Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 11

Faamamāina Tau Amio—Ua Faaāta Mai ai le Paia o le Atua

Faamamāina Tau Amio—Ua Faaāta Mai ai le Paia o le Atua

MANATU AUTŪ O LE MATAUPU

Le auala ua aʻoaʻo ai e le Tupu ona tagatānuu e faaaloalo i tapulaa tau amio a le Atua

Seʻi faaāta lou ulufale atu i le faitotoʻa o le lotoā i fafo o le malumalu sili faaleagaga o Ieova

1. Aiseā e tatou te maofa ai i le vaaiga na vaaia e Esekielu?

SEʻI faaāta i lou mafaufau le mea sa tupu i le perofeta o Esekielu, i le pe tusa o le 2,500 tausaga ua mavae. Ua e ulu atu i se malumalu e sili ona matagofie ma telē. Ua faasino atu e se agelu iā te oe lenei nofoaga matagofie. Ua e laasia sitepu e fitu e tau atu i faitotoʻa e tolu o le malumalu, ma ua e maofa ina ua e vaaia nei faitotoʻa, e oo atu lo latou maualuluga i le pe ā ma le 100 futu (30 mita). I le taimi na e ulu ai i na faitotoʻa, na e vaaia ai potu o leoleo o le faitotoʻa. Ua iai foʻi ata o laau o le pama i tumutumu o poutū o le malumalu.—Eseki. 40:1-4, 10, 14, 16, 22; 41:20.

2. (a) O le ā o loo faaataina mai e le malumalu? (Tagaʻi foʻi i le faaopoopoga.) (e) O le ā e tatou te aʻoaʻoina mai i vaega eseese o le malumalu?

2 O le vaaiga lenā e faatatau i le malumalu faaleagaga, lea na faamatalaina e Esekielu i le mataupu e 40, e oo i le mataupu e 48 o lana tusi. O lenei malumalu ua faaāta mai ai le faatulagaga a Ieova mo le tapuaʻiga mamā. E iai le fesootaʻiga o vaega eseese o lenei malumalu i la tatou tapuaʻiga i aso nei. * O le ā ua faaāta mai e faitotoʻa maualuluga? Ua faamanatu mai ai, o i latou e auai i le tapuaʻiga mamā iā Ieova, e tatau ona ola e ōgatusa ma tapulaa maualuluga ma amiotonu a le Atua. E faapena foʻi le manatu o loo faaāta mai e ata o laau o le pama, auā e faaaogā i nisi taimi i le Tusi Paia le laau o le pama e faaāta mai ai le amiotonu. (Sala. 92:12) Ae o potu o leoleo o faitotoʻa ua faailoa mai ai, e lē mafai ona ulu atu i le tapuaʻiga mamā i latou e teena tapulaa a Ieova.—Eseki. 44:9.

3. Aiseā e manaʻomia ai pea ona faamamāina soo o Keriso?

3 Ua faapefea ona faataunuuina le vaaiga a Esekielu? E pei ona taʻua i le Mataupu e 2, na faaaogā e Ieova Keriso e faamamāina ona tagata mai le 1914, seʻia oo i le tauamatamataga o le 1919. Ae pe na gata ai i inā le faamamāina faaleagaga? E leai. A o faagasolo le 100 tausaga ua mavae, na faaauau pea ona tausisi Iesu i tapulaa maualuluga tau amio a Ieova. Na manaʻomia pea ona faamamāina  faaleagaga soo o Keriso. O le māfuaaga, na aoaoina e Iesu ona soo mai i lenei lalolagi leaga a Satani, ma o loo naunau lava le Tiapolo e toe maileia atu i latou. (Faitau le 2 Peteru 2:20-22.) O lea, seʻi o tatou iloiloina ni vala se tolu na faaauau ai ona faamamāina Kerisiano moni. Muamua, o le faamamāina tau amio. Lona lua, o se tasi o faatulagaga sa faia mo le faatumauina o le mamā o le faapotopotoga, ma le vala mulimuli o le faatulagaga o le aiga.

