Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 19

O Faugāfale e Faamamaluina ai Ieova

O Faugāfale e Faamamaluina ai Ieova

MANATU AUTŪ O LE MATAUPU

O galuega faufale ua lagolagoina ai manaʻoga o le Malo

1, 2. (a) O le ā se vala ua loa tausaga o olioli ai auauna a Ieova? (e) O le ā le vala e sili ona tāua iā Ieova?

UA LOA tausaga o fiafia tagata o le Atua i faugāfale, lea e avatu ai le viiga i le suafa o le Atua. O se faaaʻoaʻoga, na galulue fiafia tagata Isaraelu e fausia le faleʻie paia o le tapuaʻiga, ma foaʻi meafaitino mo le galuega.Eso. 35:30-35; 36:1, 4-7.

2 E lē o meafaitino o loo faia ai le galuega, le vala e sili ona tāua i le silafaga a Ieova ma faamamaluina ai o ia. (Mata. 23:16, 17) Peitaʻi, o le vala e sili ona tāua, o le tapuaʻiga o loo faia e ana auauna, lea e aofia ai le agaga faataulaga ma lo latou maelega. (Eso. 35:21; Mare. 12:41-44; 1 Timo. 6:17-19) Aiseā e tāua ai lenā vala? Talu ai e lē tumau ai pea fale e faia ai tapuaʻiga, e pei o le faleʻie paia ma le malumalu. Ua mou atu na fausaga, ae e lē galo iā Ieova le limafoaʻi ma le galulue o ona tagata e lagolagoina le galuega.Faitau le 1 Korinito 15:58; Eperu 6:10.

3. O le ā o le a iloiloina i lenei mataupu?

3 O loo galulue mamafa tagata o Ieova i aso nei e fausia nofoaga mo tapuaʻiga. E mataʻina vala ua tatou faataunuuina i lalo o le taʻitaʻiga a lo tatou Tupu o Iesu Keriso. E tatou te mautinoa ai, o loo faamanuia e Ieova a tatou taumafaiga. (Sala. 127:1) I lenei mataupu, o le a tatou iloiloina ai nisi o galuega na faamamaluina ai Ieova. O le a tatou iloiloina ai foʻi faamatalaga a nisi na auai i nei galuega.

Fausiaina o Maota mo Sauniga

4. (a) Aiseā e tatou te manaʻomia ai nisi nofoaga mo le tapuaʻiga? (e) Aiseā ua tuufaatasi ai nisi o ofisa o le lālā? (Tagaʻi i le pusa “ Fausiaina o Lālā—Fetuunaʻi i Manaʻoga e Tulaʻi Mai.”)

4 E pei ona taʻua i le Mataupu e 16, e finagalo Ieova e tatou te faapotopoto faatasi mo le tapuaʻiga. (Epe. 10:25) O a tatou sauniga, e lē gata e faamalosia ai lo tatou faatuatua, ae faamalosia ai foʻi lo tatou naunau e faia se sao i le galuega talaʻi. A o faagasolo aso e gata ai, o loo faaauau pea ona faatelevave e Ieova lenā galuega. O le iʻuga, e faitau afe i latou o loo gasolo mai i lana faalapotopotoga i tausaga taʻitasi. (Isa. 60:22) O le faatupulaʻia o tagatānuu  o le Malo, ua manaʻomia ai foʻi nisi masini lomitusi e lomia ai lomiga faale-Tusi Paia. E lē gata i lea, ua manaʻomia ai foʻi nisi nofoaga mo le tapuaʻiga.

5. Aiseā e talafeagai lelei ai le faaaogāina o le igoa Maota o le Malo? (Tagaʻi foʻi i le pusa “ Le ʻLotu o le Malamalama Fou.’”)

5 I le amataga o le talafaasolopito o tagata o Ieova i aso nei, na iloa ai e Tagata Aʻoga o le Tusi Paia le manaʻomia o ni nofoaga mo le tapuaʻiga. E foliga mai o se tasi o nofoaga muamua o le tapuaʻiga, sa fausia i West Virginia i le Iunaite Setete i le 1890. E oo ane i vaitausaga o le 1930, ua fausia ma toe faafou e tagata o Ieova le tele o nofoaga mo le tapuaʻiga. Peitaʻi, e leai se igoa patino sa faaigoa ai nei maota. I le 1935, na asiasi ai le uso o Rutherford i Hawaii, a o fausia se maota mo sauniga faatasi ai ma se ofisa fou o le lālā i inā. Na fesiligia o ia po o le ā se igoa e faaigoa ai le maota, ae na tali mai Rutherford: “Pe e lē tatau ona faaigoa o le ʻMaota o le Malo,’ auā o lea e tatou te talaʻia le  tala lelei o le Malo?” (Mata. 24:14) Na talafeagai lelei le igoa na faaigoa ai lenā maota, ma o le igoa foʻi lenā o loo faaigoa ai le tele o maota o loo faaaogā e Molimau a Ieova i le lalolagi aoao mo sauniga.

