona gauaʻi atu iā i latou. Peitaʻi, e iai tulaga e ono tulaʻi mai e lē tatau ai ona tatou faia faapea. Pe a faatonuina i tatou e faipule silisili e aua neʻi usiusitaʻi iā Ieova le Atua, ona tatou tali atu lea e pei o le ʻauaposetolo: “E tatau ona matou usiusitaʻi i le Atua o le pule, nai lo o tagata.” (Galu. 5:29) I le Mataupu e 14, o le a tatou aʻoaʻoina atili ai pe na faapefea ona faatatauina e tagata o le Atua, le mataupu silisili e faatatau i le solitū.

O se faaeaga le faailoa atu o le faamoemoe o le ola e faavavau o loo i le Tusi Paia!

25. Aiseā e tatou te talisapaia ai le taʻitaʻiga a le agaga paia i lo tatou malamalamaga e faatatau i le Malo?

25 Seʻi tomānatu i mea na aʻoaʻoina e soo o Keriso e faatatau i le Malo, a o faagasolo le tele o tausaga. Ua tatou aʻoaʻoina le taimi na faavae ai le Malo o le Atua i le lagi, ma le tāua o lenā Malo. Ua tatou malamalama foʻi i faamoemoe e lua mo tagata faamaoni, o le faamoemoe i le lagi ma le lalolagi. Ua tatou aʻoaʻoina foʻi le auala e faaalia ai le faamaoni i le Malo o le Atua, faapea le gauaʻi i faipule silisili. Ia fesili ifo, ʻPe e mafai ona ou malamalama i nei upu moni tautele, pe ana lē taʻitaʻia e Iesu Keriso lana pologa faamaoni?’ O se faamanuiaga le taʻitaʻia o i tatou e Iesu Keriso ma le agaga paia.

^ pala. 3 E tusa ai ma se tasi lomifefiloi, o le upu Eleni mo le “taʻitaʻia” e pei ona taʻua i le mau, e uiga atu i le “faailoa mai o se auala.”

^ pala. 7 A o leʻi oo i lenā taimi, sa manatu e faapea na faasino atu lenā vaaiga i se taua i le va o le Lotu Katoliko Roma, ma le Emepaea o Roma ma isi lotu faapaupau.

^ pala. 10 Iā Iuni i le 1880, na taʻua ai i le Watch Tower o le 144,000 e faia aʻe i tagata Iutaia, na avea ma Kerisiano moni a o leʻi oo i le 1914. Peitaʻi i le taufaaiʻuiʻuga o le 1880, na aumaia ai se isi malamalamaga fou lea e taitutusa ma le malamalamaga ua iai nei.