Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Ua Pule le Malo o le Atua!

 MATAUPU 18

O Auala e Faatupe ai Galuega o le Malo

O Auala e Faatupe ai Galuega o le Malo

MANATU AUTŪ O LE MATAUPU

O māfuaaga ma auala e lagolago ai e tagata o le Atua galuega o le Malo i le itu tautupe

1, 2. (a) Na faapefea ona tali atu le uso o Russell i se faifeʻau na fia malamalama i le auala e faagaoioi ai galuega a Molimau a Ieova? (e) O le ā o le a iloiloina i lenei mataupu?

NA FESILI fia malamalama se faifeʻau o le Lotu Toefuataʻiina i le uso o Russell, e faatatau i le auala e faatupe ai galuega a Tagata Aʻoga o le Tusi Paia.

Na faapea atu le uso o Russell: “E matou te lē faia ni saogatupe.”

Na fesili mai le faifeʻau: “Ae e faapefea la ona maua tou tupe?”

Na faapea atu Russell: “Afai ou te taʻuina atu le mea moni, e faigatā ona e talitonu i ai. Pe a ō mai tagata i a matou sauniga, e latou te lē vaaia ai le aoina o ni peleti. Peitaʻi, ua latou iloa e iai tupe faaalu. E latou te faapea ifo: ʻE tatau lava ona iai se tau o lenei maota. . . . E faapefea ona faia saʻu foaʻi itiiti mo lenei maota?’”

Sa matuā le talitonu le faifeʻau.

Na faapea atili atu le uso o Russell: “Ua ou taʻuina atu iā te oe le mea moni. E masani ona latou fesili: ʻE faapefea ona faia saʻu foaʻi itiiti mo lenei maota?’ E naunau se tasi e faia se foaʻi mo le Alii pe a maua sana tupe. Ae aiseā e faamalosia ai o ia e faia se foaʻi pe a leai sana tupe?” *

2 Sa faailoa atu e le uso o Russell le mea moni. Ua loa ona faia e tagata o le Atua foaʻi tauofo e lagolagoina ai le tapuaʻiga moni. I lenei mataupu, o le a iloiloina ai nisi o faaaʻoaʻoga faale-Tusi Paia faapea faaaʻoaʻoga i aso nei. A o tatou iloiloina le auala ua faatupe ai galuega o le Malo, ia tatou fesili ifo: ʻE faapefea ona ou lagolagoina le Malo?’

“Ia Taʻitasi ma Fai Lana Foaʻi mo Ieova e Tusa ma Lona Lotomalie”

3, 4. (a) O le ā le itu ua maufaatuatuaina ai e Ieova ona tagata tapuaʻi? (e) Na faapefea ona lagolagoina e tagata Isaraelu le fausiaina o le faleʻie paia?

3 E maufaatuatuaina e Ieova ona tagata tapuaʻi. E silafia e Ieova, pe a tuu i ona tagata le avanoa e faia ai foaʻi tauofo, o le a latou fiafia e faia faapea. O lea, seʻi o tatou iloiloina ni faaaʻoaʻoga se lua i Isaraelu anamua.

 4 Na faatonuina e Ieova tagata Isaraelu e faia le faleʻie paia mo le tapuaʻiga, ina ua māeʻa ona ia faasaoina i latou mai i Aikupito. E tele mea na manaʻomia e faia ai le faleʻie ma meafale. O lea, na faatonu ai e Ieova Mose e tuuina atu i tagata le avanoa e lagolagoina ai le galuega. Na faapea atu Mose: “Ia taʻitasi ma fai lana foaʻi mo Ieova e tusa ma lona lotomalie.” (Eso. 35:5) Na faapefea ona tali atu nei tagata e leʻi leva ona māeʻa le ʻfaapologaina i faiga sauā’? (Eso. 1:14) Sa latou matuā lagolagoina le galuega, ma foaʻi ma le lotoatoa auro, siliva, ma isi mea tāua. O le tele o nei mea sa latou aumaia mai i tagata Aikupito. (Eso. 12:35, 36) E tele mea sa foaʻi atu e tagata Isaraelu, o lea na “taofia ai tagata mai le aumaia o nisi mea.”Eso. 36:4-7.

5. Na faapefea ona tali atu tagata Isaraelu, ina ua tuuina atu e Tavita le avanoa e faia ai foaʻi mo le fausiaina o le malumalu?

