Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 13

Ave e Tagata Talaʻi o le Malo a Latou Mataupu i le Faamasinoga

Ave e Tagata Talaʻi o le Malo a Latou Mataupu i le Faamasinoga

MANATU AUTŪ O LE MATAUPU

E pei ona valoia e Iesu, o le a feagai ona tagata ma teteega faaletulafono i la latou galuega talaʻi

1, 2. (a) O le ā na taulau manuia ai taʻitaʻi lotu, ae o le ā le auala na tali atu ai le ʻauaposetolo? (e) Aiseā na lē usiusitaʻi ai le ʻauaposetolo ina ua faasā ona latou toe talaʻi?

UA MAVAE le Penetekoso i le 33 T.A., ma e na o ni nai vaiaso foʻi talu ona faavaeina le faapotopotoga Kerisiano i Ierusalema. Na manatu Satani o le taimi tonu lenā e tatau ona osofaʻia ma tafiesea ai le faapotopotoga, a o leʻi faasolo ina faatuputeleina. Na gaoioi Satani i se auala poto, e uunaʻia taʻitaʻi lotu e taofia le galuega talaʻi o le Malo. E ui i lea, na faaauau pea ona talaʻi ma le lototetele le ʻauaposetolo, ma e toʻatele na “talitonu i le Alii.”—Galu. 4:18, 33; 5:14.

Na fiafia le ʻauaposetolo ona “ua taʻuaogāina i latou ia faaleagaina ona o lona suafa”

2 Na toe taumafai tagata tetee e taofia le galuega talaʻi, e ala i le faafalepuipuiina o le ʻauaposetolo. Peitaʻi, na faasaʻolotoina i latou e le agelu a Ieova i le pō, ma amata ona latou toe talaʻi i le aso na sosoo ai. Na toe taofia i latou ma molia i luma o taʻitaʻi, o ē na tuuaʻia le ʻauaposetolo i le solia o le tulafono e faasā ai ona latou toe talaʻi. Peitaʻi, na tali atu ma le lototetele le ʻauaposetolo: “E tatau ona matou usiusitaʻi i le Atua o le pule, nai lo o tagata.” Na matuā feita nei taʻitaʻi ma mananaʻo e “fasioti” iā i latou. Peitaʻi, na faapea atu Kamalielu le faiaʻoga faaaloalogia o le Tulafono i nei taʻitaʻi: ʻIa outou faaeteete. Aua tou te aiā i nei tagata, ae tuu ai pea i latou.’ Na latou talia le fautuaga a Kamalielu, ma faasaʻoloto loa le ʻauaposetolo. O le ā le gaoioiga na faia e nei tane faamaoni? Na lē aunoa “ona latou aʻoaʻo atu i aso uma lava, ma folafola atu le tala lelei e uiga iā Iesu le Keriso.”—Galu. 5:17-21, 27-42; Faata. 21:1, 30.

3, 4. (a) O le ā le metotia ua leva ona faaaogā e Satani e osofaʻia ai tagata o le Atua? (e) O le ā o le a iloiloina i lenei mataupu ma mataupu e lua o loo sosoo mai?

3 O le faamasinoga na faia i le 33 T.A., o le teteega muamua lenā na fesagaʻia e le faapotopotoga Kerisiano. Peitaʻi, e leʻi gata ai i inā. (Galu. 4:5-8; 16:20; 17:6, 7) I aso nei, o loo faaaogā foʻi e Satani tagata e tetee i le upu moni, e uunaʻia taʻitaʻi o malo e faasā le galuega talaʻi. E tele tuuaʻiga sesē ua faia e nei tagata tetee faasaga i tagata o le Atua. Ua latou tuuaʻia i tatou o ni ē e faatupu vevesi, o ni tagata fouvale, ma o ni ē e faatauʻoa. Sa faaaogā e uso le faamasinoga pe a talafeagai, e faamaonia ai le sesē o nei tuuaʻiga. O ā  iʻuga o na faamasinoga? E faapefea i faamasinoga na faia i tausaga ua mavae ona tatou aafia ai i aso nei? Seʻi o tatou iloiloina nisi o na faamasinoga, ma iloa ai le auala ua fesoasoani ai nei mataupu i le tala lelei ma “faamautū ai faaletulafono.”—Fili. 1:7.

4 I lenei mataupu, o le a iloiloina ai le auala na puipuia ai la tatou aiā, e maua ai le saʻolotoga e talaʻi atu. Ae i mataupu e lua o loo mulimuli mai, o le a iloiloina ai nisi o faamasinoga na tatou taumafai malosi e vavaeese mai ai i le faia o sa tatou vaega i le lalolagi, ma ola e ōgatusa ma tapulaa a le Malo.

