Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 6

O Tagata Talaʻi—Ua Lotomalilie e Ofo Atu i Latou Lava

O Tagata Talaʻi—Ua Lotomalilie e Ofo Atu i Latou Lava

MANATU AUTŪ O LE MATAUPU

Ua faatulaga e le Tupu se ʻautau o tagata talaʻi

1, 2. O le ā na valoia mai e Iesu, ma o le ā le fesili tāua na lāgā ai?

E MASANI ona lē faataunuuina e taʻitaʻi o faigāmalo a latou folafolaga, ma e faia foʻi faapea e tagata e lelei o latou faanaunauga. Peitaʻi, e ese mai ai le tulaga o Iesu Keriso le Tupu o le Malo faa-Mesia.

2 Sa faia e Iesu se valoaga i le pe tusa o le 1,900 tausaga a o leʻi avea o ia ma Tupu. O lea, ina ua māeʻa ona avea o ia ma Tupu i le 1914, na ia nofosauni ai loa e faataunuu lenā valoaga. Na ia valoia mai i le Mataio 24:14: “O le a talaʻiina atu lenei tala lelei o le malo i le lalolagi atoa.” O le faataunuuina o na upu, o se tasi lea o vala o le faailoga o lona faatasi mai i lona mana tautupu. Peitaʻi, na tulaʻi ai se fesili tāua. O le a faapefea ona faatulaga e le Tupu se ʻautau o tagata talaʻi e lotomalilie e ofo atu i latou lava, i aso e gata ai o se vaitaimi e iloga i le manatu faapito, leai o se alofa ma tagata e lē fiafia i lotu? (Mata. 24:12; 2 Timo. 3:1-5) E tāua ona iloa le tali o lenā fesili, auā e aafia ai Kerisiano moni uma.

3. O le ā sa mautinoa e Iesu, ma na faapefea ona ia atiaʻe lenā uiga?

3 Seʻi o tatou mafaufau i le valoaga a Iesu. Pe e lē faaalia i le faaupuga a Iesu “o le a talaʻiina atu,” le uiga mautinoa sa iā te ia? O le mea moni lenā, auā na mautinoa e Iesu o le a faaalia e i latou e lagolagoina o ia le agaga faataulaga, i aso e gata ai. Na faapefea ona maua e Iesu lenā uiga mautinoa? Sa ia aʻoaʻoina mai i lona Tamā. (Ioa. 12:45; 14:9) A o leʻi afio mai i le lalolagi, sa ia mātauina le maufaatuatuaina e lona Tamā o le agaga faataulaga na faaalia e ana auauna. Seʻi o tatou iloiloina le auala na faia ai faapea e Ieova.

“E Ofo Atu ma le Lotomalie e Ou Tagata i Latou Lava”

4. O le ā le galuega na valaaulia e Ieova tagata Isaraelu e lagolagoina, ma na faapefea ona latou tali atu?

4 Seʻi mafaufau i le mea na tupu ina ua faatonuina e Ieova Mose e fausia le faleʻie paia, lea na avea ma taulaʻiga o le tapuaʻiga mo le nuu o Isaraelu. Na valaaulia e le Atua  e ala mai iā Mose tagata ina ia lagolagoina le galuega. Na faapea atu Mose: “Ia taʻitasi ma fai lana foaʻi mo Ieova e tusa ma lona lotomalie.” O le ā le iʻuga? “Ua aumaia pea e tagata iā te ia o foaʻi tauofo i lea taeao ma lea taeao.” E tele mea na aumaia, o lea “na taofia ai tagata mai le aumaia o nisi mea.” (Eso. 35:5; 36:3, 6) Sa faamaonia e Isaraelu le talafeagai o le maufaatuatuaina o i latou e Ieova.

5, 6. E tusa ai ma le Salamo 110:1-3, o le ā e faatalitalia e Ieova ma Iesu mai i tagata tapuaʻi faamaoni i aso e gata ai?

