Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 15

Finau mo le Saʻolotoga e Tapuaʻi Ai

Finau mo le Saʻolotoga e Tapuaʻi Ai

MANATU AUTŪ O LE MATAUPU

O auala ua fesoasoani ai Keriso i ona soo e finau mo le saʻolotoga e tapuaʻi ai ma usitaʻia tulafono a le Atua

1, 2. (a) E faapefea ona faamaonia o tatou tulaga o ni tagatānuu o le Malo o le Atua? (e) Aiseā e finau ai Molimau a Ieova i nisi taimi mo le saʻolotoga faaletapuaʻiga?

PO O oe o se tagatānuu o le Malo o le Atua? O le tulaga lenā pe afai o oe o se Molimau a Ieova. E lē faamaonia o tatou tulaga o ni tagatānuu o le Malo i ni tusifolau, po o ni pepa faamaonia mai se faigāmalo. Peitaʻi, e faamaonia i le auala e faia ai la tatou tapuaʻiga iā Ieova. O le tapuaʻiga moni e tele atu mea e aofia ai nai lo o tatou talitonuga, ma e aofia ai lo tatou usiusitaʻi i tulafono a le Malo o le Atua. O la tatou tapuaʻiga foʻi e aafia ai tafa uma o o tatou olaga, e pei o le auala e tausia ai o tatou aiga, ma le auala e taulimaina ai mataupu faafomaʻi.

2 Peitaʻi, e lē tāua i taimi uma i le lalolagi le avea o i tatou ma tagatānuu o le Malo, faapea agavaa e tatau ona ausiaina. O nisi faigāmalo ua taumafai e faasāsā pe tafiesea atoatoa la tatou tapuaʻiga. O nisi taimi ua finau tagata o le Atua mo le saʻolotoga, e usitaʻia ai tulafono a le Tupu faa-Mesia. Peitaʻi e lē faateʻia ai i tatou, auā o loo taʻua foʻi i le Tusi Paia auauna a Ieova na finau mo le saʻolotoga e fai ai la latou tapuaʻiga.

3. O le ā na fesagaʻia e tagata o Ieova i aso o le masiofo o Eseta?

3 O se faaaʻoaʻoga, na lamatia ola o tagata o le Atua i aso o le masiofo o Eseta. Na taumafai le palemia amioleaga o Hamanu e fasiotia tagata Iutaia uma, sa nonofo i vaipanoa sa pule ai Asueru le tupu o Peresia. O le māfuaaga, sa “ese a latou tulafono mai i isi nuu uma.” (Eseta 3:8, 9, 13) E leʻi tuulafoaʻia e Ieova ona tagata. Peitaʻi na ia faamanuia i taumafaiga a Eseta ma Moretekai, ina ua la talosaga atu i le tupu o Peresia ina ia puipuia tagata o le Atua.—Eseta 9:20-22.

4. O le ā o le a iloiloina i lenei mataupu?

4 Ae faapefea aso nei? I le mataupu ua mavae, na taʻua ai taumafaiga a faigāmalo e tetee i Molimau a Ieova. Ae i lenei mataupu, o le a talanoaina ai nisi o auala na taumafai ai na faigāmalo e faasāsā la tatou tapuaʻiga. O vala nei e tolu o le a tatou iloiloina: (1) o la tatou aiā e faagaoioi ai la tatou faalapotopotoga faapea le auala e faia ai la tatou tapuaʻiga, (2) le saʻolotoga e tatou te filifilia ai togafitiga faafomaʻi e ōgatusa ma taʻiala a le Tusi Paia, ma le (3) le aiā a mātua e tausia aʻe ai a latou fanau i tapulaa a Ieova. O le a tatou iloiloina i nei  vala taʻitasi le auala na taumafai ai nei tagatānuu faamaoni lototetele, e puipuia o latou tulaga o ni tagatānuu o le Malo, ma le auala na faamanuiaina ai a latou taumafaiga.

Taumafaiga e Avea ma Lotu Aloaʻia ma Maua le Saʻolotoga e Faia ai le Tapuaʻiga

5. O ā aogā ua maua e Kerisiano moni mai i le faatagaga faaletulafono ua tuuina atu iā i latou?

5 E tatou te lē manaʻomia se faatagaga faaletulafono mai faigāmalo, ina ia faia ai la tatou tapuaʻiga iā Ieova. Peitaʻi, o lenā faatagaga faaletulafono e faigofie ai ona faia la tatou tapuaʻiga. O se faaaʻoaʻoga, e tatou te maua ai le saʻolotoga e feiloaʻi ai i a tatou lava Maota mo Sauniga ma Maota mo Fonotaga, le lolomiina ma le felaʻuaʻiga o lomiga faale-Tusi Paia, ma le faailoa atu o le tala lelei i isi e aunoa ma le faalavelavea. O le tele o atunuu ua lesitala faaletulafono ai Molimau a Ieova, ma ua latou maua ai le saʻolotoga e faia ai la latou tapuaʻiga, e pei o tagata lotu o isi foʻi lotu aloaʻia. Ae o le ā e tupu pe a teena e se faigāmalo le lesitalaina faaletulafono o Molimau a Ieova, pe taumafai foʻi e faasāsā le saʻolotoga e faia ai la tatou tapuaʻiga?