Faamamāina Tau Amio

4, 5. O le ā le mailei ua leva ona faaaogā e Satani, ma o le ā le itu ua ia taulau manuia ai?

4 E naunau tagata o Ieova e tausia ana tapulaa maualuluga tau amio. O lea, na latou talia ai ma le lotoatoa le auala na aumaia ai e Ieova taʻiala manino e faatatau i lenei mataupu. Seʻi o tatou iloiloina nisi o faaaʻoaʻoga.

5 Amioga lē mamā taufeusuaʻiga. Na faatulaga e Ieova le faia o feusuaʻiga mamā i totonu o le liʻo o le faaipoipoga. Ua faaaogā e Satani lenei meaalofa tautele e maileia ai auauna a Ieova, ma lē maua ai lona finagalo malie. Na taulau Satani i le faaaogāina o lea mailei i aso o Palaamo, ma ua sili atu ona ia taulau manuia ai i nei aso e gata ai.—Nu. 25:1-3, 9; Faaa. 2:14.

6. (a) O le ā le taʻutinoga sa lomia i le Watch Tower? (e) O le ā le auala na faaaogā ai lea taʻutinoga, ma aiseā na lē toe faaaogāina ai? (Tagaʻi foʻi i le faaopoopoga.)

6 I le Watch Tower o Iuni 15 i le 1908, na lomia ai se taʻutinoga na fesoasoani i le teena o osofaʻiga a Satani. O se vaega lenei o lenā taʻutinoga: “O le a tutusa le auala ou te feutagaʻi ai ma se tasi o le isi itupā, pe a na o i maʻua ma pe a iai foʻi faatasi ma isi tagata, i so o se taimi ma so o se nofoaga.” * E leʻi faamalosia tagata uma e faia lenei taʻutinoga. Peitaʻi, sa faia lava e le toʻatele, ma sa lomia o latou suafa i le Watch Tower. I tausaga mulimuli ane, na fesoasoani lenei taʻutinoga i le toʻatele, peitaʻi na faasolo ina avea o se mea e tau ina fai, o lea na lē toe faaaogāina ai. E ui i lea, na tatau pea ona tausia tapulaa maualuluga tau amio.

7. O le ā le faafitauli na taʻua i le Watch Tower i le 1935, ma o le ā le taʻiala na aumaia ai?

7 Na faateteleina pea osofaʻiga a Satani. I le Watchtower o Mati 1 i le 1935, na faailoa manino mai ai le faafitauli ua amata ona aafia ai auauna a Ieova. Ua manatu nisi o le faia o so latou sao i le faiva, e lē tau manaʻomia ai ona latou ola e ōgatusa ma tapulaa tau amio a Ieova. Na taʻua i le lomiga e faapea: “Ia manatua, e lē lava le tau ina auai i le galuega talaʻi. O molimau a Ieova o sui vaaia o Ieova, ma o la latou matafaioi le faaatagia mai o Ieova ma lona malo i se auala talafeagai.” Na aumaia foʻi i lenā mataupu fautuaga tuusaʻo e faatatau i le faaipoipoga ma feusuaʻiga, ma fesoasoani ai i tagata o le Atua e “sosola ese i le faitaaga.”—1 Kori. 6:18.

8. Aiseā na faamamafa mai ai pea i Le Olomatamata le uiga o le upu Eleni mo feusuaʻiga lē mamā?

 8 I tausaga talu ai nei, na faamamafa mai ai pea i Le Olomatamata le uiga o le upu Eleni mo feusuaʻiga lē mamā, po o le por·neiʹa. O lenā upu, e lē o tau ina faasino atu i le faia o feusuaʻiga. Peitaʻi, e aofia ai so o se faiga lē mamā ma amioga matagā faaleituaiga, lea e masani ona faia i fale e faia ai faiga faatalitane. Ua puipuia e Iesu ona soo mai i feusuaʻiga lē mamā lea ua taatele i le lalolagi i aso nei.—Faitau le Efeso 4:17-19.