5 O loo faatalitalia foʻi e Ieova lenā agaga faataulaga mai i ana auauna i nei aso e gata ai. I le silia i le 1,000 tausaga a o leʻi fanau mai Iesu, na faagaeeina ai e Ieova Tavita e tusia faamatalaga e faatatau i le taimi o le a amata ona pule ai le Mesia. (Faitau le Salamo 110:1-3.) E iai fili o le Tupu fou o Iesu o loo tetee iā te ia. Ae e iai foʻi i latou o loo lagolagoina o ia, ma e lē o faamalosia i latou e auauna i le Tupu. E oo lava i talavou, o loo latou lotomalilie e ofo atu i latou lava, ma ua talafeagai ai ona faatusaina i latou i le sau o le vaveao. *

Ua faatoʻateleina i latou ua ofo atu e lagolagoina le Malo e pei o le sau o le vaveao (Tagaʻi i le palakalafa e 5)

6 Na silafia e Iesu o loo faatatau atu iā te ia le valoaga o loo i le Salamo 110. (Mata. 22:42-45) O lea, sa ia mautinoa ai e iai tagata faamaoni o le a lotomalilie e ofo atu i latou lava, e talaʻia le tala lelei i le lalolagi aoao. Ua faapefea ona faamaonia lenā vala i mea na tutupu i le talafaasolopito? Po ua faatulaga e Iesu se ʻautau o tagata talaʻi e faaalia le agaga faataulaga i nei aso e gata ai?

“O Loʻu Faaeaga ma Laʻu Matafaioi le Faalauiloa Atu o Lenā Feʻau”

7. O ā laasaga na faia e Iesu e sauniunia ai ona soo mo se galuega tele, ina ua māeʻa ona avea o ia ma Tupu?

7 E leʻi umi lava talu ona avea Iesu ma Tupu, ae ia sagaʻi ane loa e sauniunia ona soo mo se galuega tele. E pei  ona taʻua i le Mataupu e 2, sa ia asiasia ma faia le galuega faamamā mai le 1914, seʻia oo i le amataga o le 1919. (Mala. 3:1-4) I le 1919, na ia tofia ai le pologa faamaoni e taʻimua i ona tagata. (Mata. 24:45) Talu mai lenā taimi, o loo faaauau pea ona tufatufaina mai e le pologa meaʻai faaleagaga, e ala mai i lauga o tauaofiaga faapea lomiga. O nei vala, ua faalaeiauina ai pea Kerisiano ina ia faia so latou sao i le talaʻiga.

8-10. Na faapefea i tauaofiaga ona faamamafa ai le tāua o le galuega talaʻi? Aumai se faataʻitaʻiga. (Tagaʻi foʻi i le pusa “ O Uluaʻi Tauaofiaga na Faamamafa ai le Tāua o le Galuega Talaʻi.”)

8 Lauga o tauaofiaga. O le naunau o Tagata Aʻoga o le Tusi Paia mo taʻiala, na latou auai ai i le tauaofiaga na faia i Cedar Point i Ohio i le Iunaite Setete, mai iā Setema 1-8 i le 1919. O la latou tauaofiaga tele muamua lea, talu ona māeʻa le Taua Muamua a le Lalolagi. I le aso lona lua o le tauaofiaga, na faia ai e Rutherford se lauga, lea na ia faapea atu ai i le ʻauusufono: ʻO le galuega autū a Kerisiano i le lalolagi, o le folafola atu lea o le feʻau o le malo a le Alii.’

9 O le vala e sili ona mataʻina o lea tauaofiaga na tupu i le aso lona lima. Na faia ai e le uso o Rutherford le lauga “ʻAufaigaluega Felagolagomaʻi,” lea na lomia mulimuli ane i le Watch Tower, i le mataupu na faaulutalaina “Faasilasilaina le Malo.” Na ia faapea mai: “E tatau i se Kerisiano ona fesili ifo, O le ā le māfuaaga o loʻu iai i le lalolagi? O le tali, Ua avea aʻu ma sāvali a le Atua e faalauiloa atu le feʻau o le leleiga i le lalolagi, ma o loʻu faaeaga ma laʻu matafaioi le faalauiloa atu o lenā feʻau.”

10 O le lauga taʻutaʻua lenā a le uso o Rutherford, na faasilasila mai ai o le a lomia le mekasini fou The Golden Age (Ala Mai!), e fesoasoani i tagata e iloa, o le Malo e na o le pau lea o le faamoemoega mo le fanau a tagata. Na ia fesili i le aofia po o ai e fia faia sona sao i le tufatufaina o lea mekasini. Na taʻua i se lipoti: “E mataʻina le auala na tali mai ai le aofia, ma na tutulaʻi uma le 6,000 na auai.” * Na faamaonia ai, na lotomalilie i latou na lagolagoina le Tupu e faalauiloa atu le Malo.

11, 12. O le ā na taʻua i le Watch Tower i le 1920 e faatatau i le taimi e faataunuu ai le galuega na valoia mai e Iesu?