6. O le ā le luʻi na fesagaʻia e Molimau a Ieova i Ausetalia i le amataga o vaitausaga o le 1940?

6 Ausetalia. I le amataga o vaitausaga o le 1940, na faapea mai ai se kovana sili o Ausetalia, e telē se aafiaga leaga o talitonuga o Molimau a Ieova i le lagolagoina o le Taua Lona Lua a le Lalolagi. O lea na faia ai se tapu e taofia ai le faia o sauniga, talaʻiga, faapea le tapunia o le Peteli ma fāoa faamalosi foʻi Maota mo Sauniga. Na faasāina foʻi a tatou lomiga faale-Tusi Paia. Ae na maua e uso le mapusaga ina ua mavae ni nai tausaga o faia faananā la latou tapuaʻiga. Iā Iuni 14 i le 1943, na aveesea ai e le Faamasinoga Maualuga i Ausetalia lenā tapu.

7, 8. Faamatala taumafaiga na faia e uso i Rusia i le tele o tausaga mo le saʻolotoga e faia ai le tapuaʻiga.

7 Rusia. E tele tausaga na saisaitia ai le tapuaʻiga a Molimau a Ieova i lalo o pulega faa-Komunisi, seʻia oo i le taimi na lesitala ai i le 1991. Ae i le taimi na lē toe iai le Iuni faa-Sovieti, na mafai ai loa ona aloaʻia faaletulafono la tatou faalapotopotoga i lalo o le Faigāmalo Soofaatasi a Rusia i le 1992. Peitaʻi, e leʻi umi ae amata ona faapopoleina nisi tagata tetee, aemaise lava i latou na auai i le lotu Orthodox i Rusia, i le faatupulaʻia o tagata o Ieova. O lea, mai le 1995 e oo atu i le 1998, e lima moliaga na latou tuuaʻia ai Molimau o Ieova o ni tagata solitulafono. Peitaʻi, e leai ni faamaoniga o nei moliaga. Na maumauaʻi nei tagata tetee e faaulu sa latou tagi i le 1998. Na tatou manumalo i le faamasinoga, peitaʻi, na tatou faiaʻina iā Me i le 2001, ina ua latou apiliina le faaiʻuga. Sa toe faia lenā mataupu iā Oketopa o lenā lava tausaga, ma i le 2004 na faalēaogāina ai le faalapotopotoga faaletulafono sa faaaogā e Molimau a Ieova i Moscow, ma faasā la latou galuega.

 8 Na matuā faateteleina sauāga. (Faitau le 2 Timoteo 3:12.) Na ulagia ma sauāina Molimau a Ieova. Na aveesea faamalosi a tatou lomiga, ma matuā faigatā ona fausia pe faaaogā foʻi ni fale e faia ai a tatou sauniga. Seʻi mafaufau i faigatā na fesagaʻia e o tatou uso ma tuafāfine. Na ave e uso le mataupu i le Faamasinoga o Aiā Tatau i Europa (ECHR) i le 2001, ae o le 2004 na latou faatoʻā aveina ai isi faamatalaga faaopoopo i le Faamasinoga. I le 2010, na aumaia ai le faaiʻuga a le Faamasinoga. Na faaalia e le Faamasinoga, o le faailogatagata na māfua ai ona faasā Molimau a Ieova i Rusia. E lē talafeagai foʻi le faaiʻuga a faamasinoga maualalo, ona e leai ni faamaoniga o moliaga o Molimau a Ieova. Na taʻua atili e le Faamasinoga, o le faasāina o Molimau a Ieova na aveesea ai lo latou saʻolotoga faaletulafono. O lea, o lenā faaiʻuga na faatāua ai le saʻolotoga e faia ai la latou tapuaʻiga. E ui e leʻi talia i nisi vaega o Rusia le faaiʻuga a le ECHR, ae na maua lava e tagata o le Atua le lototele mai na manumalo faafaamasinoga.

Titos Manoussakis (Tagaʻi i le palakalafa 9)

9-11. Na faapefea ona tauivi tagata o le Atua i Eleni mo le saʻolotoga e faapotopoto ai mo le tapuaʻiga, ma o le ā le iʻuga na oo i ai?