9, 10. (a) O le ā se isi mataupu na taʻua i le Watch Tower i le 1935? (e) O le ā le vaaiga paleni a le Tusi Paia e faatatau i le faaaogāina o le ʻava malosi?

9 Le faaaogā sesē o le ʻava malosi. E iai se isi mataupu na taʻua i le Watchtower o Mati 1 i le 1935. Na taʻua i lenā lomiga: ʻUa mātauina le auai o nisi i le faiva, ma faia tiute tauave i le faalapotopotoga a o faasuāʻavā. O ā vala e talafeagai ai le faaaogāina o le ʻava malosi e tusa ai ma taʻiala a le Tusi Paia? Pe e talafeagai le aafia o le auala e fai ai le auaunaga a se tasi ona o le faaaogāina o le ʻava malosi?’

10 O le tali o na fesili, e mafai ona iloa ai le vaaiga paleni e faatatau i le faaaogāina o le ʻava malosi. E lē o taʻusalaina i le Tusi Paia le faaaogāina o le uaina ma le ʻava malosi. Peitaʻi, o loo matuā taʻusalaina ai le onā. (Sala. 104:14, 15; 1 Kori. 6:9, 10) E tele taimi ua lapataʻia ai auauna a Ieova e faatatau i le faia o le auaunaga paia a o faasuāʻavā, e faaaogā ai le tala e faatatau i atalii o Arona lea na faamūina mea manogi ua faasāina. Na faamatalaina i le mau le māfuaaga atonu na taʻitaʻia atu ai nei tane i le faia o lea gaoioiga lē talafeagai. O lea, na aumaia ai e Ieova se tulafono e faasā ai ona faaaogā le ʻava malosi pe a faia e ositaulaga la latou auaunaga paia. (Levi. 10:1, 2, 8-11) I aso nei, e tatau i auauna a Ieova ona ʻalofia le tagofia o le ʻava malosi, a o leʻi faia la latou auaunaga paia.

11. Aiseā na avea ai o se faamanuiaga le maua pea e tagata o le Atua, o le malamalamaga e faatatau i le puleaina o se tasi e le ʻava malosi?

11 I tausaga talu ai nei, na faasusulu mai ai pea e Iesu le malamalamaga e faatatau i le puleaina o se tasi e le ʻava malosi. O meaʻai faaleagaga ua saunia mai e Ieova i le taimi tatau, ua mafai ai e le toʻatele ona toe pulea lelei o latou olaga. E lē gata i lea, ua mafai ai foʻi e nisi ona ʻalofia le puleaina e le ʻava malosi. E lē tatau ona faaaogāsesēina le ʻava malosi, auā e aveesea ai lo tatou tulaga faamamaluina, faapea le fiafia i le aiga, aemaise le faaeaga o le auai i le tapuaʻiga mamā iā Ieova.

ʻE faigatā ona tatou faaāta lo tatou Alii e manogi tapaa pe e ulaina foʻi se tapaa.’—C. T. Russell

12. O le ā le vaaiga sa iai i auauna a Keriso e faatatau i le tapaa, a o leʻi amata aso e gata ai?

12 Faaaogāina o le tapaa. A o leʻi amataina aso e gata ai, ua leva ona iloa e soo o Keriso e lē tatau ona faaaogā le tapaa. E manatua e le uso o Charles Capen le taimi muamua na feiloaʻi ai i le uso o C. T. Russell i le taufaaiʻuiʻuga o le senituri lona 19, a o 13 ona tausaga. A o tutū ma ona uso i le fasitepu o le Bible House i Allegheny i Pennsylvania, na  savali atu Russell i o latou luma, ma fesili atu iā i latou: “O lenā e tou te ulaula? O loo oʻu lagonaina le manogi tapaa.” Na latou tali atu e leai. O lenā mea na latou iloa ai le manatu o Russell e faatatau i le tapaa. I le Watch Tower o Aokuso 1 i le 1895, na faapea mai ai Russell e faatatau i le 2 Korinito 7:1: ʻE lē faamamaluina le Atua po o i tatou lava, pe a tatou faaaogāina le tapaa. E faigatā ona tatou faaāta lo tatou Alii e manogi tapaa pe e ulaina foʻi se tapaa.’