6, 7. O le ā le iʻuga na oo i ai ona o le vave ona fausia o Maota mo Sauniga?

6 E oo ane i vaitausaga o le 1970, ua matuā faateleina le manaʻoga mo Maota mo Sauniga. O lea na faia ai e uso i le Iunaite Setete, se auala e fausia ai mo ni nai aso ni maota matagofie ma lelei fausaga. E oo ane i le 1983, ua pe ā ma le 200 maota faapena ua fausia i le Iunaite Setete ma Kanata. Na amata ona faavaeina e uso komiti o faugāfale o le vaipanoa, ina ia faataunuuina ai lenā galuega. Na taulau manuia lenā auala, ma i le 1986, na aloaʻia ai e le Vaega Pule lenā faatulagaga. E oo ane i le 1987, ua silia i le 60 Komiti o Faugāfale o le Vaipanoa i le Iunaite Setete. * Ae e oo ane i le 1992, ua tofia Komiti o Faugāfale o le Vaipanoa i Anitenitina, Ausetalia, Falani, Siamani, Iapani, Mekisikō, Aferika i Saute ma Sepania. E talafeagai ona tatou lagolagoina galuega mamafa a uso o loo galulue i le fausiaina o Maota mo Sauniga ma Maota mo Fonotaga, auā o a latou galuega o se vaega o le auaunaga paia.

7 O le vave ona fausia o nei maota, na avatu ai se molimau lelei iā i latou e nonofo i na vaipanoa. O se faaaʻoaʻoga, na lomia i se nusipepa i Sepania le mataupu “Faatuatua e Siitia ai Mauga.” O le fesili lenei na lāgā e le nusipepa e faatatau  i se Maota mo Sauniga na faia i le aai o Martos: “E ui i lenei lalolagi manatu faapito, ae e mafai faapefea ona malaga mai tagata tauofo mai i isi vaipanoa [o Sepania] e aunoa ma le manatu faapito ina ia fausia se maota e vave, lelei ma maopoopo le auala na fausia ai?” Na taliina e le nusipepa lenā fesili i le sii mai o le faamatalaga a se tasi o Molimau a Ieova e faapea: “O le tali faigofie, ona o loo aʻoaʻoina e Ieova ona tagata.”

Galuega Faufale i Atunuu e Vaivai le Tamaoaiga

8. O le ā le polokalame fou na faamaonia e le Vaega Pule i le 1999, ma aiseā?

8 A o faasolo ina māeʻa le senituri lona 20, e toʻatele na lolofi mai i le faalapotopotoga a Ieova mai i atunuu e vaivai le tamaoaiga. Na faia lava e faapotopotoga le mea sili e fausia ai a latou maota mo sauniga. I nisi atunuu, e onosaia e uso tauemuga ona o le faigofie o fausaga o Maota mo Sauniga, pe a faatusatusa i falesā o isi lotu. Peitaʻi, na amata mai i le 1999, ona faamaonia e le Vaega Pule se polokalame mo le fausiaina o Maota mo Sauniga i atunuu tauatiaʻe. Na “fesoasoani” foaʻi mai i atunuu e lelei tamaoaiga i nei galuega. (Faitau le 2 Korinito 8:13-15.) E lē gata i lea, e tauofo foʻi uso ma tuafāfine mai i isi atunuu e galulue i nei galuega.

9. O le ā le galuega na foliga mai e faigatā ona faataunuu, ae o le ā na mafai ona faataunuuina?

9 E foliga mai sa faigatā ona faataunuu lenei galuega i le taimi muamua. Na faaalia mai i se lipoti i le 2001, e silia  i le 18,300 Maota mo Sauniga na manaʻomia ona fausia i atunuu tauatiaʻe e 88. O le fesoasoani a le agaga paia o le Atua, ma lo tatou Tupu o Iesu Keriso, ua mafai ai ona faataunuu lenei galuega. (Mata. 19:26) E mai i le 1999 e oo i le 2013, e 26,849 Maota mo Sauniga na fausia e tagata o Ieova i lenei polokalame. * O loo faaauau pea ona faamanuia Ieova i le galuega talaʻi. E oo ane i le 2013, o loo manaʻomia pea ona fausia le pe ā ma le 6,500 Maota mo Sauniga i atunuu tauatiaʻe. O lea, o loo manaʻomia pea ona fausia le faitau selau o Maota mo Sauniga i tausaga taʻitasi.