9 Eleni. I le 1983, na faaaogā ai e Titos Manoussakis se potu i Heraklion i Crete, e faia ai sauniga a se vaega toʻaitiiti o Molimau a Ieova i inā. (Epe. 10:24, 25) Na faia e se faifeʻau o le lotu Orthodox se faitioga i leoleo, e faatatau i le tapuaʻiga a Molimau a Ieova. Aiseā? Talu ai sa matuā eseese o latou talitonuga ma talitonuga a Molimau a Ieova. Na molia e le faigāmalo Titos Manoussakis ma isi uso e toʻatolu i le faia o ni solitulafono. Na faasalaina i latou ma faafalepuipui ai mo le lua masina. Na manatu uso o le faaiʻuga a le faamasinoga, ua aveesea ai le saʻolotoga e faia ai la latou tapuaʻiga. O lea na ave ai la latou mataupu i isi faamasinoga, ma seʻia oo atu ai lava i le ECHR.

10 I le 1996, na aumaia ai e le ECHR se faaiʻuga e leʻi faatalitalia e tagata tetee i le tapuaʻiga moni. Na taʻua e le Faamasinoga, “o Molimau a Ieova o se lotu aloaʻia e tusa ai ma le tulafono a Eleni,” ma o le faaiʻuga a le faamasinoga maualalo ʻna aafia ai le saʻolotoga o tagata e faia ai a latou tapuaʻiga.’ Na taʻua atili e le Faamasinoga, e lē faia e le faigāmalo a Eleni le faaiʻuga “pe e tatau ona talia ni talitonuga faalelotu, po o le auala foʻi e faailoa ai na talitonuga.” Na suia le faaiʻuga sa faia i Molimau a Ieova, ma na faamaonia ai le saʻolotoga e faia ai la latou tapuaʻiga.

11 E ui i lea, e leʻi foʻia ai faafitauli i Eleni. I le 2012, na maua ai le faaiʻuga o se mataupu faapena i Kassandreia i Eleni, ma e toetoe atoa le 12 tausaga na faia ai lenā mataupu. O lenā mataupu na taulamua ai se faifeʻau o le lotu Orthodox. Na lagolagoina e le Faamasinoga Maualuga a Eleni tagata o le Atua. Na faailoa mai i le faaiʻuga a le faamasinoga,  o loo puipuia i faiga faavae a le malo o Eleni le saʻolotoga e faia ai tapuaʻiga, ma na teena ai foʻi le soona molia pea o Molimau a Ieova e lē o se lotu aloaʻia. Na taʻua e le Faamasinoga: “E lē o natia aʻoaʻoga a ʻMolimau a Ieova,’ ma o loo latou faailoa atu o i latou o se tapuaʻiga aloaʻia.” Ua fiafia nei sui o le faapotopotoga toʻaitiiti i Kassandreia, ona ua mafai ona faia a latou tapuaʻiga i a latou lava Maota mo Sauniga.

12, 13. Na faapefea ona taumafai tagata tetee i Falani e fafauina faalavelave e ala i le poloaʻiga, ma o le ā le iʻuga na oo i ai?

12 Falani. Na faia e nisi tagata tetee auala e ʻfafauina ai faalavelave e ala i le poloaʻiga.’ (Faitau le Salamo 94:20.) O se faaaʻoaʻoga, i le ogatotonu o vaitausaga o le 1990, na faia ai e le vaega o lafoga i Falani se suʻesuʻega o tupe a le Association Les Témoins de Jéhovah (ATJ), o se tasi lea o faalapotopotoga faaletulafono o loo faaaogā e Molimau a Ieova i Falani. Na taʻua e le minisita o tupe le fuafuaga o lenei iloiloga e faapea: ʻO le faaiʻuga o lenei iloiloga e mafai ona faatau ese ai meatotino a le faalapotopotoga, pe faia foʻi ni moliaga o lo latou solia o le tulafono.’ E ui e leʻi iai ni faamaoniga o ni faiga piʻopiʻo, ae na manaʻomia pea ona totogi e le ATJ ni lafoga tetele. Pe ana faapea e taulau lenā fuafuaga, e leai lava se isi faaiʻuga e faia e uso, ae tapunia loa le Peteli ma faatau atu ina ia mafai ai ona totogi lafoga. E ui i lea, e leʻi faavaivai ai tagata o le Atua. Na lototetele Molimau a Ieova i Falani e fesagaʻia nei faiga lē tonu, ma faaulu ai la latou tagi i le ECHR i le 2005.

13 Na aumaia le faaiʻuga a le Faamasinoga iā Iuni 30 i le 2011. Na taʻua ai i lenā faaiʻuga e faatoʻā mafai ona faia se fuafuaga a le malo, pe afai ua solia e le lotu le tulafono. Peitaʻi, e lē pule le faigāmalo pe talia talitonuga o se lotu po o le auala e faaali ai o latou talitonuga, auā o loo iai le saʻolotoga e faia ai tapuaʻiga. Na taʻua atili i le Faamasinoga: ʻO le faaiʻuga sa faia na lē mafai ai e le faalapotopotoga ona faaaogā a latou meatotino, ma faigatā ai ona saʻoloto o latou sui auai i le faia o la latou tapuaʻiga i so o se auala.’ Na matuā lagolagoina e le Faamasinoga le itu a Molimau a Ieova. Na matuā fiafia tagata o Ieova ina ua toe totogi atu e le faigāmalo a Falani nei lafoga faatasi ai ma tupe tului, ma na faatonuina le faigāmalo e aveese a latou aiāiga sa faia i le Peteli, ina ia faatau atu e totogi ai lafoga.

