Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 10

Ua Faamamāina Faaleagaga e le Tupu Ona Soo

Ua Faamamāina Faaleagaga e le Tupu Ona Soo

MANATU AUTŪ O LE MATAUPU

Le māfuaaga ma le auala na faamamāina faaleagaga ai e Iesu ona soo

1-3. O le ā na faia e Iesu ina ua ia vaaia le faaleagaina o le malumalu?

NA FAATĀUA e Iesu le malumalu i Ierusalema, auā sa ia iloa le tāua o lea nofoaga. Sa avea lenei malumalu ma taulaʻiga autū o le tapuaʻiga moni i le lalolagi. Sa tatau ona mamā le tapuaʻiga iā Ieova. O lea, seʻi mafaufau i faalogona o Iesu iā Nisani 10 i le 33 T.A., ina ua asiasi atu ma iloa ai ua faaleagaina le malumalu. O le ā le mea na tupu?Faitau le Mataio 21:12, 13.

2 I le Lotoā o Nuu Ese, sa faia ai e tagata faatauʻoa ma ē suitupe, fefaatauaʻiga faapiʻopiʻo ma tagata na ō atu e ofo a latou taulaga iā Ieova. * Sa “tutuli i fafo [e Iesu] ē uma ua fai fefaatauaʻiga i le malumalu, ma fuli laulau a tagata suitupe.” (Faatusatusa i le Neemia 13:7-9.) Sa taʻusalaina e Iesu nei tagata manatu faapito, ona o lo latou avea o le maota o lona Tamā ma “ana o ē e faomea.” Sa tāua iā Iesu le malumalu, ma na ia iloa foʻi e tatau ona mamā le tapuaʻiga i lona Tamā.

3 I senituri mulimuli ane ina ua māeʻa ona avea Iesu ma Tupu, na ia toe faamamāina ai se isi malumalu. O le ā lenā malumalu?

Faamamāina “Atalii o Levi”

4, 5. (a) Na faapefea ona faamamāina soo faauuina o Iesu mai le 1914 seʻia oo i le tauamatamataga o le 1919? (e) Pe na māeʻa ai i inā le faamamāina faaleagaga o tagata o le Atua? Faamatala.

4 E pei ona taʻua i le Mataupu e 2, ina ua māeʻa ona avea Iesu ma Tupu i le 1914, ona la asiasia lea ma lona Tamā le malumalu faaleagaga, po o le faatulagaga o le tapuaʻiga mamā. * O le iʻuga, na iloa ai e le Tupu e tatau ona faamamāina “atalii o Levi,” po o le ʻaufaauuina. (Mala. 3:1-3) Na amata mai i le 1914 seʻia oo i le tauamatamataga o le 1919, ona faataga e Ieova ona tagata e aafia i tofotofoga eseese ina ia faamamāina ai i latou. O le iʻuga, na faamamāina i latou, ma na latou naunau pea e lagolagoina le Tupu faa-Mesia.

5 Ae pe na māeʻa ai i inā le faamamāina o tagata o le  Atua? E leai. A o faagasolo aso e gata ai, o loo faaaogā e Ieova le Tupu faa-Mesia e fesoasoani i le faamamāina o ona soo, ina ia tumau ai i le malumalu faaleagaga. I mataupu e lua o loo sosoo mai, o le a talanoaina ai le auala na faamamā ai e Iesu ona soo i le itu tau amio. E lē gata i lea, o le faamamāina o lana faalapotopotoga. Ae seʻi o tatou iloiloina muamua auala eseese na faamamā ai faaleagaga e Iesu ona soo. E faamalosia lo tatou faatuatua, pe a malamalama i le auala ua faamamā ai faaleagaga e Iesu ona soo.

“Ia Outou Tausisi i le Mamā”

6. E faapefea i le faatonuga na avatu e Ieova i tagata Iutaia na faaaunuua, ona tatou malamalama ai i mea e aofia i le mamā faaleagaga?

