Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 4

Ua Faasilisilia e Ieova Lona Suafa

Ua Faasilisilia e Ieova Lona Suafa

MANATU AUTŪ O LE MATAUPU

E faamamaluina e tagata o le Atua lona suafa

1, 2. Na faapefea ona faasilisilia e le New World Translation le suafa o le Atua?

I LE taeao o le Aso Lua o Tesema 2 i le 1947, na faatulaga ai se vaega toʻaitiiti o uso faauuina i le Peteli i Brooklyn i Niu Ioka, ina ia faataunuu se galuega tele. Na faaauau lenei galuega faigatā i le 12 tausaga na sosoo ai. Peitaʻi i le Aso Sa o Mati 13 i le 1960, na faamāeʻaina ai lenei faaliliuga fou o le Tusi Paia. Ae i le Aso Sa o Iuni 18, 1960, na tatala ai e le uso o Nathan Knorr le faaliliuga atoa o le New World Translation of the Holy Scriptures, i se tauaofiaga i Manchester i Egelani. Na faailoa mai e le failauga faalogona o le aofia ina ua ia faapea mai: ʻO se aso fiafia lenei mo Molimau a Ieova i le lalolagi aoao.’ O se tasi o vala na matilatila ai lenei faaliliuga fou, o le tele o taimi o loo faaaogāina ai le suafa o le Atua.

Le tatalaina O le Tusi Paia o le Lalolagi Fou o Tusitusiga Eleni i le Fonotaga o le “Faatelega Faatiokarate,” i le 1950 (Itu agavale: Yankee Stadium i le Aai o Niu Ioka; itu taumatau: Ghana)

2 O le tele o faaliliuga o le Tusi Paia ua aveesea ai le suafa o le Atua. Peitaʻi, na taumafai malosi le ʻaufaauuina e faalēaogāina taumafaiga a Satani, e aveesea atoatoa le suafa o le Atua. Ua faapea mai upu tomua o le Faaliliuga a le Lalolagi Fou: “O le vala e sili ona tāua o lenei faaliliuga, o le toe tuu lea o le suafa e patino i le Atua i le tulaga e tatau ona iai i le Tusi Paia.” E silia i le 7,000 taimi ua faaaogā ai le suafa o Ieova i le Faaliliuga a le Lalolagi Fou. Maʻeu le mataʻina o le auala ua faasilisilia ai le suafa o Ieova!

3. (a) O le ā na malamalama ai o tatou uso e faatatau i le uiga o le suafa o le Atua? (e) O le ā lo tatou malamalamaga e faatatau i le Esoto 3:13, 14? (Tagaʻi i le pusa “ Le Uiga o le Suafa o le Atua.”)

3 I le amataga, na malamalama ai Tagata Aʻoga o le Tusi Paia o le uiga o le suafa o le Atua: “O aʻu o lē ola, o loo ola lava.” (Eso. 3:14, Tusi Paia Samoa-Lomiga 1969) O lea, na taʻua ai i le Watch Tower o Ianuari 1, 1926: ʻO le suafa o Ieova ua faailoa mai ai e lē faalagolago o ia i se tasi ina ia soifua ai pea, ma e leai sona amataga ma sona gataaga.’ Peitaʻi, ina ua amata le galuega a le ʻaufaaliliu o le New World Translation, na fesoasoani Ieova i ona tagata e malamalama, e lē gata e leai se tasi na foafoaina o ia, ae e mafai foʻi ona ia faataunuuina lona finagalo. Na latou iloa foʻi o le uiga o le suafa o Ieova, “E Gaoioi o Ia e Tusa ai ma Tulaga  Manaʻomia.” Na ia foafoaina le vateatea ma meafaiola atamamai uma, ma o loo faaauau foʻi ona ia faataunuuina lona finagalo ma ana fuafuaga. Aiseā e tāua ai ona faasilisilia le suafa o Ieova, ma e faapefea ona faia so tatou sao i le faasilisilia o lenā suafa?