E mafai ona fai so tatou sao e fesoasoani ai iā i latou, e ala i le tatalo e lē aunoa mo o tatou uso ma tuafāfine faaleagaga o loo mafatia pea i faamasinoga lē tonu

14. E faapefea ona faia sou sao i le mauaina o le saʻolotoga mo le tapuaʻiga?

14 I le pei o Eseta ma Moretekai i aso anamua, o loo faaauau foʻi ona finau tagata o Ieova i aso nei mo le saʻolotoga e faia ai la latou tapuaʻiga, i le auala e finagalo i ai Ieova. (Eseta 4:13-16) E mafai ona fai so tatou sao e fesoasoani ai iā i latou, e ala i le tatalo e lē aunoa mo o tatou uso ma tuafāfine faaleagaga o loo mafatia pea i faamasinoga lē tonu. O na tatalo, e mafai ona fesoasoani iā i latou e tumau ai i faigatā ma sauāga o loo latou fesagaʻia. (Faitau le Iakopo 5: 16.) O a tatou manumalo i le faamasinoga, e faamaonia ai le talia e Ieova o a tatou tatalo.—Epe. 13:18, 19.

Saʻolotoga e Filifilia ai Togafitiga Faafomaʻi e Ōgatusa ma Taʻiala a le Tusi Paia

15. O ā vala e manatunatu ai tagata o le Atua e tusa ai ma tuigātoto?

15 E pei ona taʻua i le Mataupu e 11, ua maua e tagatānuu o le Malo o le Atua taʻiala manino mai i le Tusi Paia, e ʻalofia ai le faaaogāsesēina o le toto lea ua taatele i aso nei. (Kene. 9:5, 6; Levi. 17:11; faitau le Galuega 15:28, 29.) E ui e tatou te lē taliaina tuigātoto, peitaʻi e tatou te naunau e faaaogā isi togafitiga faafomaʻi e sili ona lelei, e lē feteenaʻi ma tulafono a le Atua. Ua amanaʻia e faamasinoga maualuluga a le tele o atunuu le aiā a tagata, e talia pe e teena ai togafitiga e feteenaʻi ma o latou lotofuatiaifo ma talitonuga faalelotu. Peitaʻi, e iai nisi atunuu o loo feagai ai tagata o le Atua ma luʻi ona o lenei tulaga. Seʻi o tatou iloiloina nisi o faaaʻoaʻoga.

16, 17. O le ā le mea na tupu na matuā faateʻia ai se tuafafine i Iapani, ma na faapefea ona taliina ana tatalo?

16 Iapani. Na manaʻomia ona faia se taotoga o Misae Takeda, o se tuafafine e 63 tausaga mai i Iapani. Talu ai o ia o se tagatānuu faamaoni o le Malo, o lea na ia faailoa atu ai i lana fomaʻi lona faanaunauga e lē faaaogāina le toto i ona togafitiga. I masina mulimuli ane, sa faateʻia o ia ina ua ia iloa sa tuiina lona toto i le taimi na faia ai le taotoga. Sa lagona e le tuafafine ua faasesēina o ia. O lea, iā Iuni i le 1993, sa faaulu ai sana tagi e faatatau i fomaʻi ma le falemaʻi. O lenei tuafafine e lotomaulalo ma filemu, peitaʻi e malosi lona faatuatua. E ui e leʻi atoatoa lona malosi, ae e toetoe atoa le itula o faia ma le lototele lana molimau i le fale faamasino. Sa ia toe tu foʻi i le faamasinoga, a o toe tasi le masina o loo totoe o lona soifuaga. Pe e tatou te lē talisapaia ea le lototele ma le faatuatua o lenei tuafafine? Na ia faapea mai, sa ia tatalo faatauanau iā Ieova e faamanuia mai i ana taumafaiga. Sa ia mautinoa, e faafofoga mai Ieova i ana tatalo.