O ni Ē Faatupu Vevesi po o ni Ē Lagolagoina ma le Faamaoni le Malo?

5. I le taufaaiʻuiʻuga o vaitausaga o le 1930, aiseā na taofia ai e leoleo tagata talaʻi o le Malo, ma o le ā le gaoioiga na faia e uso na taʻimua?

5 I le taufaaiʻuiʻuga o vaitausaga o le 1930, na taumafai ai nisi aai ma setete i le Iunaite Setete o Amerika, e faamalosia Molimau a Ieova e talosaga mo se laisene, po o se faatagaga faaletulafono e fai ai la latou talaʻiga. Peitaʻi, e leʻi talosaga uso mo se laisene. Sa latou manatu e mafai ona faalēaogāina e se faigāmalo lenā laisene, ma e leai se faigāmalo e aiā i le faatonuga na avatu e Iesu i ona soo, e talaʻi le feʻau o le Malo. (Mare. 13:10) O le iʻuga, e toʻatele tagata talaʻi o le Malo na faafalepuipuiina. O lea, na filifili ai i latou sa taʻimua i le faalapotopotoga e tuuina atu nei mataupu i le faamasinoga. Na latou taumafai e faamaonia le lē tonu o le taofiofia e le faigāmalo, o le aiā a Molimau a Ieova e faia ai la latou talaʻiga. O lea i le 1938, na tupu ai se mea na iʻu atu ai i se faamasinoga mataʻina. O le ā le mea na tupu?

6, 7. O le ā na tupu i le aiga o Cantwell?

6 I le taeao o le Aso Lua iā Aperila 26 i le 1938, na sauni ai le uso o Newton Cantwell (60 tausaga), ma lana avā o Esther, ma ona atalii o Henry (22 tausaga), Russell (18 tausaga) ma Jesse (16 tausaga), e talaʻi i le aso atoa i le aai o New Haven i Connecticut. O i latou uma o ni paeonia faapito. Na latou sauniuni e ō ese mai i le fale mo le silia i le tasi le aso. Aiseā? E iai taimi na taofia muamua ai i latou, o lea, na latou faatalitalia ai o le a toe tupu foʻi lenā mea. Peitaʻi, e leʻi mafai ona aveesea ai lo latou faanaunauga e talaʻi atu le feʻau o le Malo. E lua taavale sa latou faimalaga ai i New Haven. O le isi taavale sa ave e Newton, sa iai i totonu laau e tāina ai lauga (phonographs), faapea le anoanoaʻi o lomiga faale-Tusi Paia. Ae sa aveina e Henry le isi taavale e iai mea faaleotele leo e faasalalau ai lauga (sound car). E leʻi umi lava ona amata la latou talaʻiga, ae taofia loa e leoleo.

7 Sa taofia muamua Russell, ona sosoo ai lea ma Newton ma Esther. Sa iloa mamao atu e Jesse le taimi na taofia ai e leoleo ona mātua, faapea lona uso matua. Peitaʻi, na faaauau pea ona ia talaʻi e faaaogā ai lana phonograph, a o le  taimi foʻi lenā o loo talaʻi Henry i le isi itu o le aai. Sa tāina e Jesse i le phonograph le lauga a le uso o Rutherford na faamatuaina “O Fili,” ma na faalogologo ai ni tamāloloa se toʻalua e lotu Katoliko. Sa la matuā feita ina ua faalogologo i le lauga, ma mananaʻo ai e fasi Jesse. Peitaʻi, na ia savali ese ma le filemu, ma na taofia o ia e leoleo i se taimi mulimuli ane. E leʻi faia e leoleo ni moliaga e faatatau iā Esther, ae e na o le uso o Newton ma lana fanau. E ui i lea, na toe tatalaina i latou i le aso lava lea, e faatali ai le aso o lo latou faamasinoga.

8. Aiseā na tuuaʻia ai e le faamasinoga Jesse Cantwell o se tagata faatupu vevesi?

8 Iā Setema i le 1938, na auai ai lenei aiga i le faamasinoga na faia i New Haven. Na molia Newton, Russell ma Jesse i le faatauina atu o lomiga e aunoa ma se laisene. E ui i talosaga apili sa faia i le Faamasinoga Maualuga i Connecticut, ae sa faamaonia lava moliaga o Jesse o se tagata faatupu vevesi. O le māfuaaga, sa faia molimau a tamāloloa Katoliko e toʻalua e faapea, o le lauga sa la faalogologo i ai na taʻuleagaina ai la latou lotu, lea na māfua ai ona la feita. O lea, na apili ai e uso sa taʻimua i le faalapotopotoga le faaiʻuga i le Faamasinoga Maualuga a le Iunaite Setete, po o le faamasinoga maualuga lea i le atunuu.