11 Lomiga. Na matuā faamatilatila mai i le Watch Tower, le tāua o le galuega talaʻi lea na valoia mai e Iesu. Seʻi o tatou iloiloina ni faaaʻoaʻoga mai le amataga o vaitausaga o le 1920.

12 O le ā le feʻau o le a folafolaina atu pe a faataunuu le Mataio 24:14? O afea e faataunuu ai lenā galuega? I le Watch Tower o Iulai 1, 1920, sa iai le mataupu “Tala Lelei o le Malo,” lea na taʻua ai le feʻau e faapea: “O le tala lelei e faatatau i le iʻuga o le faiga tuai o mea, ma le faavaeina o le Malo faa-Mesia.” Na taʻua ai foʻi le taimi e talaʻia atu ai lea  feʻau: ʻE tatau ona talaʻia lea feʻau mai le Taua Muamua a le Lalolagi, seʻia oo i le puapuaga tele.’ Na taʻua atili ai foʻi: ʻO le taimi lenei e talaʻia ai le tala lelei i le tele e mafai ai, i atunuu ua faapea mai o Kerisiano.’

13. Na faapefea i se Watch Tower i le 1921, ona uunaʻia ai Kerisiano faauuina e faaalia le agaga faataulaga?

13 Pe na faamalosia tagata o le Atua e faia le galuega na valoia mai e Iesu? E leai. I le Watch Tower o Mati 15, 1921, na iai se mataupu na faamatuaina “Ia Lototetele.” O lenā mataupu na faalaeiauina ai le ʻaufaauuina e faaalia le agaga faataulaga. Sa faalaeiauina le tagata lava ia ina ia fesili ifo: “Pe e lē o se faaeaga tautele, ma o loʻu tiute foʻi le faia o se sao i lea galuega?” Na taʻua atili i le lomiga: ʻPe a vaai i ai o se faaeaga le faia o se sao i lea galuega, o le a e pei ai o Ieremia o lē na pei le afioga a le Atua o se afi mumū o loo punitia i ona ivi, lea na uunaʻia ai o ia e tautala atu.’ (Iere. 20:9) O lenā faalaeiauga, na faailoa mai ai le maufaatuatuaina e Ieova ma Iesu, o tagata faamaoni na lagolagoina le Malo.

14, 15. I le 1922, o le ā le auala na faalaeiauina ai e le Watch Tower Kerisiano faauuina e faaoo atu ai le feʻau?

14 Na faapefea ona faaoo atu e Kerisiano moni le feʻau o le Malo? Na iai i le Watch Tower o Aokuso 15, 1922, se mataupu puupuu na faamatuaina “E Tāua le Auaunaga,” lea na aumaia ai se feʻau malosi. O lenā mataupu, na uunaʻia ai le ʻaufaauuina “e ō i fale o aiga e talanoa ai ma ave i ai lomiga, ma molimau atu ua lata mai le malo o le lagi.”

15 Talu mai le 1919, na manino mai ai le faaaogāina e Keriso o le pologa faamaoni ma le faautauta, e faamanatu atu pea i Kerisiano lo latou faaeaga ma le tiute tauave e faalauiloa atu le feʻau o le Malo. O le ā le auala na tali atu ai Tagata Aʻoga o le Tusi Paia?

“O le a Galulue Tauofo Ē Faamaoni”

16. Na faapefea ona tali atu nisi o toeaina i le manatu e tatau ona auai tagata uma i le faiva i le fanua?

16 I vaitausaga o le 1920 ma le 1930, na teena ai e nisi le manatu e tatau i le ʻaufaauuina uma ona faia so latou sao i le faiva i le fanua. Na taʻua i le Watch Tower o Novema 1, i le 1927 le mea na tupu: ʻE iai nisi o toeaina i le faapotopotoga ua mumusu e faalaeiauina uso e faia so latou sao i le auaunaga, ma e lē faia foʻi so latou sao i lea galuega. Ua latou ʻamuʻamu i le fuafuaga e talaʻi mai i lea fale i lea fale le feʻau e faatatau i le Atua, le Tupu faapea lona Malo.’ Na taʻua atili ai foʻi: “Ua oo i le taimi e tatau ai i tagata faamaoni ona ʻalofia i latou na, ma faailoa atu ua lē o toe maufaatuatuaina i latou e avea ma toeaina.” *

17, 18. O le ā le auala na tali atu ai le toʻatele i le taʻiala mai le ofisa ulu, ma na faapefea ona tali atu le faitau miliona i le selau tausaga ua mavae?