E iai luʻi i le fausiaina o Maota mo Sauniga i atunuu e vaivai le tamaoaiga

10-12. E faapefea i le fausiaina o Maota mo Sauniga ona faamamaluina ai le suafa o Ieova?

10 E faapefea i le fausiaina o maota fou mo sauniga ona faamamaluina ai Ieova? Na taʻua i se lipoti mai i le ofisa o le lālā i Zimbabwe e faapea: “I totonu o le tasi le masina talu ona māeʻa le fausiaina o se maota fou mo sauniga, ua faaluaina le aofaʻi o i latou e auai i sauniga.” I le tele o atunuu, e faatalatū tagata e aufaatasi ma i tatou seʻi vaganā ua iai se nofoaga mautū mo le tapuaʻiga. O le taimi lava e uma ai ona fausia se Maota mo Sauniga, e vave ona faatumulia ma oo ai ina manaʻomia se isi maota. Peitaʻi, e lē na o le fausaga o maota o loo tosina mai ai tagata iā Ieova. O le auala o loo faaalia ai e i latou o loo fausia nei maota le alofa moni faa-Kerisiano, ua aafia ai le vaaiga a tagata i le faalapotopotoga. Seʻi mātau nisi o faaaʻoaʻoga.

11 Indonesia. E iai se tamāloa na ia mātauina le fausiaina o se tasi o Maota mo Sauniga. I le taimi na ia iloa ai e tauofo uma tagata o loo galulue ai, na ia faapea mai: ʻE mataʻina tele tagata o la outou tapuaʻiga. E galulue fiafia ma le lotoatoa tagata uma, e ui lava e lē maua ai ni o latou totogi. Ou te iloa e leai se isi faalapotopotoga faalelotu e pei o outou.’

12 Ukraine. E masani ona uia e se fafine le vaipanoa na fausia ai se Maota mo Sauniga. Na ia faapea mai: “Sa masani ona ou faalogo e faatatau i Molimau a Ieova mai i se tasi o oʻu uso e Molimau a Ieova. O loʻu mātauina o le galuega sa faia, na ou fia auai ai i lenei aiga faaleagaga, ona o le alofa na faaalia e tagata uma.” Na talia e le fafine se suʻesuʻega faale-Tusi Paia ma papatiso ai i le 2010.

13, 14. (a) O le ā e tatou te aʻoaʻoina mai le auala na tali atu ai se ulugalii ina ua uma ona fausia se tasi o Maota mo Sauniga? (e) O ā nisi o auala e mafai ona e faamamaluina ai Ieova i la outou maota mo le tapuaʻiga?

13 Anitenitina. Na talanoa atu se ulugalii i se uso sa vaavaaia le fausiaina o se tasi o Maota mo Sauniga. Na faapea atu le tamāloa i le uso: ʻNa ma mātauina le galuega o lenei maota, ma ua ma filifili ai e fia aʻoaʻo e faatatau i le Atua i lenei nofoaga.’ Na ia fesili atu i le uso: “O le ā e tatau ona ma faia ina ia agavaa ai e auai i sauniga?” Na la talia se suʻesuʻega faale-Tusi Paia, ma mananaʻo e auai lo latou  aiga atoa i le sauniga. Na talia fiafia e uso lo latou manaʻoga.

14 Atonu e lē mafai ona e maua le faaeaga e fesoasoani ai i le fausiaina o la outou Maota mo Sauniga. Peitaʻi, e iai isi auala e mafai ona e faamamaluina ai Ieova. O se faaaʻoaʻoga, e mafai ona valaaulia au suʻesuʻega faale-Tusi Paia, toe asiga ma tagata lautele e auai i sauniga i le Maota mo Sauniga. E mafai foʻi ona faia sou sao i le faamamāina ma le faatumauina o le lelei o le maota mo le tapuaʻiga. O le fuafua lelei, e mafai ai ona e faia se foaʻi e tausia ai la outou Maota mo Sauniga, po o le fausia ai foʻi o maota faapenei i isi vaega o le lalolagi. (Faitau le 1 Korinito 16:2.) O nei gaoioiga uma e faapaiaina ai le suafa o Ieova.

O Ē o Loo ʻOfo Atu ma le Lotomalie i Latou Lava’

15-17. (a) O ai o loo faia le tele o galuega faufale? (e) O le ā e tatou te aʻoaʻoina mai manatu o nisi o ulugalii na galulue i le tele o galuega faufale faavaomalo?