13. O le ā le malamalamaga na maua i le 1973?

13 I le 1935, na taʻua ai i le Watchtower o le tapaa o se “vao leaga,” ma o so o se tasi e lamuina pe ulaina, e lē mafai ona galue pea i le aiga Peteli, pe auai foʻi i le auaunaga paeonia po o le galuega femalagaaʻi. Peitaʻi, o le 1973 na toe faalautele ai le malamalamaga i lea mataupu. Na taʻua i le Watchtower o Iuni 1, e lē mafai ona avea pea se tasi ma sui o le faapotopotoga, pe a faaauau pea ona faia lenei gaoioiga lē mamā, lē alofa, ma e iʻu ai i le oti. E tatau ona faateʻaina i latou e lē mananaʻo e tuu le faaaogāina o le tapaa. * Na faia e Iesu se laasaga tāua e faamamā ai ona soo.

14. O le ā le taʻiala a le Atua e faatatau i le toto, ma na faapefea ona taatele le faaaogāina o le tuigātoto?

14 Faaaogā sesē o le toto. I aso o Noa, na faamanino mai ai e le Atua e lē tatau ona ʻaina le toto. Na ia toe faamautinoa mai lenā tulaga ina ua ia aumaia le Tulafono i le nuu o Isaraelu, faapea foʻi le taʻiala na avatu i uluaʻi Kerisiano ina ia ʻtaumamao mai le toto.’ (Galu. 15:20, 29; Kene. 9:4; Levi. 7:26) Peitaʻi, ua faaaogā e Satani se auala e taaʻina ese ai tagata mai le usitaʻia o lenā taʻiala mai i le Atua. I le senituri lona 19, na faataʻitaʻi ai ona faia e fomaʻi tuigātoto. Na mafai ona latou iloa ai ituaiga eseese o toto, ma amata ai loa ona faia le tele o tuigātoto. O le 1937 na amata ona tuiina mai ai toto o tagata ma tuuina i fale e teu ai toto, ae o le Taua Lona Lua a le Lalolagi na matuā taatele ai lenei ituaiga o togafitiga. E leʻi umi ae taatele le faia o tuigātoto i le lalolagi aoao.

15, 16. (a) O le ā le gaoioiga na faia e Molimau a Ieova e faatatau i tuigātoto? (e) O le ā le fesoasoani na maua e soo o Iesu e tusa ai o lea mataupu, ma o ā iʻuga na maua mai ai?

15 I le amataga o le 1944, na faailoa mai ai i le Watchtower e tutusa le tuiina ma le ʻaina o le toto. Na faalautele lenā malamalamaga i le tausaga na sosoo ai. Ae i le 1951, na lomia ai i le Watchtower ni fesili ma tali e fesoasoani i tagata o le Atua, pe a feutagaʻi ma fomaʻi. Na lototetele soo o Keriso e feagai ma tauemuga, teteega ma sauāga. Ae na faaaogā e Iesu lana faalapotopotoga e saunia mai le fesoasoani manaʻomia, e ala mai i lomiga na suʻesuʻe ma iloiloina māeʻaeʻa ai lenei mataupu.