17 O le itu e fiafia ai, na talia ma le fiafia e le toʻatele le taʻiala mai i le ofisa ulu. Sa latou vaai i ai o se faaeaga le folafola atu o le feʻau o le Malo. Na taʻua i le Watch Tower  o Mati 15, 1926: ʻO le a galulue tauofo tagata faamaoni e faailoa atu le feʻau i tagata.’ Na ola na tagata faamaoni e tusa ma upu faavaloaga o loo i le Salamo 110:3, ma lotomalilie e ofo atu i latou lava e lagolago le Tupu faa-Mesia.

18 I le 100 tausaga ua mavae, e faitau miliona na ofo atu i latou lava e faalauiloa le Malo. I nisi o mataupu o loo mulimuli mai, o le a iloiloina ai auala ma meafaigaluega na latou faaaogā, ma iʻuga na maua mai ai. Ae seʻi o tatou iloiloina muamua le māfuaaga, ua tauofo ai le faitau miliona e faia le galuega talaʻi i se lalolagi manatu faapito. A o iloiloina lenā vala, ia fesili ifo, ʻAiseā ua ou talaʻia ai le tala lelei?’

ʻIa Faaauau Pea Ona Saʻili Muamua le Malo’

19. Aiseā e tatau ai ona tatou utagia le fautuaga a Iesu ia ʻfaaauau pea ona saʻili muamua le Malo’?

19 Na fautuaina e Iesu ona soo i le Mataio 6:33, ʻina ia faaauau pea ona saʻili muamua le Malo.’ Aiseā e tatau ai ona utagia lenā fautuaga? Talu ai ua tatou iloa le tāua o le Malo, ma o le vala autū lea i le faataunuuina o le finagalo o le Atua. Na iloiloina i le mataupu ua mavae, le auala na faasolosolo ona faailoa mai ai e le agaga paia upu moni e faatatau i le Malo. O le a tatou saʻilia muamua le Malo, pe afai e pāʻia o tatou loto i upu moni tautele e faatatau i le Malo.

E taitutusa le fiafia o Kerisiano ina ua latou maua upu moni e faatatau i le Malo, ma le fiafia o le tamāloa ina ua ia maua le oloa sa natia (Tagaʻi i le palakalafa e 20)

20. Na faapefea ona faaalia i le talafaatusa a Iesu e faatatau i le oloa na natia, le auala o le a tali atu ai ona soo i le fautuaga e saʻilia muamua le Malo?

20 Na silafia e Iesu le auala o le a tali atu ai ona soo i le fautuaga ina ia saʻilia muamua le Malo. Seʻi mafaufau i lana talafaatusa e faatatau i le oloa sa natia. (Faitau le Mataio 13:44.) Na taʻua i le talafaatusa, sa maua e le tagata faigaluega le oloa sa natia a o faia ana galuega i aso taʻitasi, ma ia iloa ai le tāua o lea oloa. O le ā na ia faia? “O lona olioli na alu ai loa o ia ma faatau atu ana mea uma, ma faatau mai ai lenā fanua.” O le ā le lesona e tatou te aʻoaʻoina mai ai? O le iloaina o le upu moni e faatatau i le Malo ma lona tāua, o le a tatou naunau ai e faia faataulaga ina ia faamuamua le Malo i o tatou olaga. *

21, 22. Ua faapefea ona faamaonia e i latou e lagolagoina le Malo lo latou saʻilia muamua o le Malo? Aumai se faataʻitaʻiga.

21 O tagata faamaoni o loo lagolagoina le Malo, e faamaonia atu i a latou gaoioiga ae e lē na o upu, o loo latou saʻilia muamua le Malo. E tuutoina atu o latou olaga, tomai faapea a latou meafaitino ina ia talaʻia ai le Malo. Ua faia e le toʻatele le tele o faataulaga ina ia auai ai i le auaunaga faataimi atoa. Ua vaaitino na tagata talaʻi i le faamanuia a Ieova iā i latou, ona o le faamuamua o le Malo. Seʻi o tatou iloiloina se faaaʻoaʻoga.