17 Na aumaia le faaiʻuga a le faamasinoga, ina ua māeʻa le tolu tausaga talu ona maliu le tuafafine. Sa lagolagoina e le Faamasinoga Maualuga le tuafafine, ma na latou ioeina le lē talafeagai o le tuiina o le toto, auā sa ia faailoa manino mai ona manaʻoga. Iā Fepuari 29 i le 2000, na taʻua ai i le faaiʻuga na aumaia, “o le aiā e filifili” ai i nei mataupu, “e tatau ona faaaloalogia o se aiā tatau a le tagata lava ia.” Sa maumauaʻi lenei tuafafine e finau mo le saʻolotoga e filifilia ai togafitiga e ōgatusa ma lona lotofuatiaifo ua aʻoaʻoina lelei. O le faia faapea, ua mafai ai e Molimau a Ieova i Iapani ona faia togafitiga e aunoa ma le popole i le tuiina faamalosi o le toto.

Pablo Albarracini (Tagaʻi i le palakalafa 18 e oo i le 20)

18-20. (a) Na faapefea i se Faamasinoga Toe Iloilo i Anitenitina ona faatāuaina le aiā a se tasi e teena ai le tuigātoto, e faaaogā ai le pepa o le toto? (e) E faapefea ona faaalia le gauaʻi o se tasi i le taʻitaʻiga a Keriso e tusa ai ma le faaaogāina o le toto?

18 Anitenitina. Ua faapefea ona sauniunia tagatānuu o le Malo, i le taimi e manaʻomia ai ona filifilia se togafitiga ae o loo matapogia? E tatau ona tatou tauaveina se pepa  faaletulafono e mafai ona fai ma o tatou sui. O le mea lenā na faia e le uso o Pablo Albarracini. Iā Me i le 2012, na tupu ai se faalavelave na faafuaseʻi ona fanaina ai o ia e se tagata. Sa ave o ia i le falemaʻi a o matapogia, ma e leʻi mafai ona ia faamatala atu lona tulaga e faatatau i le tuiina o le toto. Peitaʻi, sa iai sana pepa o le toto sa sainia i le fā tausaga ua mavae. E ui i le tugā o ona manuʻaga ma le mafaufau o nisi fomaʻi e tatau ona tuiina le toto e laveaʻia ai lona ola, ae na latou faaaloalogia lava ona manaʻoga. E ui i lea, sa taumafai lona tamā e lē o se Molimau a Ieova, e aumaia se faatagaga mai le faamasinoga e tui ai le toto o lona atalii.

19 Sa faia e le lōia a le avā a Pablo se talosaga apili i le Faamasinoga Toe Iloilo. E leʻi umi, ae aumaia loa le faaiʻuga a le Faamasinoga Toe Iloilo e faalēaogāina ai le faaiʻuga a le faamasinoga maualalo, ma e tatau ona faaaloalogia manaʻoga o le tagata maʻi, e pei ona aumaia i le pepa o le toto. Sa apili e le tamā o Pablo le mataupu i le Faamasinoga Maualuga a Anitenitina. Peitaʻi, e leʻi maua e le Faamasinoga Maualuga “se māfuaaga e masalomia ai [le faaiʻuga a Pablo e teena ai le tuigātoto], auā sa faia ma le faautauta lana faaiʻuga faatasi ma le saʻolotoga e filifili ai.” Na taʻua e le Faamasinoga: ʻO tagata matutua uma e mafai ona muaʻi faia ni filifiliga e faatatau i o latou soifua mālōlōina, e talia pe e teena ai ni togafitiga. E tatau ona faaaloalogia e fomaʻi o loo faia togafitiga nei filifiliga.’

Po ua faatumu lau pepa o le toto?

20 Sa toe malosi le uso o Pablo. Sa fiafia le uso ma lana avā ona sa ia faatumuina le pepa o le toto. O le faia o lenā laasaga tāua ma faigofie, ua faaalia ai lona gauaʻi iā Keriso le Tupu o le Malo o le Atua. Po ua faia foʻi faapea e lou aiga?

April Cadoreth (Tagaʻi i le palakalafa 21 e oo i le 24)

21-24. (a) Na faapefea ona faia e le Faamasinoga Maualuga i Kanata se faaiʻuga mataʻina e faatatau i tamaiti ua faasolo ina matutua, faapea le faaaogāina o le toto? (e) E faapefea i lenei mataupu ona faalaeiauina ai auauna talavou a Ieova?

21 Kanata. E masani ona amanaʻia e faamasinoga le aiā a mātua, e filifilia ai le togafitiga e sili ona lelei mo a latou fanau. E iai foʻi taimi e faaaloalogia ai e faamasinoga filifiliga a tamaiti ua faasolo ina matutua ae o loo i lalo o le vaavaaiga a mātua, e faatatau i togafitiga e latou te filifilia. E faapena le mea na tupu iā April Cadoreth. I le 14 o ona tausaga, na taofia ai o ia i le falemaʻi ona o se piliki i totonu o lona tino (internal bleeding). Ae i nai masina na muamua atu, sa ia faatumuina ai le pepa mo Faatonuga Faafomaʻi Ua Muaʻi Saunia, ma faailoa ai lona lē taliaina o se tuigātoto e tusa lava po o le ā le tulaga e tulaʻi mai. Na lē amanaʻia e le fomaʻi le talosaga manino a April, ma ia tāpā ai se faatagaga faaletulafono e tuiina ai lona toto. Na tuiina faamalosi lona toto, ma na faatusaina e April lenā gaoioiga i le tosoina faamalosi o ia.