16 I le 1979, na amata ai ona asiasi nisi o toeaina i falemaʻi ina ia fesoasoani i fomaʻi e malamalama i o tatou tulaga, ma māfuaaga faale-Tusi Paia o o tatou talitonuga. Na  latou faailoa atu foʻi nisi o togafitiga e mafai ona suia ai tuigātoto. I le 1980, na maua ai e toeaina i aai e 39 i le Iunaite Setete se toleniga faapitoa e faia ai lea galuega. Mulimuli ane, na faamaonia ai e le Vaega Pule le faavaeina o Komiti o Mataupu Tau Falemaʻi i le lalolagi aoao. Pe na aogā nei taumafaiga? E faitau afe fomaʻi ua galulue faatasi ma Molimau a Ieova, ma faaaloalo i a latou filifiliga i togafitiga e lē faaaogāina ai le toto. Na faasolo ina tele falemaʻi e saunia isi togafitiga e lē faaaogāina ai le toto, ma ua faamaonia e nisi o fomaʻi, o togafitiga nei e sili ona lelei. Pe e tatou te talisapaia le auala ua puipuia ai e Iesu ona soo mai aafiaga leaga a Satani?—Faitau le Efeso 5:25-27.

Na faasolo ina tele falemaʻi e saunia isi togafitiga e lē faaaogāina ai le toto, ma ua faamaonia e nisi o fomaʻi, o togafitiga nei e sili ona lelei

17. E faapefea ona faailoa atu e tāua iā i tatou le auala ua faamamā ai e Iesu ona soo?

17 Ia fesili ifo: ʻPe e tāua iā i tatou le auala ua faamamāina ai e Keriso ona soo, ma aʻoaʻoina i tatou e ola e ōgatusa ma tapulaa maualuluga a Ieova?’ Ia manatua, o loo taumafai Satani e vavaeese i tatou mai iā Ieova ma Iesu, e ala i lo tatou lē faaaloalo i tapulaa a Ieova. Ua aumaia e lē aunoa e le faalapotopotoga a Ieova lapataʻiga e faatatau i  amioga lē mamā a le lalolagi, ina ia aua ai neʻi o tatou aafia i taaʻiga a Satani. O lea, ia tatou mataala pea ma usiusitaʻi i fautuaga o loo tatou mauaina.—Faata. 19:20.

Puipuia le Faapotopotoga Mai Amioga Lē Mamā

18. O le ā e faamanatu mai e le vaaiga a Esekielu e tusa ai ma i latou e teena ma le loto iai tapulaa maualuluga a Ieova?

18 O le vala lona lua o le faamamāina tau amio, e aofia ai auala e faatumauina ai le mamā o le faapotopotoga. O le tulaga e faanoanoa ai, e lē o tagata uma e taliaina tapulaa a Ieova ma tuuina atu o latou ola iā te ia, e faaauau ona tausisi i a latou filifiliga sa fai. Peitaʻi ua suia o latou loto ma teena ma le loto i ai tapulaa a Ieova. O le ā le gaoioiga e tatau ona faia iā i latou? Pe e te manatua faitotoʻa maualuluga o le malumalu faaleagaga lea na taʻua i le amataga? Na taʻua ai o nei faitotoʻa taʻitasi, o loo iai potu o leoleo o faitotoʻa. O nei leoleo o loo puipuia le malumalu mai le ulufale atu i ai o i latou ʻe lē peritomeina o latou loto.’ (Eseki. 44:9) O lenā vala ua faamanatu mai ai, o le tapuaʻiga mamā o se faaeaga e na o i latou o loo ola e ōgatusa ma tapulaa maualuluga a Ieova, e mafai ona latou mauaina. I se tulaga talitutusa, e lē mafai ona maua e tagata uma le faaeaga o le aufaatasi ma isi Kerisiano i le tapuaʻiga.

19, 20. (a) Na faapefea ona fesoasoani Iesu i ona soo i le auala e taulima ai le iloiloina o agasala matuiā? (e) O ā vala e tolu e māfua ai ona faateʻaina se tagata faimea sesē e lē faaalia le salamō?