9, 10. (a) O le ā le faaiʻuga na faia e le Faamasinoga Maualuga i le aiga o Cantwell? (e) Ua faapefea ona tatou maua aogā mai i lenā faaiʻuga?

 9 Iā Mati 29 i le 1940, na amata ai ona faalogo le Faamasino Sili o Charles E. Hughes ma isi faamasino e toʻavalu, i manatu sa folasia e le uso o Hayden Covington, lea na avea ma lōia a Molimau a Ieova. * I le taimi na taumafai ai le lōia a le setete o Connecticut, e faamaonia atu o Molimau a Ieova o ni tagata faatupu vevesi, na fesili ai se tasi o faamasino: “Pe e moni ea e leʻi fiafia tagata i le feʻau sa talaʻia e Iesu i ona aso?” Na tali atu le lōia: ʻE saʻo lelei, ma atonu o lea ou te manatua foʻi le mea na tupu iā te ia ona o lona talaʻia atu o lenā feʻau.’ E leʻi iloa e le alii lōia, ua ia faatusa atu Molimau a Ieova iā Iesu, ae faatusa le faigāmalo iā i latou na faasalaina Iesu. Iā Me 20 i le 1940, na aufaatasi uma ai faamasino e lagolagoina Molimau a Ieova.

Hayden Covington (ogatotonu, laina i luma), Glen How (agavale), ma isi a o tuua le fale faamasino ina ua faamaonia lo latou malo i le faamasinoga

10 O le tāua o lenā manumalo faafaamasinoga, ua malupuipuia ai le saʻolotoga e faatino ai tapuaʻiga, ma e leai se vaega, setete, po o se faigāmalo e mafai ona aveesea lenā saʻolotoga. Na faamaonia foʻi i le faamasinoga, e leʻi faatupuina e Jesse se ʻvevesi i nofoaga faitele.’ O lea, na manino mai ai i le faaiʻuga a le faamasinoga, e lē faatupu vevesi Molimau a Ieova. Maʻeu se faaiʻuga matagofie mo auauna a Ieova! Ua faapefea ona tatou maua aogā mai i lenā faaiʻuga? Na faapea mai se lōia Molimau a Ieova: “O le saʻolotoga e faia ai la tatou tapuaʻiga e aunoa ma le popole i ni faasāsāaga, ua mafai ai e Molimau a Ieova i aso nei ona faailoa atu le feʻau o le faamoemoe i isi i o tatou vaipanoa.”

O Tagata Fouvale po o ni Ē Faalauiloa Atu le Upu Moni?

Quebec’s Burning Hate for God and Christ and Freedom Is the Shame of All Canada

11. O le ā le tauiviga na faia e uso i Kanata, ma aiseā?

11 Na fesagaʻia e Molimau a Ieova i Kanata le tele o teteega ogaoga, a o faagasolo vaitausaga o le 1940. O lea, i le 1946 na faia ai e uso se tauiviga mo le 16 aso, e tufatufa ai le sāvali Quebec’s Burning Hate for God and Christ and Freedom Is the Shame of All Canada, ina ia faailoa atu ai i tagata le aveesea o le saʻolotoga e faia ai tapuaʻiga. Sa faaalialia i lenā sāvali e fā itulau, faamatalaga e faatatau i taʻitaʻi lotu faatupu vevesi, o sauāga a leoleo ma tagata fouvale, agaʻi i uso o loo nonofo i Quebec. Na taʻua i le sāvali: ʻO loo faaauau pea le taofia faasolitulafono o molimau a Ieova. E silia foʻi i le 800 moliaga na faia agaʻi i molimau a Ieova, na nonofo i Montreal.’

12. (a) Na faapefea ona tali atu tagata tetee i lenā tauiviga? (e) O le ā le moliaga na molia ai o tatou uso? (Tagaʻi foʻi i le faaopoopoga.)

12 Na galulue faatasi Maurice Duplessis le taʻitaʻi o Quebec, ma le Katinale o le Katoliko Roma o Villeneuve, e tali atu i le sāvali e ala i le faalauiloaina o se “taua” agaʻi i Molimau a Ieova. Na vave ona faatupulaʻia moliaga mai i le 800 agaʻi i le 1,600. Na taʻua e se tasi o tuafafine paeonia: “E lē mafaitaulia le tele o taimi na taofia ai i matou e leoleo.” Na molia Molimau a Ieova na tufatufaina sāvali i le lomia o faamatalaga  sesē e faatatau i le faigāmalo, ma uunaʻia ai tagata e tetee i le malo. *

13. O ai i latou na faia muamua o latou faamasinoga i moliaga o le faatupu vevesi, ma o le ā le iʻuga na faia e le faamasinoga?