22 Na amata ona auauna Avery ma Lovenia Bristow o ni colporteur (paeonia sauatoa), i le itu i saute o le Iunaite  Setete i le taufaaiʻuiʻuga o vaitausaga o le 1920. I tausaga mulimuli ane, na taʻua e Lovenia: “E tele tausaga na ma fiafia ai i le auaunaga paeonia. O le tele o taimi na ma lē iloa ai po o fea e maua ai se tupe mo le penisini, ma faatau ai se meaʻai. E ui i lea, e eseese lava auala na saunia ai e Ieova mea na ma manaʻomia. Na faaauau pea ona ma paeonia, ma na maua pea mea na ma manaʻomia.” E manatua e Lovenia se tasi taimi na la auauna ai i Pensacola i Florida, ma na lē lava se la tupe ma se mea e fai ai se meaʻai. I le taimi na la toe foʻi ai i le kalaveni, sa la maua ni ato meaʻai se lua faatasi ai ma se pepa o loo tusia ai le faamatalaga: “O alofaaga mai le faapotopotoga i Pensacola.” Pe a toe mafaufau i tausaga na paeonia ai, na faapea mai Lovenia: “E leʻi tuulafoaʻia i maʻua e Ieova. Sa ia silafia lo ma faatuatuaina o ia.”

23. O ā ni ou faalogona e faatatau i upu moni o le Malo ua e iloaina, ma o le ā ua e maumauaʻi e fai?

23 E eseese uma o tatou tulaga, ma e lē tutusa foʻi le tele o lo tatou sao e faia i le talaʻiga. Peitaʻi, o se faaeaga iā i tatou uma le faalauiloa atu o le tala lelei ma le lotoatoa. (Kolo. 3:23) O le tāua iā i tatou o le upu moni e faatatau i le Malo, ua tatou lotomalilie ai e faia so o se faataulaga, ina ia faia ai le mea sili i le auaunaga. Po o lo tatou faanaunauga foʻi lenā?

24. O le ā se tasi o vala mataʻina ua faataunuuina e le Malo i nei aso e gata ai?

24 I le 100 tausaga ua mavae, na faataunuuina ai e le Tupu le valoaga o loo i le Mataio 24:14, ma e leʻi fia pulepuletutū o ia ina ua ia faia lea vala. E ui na feola ona soo i se lalolagi manatu faapito, ae na latou lotomalilie e ofo atu i latou lava e faia le galuega talaʻi. O le folafolaina atu o le tala lelei i le lalolagi aoao, ua avea ma se tasi o vala o le faailoga o le faatasi mai o Iesu i le mana o le Malo. O le talaʻia foʻi o le tala lelei, o se tasi lea o mea e sili ona mataʻina ua faataunuuina e le Malo i nei aso e gata ai.

^ pala. 5 I le Tusi Paia, e fesootaʻi atu le sau o le vaveao i le tele o se mea.—Kene. 27:28; Mika 5:7.

^ pala. 10 Na taʻua i le tamaʻi tusi To Whom the Work Is Entrusted: ʻO le tauiviga o le tufaina o le The Golden Age mai i lea fale i lea fale, sa aofia ai le feʻau o le malo. Sa mafai ona tuu i aiga se kopi o le mekasini, pe a māeʻa ona faailoa i ai le feʻau e faatatau i le tauiviga.’ I tausaga mulimuli ane, na faalaeiauina uso e faailoa i tagata e mafai ona latou mauaina kopi o le Golden Age ma le Watch Tower, e ala i le meli. Iā Fepuari 1 i le 1940, na amata ai ona faalaeiauina tagata o Ieova e tufatufa atu ma lipoti mekasini na latou tufatufaina.

^ pala. 16 I lenā taimi, sa faapalota le filifilia o toeaina i le faapotopotoga. O lea, na mafai ai ona lē palotaina e le faapotopotoga tane na lē fia auai i le faiva i le fanua. O le a talanoaina i le Mataupu e 12, le auala faale-Atua na faaaogā mulimuli ane e tofia ai toeaina.

^ pala. 20 O le manatu lava lea e tasi na taʻua e Iesu, i lana talafaatusa e faatatau i le tagata faatauʻoa na malaga e saʻilia le penina tautele. I le taimi na ia maua ai lea penina tautele, sa ia faatau atu ana mea uma ina ia faatau mai ai le penina. (Mata. 13:45, 46) Ua tatou iloa mai i nei talafaatusa, e eseese auala e iloa ai e tagata upu moni e faatatau i le Malo. O isi na teʻi lava ua maua le upu moni, a o nisi na latou saʻilia le upu moni. Ae po o le ā lava le auala na tatou maua ai le upu moni, ia tatou lotomalilie e faia faataulaga uma ina ia faamuamua ai le Malo i o tatou olaga.