22 Na ave e April ma ona mātua le mataupu i le faamasinoga. Ae na faatoʻā iloiloina lenei mataupu i le Faamasinoga Maualuga i Kanata, ina ua mavae tausaga e lua. E foliga  mai na faiaʻina le itu a April i le faamasinoga, ona e leʻi mafai ona suia ai le tulafono a Kanata. Peitaʻi i le iʻuga o le Faamasinoga, na mafai ai ona ia maua se taui tautupe e totogi ai ana pili o le faamasinoga. E lē gata i lea, na lagolagoina e le Faamasinoga o ia faapea isi tamaiti ua faasolo ina matutua, e mananaʻo e filifilia a latou lava togafitiga faafomaʻi. Na faapea mai le Faamasinoga: “E tatau ona faatagaina tamaiti uma e i lalo ifo o le 16 tausaga, e faaalia o latou manatu e faatatau i togafitiga faafomaʻi, e iloa ai po ua lava lo latou matutua e faia ai a latou lava filifiliga.”

23 E tāua lenei mataupu, auā na iloiloina ai e le Faamasinoga Maualuga aiā faaletulafono a tamaiti ua faasolo ina matutua. A o leʻi faia lenei mataupu, sa mafai e so o se faamasinoga i Kanata ona avatu le faatagaga e faia ai se togafitiga o se tamaitiiti e i lalo ifo o le 16 tausaga, pe afai e manatu le faamasinoga o le togafitiga lea e sili ona lelei. Ae ina ua māeʻa lenei mataupu, na lē toe mafai ai e se faamasinoga ona avatu le faatagaga e faia ai se togafitiga, e feteenaʻi ma le  manaʻoga o se tamaitiiti e i lalo ifo o le 16 tausaga, e aunoa ma le tuu i ai o le avanoa e faamaonia ai ua lava lo latou matutua, e fai ai a latou filifiliga.

“Ua ou matuā fiafia ona sa faia saʻu vaega itiiti i le faamamaluina o le suafa o le Atua, ma faamaonia ai e pepelo Satani”

24 Na iai se aogā o le mataupu na finauina e April mo le tolu tausaga. O loo ia ola mālōlōina pea, ma ua avea nei o ia ma paeonia sauatoa. Na ia faapea mai: “Ua ou matuā fiafia ona sa faia saʻu vaega itiiti i le faamamaluina o le suafa o le Atua, ma faamaonia ai e pepelo Satani.” Ua tatou iloa mai i le faaaʻoaʻoga a April, e mafai foʻi e talavou lāiti ona faaalia le lototele, ma faamaonia ai o i latou o tagatānuu moni o le Malo o le Atua.—Mata. 21:16.

Saʻolotoga e Tausia Aʻe ai Fanau e Tusa ai ma Tapulaa a Ieova

25, 26. O le ā e masani ona tupu i nisi taimi i ulugalii ua tatala a latou faaipoipoga?

25 Ua faatuatuaina e Ieova mātua e tausia aʻe fanau e tusa ai ma ana tapulaa. (Teu. 6:6-8; Efe. 6:4) E lē faigofie lenā tiute tauave, aemaise lava pe a tatalaina le faaipoipoga. E ono eseese manatu o mātua i le auala e tausia aʻe ai le fanau. O se faaaʻoaʻoga, e manatu se matua Molimau a Ieova, e tatau ona tausia aʻe le tamaitiiti e tusa ai ma tapulaa faa-Kerisiano. Peitaʻi, e lē o le manatu lenā o le matua e lē talitonu. E tatau i le matua o loo i le upu moni ona manatua, e ui ua tatala le faaipoipoga, ae o loo iai pea le faiā a le isi paaga ma tamaiti.

26 O nisi mātua e lē talitonu, e latou te talosaga i le faamasinoga ina ia mafai ona latou tausia a latou fanau, ma pulea ai o latou talitonuga faalelotu. E faapea mai nisi mātua lē talitonu, e lē lelei pe a tausia aʻe se tamaitiiti e avea ma Molimau a Ieova. Talu ai o le a lē faamanatuina ai aso fanau ma isi aso faamanatu, pe e lē tuiina foʻi le toto pe a tulaʻi mai se faalavelave faafuaseʻi. Ae o le vala e lelei ai, e masani ona vaai le faamasinoga i le itu e sili ona lelei mo fanau, nai lo o le faia o le faaiʻuga ona e faapea e lē lelei le lotu a le isi matua. Seʻi o tatou iloiloina nisi o faaaʻoaʻoga.