13 I le 1947, na tulaʻi ai i luma o le faamasinoga le uso o Aimé Boucher ma ona afafine o Gisèle (18 tausaga) ma Lucille (11 tausaga), i moliaga o le faatupu vevesi. Sa latou tufatufaina le sāvali o le Quebec’s Burning Hate, i se vaipanoa e latalata ane i le aai o Quebec. Peitaʻi, sa faigatā ona talitonuina o i latou o ni tagata faatupu vevesi. O Aimé o se uso filemu ma lotomaulalo e iai lana faatoʻaga, ma e masani ona malaga i le aai i lana taavale solofanua. Na latou onosaia nisi o sauāga ma tofotofoga na faamatalaina i le sāvali. E leʻi taliaina e se tasi o faamasino e ʻinoʻino i Molimau a Ieova, le mamā o lenei aiga mai i o latou moliaga. Nai lo o lea, sa ia lagolagoina le manatu o le itu tagi, o le sāvali na faatupuina ai le vevesi ma e tatau ona faasalaina i latou. E foliga mai o le manatu o le faamasino: O se solitulafono le faailoa atu o le mea moni. Na faamaonia moliaga o Aimé ma Gisèle i le lomia o faamatalaga sesē, ma e oo foʻi iā Lucille sa lokaina mo aso e lua i le falepuipui. Na talosaga uso e toe iloilo lenei faaiʻuga i le Faamasinoga Maualuga a Kanata, ma na taliaina e le faamasinoga le talosaga.

14. Na faapefea ona tali atu uso i Quebec i sauāga?

14 Na faaauau pea ona talaʻia e uso ma tuafāfine i Quebec le feʻau o le Malo, e ui i osofaʻiga ma sauāga na latou fesagaʻia, ma na maua ai iʻuga mataʻina. I le fā tausaga talu ona amata le tauiviga i le 1946, na faatupulaʻia ai le numera o Molimau a Ieova i Quebec mai i le 300 i le 1,000 tagata talaʻi. *

15, 16. (a) O le ā le faaiʻuga na faia e le Faamasinoga Maualuga e faatatau i le mataupu a le aiga o Boucher? (e) O le ā le aafiaga o lenei manumalo faafaamasinoga i uso ma isi?

15 Iā Iuni i le 1950, na taulima ai le mataupu a le uso o Aimé i luma o faamasino e toʻaiva i le Faamasinoga Maualuga a Kanata. Ae iā Tesema 18 i lenā lava tausaga, na lagolagoina ai e le Faamasinoga la tatou itu. Aiseā? Na faamatala e se lōia Molimau a Ieova e igoa iā Glen How, na ioe le faamasinoga i le manatu o le itu a Molimau a Ieova e faapea, o le moliaga o le “faatupu vevesi,” e aofia ai le uunaʻia o tagata e tetee i le faigāmalo. Peitaʻi, e leai ni faamatalaga faapena na lomia i le sāvali, o lea e iai le aiā a tagata e faailoa atu ai o latou manatu. Na faapea atili mai le uso o Glen: “Na ou vaaitino i le manumalo aʻiaʻi o Ieova.” *

16 Na avea le faaiʻuga a le Faamasinoga Maualuga, o se manumalo aʻiaʻi mo le Malo o le Atua. Na soloia ai foʻi isi moliaga e 122 e faatatau i le lomia o faamatalaga sesē, na faia agaʻi i Molimau a Ieova na nonofo i Quebec. E lē gata i lea, o le faaiʻuga a le faamasinoga na mafai ai e tagatānuu o Kanata ma Malo o le Taupulega, ona faaali o latou manatu i le auala o loo faia ai pulega a faigāmalo. O lenei faaiʻuga, na faalēaogāina ai taumafaiga a lotu ma le faigāmalo i Quebec. *

 O ni Tagata Suʻe Tupe po o ni Tagata Maelega e Faalauiloa le Malo?

17. Ua faapefea ona taumafai nisi faigāmalo e pulea la tatou galuega talaʻi?

17 E tutusa uluaʻi Kerisiano ma auauna a Ieova i aso nei, ʻe lē o ni ē e suʻe tupe i le afioga a le Atua.’ (Faitau le 2 Korinito 2:17.) Peitaʻi, e iai nisi faigāmalo ua taumafai e pulea la tatou talaʻiga e faaaogā ai le malosiaga o le tulafono. O lea, seʻi o tatou iloiloina nisi o faamasinoga e lua, na fesiligia ai le tulaga o Molimau a Ieova, po o ni ē e suʻe tupe po o ni tagata talaʻi.