Le Faapaiaina o le Suafa o le Atua

4, 5. (a) O le ā o loo tatou talosaga atu ai pe a tatou tatalo: “Ia faapaiaina lou suafa”? (e) O afea ma e faapefea ona faapaiaina e le Atua lona suafa?

4 E finagalo Ieova e faasilisilia lona suafa. O le vala autū o lona finagalo ia faapaiaina lona suafa, ma e faamaonia lenā vala i le uluaʻi talosaga o le tatalo faaaʻoaʻo a Iesu: “Ia faapaiaina lou suafa.” (Mata. 6:9) O le ā e aofia ai i lenā talosaga?

5 E pei ona tatou aʻoaʻoina i le Mataupu 1 o lenei lomiga, o le talosaga “Ia faapaiaina lou suafa,” e aofia i talosaga e tolu o le tatalo faaaʻoaʻo a Iesu, lea e fesootaʻi atu i le finagalo o Ieova. O isi talosaga e lua: “Ia oo mai lou malo. Ia faia lou finagalo.” (Mata. 6:10) O lea, e pei ona tatou tatalo iā Ieova ia oo mai lona Malo ma faia lona finagalo, e faapena foʻi ona tatou tatalo atu iā te ia ina ia faapaiaina lona suafa. I nisi faaupuga, o loo tatou tatalo iā Ieova e faamamāina lona suafa mai le taʻuleagaina, talu mai le fouvalega i Etena. O le a faapefea ona tali mai Ieova i lenā tatalo? Ua ia fetalai: “O le a ou faapaiaina lava loʻu igoa mamalu lea ua taʻuvalea i nuu.” (Eseki. 36:23; 38:23) O le a faapaiaina e Ieova lona suafa, pe a ia faaumatia tagata amioleaga iā Amaketo.

6. E faapefea ona faia so tatou sao i le faapaiaina o le suafa o le Atua?

6 A o faagasolo taimi, na faataga ai e Ieova ana auauna e faia so latou sao i le faapaiaina o lona suafa. E lē mafai ona tatou faaopoopo se mamalu i le suafa o le Atua, auā e paia lava o ia ma e atoatoa ona lelei. O lea, e faapefea ona tatou faapaiaina lona suafa? Na faapea mai Isaia: “E ao ona outou manatua e na o Ieova o ʻau e paia lava o ia.” Ae na fetalai Ieova e faatatau i ona tagata: “Latou te faapaiaina loʻu igoa, ma latou te . . . matataʻu foʻi i le Atua o Isaraelu.” (Isa. 8:13; 29:23) O lea, e tatou te faapaiaina le suafa o Ieova e ala i le vaai i ai e silisili nai lo o isi igoa uma, ia faaaloalo i lē e ana lenā suafa, ma fesoasoani i isi e faapaiaina lenā suafa. Ae e sili ai ona tatou faaalia le migao i le suafa o le Atua, e ala i le vaai iā Ieova o lo tatou Pule, ma usiusitaʻi iā te ia mai i o tatou loto.—Faata. 3:1; Faaa. 4:11.

Ia Sauniuni e Tauave ma Faasilisilia le Suafa o le Atua

7, 8. (a) Aiseā na umi ai ona faatoʻā tauave lea e tagata o le Atua o lona suafa? (e) O le ā o le a tatou iloiloina?

7 Ua faaaogā e auauna a Ieova i aso nei le suafa o le Atua i le tele o lomiga talu mai vaitausaga o le 1870. O se faataʻitaʻiga, na taʻua le suafa o Ieova i le Watch Tower o Aokuso i  le 1879, ma le tusi pese Songs of the Bride. E ui i lea, e foliga mai e leʻi faatagaina e Ieova i latou e tauave lona suafa, auā sa iai se mea sa tatau ona latou ausia muamua. Na faapefea ona sauniunia e Ieova Tagata Aʻoga o le Tusi Paia e tauave lona suafa?

8 Pe a toe tepa i tua i le taufaaiʻuiʻuga o vaitausaga o le 1800, seʻia oo i le amataga o vaitausaga o le 1900, e tatou te mātauina ai le faasolosolo ona faailoa mai e Ieova i ona tagata o upu moni e faatatau i lona suafa. O lea, seʻi o tatou iloiloina ni vala se tolu.