6 O le ā le mamā faaleagaga? Seʻi o tatou iloiloina le fetalaiga a Ieova i tagata Iutaia sa faaaunuua i Papelonia, i le taimi o le a latou sauni e toe foʻi ai i le 537 T.L.M. (Faitau le Isaia 52:11.) Na toe foʻi i latou sa faaaunuua i Ierusalema e toe fausia le malumalu, ma faafoʻisia le tapuaʻiga moni. (Esera 1:2-4) Na finagalo Ieova e tuuesea e tagata Iutaia tū ma aʻoaʻoga faalotu uma a Papelonia. Seʻi mātau ana faatonuga na avatu iā i latou: “Aua tou te papaʻi atu i se mea e lē mamā,” “ia ō ese mai i totonu iā te ia,” ma “ia outou tausisi i le mamā.” E lē tatau ona pisipisia le tapuaʻiga mamā i tapuaʻiga sesē. O lea, o le mamā faaleagaga e aofia ai le vavaeese mai i aʻoaʻoga ma tū a lotu sesē.

7. O le ā le auala ua faaaogā e Iesu e faatumau ai le mamā faaleagaga o ona soo?

7 E leʻi leva talu ona avea Iesu ma Tupu, ae ia tofia se vaega toʻaitiiti e fesoasoani e faatumau le mamā faaleagaga o ona soo. O lenā vaega toʻaitiiti o le pologa faamaoni ma le faautauta, lea na tofia e Iesu i le 1919. (Mata. 24:45) E oo ane i lenā tausaga, ua vavaeese Tagata Aʻoga o le Tusi Paia mai i le tele o aʻoaʻoga a lotu sesē. Peitaʻi, na manaʻomia pea ona faamamāina faaleagaga i latou. O lea, na faaaogā ai e Iesu le pologa faamaoni, e faasolosolo ona faailoa mai i ona soo aso faamanatu ma tū e manaʻomia ona latou lafoaʻia. (Faata. 4:18) Seʻi o tatou iloiloina nisi o faaaʻoaʻoga.

Pe e Tatau Ona Faamanatu e Kerisiano le Kerisimasi?

8. O le ā le mea ua leva ona iloa e Tagata Aʻoga o le Tusi Paia e faatatau i le Kerisimasi, ae o le ā e latou te leʻi malamalama lelei i ai?

8 Ua leva ona iloa e Tagata Aʻoga o le Tusi Paia e faapaupau le amataga o le Kerisimasi, ma e leʻi fanau Iesu iā Tesema 25. Na taʻua i le Watch Tower o Tesema i le 1881: ʻO le toʻatele o tagata ua liulotu, sa auai i lotu faapaupau. O lea, e na ona taʻua lava o i latou o Kerisiano, ae o ē sa avea ma faifeʻau i lotu faapaupau ua taʻua nei o faifeʻau Kerisiano. E oo foʻi i aso faamanatu faapaupau, ua latou taumafai e suia i ni igoa faa-Kerisiano. O se faaaʻoaʻoga o na aso faamanatu, o le Kerisimasi.’ I le 1883, sa iai i le Watch Tower se mataupu na faamatuaina “O Anafea na Fanau ai Iesu?” Na  taʻua i lenā mataupu, atonu na fanau Iesu i le amataga o Oketopa. * Peitaʻi, e leʻi malamalama Tagata Aʻoga o le Tusi Paia e tatau ona taofia le faamanatuina o le Kerisimasi. Na faaauau foʻi ona faamanatu lenā aso i le aiga Peteli i Brooklyn. Peitaʻi, na suia le tulaga o mea ina ua mavae le 1926. Aiseā?

9. O le ā na iloa mulimuli ane e Tagata Aʻoga o le Tusi Paia e faatatau i le Kerisimasi?

9 O suʻesuʻega loloto ma le māeʻaeʻa na faia e Tagata Aʻoga o le Tusi Paia na latou iloa ai, o le amataga o le Kerisimasi ma mea e aofia ai, e lē faamamaluina ai le Atua. Na iai i le lomiga o le Golden Age o Tesema 14, 1927, se mataupu na faamatuaina “Le Amataga o le Kerisimasi.” Na taʻua i lenā mataupu, o le Kerisimasi o se aso faamanatu faapaupau, e taulaʻi atu i faafiafiaga ma e aofia ai ifoga tupua. Na faamanino mai ai foʻi e leʻi faapea mai Iesu e faamanatu le Kerisimasi, ma na faaiʻu le mataupu i le manatu lenei: ʻUa faaauau pea ona faamanatuina lea aso e le lalolagi, Tiapolo, faapea ma tagata ina ia faamalie ai o latou tuʻinanauga. O lea, e leai se māfuaaga e tatau ai ona naunau i latou ua tuuina atu e auauna iā Ieova, e faamanatu lea aso.’ Na amata mai i lenā tausaga ona lē toe faamanatuina e le aiga Peteli le Kerisimasi.