18, 19. Na faapefea ona taumafai le faigāmalo i Tenemaka e taofia le galuega talaʻi?

18 Tenemaka. Iā Oketopa 1 i le 1932, na amata ai ona faamalosia se tulafono e lē mafai ai ona faatauina lomiga e aunoa ma se laisene. Peitaʻi, e leʻi talosaga o tatou uso mo se laisene. I le aso na sosoo ai, na talaʻi ai i le aso atoa ni tagata talaʻi se toʻalima i Roskilde, o se aai e pe ā ma le 20 maila (silia i le 30 km) le mamao i sisifo mai i le aai o Copenhagen. Peitaʻi, i le faaiʻuga o le aso na taofia ai e leoleo August Lehmann, ona o lona faatauina o lomiga e aunoa ma se laisene.

19 Iā Tesema 19 i le 1932, na tulaʻi ai le uso o August i luma o le faamasinoga. Na ia taʻutino sa ia ofoina lomiga i tagata, ae e na te leʻi faatauina atu. Na lagolagoina o ia e le faamasinoga ina ua latou faapea mai: ʻNa mafai e [August] ona tausia o ia lava, ma e leai sona faanaunauga e maua ai sona tamaoaiga faaletino. Nai lo o lea, sa alu ai ana tupe.’ Na lagolagoina e le faamasinoga le itu a Molimau a Ieova, ma na taʻua i le faaiʻuga e leʻi faia e Lehmann ni “faiga faapisinisi.” E ui i lea, na maumauaʻi fili o tagata o le Atua e faasāsā le galuega talaʻi. (Sala. 94:20) Na apili e se lōia a le malo lenei faaiʻuga i le Faamasinoga Maualuga a le atunuu. O le ā le auala na tali atu ai uso?

20. O le ā le faaiʻuga na faia e le Faamasinoga Maualuga i Tenemaka, ma o le ā le auala na tali atu ai o tatou uso?

20 Na matuā faateleina le galuega talaʻi i Tenemaka, i le vaiaso na valaau ai le mataupu i le Faamasinoga Maualuga. I le Aso Lua o Oketopa 3 i le 1933, na faailoa mai ai le faaiʻuga a le faamasinoga. Na latou lagolagoina le faaiʻuga a le faamasinoga maualalo e leʻi solia e August Lehmann le tulafono. O lona uiga, o loo saʻoloto lava Molimau e Ieova e fai la latou talaʻiga. Na matuā faateleina le sao o uso ma tuafāfine i le galuega talaʻi, e faaalia ai lo latou lotofaafetai iā Ieova. Talu mai lenā faaiʻuga a le Faamasinoga, e leʻi toe faalavelave lava le malo i le galuega talaʻi a Molimau a Ieova i Tenemaka.

O Molimau a Ieova lototetele i Tenemaka i vaitausaga o le 1930

21, 22. O le ā le faaiʻuga na faia e le Faamasinoga Maualuga i le Iunaite Setete i le mataupu e faatatau i le uso o Murdock?

21 Iunaite Setete. I le Aso Sa o Fepuari 25 i le 1940, na taofia ai e leoleo le uso paeonia o Robert Murdock, Jr., ma isi Molimau a Ieova e toʻafitu a o talaʻi i Jeannette, o se aai i le setete o Pennsylvania. Sa faamaonia o latou moliaga o le  lē totogia o se laisene e tufa atu ai a latou lomiga. O lea, na apili ai lenei mataupu i le Faamasinoga Maualuga i le Iunaite Setete, ma na taliaina e le faamasinoga le talosaga.

22 Iā Me 3 i le 1943, na faalauiloa mai ai e le Faamasinoga Maualuga lo latou lagolagoina o le itu a Molimau a Ieova. Na teena e le faamasinoga le totogiina o se laisene, ona e feteenaʻi ma le “aiā tatau o loo aiāia i lalo o faiga faavae a le malo.” Na faalēaogāina e le faamasinoga le tulafono a le aai, ona ua ʻsaisaitia ai le saʻolotoga e fai ai tapuaʻiga.’ I le taimi na faailoa mai ai e le faamasino o William O. Douglas le faaiʻuga, na ia faapea mai, o le galuega a Molimau a Ieova ʻe aofia ai la latou talaʻiga ma le tufatufaina o lomiga.’ Na ia taʻua atili: ʻE tatau ona matuā puipuia le galuega talaʻi a Molimau a Ieova, e pei ona puipuia o le auala e faia ai tapuaʻiga a isi lotu.’