19 I le 1892, na taʻua ai i le Watch Tower o lo ʻtatou tiute le faateʻaina o Kerisiano e faafitia le faia e Iesu o le togiola mo tagata uma.’ (Faitau le 2 Ioane 10.) I le 1904, na taʻua ai i le tusi The New Creation, e lamatia le faapotopotoga iā i latou o loo faaauau pea ona faia amioga leaga. I lenā vaitaimi, e faia e le faapotopotoga atoa le iloiloga o agasala matuiā. Peitaʻi, e seāseā tupu lenā tulaga. I le 1944, na faailoa mai ai i le Watchtower, e na o uso maufaatuatuaina e taulimaina nei mataupu. Ae o le 1952, na lomia ai i le Watchtower le auala faale-Tusi Paia e taulima ai mataupu taufaamasinoga. Na faamamafa mai ai le māfuaaga autū e faateʻaeseina ai i latou e lē faaalia le salamō, ina ia mafai ona faatumau le mamā o le faapotopotoga.

20 Na faaauau pea ona fesoasoani Iesu i ona soo e faalautele ma suia lo latou malamalama, i le auala e taulima ai le iloiloina o agasala matuiā. Ua toleniina foʻi toeaina Kerisiano i le taulimaina o mataupu taufaamasinoga i le auala a Ieova, ma maua foʻi le vaaiga paleni i le faia o le faamasinogatonu ma le faaalia o le agalelei. I aso nei, o nisi nei o māfuaaga e māfua ai ona faateʻaeseina se tagata lē salamō mai i le faapotopotoga: (1) puipuia ai le suafa o Ieova mai le taʻuleagaina, (2) puipuia le faapotopotoga mai aafiaga leaga o agasala matuiā, ma le (3) uunaʻia ai le tagata faimea sesē e faaalia le salamō.

21. O le ā le auala ua avea ai le faatulagaga o le faateʻaina o se faamanuiaga mo tagata o Ieova?

 21 Ua avea le faatulagaga o le faateʻaina o se faamanuiaga i soo o Keriso i aso nei. I Isaraelu anamua, na avea tagata faimea sesē ma aafiaga leaga i le nuu, ma na sili atu ona toʻatele tagata amioleaga nai lo o ē e alolofa iā Ieova ma naunau e fai le mea saʻo. O le māfuaaga lea na taʻuleagaina ai le suafa o Ieova, ma latou lē maua ai lona finagalo malie. (Iere. 7:23-28) I aso nei, ua feutagaʻi foʻi Ieova ma tane ma fafine faaleagaga. O le aveesea o tagata faimea sesē lotomaaa mai i le faapotopotoga, e lē mafai ai ona avea pea i latou ma auupega a Satani, e faaleagaina ai le mamā o le faapotopotoga. I le avea ai ma tagata o Ieova, ua tatou mautinoa ai le mauaina o lona finagalo malie. Na folafola mai e Ieova: “O so o se auupega ua faia e faasagatau iā te oe e lē manuia.” (Isa. 54:17) Po o tatou lagolagoina ma le faamaoni toeaina o loo fitā i tuga, i le faatinoina o le tiute tauave tāua o le faia o mataupu taufaamasinoga?

Faamamaluina Lē na Faavaeina Aiga

22, 23. (a) Aiseā e tatou te talisapaia ai o tatou uso na soifua i le amataga o le senituri lona 20? (e) Aiseā na manaʻomia ai pea ona maua le vaaiga paleni i le faatulagaga i le aiga?