9, 10. (a) Aiseā na soona faatāua ai Iesu i uluaʻi lomiga o le Watch Tower? (e) O le ā na suia talu mai le 1919, ma o le ā le iʻuga na oo i ai? (Tagaʻi foʻi i le pusa “ Le Auala na Faasilisilia ai e Le Olomatamata le Suafa o le Atua.”)

9 Muamua, sa amata ona maua e auauna a Ieova le vaaiga saʻo e faatatau i le tāua o le suafa o le Atua. Na vāai Tagata Aʻoga o le Tusi Paia i le sauniuniga o le togiola, o le aʻoaʻoga autū lea o le Tusi Paia. O le māfuaaga lea sa soona faatāua ai Iesu i le Watch Tower. O se faaaʻoaʻoga, i le uluaʻi tausaga o lenei lomiga, e sefulu taimi na sili atu ai ona taʻua le suafa o Iesu nai lo o Ieova. Ae na taʻua e le Watchtower o Mati 15, 1976, na “soona faatāua” e Tagata Aʻoga o le Tusi Paia Iesu. A o faagasolo taimi, na fesoasoani Ieova i Tagata Aʻoga o le Tusi Paia e iloa le tāua o lona suafa i le Tusi Paia. O le ā le auala na latou tali atu ai? Na taʻua i le Watchtower lava lea, talu mai le 1919, “na amata ona latou matuā faatāuaina Ieova le Tamā o le Mesia.” O lea, mai le 1920-1929, e silia i le 6,500 taimi na taʻua ai le suafa o le Atua i le Watch Tower.

10 Na faaalia e uso lo latou alolofa i le suafa o le Atua, e ala i le avatu i ai o le faaeaea talafeagai. Na latou faataʻitaʻi iā Mose, e ala i le ʻfolafola atu o le suafa o Ieova.’ (Teu. 32:3; Sala. 34:3) O le iʻuga, e pei ona folafola mai i le Tusi Paia, na silafia e Ieova lo latou alolofa mo lona suafa, ma na latou maua lona finagalo malie.—Sala. 119:132; Epe. 6:10.

11, 12. (a) O le ā le suiga na faia i a tatou lomiga ina ua mavae le 1919? (e) O le ā na faauaʻi atu i ai e Ieova ana auauna, ma aiseā?

11 Lona lua, na manaʻomia ona maua e Kerisiano moni le malamalamaga saʻo i le galuega na tuuina atu e le Atua iā i latou. E leʻi umi talu ona mavae le 1919, ae amata loa ona iloiloina e uso faauuina le valoaga a Isaia. Na amata foʻi ona suia le vala e uaʻi atu i ai a tatou lomiga. Aiseā na avea ai lenā suiga ma “meaʻai i le taimi tatau”?—Mata. 24:45.

12 A o leʻi oo i le 1919, e leʻi iloiloina i le Watch Tower le faamatalaga lenei a Isaia: “O le fetalaiga lenei a Ieova: ʻO outou o aʻu molimau, o laʻu auauna ua ou filifilia.’” (Faitau le Isaia 43:10-12.) Ae e leʻi umi lava talu ona mavae lenā tausaga, ae amata loa ona uaʻi atu a tatou lomiga i lenā mau, ma faalaeiau le ʻaufaauuina e faia so latou sao i le galuega na tuuina atu e Ieova iā i latou, o le molimau lea e  faatatau iā te ia. E mai le 1925-1931, e 57 lomiga o le Watch Tower na iloiloina ai le mataupu e 43 o le Isaia. O na lomiga uma sa faatatau atu ai upu a Isaia i Kerisiano moni. Sa manino mai le taumafai o Ieova e faauaʻi atu manatu o ana auauna i le galuega ua tuuina atu iā i latou. Aiseā? O le auala lenā na ʻmuamua ona tofotofoina ai i latou po ua agavaa.’ (1 Timo. 3:10) A o leʻi tauaveina e Tagata Aʻoga o le Tusi Paia le suafa o le Atua, na manaʻomia ona faamaonia atu iā Ieova e ala i a latou galuega, o i latou moni lava o ana molimau.—Luka 24:47, 48.