27, 28. Na faapefea ona tali atu le Faamasinoga Maualuga i Ohio, i le tuuaʻiga e iai se aafiaga leaga o talitonuga o Molimau a Ieova i se tamaitiiti?

27 Iunaite Setete. I le 1992, na faia ai i le Faamasinoga Maualuga i Ohio se mataupu na talosaga ai se tamā lē talitonu, e faapea o le a iai se aafiaga leaga i lona atalii pe a tausia aʻe o se Molimau a Ieova. Na lagolagoina e le faamasinoga maualalo le manatu o le tamā. Sa mafai e le tuafafine o Jennifer Pater ona asiasi i lana tama, peitaʻi sa lē mafai ona ia “aʻoaʻoina o ia i talitonuga a Molimau a Ieova, i so o se auala.” O le uiga o lenei faatonuga mai le faamasinoga maualalo, sa lē mafai e le tuafafine ona talanoa i lana tama o Bobby, e faatatau i le Tusi Paia faapea amioga tatau. Sa matuā faanoanoa le tuafafine, peitaʻi sa ia iloa e tatau ona ia onosaʻi ma faatalitali i le taimi a Ieova e gaoioi ai. Na ia faapea mai: “Sa fesoasoani mai lava Ieova.” Sa fesoasoani le faalapotopotoga  a Ieova i le lōia a le tuafafine, i le faia o le talosaga apili i le Faamasinoga Maualuga i Ohio.

28 E leʻi talia e le Faamasinoga Maualuga le faaiʻuga a le faamasinoga maualalo, e ala i le faapea mai “e iai i mātua le aiā e aʻoaʻo ai a latou fanau, lea e aofia ai le aiā e talanoa ai i mataupu faalelotu ma amioga.” Na taʻua atili e le faamasinoga, e faatoʻā afāina lava pe a faaleagaina e talitonuga o Molimau a Ieova, le tulaga faaletino ma le mafaufau o le tamaitiiti. Ae e leai se aiā a le faamasinoga e taofiofia ai mātua, mai le tausia o a latou fanau ona o a latou tapuaʻiga. E leʻi maua e le faamasinoga ni vala e faamaonia ai o talitonuga o Molimau a Ieova, e iai se aafiaga leaga i le tulaga faaletino ma le mafaufau o le tamaitiiti.

O le tele o faamasinoga na manumalo ai mātua Kerisiano i le mauaina o le aiā e tausia ai a latou fanau

29-31. Aiseā na faiaʻina ai se tasi tuafafine i le faamasinoga i Tenemaka, ae na faapefea ona tali atu le Faamasinoga Maualuga i Tenemaka i lenā mataupu?

29 Tenemaka. O le luʻi foʻi lenā na fesagaʻia e le tuafafine o Anita Hansen, ina ua tatala lana faaipoipoga. Sa finau lona toʻalua i le faamasinoga e manaʻo e tausia lona afafine e fitu tausaga o Amanda. I le 2000, na lagolagoina ai e le faamasinoga le tuafafine o Anita. Peitaʻi, na apili e le tamāloa le mataupu i le faamasinoga maualuga ma manumalo ai. Na faapea mai le faamasinoga, e eseese manatu o mātua i le auala e tausia ai le la tama, ona o le eseese o talitonuga faalelotu. O lea, o le tamā e faia le faaiʻuga e faatatau i le tapuaʻiga  e tatau ona auai ai lona afafine. Na faiaʻina le tuafafine o Anita, ona o ia o se Molimau a Ieova.

30 A o feagai le tuafafine o Anita ma nei tulaga faigatā, e iai taimi sa ia lē mautinoa ai po o ā mea e tatau ona tatalo ai. Peitaʻi na ia faapea mai: “Na matuā faamāfanafanaina aʻu i manatu o loo i le Roma 8:26, 27. Sa ou lagona o loo malamalama lelei Ieova i oʻu faalogona, ma sa ia silasila mai iā te aʻu i taimi uma.”—Faitau le Salamo 32:8; Isaia 41:10.

31 Na apili e le tuafafine o Anita le mataupu i le Faamasinoga Maualuga i Tenemaka. Na taʻua i le faaiʻuga a le Faamasinoga: “E tatau ona faia se faaiʻuga e fua i le mea e sili ona lelei mo le tamaitiiti.” Na taʻua atili e le Faamasinoga, e tatau ona fua le faaiʻuga i le auala e taulima ai e mātua taʻitasi faafitauli, ae e lē fuaina i “aʻoaʻoga ma talitonuga” o Molimau a Ieova. Na matuā fiafia le tuafafine o Anita, ina ua lagolagoina o ia e le Faamasinoga, ma toe faafoʻi ai iā te ia le tausiga o lana tama.