23. Aiseā e tāua ai i aso nei manumalo faafaamasinoga na tutupu i le 1943?

23 O le faaiʻuga a le Faamasinoga Maualuga, na avea o se manumalo aʻiaʻi mo tagata o le Atua. Na faamautinoa mai ai o i tatou o faifeʻau Kerisiano, ae e lē o ni ē e suʻe tupe. I lenā lava aso i le 1943, na manumalo ai isi faamasinoga e 12 a Molimau a Ieova mai i mataupu e 13, sa faia i le Faamasinoga Maualuga, lea e aofia ai le mataupu a Murdock. A o  faagasolo tausaga, na aogā nei faaiʻuga i isi faamasinoga na toe luʻia ai la tatou aiā, e talaʻia le feʻau o le Malo i le lautele, faapea le talaʻiga mai i lea fale i lea fale.

“E Tatau Ona Matou Usiusitaʻi i le Atua o le Pule, Nai lo o Tagata”

24. O le ā le auala e tatou te tali atu ai pe a faasā e se faigāmalo la tatou talaʻiga?

24 E fiafia tagata o Ieova pe a tuuina mai e faigāmalo le aiā faaletulafono, e talaʻia ai le feʻau o le Malo. Ae pe a faasā e faigāmalo le galuega talaʻi, ona fetuunaʻi lea o auala e tatou te faaaogāina ina ia faaauau ai pea le talaʻiga. E pei o le ʻauaposetolo, ʻe tatau ona tatou usiusitaʻi i le Atua o le pule, nai lo o tagata.’ (Galu. 5:29; Mata. 28:19, 20) Peitaʻi, e tatou te tutū i le faamasinoga ina ia mafai ai ona faataga la tatou galuega talaʻi. Seʻi o tatou iloiloina ni faaaʻoaʻoga se lua.

25, 26. O ā mea na tutupu i Nicaragua na māfua ai ona faia se faamasinoga i le Faamasinoga Maualuga, ma o le ā le iʻuga na oo i ai?

25 Nicaragua. Iā Novema 19 i le 1952, na alu ai le uso misionare sa avea ma ovasia o le lālā o Donovan Munsterman, i le Ofisa o Femalagaaʻiga i le laumua o Managua. Sa faatonuina o ia e alu e vaai Arnoldo García, lea sa faauluulu i ai le ofisa. Na faailoa atu e Arnoldo iā Donovan, o Molimau a Ieova i Nicaragua, e “faasā ona talaʻia atu a latou aʻoaʻoga ma faia a latou galuega faalotu.” Na faamatala e Arnoldo i le uso, e leai se faatagaga mai le minisita o le malo e faia ai le talaʻiga a Molimau a Ieova, ma na tuuaʻia i latou o ni tagata komunisi. O lenā tuuaʻiga, sa faia e faifeʻau o le lotu Katoliko.

O uso i Nicaragua i taimi o faasāsāaga

26 Na vave ona faafesootaʻi e le uso o Donovan le faigāmalo ma le Matagaluega o Lotu, faapea le peresitene o Anastasio Somoza García. Peitaʻi, e leʻi taulau ana taumafaiga. O lea, na fetuunaʻi ai e uso auala e latou te faaaogāina. Sa tapunia  Maota mo Sauniga ae feiloaʻi i ni vaega lāiti, ma taofia talaʻiga i auala tele. Peitaʻi, na faaauau pea ona latou talaʻia le feʻau o le Malo. I le taimi e tasi, na latou faia se talosaga i le Faamasinoga Maualuga, ina ia aveesea ai lenei faasāsāaga. Na faasalalau e nusipepa lenei faasāsāaga, faapea le talosaga na faia e uso. O lea, na talia ai e le Faamasinoga Maualuga la latou talosaga e toe iloilo le mataupu. O le ā le iʻuga? Iā Iuni 19 i le 1953, na faalauiloa mai ai le autasi o le faamasinoga e lagolagoina le itu a Molimau a Ieova. Na faailoa mai e le Faamasinoga Maualuga, o lenei faasāsāaga na aveesea ai le saʻolotoga e faaali ai o tatou manatu, ma faailoa o tatou talitonuga. O lenei faaiʻuga, na toe faaleleia ai le faiā a Molimau a Ieova ma le faigāmalo a Nicaragua.

27. Aiseā na maofa ai tagata i Nicaragua i le faaiʻuga a le Faamasinoga, ma o le ā le vaaiga a uso i lenā faaiʻuga?

27 Na matuā faateʻia tagatānuu o Nicaragua, i le lagolagoina e le Faamasinoga Maualuga o Molimau a Ieova. Talu ai e oo ane i lenā taimi, ua matuā malolosi taaʻiga a taʻitaʻi lotu, ma e leʻi mananaʻo le Faamasinoga e faia ni faaiʻuga e feteenaʻi ma taʻitaʻi lotu. E lē gata i lea, sa telē le malosiaga o le faigāmalo, ma e seāseā faia e le Faamasinoga se faaiʻuga e feteenaʻi ma le faigāmalo. O lea, na mautinoa ai e uso na latou manumalo ona o le puipuiga a lo latou Tupu, ma na faaauau ai pea la latou galuega talaʻi.—Galu. 1:8.