22 O le vala lona tolu ua faaauau pea ona faamanuiaina ai soo o Keriso mai le faamamāina faaleagaga, o le faatulagaga o le liʻo o le faaipoipoga ma le olaga faaleaiga. A o faagasolo tausaga, ua faaauau pea ona fetuunaʻi lo tatou malamalamaga e faatatau i le faatulagaga o le aiga. O se faaaʻoaʻoga, pe a tatou faitau i lomiga e faatatau i auauna a Ieova i le amataga o le senituri lona 20, e tatou te maofa i le agaga faataulaga sa latou faaalia. E tatou te talisapaia le auala na latou faamuamua ai le auaunaga paia. Peitaʻi, sa manaʻomia pea ona latou maua se vaaiga paleni. I le ā le itu?

23 E iai nisi uso sa taliaina faaeaga i le auaunaga, po o le auai foʻi i le galuega femalagaaʻi, lea e valavala ai ma aiga mo le tele o masina. Sa iai foʻi taimi e leʻi faalaeiauina ai le faia o faaipoipoga. Peitaʻi, sa feteenaʻi lenā vala ma taʻiala a le Tusi Paia. E leʻi tele foʻi ni fautuaga i le auala e faamalosia ai faaipoipoga. Peitaʻi, ua suia le tulaga o mea i aso nei.

I aso nei, e lē tatau ona talia faaeaga i le auaunaga, pe a aafia ai faatulagaga i le aiga

24. Na faapefea ona fesoasoani Iesu i ona soo e faalautele lo latou malamalamaga e faatatau i faaipoipoga ma aiga?

24 I aso nei, e lē tatau ona talia faaeaga i le auaunaga, pe a aafia ai faatulagaga i le aiga. (Faitau le 1 Timoteo 5:8.) Ua faamautinoa mai foʻi e Iesu e faaauau pea ona maua e ona soo fautuaga faale-Tusi Paia, e faatatau i faaipoipoga ma le olaga faaleaiga. (Efe. 3:14, 15) I le 1978, na tatala ai le tusi Faia o Lou Olaga Faaleaiga ia Fiafia. Ae i le 18 tausaga na sosoo ai, na maua ai le lomiga Le Ala e Maua ai le Fiafia i le Aiga. E lē gata i lea, o loo maua pea i le tele o mataupu o Le Olomatamata fautuaga faale-Tusi Paia e fesoasoani i faaipoipoga.

25-27. O le ā le auala na uaʻi atu ai le pologa faamaoni i manaʻoga faaleagaga o fanau?

 25 Ae faapefea manaʻoga o le fanau? Ua tele tausaga o saunia e le faalapotopotoga a Ieova le tele o sauniuniga lelei mo fanau e eseese le matutua. O se faaaʻoaʻoga, mai le 1919-1921 na lomia ai i le Golden Age le mataupu “Juvenile Bible Study.” Ae ina ua māeʻa lenā, ona lomia lea o le polosiua The Golden Age ABC i le 1920, a o le 1941 na tatala ai le tusi Children. Ae i vaitausaga o le 1970, na tatalaina ai tusi o le Listening to the Great Teacher, Lou Talavou—Mauaina Mai ai Aogā Silisili, ma Laʻu Tusi o Tala o le Tusi Paia. I le 1982, na amata ai ona lomia i le Ala Mai! le mataupu “Ua Fesili Mai Talavou,” seʻia oo lava ina lomia i le 1989 le tusi Fesili ua Fesili Mai ai Talavou—Tali e Aogā.

Sa vaaia le fiafia o i latou sa auai i se tauaofiaga i Siamani, ina ua tatala le polosiua O Aʻu Lesona o le Tusi Paia!

26 I aso nei, ua tatou maua lomiga fou e lua o le Young People Ask, ma o loo faaauau pea ona maua nei mataupu i le tuatusi o le jw.org. Ua tatou maua foʻi le tusi Ia Faalogo i le Faiaʻoga Sili. O loo maua foʻi i la tatou tuatusi le tele o mataupu e aogā mo fanau e pei o Bible-character card, o mataupu  e faia ai suʻesuʻega a fanau, o taaloga, vitiō, tala faale-Tusi Paia, faapea lesona faale-Tusi Paia mo tamaiti e i lalo ifo o le tolu tausaga le matutua. Ua faailoa manino mai i nei vala, e lē o suia lava le vaaiga a Iesu i tamaiti, e pei ona ia siitia ai tamaiti i ona aao a o iai i le lalolagi. (Mare. 10:13-16) E finagalo Iesu e fafagaina le fanau i le itu faaleagaga.