13. Ua faapefea ona faaalia mai i le Afioga a le Atua le finauga tāua e tatau ona foʻia?

13 Lona tolu, na amata ona talisapaia e tagata o Ieova le tāua o le faapaiaina o lona suafa. A o faagasolo vaitausaga o le 1920, na amata ai ona latou iloa o le faapaiaina o le suafa o Ieova, o le finauga e sili ona tāua e tatau ona foʻia. E faapefea ona faamaonia lenā vala i le Tusi Paia? Seʻi o tatou iloiloina ni faaaʻoaʻoga se lua. Muamua, o le ā le māfuaaga autū na faasaoina ai e le Atua le nuu o Isaraelu mai i Aikupito? Na fetalai Ieova i le Esoto 9:16: ʻIna ia faailoa atu loʻu igoa i le lalolagi uma.’ Lona lua, aiseā na faaalia ai e Ieova le alofa mutimutivale iā i latou e ui na latou fouvale iā te ia? Na toe fetalai Ieova: “Ou te leʻi faia ona o loʻu igoa neʻi faaleagaina i luma o nuu.” (Eseki. 20:8-10) O le ā na aʻoaʻoina e Tagata Aʻoga o le Tusi Paia mai i na faaaʻoaʻoga ma isi tala faale-Tusi Paia?

14. (a) O le ā na malamalama i ai tagata o le Atua i le taufaaiʻuiʻuga o vaitausaga o le 1920? (e) O le ā le aafiaga o le galuega talaʻi, ona o le loloto o le malamalama o Tagata Aʻoga o le Tusi Paia? (Tagaʻi foʻi i le pusa “ Le Māfuaaga Malosi e Talaʻi Ai.”)

14 E oo ane i le taufaaiʻuiʻuga o vaitausaga o le 1920, ua amata ona malamalama tagata o le Atua i mea na faamauina e Isaia i le 2,700 tausaga ua mavae. Na faapea mai Isaia: “O le mea lea, na e taʻitaʻia ai ou tagata ina ia faia ai se igoa matagofie mo oe lava.” (Isa. 63:14) Na malamalama Tagata Aʻoga o le Tusi Paia, e sili atu ona tāua le faapaiaina o le suafa o le Atua nai lo o le mauaina o le faaolataga. (Isa. 37:20; Eseki. 38:23) I le 1929, na taʻua ai i le tusi o le Prophecy e faapea: “O le mataupu e sili ona tāua i foafoaga uma o le [faapaiaina o le] suafa o Ieova.” O lenei fetuunaʻiga o le malamalamaga, na atili uunaʻia ai auauna a le Atua e molimau e faatatau iā Ieova, ma taʻumamāina ai lona suafa.

15. E oo ane i vaitausaga o le 1930 o le ā ua malamalama i ai o tatou uso, ma o le ā le faaeaga ua mafai nei ona latou mauaina?

15 E oo ane i le amataga o vaitausaga o le 1930, ua amata ona maua e uso le vaaiga saʻo e faatatau i le tāua o le suafa o le Atua. E lē gata i lea, ua latou malamalama i le galuega na tuuina atu e le Atua iā i latou, faapea le tāua o le faapaiaina o le suafa o le Atua. O lea, ua oo i le taimi atofaina a Ieova e tuuina atu ai le faaeaga i ana auauna e tauave lona suafa. Seʻi o tatou iloiloina ni mea na tutupu, e iloa ai le auala na tupu ai lenā mea.

 Ua Filifilia e Ieova “ni Tagata mo Lona Suafa”

16. (a) O le ā le auala mataʻina na faasilisilia ai e Ieova lona suafa? (e) O ai na tauaveina le suafa o Ieova i aso anamua?