10. (a) O le ā le suʻesuʻega māeʻaeʻa e faatatau i le Kerisimasi na faailoa mai iā Tesema i le 1928? (Tagaʻi foʻi i le pusa “ Le Amataga ma le Fuafuaga o le Kerisimasi.”) (e) Na faapefea ona lapataʻia tagata o le Atua e faatatau i aso faamanatu e tatau ona ʻalofia? (Tagaʻi i le pusa “ O Isi Aso Faamanatu.”)

10 I le tausaga na sosoo ai, na maua ai e Tagata Aʻoga o le Tusi Paia nisi faamatalaga e faatatau i le Kerisimasi. Iā Tesema 12 i le 1928, na faia ai e le uso o Richard H. Barber,  o se sui o le ofisa ulu se lauga i le leitiō, na faaalialia ai i lumāmea le faapaupau o lenei aso faamanatu. O le ā le auala na tali atu ai tagata o le Atua i lenā taʻiala? E manatua e le uso o Charles Brandlein le taimi na lē toe faamanatuina ai e lona aiga le Kerisimasi. Na ia faapea mai: “E leʻi faigatā iā i matou le lē toe faamanatuina o lenā aso faapaupau. E tai pei lava o le tatalaina ese o se ofu palapalā ma tiaʻi.” E faapena foʻi le manatu na taʻua e le uso o Henry  A. Cantwell, lea na avea mulimuli ane ma ovasia femalagaaʻi: “Na matou fiafia ina ua lafoaʻia ia mea, ma faamaonia atu ai lo matou alolofa iā Ieova.” Na lotomalilie soo faamaoni o Keriso e faia suiga manaʻomia, ma lē toe faia ai sa latou vaega i lenā aso faapaupau. *Ioa. 15:19; 17:14.

11. E faapefea ona faailoa atu lo tatou lagolagoina o le Tupu faa-Mesia?

11 Maʻeu se faaaʻoaʻoga lelei na faataatia e na uso mo i tatou! Ia tatou mafaufau i la latou faaaʻoaʻoga, ma fesili ifo: ʻO le ā laʻu vaaiga i taʻiala mai i le pologa faamaoni? Po ou te talia ma le lotoatoa na taʻiala ma faatatau mea ua ou aʻoaʻoina?’ O lo tatou usiusitaʻi, e faailoa atu ai lo tatou lagolagoina o le Tupu faa-Mesia, lea ua ia faaaogāina le pologa faamaoni e tufatufa mai meaʻai faaleagaga i le taimi tatau.—Galu. 16:4, 5.

Pe e Tatau Ona Faaaogāina e Kerisiano le Koluse?

Le faailoga o le koluse ma le palealii (Tagaʻi i le palakalafa 12 ma le 13)

12. O le ā le manatu ua leva ona iai i Tagata Aʻoga o le Tusi Paia e faatatau i le koluse?

12 Na talia e Tagata Aʻoga o le Tusi Paia le faaaogāina o le koluse o se faailoga o le faa-Kerisiano, mo le tele o  tausaga. E latou te leʻi mafaufau e tatau ona tapuaʻi i le koluse, auā na latou iloa e sesē le ifo i tupua. (1 Kori. 10:14; 1 Ioa. 5:21) I le tauamatamataga o le 1883, na taʻua ai i le Watch Tower e “inosia e le Atua so o se ifoga tupua.” I le taimi muamua, sa manatu Tagata Aʻoga o le Tusi Paia e iai nisi o tulaga e lē afāina ai le faaaogāina o le koluse. O se faaaʻoaʻoga, sa latou faaaogāina se pine e iai le ata o le koluse ma le palealii. Sa latou manatu o lenei faailoga e faamaonia ai o le a latou maua le palealii o le ola, pe a faamaoni seʻia oo i le oti. Na amata mai i le 1891, ona iai le faailoga o le koluse ma le palealii i le faavaa o le Watch Tower.