28, 29. I le ogatotonu o vaitausaga o le 1980, o ā ni suiga na tutupu i Zaire?

28 Zaire. I le ogatotonu o vaitausaga o le 1980, e pe ā ma le 35,000 Molimau a Ieova i Zaire, lea ua taʻua nei o le Malo Faatemokalasi o Congo. O le faatupulaʻia o galuega o le Malo, na fausia ai e le lālā nisi fale fou. Iā Tesema i le 1985, na faia ai se tauaofiaga faavaomalo i le laumua o Kinshasa. E 32,000 sui usufono na auai mai vaega eseese o le lalolagi, ma na matuā faatumulia ai se fale matamata i le aai. Peitaʻi, na amata ona suia le tulaga o mea. O le ā le mea na tupu?

29 Na auauna le uso o Marcel Filteau o se misionare i Zaire i lenā taimi. Sa ola aʻe o ia i Quebec i Kanata, ma sa ia aafia i sauāga na tutupu ai i inā. Na ia faapea mai: “Iā Mati 2 i le 1986, na maua ai e uso na taʻimua se tusi na faailoa mai ai, le faasāina o le faalapotopotoga a Molimau a Ieova i Zaire.” Na sainia e le peresitene o le atunuu o Mobutu Sese Seko lenei faasāsāaga.

30. O le ā le filifiliga tāua na tatau ona faia e le Komiti o le Lālā, ma o le ā na latou faia?

30 I le aso na sosoo ai, na faasilasila mai ai i le leitiō: “E tatou te lē toe faalogo i Molimau a Ieova i [Zaire].” Na faaleagaina Maota mo Sauniga. Na fāoa a latou meatotino, taofia, faafalepuipui ma sauāina uso, ma e oo lava i a latou fanau na faafalepuipui. Iā Oketopa 12 i le 1988, na fāoa faamalosi ai e le malo meatotino a le faalapotopotoga, ma sa nofoia e le vaegaʻau le nofoaga sa iai le lālā. Na faia e uso sa taʻimua se talosaga apili i le peresitene o Mobutu, peitaʻi, e  leʻi maua mai se tali. O lea, na tatau ai ona faia e le Komiti o le Lālā se filifiliga tāua: “Po ua tatau ona faia se talosaga apili i le Faamasinoga Maualuga, pe e tatau ona faatali teisi?” Na faapea mai le uso misionare o Timothy Holmes, lea na avea ma sooupu o le Komiti o le Lālā i lenā taimi: “Sa matou saʻili iā Ieova mo le atamai ma le taʻitaʻiga.” Na latou mafaufau e leʻi oo i le taimi talafeagai e faia ai se gaoioiga faaletulafono, ina ua māeʻa ona latou iloiloina le mataupu faatasi ma le tatalo. Nai lo o lea, sa latou uaʻi atu i le tausia o le ʻauuso, ma saʻilia auala e faaauau ai le galuega talaʻi.

“Na matou vaaia le suia e Ieova o le tulaga o mea, a o faagasolo iloiloga a le faamasinoga”

31, 32. O le ā le faaiʻuga mataʻina na faia e le Faamasinoga Maualuga i Zaire, ma na faapefea ona aafia ai o tatou uso?

31 A o faagasolo tausaga, na faasolo ina tuuitiitia omiga na feagai ma Molimau a Ieova, ma faatupulaʻia foʻi le faatāuaina o aiā tatau a tagata i le atunuu. O lea, na manatu ai loa le Komiti o le Lālā, o le taimi talafeagai lea e faia ai se talosaga e toe iloilo le mataupu i le Faamasinoga Maualuga i Zaire. Na talia e le faamasinoga le talosaga. Iā Ianuari 8 i le 1993, na faia ai le faaiʻuga a le faamasinoga e solitulafono faasāsāaga na faia i Molimau a Ieova. Na aveesea ai loa le faasāsāaga na feagai ma uso mo le toetoe fitu tausaga. O le faalēaogāina e faamasino o le faaiʻuga a le peresitene o le atunuu, na lamatia ai o latou ola. Na faapea mai le uso o Holmes: “Na matou vaaia le suia e Ieova o le tulaga o mea, a o faagasolo iloiloga a le faamasinoga.” (Tani. 2:21) O lenei manumalo na faamalosia ai le faatuatua o o tatou uso. Na latou iloa na taʻitaʻia e le Tupu o Iesu ona tagata, ina ia iloa le taimi ma le auala e gaoioi ai.