27 E finagalo foʻi Iesu e puipuia fanau mai i tulaga lamatia. A o faasolo ina matuā paʻū maulalo le tulaga tau amio o lenei lalolagi, ua matuā faateteleina ai le faileagaina o fanau. O lea, ua aumaia ai pea taʻiala manino e fesoasoani i mātua e puipuia ai fanau. *

28. (a) O le ā e faatalitalia mai iā i tatou ina ia mafai ai ona auai i le tapuaʻiga mamā? (e) O le ā ua e maumauaʻi e fai?

28 Pe e lē faalaeiauina i tatou i le auala ua faamamā ai pea e Iesu ona soo, ma toleni i latou e faaaloalo ma ola e ōgatusa ma tapulaa maualuluga a Ieova, ma maua ai aogā? Seʻi toe mafaufau i le malumalu faaleagaga lea na vaaia e Esekielu. Ia manatua ona pā maualuluga. E ui e lē o se malumalu faaletino, ae pe e mafai ona tatou vaai i ai e pei o se malumalu moni? O le ulu atu i lenā malumalu, e lē lava ai le tau ina alu i le Maota mo Sauniga, faitau le Tusi Paia pe auai foʻi i le faiva. O le māfuaaga, e mafai foʻi e tagata faafiaamiotonu ona faia na mea. Peitaʻi, ia tatou faia na vala ma ola e ōgatusa ma tapulaa a Ieova ma faia ma le faanaunauga saʻo so tatou sao i le tapuaʻiga mamā. O le faia faapea, ua tatou ulu atu ai i le mea e sili ona paia, o le faatulagaga lea o le tapuaʻiga mamā iā Ieova. Ia tatou matuā faatāuaina le faaeaga tautele ua tatou maua. Ia tatou faia le mea sili e faaāta atu ai le mamalu o Ieova, e ala i le ola e ōgatusa ma ana tapulaa maualuluga.

^ pala. 2 I le 1932, o le taimi muamua lea na taʻua ai i le lomiga lona lua o le tusi Vindication, o valoaga uma o le Tusi Paia e faatatau i le toe faafoʻisiaina o tagata o le Atua, e iai sona faataunuuga i aso nei, ma e lē faasino atu i le Isaraelu faaletino ae o le Isaraelu faaleagaga. O na valoaga o loo faatatau atu i le toe faafoʻisiaina o le tapuaʻiga mamā. I Le Olomatamata o Mati 1, 1999, na taʻua ai o le malumalu na vaaia e Esekielu, o se valoaga e faatatau i le toe faafoʻisiaina o le tapuaʻiga mamā, ma e iai sona faataunuuga faaleagaga a o faagasolo aso e gata ai.

^ pala. 6 O lenei taʻutinoga e faasāina ai se alii ma se tamaʻitaʻi ona iai na o i laʻua i se potu seʻi vaganā ua tatalaina le faitotoʻa, pe seʻi vaganā foʻi o i laʻua o ulugalii faaipoipo po o ni tauaiga vavalalata. A o faagasolo tausaga, sa avea le faitauina o lenei taʻutinoga o se vaega o le tapuaʻiga a le aiga Peteli i taeao taʻitasi.

^ pala. 13 O le faaaogāina o le tapaa e aofia ai le ulaina, lamuina po o le totōina foʻi.

^ pala. 27 O se faaaʻoaʻoga, tagaʻi i le mataupu e 32 o le tusi Ia Faalogo i le Faiaʻoga Sili; faapea le Ala Mai! o Ianuari-Mati i le 2008, itulau 20-27.