13. O le ā le malamalamaga na maua e soo o Keriso e faatatau i le faaaogāina o le koluse? (Tagaʻi foʻi i le pusa “ Le Malamalamaga e Faatatau i le Koluse.”)

13 Sa matuā tāua i Kerisiano moni le faailoga o le koluse ma le palealii. Peitaʻi, na amata mai i vaitausaga o le 1920, ona latou malamalama i le faaaogāina o le koluse. E manatua e le uso o Grant Suiter, lea na avea mulimuli ane ma sui o le Vaega Pule, se fonotaga sa faia i Detroit i Michigan i le Iunaite Setete, i le 1928. Na ia faapea mai: “I lenā fonotaga, na faailoa mai ai e lē gata e leai se tāua o le faailoga o le koluse ma le palealii, ae e inosia foʻi.” A o faagasolo tausaga, na amata ona manino mai ai e lē tatau ona faaaogāina le koluse i le tapuaʻiga mamā.

14. Na faapefea ona tali atu tagata o le Atua i le malamalamaga na latou maua e faatatau i le koluse?

14 Na faapefea ona tali atu tagata o le Atua i le malamalamaga e faatatau i le faaaogāina o le koluse? Pe na faaauau pea ona latou maumauaʻi e faaaogā le faailoga o le koluse ma le palealii, lea sa tāua iā i latou? Na faapea mai Lela Roberts: “Na faigofie ona matou lē toe faaaogāina, ina ua matou iloa le mea o loo faaāta mai ai.” Ae na faapea mai se isi tuafafine e igoa iā Ursula Serenco: “Ua matou iloa nei, o se faailoga faapaupau le mea sa matou manatu i ai o le faailoga o le maliu o Keriso. E tusa ai ma le Faataoto 4:18, ua matou fiafia ona o le auala ua faasolo ona faatuputeleina ai le malamalama.” E leʻi mananaʻo Kerisiano faamaoni e faia sa latou vaega i tū faalotu.

15, 16. E faapefea ona faailoa atu lo tatou maumauaʻi e faatumau le mamā, o lotoā faalelalolagi o le malumalu faaleagaga o Ieova?

15 O le faanaunauga foʻi lenā o auauna a Ieova i aso nei. Ua tatou iloa o loo faaaogā e Iesu le pologa faamaoni, e fesoasoani i le faatumauina o le mamā faaleagaga o ona tagata. O lea, e tatau ona tatou usiusitaʻi, pe a lapataʻia i tatou e faatatau i aso faamanatu ma tū faalotu e mafai ona tatou aafia ai. E tatau ona tatou taumafai e faatumau le mamā o lotoā faalelalolagi o le malumalu faaleagaga a Ieova, e pei ona faia e uso ma tuafāfine sa soifua i le amataga o le faatasi mai o Keriso.

16 A o faagasolo aso e gata ai, na faia foʻi e Iesu gaoioiga e lē mafai ona tatou vaaia e puipuia ai faapotopotoga a  tagata o Ieova mai le faaleagaina faaleagaga. Seʻi o tatou iloiloina le auala na ia faia ai faapea.

Tuueseese “Tagata Amioleaga Mai i Tagata Amiotonu”

17, 18. O le ā o loo faaāta mai i le (a) lafoina o le upega i le sami, (e) “maua mai ai ituaiga iʻa eseese,” (i) tuu o “iʻa lelei i ola,” ma le (o) lafoaʻi ese o iʻa leaga?

17 O loo mataala Iesu le Tupu i le puipuia o faapotopotoga a tagata o le Atua i le lalolagi aoao. O loo faia foʻi e Iesu ma agelu se galuega e tuueseese ai tagata, lea e lē mafai ona tatou malamalama i ai. Na faamatalaina e Iesu lea galuega i le talafaatusa e faatatau i le upega. (Faitau le Mataio 13:47-50.) O le ā le uiga o lenā talafaatusa?