16 O se tasi o auala ua faasilisilia ai e Ieova lona suafa, o le filifilia lea o nisi i le lalolagi e tauaveina lona suafa. Na tauaveina e le nuu o Isaraelu le suafa o Ieova talu mai le 1513 T.L.M. (Isa. 43:12) Peitaʻi, e leʻi taulau ona latou tausia le feagaiga na latou osia ma le Atua, ma i le 33 T.A., na latou melea ai lenā faiā faapitoa ma ia. E leʻi umi ae ʻsilasila loa le Atua i nuu ese, ina ia filifilia mai ai ni tagata mo lona suafa.’ (Galu. 15:14) O na tagata fou ua filifilia ua taʻua o le “Isaraelu a le Atua,” ma e faia aʻe i soo faauuina mai i atunuu eseese.—Kala. 6:16.

17. O le ā na taulau manuia ai Satani?

17 I le pe tusa o le 44 T.A., na faatoʻā taʻua ai soo o Keriso  “o Kerisiano ona o le taʻitaʻiga a le Atua.” (Galu. 11:26) I le amataga, o le taʻu Kerisiano sa na o Kerisiano moni na faasino i ai. (1 Pete. 4:16) Ae e pei ona taʻua i le talafaatusa a Iesu i le saito ma le vao leaga, na taulau taumafaiga a Satani e faaaogā lenā taʻu faapitoa i Kerisiano faatagāfai. A o faagasolo senituri, na faigatā ona iloa le eseesega o Kerisiano moni ma Kerisiano faatagāfai. Ae na faatoʻā amata ona suia lenā tulaga ina ua faagasolo “le tau e selesele ai,” lea na amata i le 1914. Aiseā? Talu ai o le taimi lenā na amata ai ona vavaeese e agelu Kerisiano moni, mai i Kerisiano faatagāfai.—Mata. 13:30, 39-41.

18. Na faapefea ona iloa e o tatou uso ua tatau ona suia lo tatou igoa?

18 Na fesoasoani Ieova i ona tagata e malamalama i le galuega na tuuina atu iā i latou, ina ua māeʻa ona tofia le pologa faamaoni i le 1919. Na vave ona latou iloa o le galuega talaʻi mai i lea fale i lea fale, na vavaeesea ai i latou mai i Kerisiano faatagāfai. O le iloaina o lenā mea, na latou manatu ai e leʻi lava le igoa na latou faaaogāina, o “Tagata Aʻoga o le Tusi Paia.” O le fuafuaga autū o o latou olaga, o le molimau lea e faatatau i le Atua ma faasilisilia lona suafa, ae e lē na o le suʻesuʻeina o le Tusi Paia. O lea, o le ā se igoa e fetaui lelei ma le galuega na latou faia? Na taliina lenā fesili i le 1931.

Le polokalame o le tauaofiaga i le 1931

19, 20. (a) O le ā le iʻugāfono mataʻina na faia i le tauaofiaga i le 1931? (e) O le ā le auala na tali atu ai o tatou uso ina ua maua lo tatou igoa fou?

19 Iā Iulai i le 1931, e pe ā ma le 15,000 Tagata Aʻoga o le Tusi Paia, na auai i se tauaofiaga na faia i Columbus i Ohio, i le Iunaite Setete. Sa lomia i le polokalame o lenā tauaofiaga le JW. Sa latou naunau uma e iloa po o le ā le uiga o nei mataʻitusi. Sa manatu nisi o lona faaumiga o le ʻJust Watch,’ a o nisi na manatu o le ʻJust Wait.’ O lea, i le Aso Sa Iulai 26, na faailoa mai ai e le uso o Joseph Rutherford se iʻugāfono ma le feʻau malosi lenei: “Ua tatou naunau e faaigoa i tatou o molimau a Ieova.” O le taimi lenā na iloa ai e le aofia le uiga o mataʻitusi sa lomia i le polokalame. Ua taʻua i latou o Molimau a Ieova (Jehovah’s Witnesses), o se igoa faale-Tusi Paia na faavae mai le Isaia 43:10.