32. Na faapefea ona puipuia e le Faamasinoga o Aiā Tatau i Europa mātua Molimau a Ieova mai i le faailogatagata?

32 Isi Atunuu i Europa. Na oo atu lava i isi faamasinoga maualuluga i fafo atu o le atunuu, nisi o mataupu e finauina ai po o ai o mātua ua nonofo valavala e tatau ona tausia fanau. E iai foʻi mataupu faapena na taulimaina i le Faamasinoga o Aiā Tatau i Europa (ECHR). E lua mataupu na faia i le ECHR, na latou taʻua ai le lē tutusa o le auala na feutagaʻi ai faamasinoga faaitumalo faapea faamasinoga maualuluga i atunuu, ma mātua Molimau a Ieova faapea mātua e lē talitonu. E māfua nei tulaga ona o tapuaʻiga. Na taʻua e le ECHR o nei faiga e faailogatagata, ma na latou taʻua foʻi “e lē talafeagai le faia o se faaiʻuga ona o talitonuga faalelotu.” Na faapea mai se tuafafine na manumalo lana mataupu i le ECHR: “Sa matuā tigā lava oʻu faalogona i le tuuaʻiga o le iai o se aafiaga leaga i fanau, auā sa ou taumafai e faia le mea e sili e tausia aʻe ai i latou o ni Kerisiano.”

33. E faapefea ona faatatauina e mātua Molimau a Ieova le taʻiala i le Filipi 4:5?

33 E manaʻomia ona faaalia le fetuutuunaʻi, e mātua talitonu o loo luʻia i le faamasinoga a latou aiā e aʻoaʻo ai a latou fanau i tapulaa a le Tusi Paia. (Faitau le Filipi 4:5.) E latou te talisapaia le mauaina o le aiā e aʻoaʻo ai a latou fanau i ala o le Atua. E faapena foʻi ona latou amanaʻia le aiā a le paaga lē talitonu e fesoasoani ai i tiute tauave faamatua, pe a manaʻo i ai. E matuā tāua i mātua Molimau a Ieova la latou tiute tauave o le toleniina o fanau.

34. O ā aogā e maua e mātua Kerisiano i aso nei mai le faaaʻoaʻoga a tagata Iutaia i aso o Neemia?

34 I aso o Neemia, sa galulue mamafa tagata Iutaia e toe fausia le malumalu ma pā o Ierusalema. Sa latou iloa o le faia o lea galuega, o le a puipuia ai o latou aiga mai atunuu na siʻomia ai i latou. O le māfuaaga lea na faapea atu ai Neemia: “Ia outou tau mo o outou uso, o outou atalii, o outou  afafine, o a outou avā, ma o outou fale.” (Nee. 4:14) Sa matuā tāua le auai o tagata Iutaia i le taua. E faapena foʻi le tāua o galuega mamafa a mātua Molimau a Ieova, i le tausia aʻe o a latou fanau i le ala o le upu moni. E latou te iloa e matuā telē le aafiaga o fanau mai i aʻoga faapea tuaoi. Atonu e oo mai foʻi aafiaga i totonu o le aiga, ona o mea e matamata ai. Mātua, aua neʻi galo e matuā tāua a tatou taumafaiga fitā e saunia ai le puipuiga mo fanau, ma latou agaʻigaʻi ai i luma faaleagaga.

Ia Tatou Mautinoa e Lagolagoina e Ieova le Tapuaʻiga Moni

35, 36. O ā aogā ua maua e Molimau a Ieova mai i le finau mo a latou aiā faaletulafono, ma o le ā ua tatou maumauaʻi e fai?

35 Ua faamanuia e Ieova taumafaiga a lana faalapotopotoga i aso nei, e puipuia le aiā e saʻoloto ai le faia o la latou tapuaʻiga. I le taimi e finau ai tagata o le Atua mo a latou aiā faaletulafono, e masani ona avatu ai se molimau lelei i le faamasinoga ma tagata lautele. (Roma 1:8) O le isi aogā o a tatou manumalo faafaamasinoga, ua mafai ai foʻi ona faatāuaina aiā tatau a isi tagata e lē o ni Molimau a Ieova. Peitaʻi, i le avea ai o i tatou ma tagata o le Atua, e tatou te lē taumafai e suia le tulaga o mea, pe taumafai foʻi e viiviia i tatou lava. Ae o le māfuaaga sili e finau ai Molimau a Ieova mo a latou aiā faaletulafono i le faamasinoga, ina ia faatumau ma agaʻigaʻi ai pea i luma le tapuaʻiga mamā.—Faitau le Filipi 1:7.

36 Ia tatou matuā faatāuaina lesona o le faatuatua, mai iā i latou na finau mo le saʻolotoga e tapuaʻi ai iā Ieova. Ia tatou tumau foʻi i le faamaoni, ma mautinoa o loo lagolagoina e Ieova la tatou galuega, ma faaauau ona ia foaʻi mai pea le malosi e tatou te faia ai lona finagalo.—Isa. 54:17.