15 O le fausiaina o Maota mo Sauniga, Maota mo Fonotaga ma ofisa o lālā, e tele lava ina faia e uso ma tuafāfine i na vaipanoa. Ae e toʻatele foʻi uso mai i isi atunuu ua iai le poto masani, o loo fesoasoani ai. O nisi o le ʻaugalulue tauofo ua faia faataulaga, ina ia galulue ai i isi atunuu mo se taimi puupuu. A o isi ua faaavanoa i latou ina ia auauna ai mo le tele o tausaga, faapea le faia o le tele o isi galuega faufale.

Timo ma Lina Lappalainen (Tagaʻi i le palakalafa e 16)

16 E iai luʻi o le galulue i isi atunuu i galuega faufale, peitaʻi, e maua ai foʻi le faamalieina. O se faaaʻoaʻoga, na malaga Timo ma Lina i atunuu i Asia, Europa ma Amerika i Saute i le fausiaina o Maota mo Sauniga, Maota mo Fonotaga ma ofisa o lālā. Na faapea mai Timo: “I le 30 tausaga  ua mavae, e pe ā ma le taʻilua tausaga ma suia oʻu faaeaga.” Ua 25 nei tausaga talu ona faaipoipo Lina ma Timo. Na faapea mai Lina: “E sefulu atunuu na ma auauna ai ma Timo. E manaʻomia le malosi ma le taimi e faamasani ai i meaʻai fou, le tau, gagana, le auala e talaʻi ai faapea le faia o ni uō fou.” * Pe na tauia a la taumafaiga? Na faapea mai Lina: “O luʻi na iʻu atu ai i faamanuiaga. Ua ma tofo i le alofa faaleuso, agaga talimālō faapea le tausiga alofa a Ieova. Ua ma vaaia foʻi le faataunuuga o le folafolaga a Iesu i ona soo, o loo i le Mareko 10:29, 30. Ua ma maua le tele o uso, tuafāfine ma tinā faaleagaga.” Na faapea mai Timo: “Ua ma maua le faamalieina i le faaaogāina o o ma tomai e faalautele ai mea a le Tupu.”

17 Na fesoasoani Darren ma Sarah i galuega sa faia i Aferika, Asia, Amerika Tutotonu, Europa, Amerika i Saute ma le Pasefika i Saute. Na la mafaufau ua la mauaina le tele o faamanuiaga. E ui i faigatā sa la fesagaʻia, ae na faapea mai Darren: ʻO se faaeaga iā te aʻu le galulue ma uso mai i vaega eseese o le lalolagi. O le alofa mo Ieova ua autasia ai ona tagata i le lalolagi atoa.’ Ae na faapea mai Sarah: “E tele mea na ou aʻoaʻoina mai uso ma tuafāfine mai i aganuu eseese. O le vaaia o faataulaga na latou faia mo le auaunaga iā Ieova, ua uunaʻia ai aʻu e faia le mea sili.”

18. Ua faapefea ona faataunuuina le valoaga i le Salamo 110:1-3?

18 Na valoia e le tupu o Tavita e ui o le a feagai tagatānuu o le Malo ma luʻi, peitaʻi o le a ʻofo atu ma le lotomalie i latou lava,’ e auauna ai i le Malo. (Faitau le Salamo 110:1-3.) O i latou uma o loo galulue i galuega e lagolagoina ai le Malo, ua faia so latou sao i le faataunuuina o na upu faavaloaga. (1 Kori. 3:9) O le tele o ofisa o lālā, o Maota mo Fonotaga faapea le faitau afe o Maota mo Sauniga, o faamaoniga vaaia lea o le pule o le Malo i le taimi lenei. Maʻeu se faaeaga o le auauna i le Tupu o Iesu Keriso i se galuega e faamamaluina ai Ieova!

^ pala. 6 I le 2013, e silia i le 230,000 le ʻaugalulue tauofo na faamaonia le galulue i Komiti o Faugāfale o le Vaipanoa e 132 i le Iunaite Setete. I lenā atunuu, e pe ā ma le 75 maota fou mo sauniga na fausia, ae pe ā ma le 900 maota na toe faaleleia e nei komiti i tausaga taʻitasi.

^ pala. 9 O lenei fuainumera e lē aofia ai le tele o Maota mo Sauniga na fausia i atunuu e lē o aofia i lenei polokalame.

^ pala. 16 E faaalu e auauna faavaomalo ma le ʻaugalulue tauofo le tele o le taimi i galuega faufale, peitaʻi e latou te lagolagosua foʻi i le talaʻiga a le faapotopotoga i faaiʻuga o le vaiaso ma afiafi.