20 Na matuā fiafia le aofia ina ua latou faalogo i lenā iʻugāfono. Sa faalogologo le toʻatele o tagata i le lalolagi i le mea na tupu i Columbus, e ala i le leitiō. Sa iai Ernest ma Naomi Barber i Ausetalia i lenā taimi, ma na la faapea mai: “A o tali atu ma le fiafia uso i Amerika, na faapena foʻi ona patipati ma le fiafia uso sa iai i Melepone. E lē galo iā i matou lenā mea.” *

Ua Faasilisilia le Suafa o le Atua i le Lalolagi Aoao

21. Na faapefea i lo tatou igoa fou ona aafia ai le galuega talaʻi?

21 O le igoa faale-Tusi Paia o Molimau a Ieova, na atili ai ona faamalosia tagata o le Atua e faia so latou sao i le galuega talaʻi. Sa auai Edward ma Jessie Grimes, o se  ulugalii paeonia mai le Iunaite Setete, i le tauaofiaga na faia i Columbus i le 1931. Na la faapea mai: “Na ma tuua le fale o taʻua i maʻua o Tagata Aʻoga o le Tusi Paia, ae ua ma toe foʻi mai o ni Molimau a Ieova. Ua matou fiafia i le mauaina o se igoa e fesoasoani iā i matou, e faamamaluina ai le suafa o le Atua.” Na faaaogā e nisi o Molimau a Ieova se metotia fou e faailoa atu ai i latou, ina ua māeʻa le tauaofiaga. Pe a feiloaʻi ma le tagata e ona le fale, ona latou tuuina atu lea o se pepa na iai le feʻau lenei: “O aʻu o se molimau a IEOVA o loo talaʻia le Malo o IEOVA lo tatou Atua.” Na mitamita tagata o le Atua e tauave le suafa o Ieova, ma na latou nofosauni e faalauiloa atu le tāua o lenā suafa i le tele e mafai ai.—Isa. 12:4.

“Na ma tuua le fale o taʻua i maʻua o Tagata Aʻoga o le Tusi Paia, ae ua ma toe foʻi mai o ni Molimau a Ieova”

22. Na faapefea ona faamaonia na maua e tagata o le Atua se faasinomaga na faaesea ai i latou?

22 Na umi se taimi ona faatoʻā faataga lea e Ieova o le ʻaufaauuina e tauave le igoa na faaesea ai i latou. Pe na mafai e Satani ona natia po o ai tagata o le Atua, talu mai le 1931? Pe na mafai ona ia natia mai i tagata le eseesega o tagata o Ieova mai i lotu o le lalolagi? E mautinoa e leai, auā ua matuā matilatila lo tatou faasinomaga o ni molimau a le Atua. (Faitau le Mika 4:5; Malaki 3:18.) O le mea moni, ua faigofie ona iloa e tagata o i tatou o Molimau a Ieova, ona o le tele o taimi e tatou te faaaogāina ai le suafa o Ieova. E leʻi mafai e lotu sesē e pei o ni mauga tetele, ona natia le tapuaʻiga moni. Nai lo o lea, ua “faatumauina” le tapuaʻiga moni a Ieova “i luga o tumutumu o mauga.” (Isa. 2:2) Ua matuā faasilisilia le tapuaʻiga iā Ieova ma lona suafa paia i aso nei.

23. E tusa ai ma le Salamo 121:5, o le ā le upu moni e faatatau iā Ieova ua faalaeiauina ai i tatou?

23 Maʻeu le faalaeiauina o i tatou i le iloa ua puipuia e Ieova i tatou i le taimi nei faapea le lumanaʻi, mai i osofaʻiga a Satani! (Sala. 121:5) O lea, ua tutusa ai o tatou faalogona ma le faisalamo o lē na tusi: “E fiafia le nuu e fai Ieova ma o latou Atua, o le nuu ua ia filifilia e fai ma ona tofi.”—Sala. 33:12.

^ pala. 20 Tagaʻi i le Mataupu 7, itulau 72-74, mo nisi faamatalaga e faatatau i le faaaogāina o alāleo faasalalau.