Le fiafia o Molimau a Ieova i le Malo Faatemokalasi a Congo i lo latou saʻolotoga e tapuaʻi ai iā Ieova

 32 O le aveesea o faasāsāaga, na mafai ai ona avatu e le ofisa o le lālā misionare i totonu o le atunuu, fausia fale fou o le lālā, faapea foʻi le auina atu o lomiga i le atunuu. * Maʻeu le fiafia o auauna a le Atua i le lalolagi aoao, i le mātauina o le auala ua puipuia faaleagaga ai e Ieova ona tagata!—Isa. 52:10.

“O Ieova o Loʻu Fesoasoani Ia”

33. O le ā e tatou te aʻoaʻoina mai i le iloiloina o nisi o mataupu faafaamasinoga?

33 O le iloiloina o nisi o nei mataupu faafaamasinoga, ua faamaonia ai le tausisi o Iesu i lana folafolaga: “Ou te tuuina atu upu ma le atamai i o outou gutu, e lē mafai ai e ē e faasagatau ona tetee pe e finau mai.” (Faitau le Luka 21:12-15.) Ua faaaogā foʻi e Ieova i latou e pei o Kamalielu i aso nei e puipuia ona tagata, ma uunaʻia foʻi lōia ma faamasino lototetele e fai le amiotonu. Ua faalēaogāina e Ieova auupega a i latou e tetee mai. (Faitau le Isaia 54:17.) E lē mafai e teteega ona taofia le galuega a le Atua.

34. Aiseā e mataʻina ai a tatou manumalo faafaamasinoga, ma o le ā ua faamaonia ai? (Tagaʻi foʻi i le pusa “ Fesoasoani Manumalo Faafaamasinoga i le Faaauilumaina o le Galuega Talaʻi.”)

34 Aiseā e mataʻina ai a tatou manumalo faafaamasinoga? E lē taualoa tagata o Ieova. E tatou te lē palota, lagolagoina se vaega faaupufai, pe taumafai foʻi e taaʻina ni tagata faipolotiki. Pe a tatou tutū foʻi i luma o se faamasinoga maualuga, e masani ona manatu tagata o i tatou o ni ē “e leʻi lava ni aʻoaʻoga ma e faatauvaa.” (Galu. 4:13) O lea, e telē le avanoa e lagolagoina ai e faamasinoga le tetee mai o taʻitaʻi lotu ma faigāmalo. Peitaʻi, o loo faaauau pea ona lagolagoina i tatou e faamasinoga. O nei manumalo faafaamasinoga, e faamaonia ai o loo tatou savavali “i le silafaga a le Atua faatasi ai ma Keriso.” (2 Kori. 2:17) O lea, e tatou te ioe faatasi ma Paulo e faalauiloa atu: “O Ieova o loʻu fesoasoani ia; ou te lē fefe lava.”—Epe. 13:6.

^ pala. 9 O le mataupu lenei i le va o Cantwell ma le setete o Connecticut, o le uluaʻi mataupu lea mai i mataupu e 43, na puipuia ai e le uso o Hayden Covington o tatou uso i luma o le Faamasinoga Maualuga i le Iunaite Setete. Na maliu le uso o Hay­den i le 1978. Sa auauna pea ma le faamaoni lana avā o Dorothy, se‘ia oo i lona maliu i le 2015 i le 92 o ona tausaga.

^ pala. 12 O lenei moliaga na faavae mai i le tulafono na faia i le 1606. Na mafai e le ʻaufaatonu (jury) ona faamaonia moliaga o le tagata, pe a latou manatu o ana faamatalaga ua faapogaia ai fevaevaeaʻiga, e tusa lava pe e saʻo.

^ pala. 14 I le 1950, e 164 auauna faataimi atoa na galulue i Quebec, e aofia ai i latou e 63 na faauu mai i Kiliata, na lotomalilie e auauna i vaipanoa na iai sauāga ogaoga.

^ pala. 15 O le uso o Glen How o se lōia lototele ma atamai na finauina le faitau selau o mataupu faafaamasinoga a Molimau a Ieova i Kanata, ma isi atunuu mai le 1943—2003.

^ pala. 16 Mo nisi faamatalaga e faatatau i lenei faamasinoga, tagaʻi i le mataupu “The Battle Is Not Yours, but God’s” o loo i le Awake! o Aperila 22, 2000, itulau e 18-24.

^ pala. 32 Na nofoia e le vaegaʻau le Peteli, ae ina ua ō ese, na fausia loa isi fale fou o le lālā i isi vaipanoa.