O le upega e faaāta mai ai le galuega talaʻi o le Malo o loo faia i le fanau a tagata (Tagaʻi i le palakalafa 18)

18 Ia ʻlafo i le sami se upega.’ O le upega o loo faaāta mai ai le galuega talaʻi o le Malo, ae o le sami e faaāta mai ai le fanau a tagata. E “maua mai ai ituaiga iʻa eseese.” Ua tosina mai tagata eseese ona o le feʻau o le tala lelei. E aofia ai i latou ua uia laasaga e avea ai ma Kerisiano, faapea i latou e fiafia i le upu moni, ae leʻi faia ni taumafaiga e auai i le tapuaʻiga mamā. * E tuu “iʻa lelei i ola.” Ua aoaoina tagata lotofaamaoni i ola po o faapotopotoga, o i inā e latou te faia ai le tapuaʻiga mamā iā Ieova. Peitaʻi, e lafoaʻi ese iʻa “leaga.” A o faagasolo aso e gata ai, o loo faaauau pea ona tuueseese “tagata amioleaga mai i tagata amiotonu.” * O le iʻuga, o i latou e lē lotomalilie e lafoaʻia o latou talitonuga ma tū faalotu, e lē mafai ona faatagaina e faaleagaina ai le faapotopotoga. *

19. O ā ni ou faalogona i le auala ua faatumau ai e Iesu, le mamā o tagata tapuaʻi o le Atua ma le tapuaʻiga moni?

19 Pe e lē faamalosia ea i tatou ona o loo tatou malu i lalo o le puipuiga a Iesu? Pe e lē faalaeiauina foʻi i tatou i le maelega o Iesu mo le tapuaʻiga moni, e pei ona ia faamamāina ai le malumalu i le uluaʻi senituri T.A.? E tatou te lotofaafetai ona o le faatumauina e Iesu o le mamā faaleagaga o tagata o le Atua, faapea le tapuaʻiga moni. E faamaonia lo tatou lagolagoina o le Tupu ma lona Malo, pe a tatou ʻalofia atoatoa lotu sesē.

^ pala. 2 Na faaaogā e tagata asiasi Iutaia se ituaiga o tupe siliva faapitoa, e totogi ai a latou lafoga faaletausaga i le malumalu. O lea, na sii ai i luga e tagata suitupe le tau e faafesuiaʻi ai tupe. Na manaʻomia foʻi ona faatau e tagata asiasi manu e faia ai a latou taulaga. Na taʻua e Iesu nei ʻaufaipisinisi “o ē e faomea,” ona o le taugatā o a latou auaunaga.

^ pala. 4 O loo tapuaʻi tagata o Ieova o loo i le lalolagi, i lotoā faalelalolagi o le malumalu sili faaleagaga.

^ pala. 8 Na taʻua i lenei mataupu o le fanau mai o Iesu i le tau malūlū, “e lē ōgatusa ma le faamatalaga a le Tusi Paia e faapea, sa i fafo leoleo mamoe e vaavaai a latou lafu.”—Luka 2:8.

^ pala. 10 I se tusi na tusia e le uso o Frederick W. Franz iā Novema 14, 1927, na ia taʻua ai: “E tatou te lē faamanatuina le Kerisimasi i le tausaga lenei. Sa palota le aiga Peteli, ma ua malilie ai i lea vala.” Mulimuli ane, na ia toe tusi iā Fepuari 6, 1928 e faapea: “Ua faasolosolo ona faamamāina i tatou e le Alii mai iā Papelonia le faalapotopotoga a le Tiapolo.”

^ pala. 18 O se faaaʻoaʻoga, i le 2013 e 7,965,954 le ʻautalaʻi, ae e 19,241,252 i latou na auai i le Faamanatuga.

^ pala. 18 O le tuueseeseina o iʻa lelei ma iʻa leaga, e lē tutusa ma le tuueseeseina o mamoe ma ʻoti. (Mata. 25:31-46) O le tuueseeseina po o le faamasinoga mulimuli o mamoe ma ʻoti, e faia a o faagasolo le puapuaga tele. O lea, o loo maua pea e i latou e pei o ni iʻa leaga le avanoa e foʻi mai ai iā Ieova, ma aoaoina ai i latou i ola po o faapotopotoga.—Mala. 3:7.

^ pala. 18 O le lafoina o iʻa leaga i le ogaumu aasa, e faaāta mai ai lo latou faaumatiaga i le lumanaʻi.