5 I le 475 tausaga mulimuli ane, na foaʻi ai e Tavita ana “oloa faapitoa,” e fesoasoani ai i le galuega o le malumalu, ma o le uluaʻi nofoaga tumau lea sa faia ai le tapuaʻiga moni i le lalolagi. Na ia faapea atu foʻi i tagata Isaraelu: “O ai ea e tauofo e foaʻi mai ana mea mo Ieova i le asō?” Na tali atu tagata e ala i le “foaʻi atu ma le lotoatoa meaalofa tauofo iā Ieova.” (1 No. 29:3-9) O le amanaʻiaina e Tavita o lē e ala mai ai nei foaʻi na ia tatalo ai: “E mai iā te oe mea uma, ma ua matou foaʻiina atu iā te oe mea uma mai i lou aao.”1 No. 29:14.

6. Aiseā e manaʻomia ai tupe mo le galuega o le Malo i aso nei, ma o ā fesili ua lāgā ai?

6 E leʻi faamalosia e Mose po o Tavita tagata o le Atua e faia foaʻi. Nai lo o lea, na faia ma le lotomalie a latou foaʻi. Ae faapefea aso nei? Ua tatou iloa e manaʻomia tupe e lagolagoina ai galuega o le Malo. E tele mea e manaʻomia mo le lomia ma le tufatufaina o Tusi Paia ma lomiga faale-Tusi Paia, le fausia ma le faaleleia o maota e faia ai sauniga ma ofisa o lālā, faapea le saunia o fesoasoani laveaʻi mo uso i taimi o mala. O lea, ua tulaʻi ai ni fesili tāua: E faapefea ona faatupe nei galuega? Pe e tatau ona faamalosia soo o Keriso e faia ni foaʻi?

“E lē Taitai ai o Tatou ʻAisi pe Talosagaina se Fesoasoani a Isi”

7, 8. Aiseā e lē faia ai e tagata o Ieova ni suʻegātupe?

7 E leʻi faataʻitaʻi le uso o Russell ma ana aumea i le mea ua masani ai lotu ua faapea mai o Kerisiano, o le faia lea o suʻegātupe. I le lomiga lona lua o le Watch Tower, sa iai le mataupu na faamatuaina, “Pe e Tou te Mananaʻo i le ʻZion’s Watch Tower’?” Na taʻua e Russell i lenā mataupu: “E tatou te talitonu o loo lagolagoina e IEOVA le ʻZion’s Watch Tower,’ ma o le pogai lea e lē taitai ai o tatou ʻaisi  pe talosagaina se fesoasoani a isi tagata. Na fetalai Ieova: ʻO aʻu e ana auro ma siliva uma i mauga.’ Pe a ia lē toe saunia mai le fesoasoani, ona tatou iloa lea ua tatau ona taofia le lomiaina o le lomiga.” (Ha. 2:7-9) I le 130 tausaga na sosoo ai, na agaʻi pea i luma le lomiaina o Le Olomatamata, ma o loo malosi pea le faalapotopotoga o loo lomiaina.

8 E lē faia e tagata o Ieova ni suʻegātupe. E latou te lē aoina ni peleti pe faia foʻi ni tusi ʻaisi. E lē faia foʻi ni bingo, lūlū po o nisi lava suʻegātupe. E latou te taofiofimamau i le manatu lenei ua leva ona taʻua i le Watch Tower: ʻE lē talafeagai le faia o ni suʻegātupe mo le galuega a le Alii, e pei ona faia e isi lotu. E tigā le finagalo o le Alii ma e na te lē taliaina suʻegātupe. E lē mauaina e i latou e faia foaʻi ni faamanuiaga, ma e lē manuia foʻi le galuega.’ *

“Ia Taʻitoʻatasi ma Faia e Tusa ma le Mea ua Filifili i Lona Loto”

9, 10. O le ā se tasi o māfuaaga e tatou te faia ai foaʻi tauofo?

9 I le avea ai o i tatou ma tagatānuu o le Malo, e lē manaʻomia ona faia faamalosi a tatou foaʻi. Peitaʻi, e tatou te fiafia e faaaogā a tatou tupe ma meafaitino e lagolagoina ai galuega o le Malo. Aiseā e tatou te lotomalilie ai e faia foaʻi? Seʻi o tatou iloiloina nisi o māfuaaga se tolu.

10 Muamua, e tatou te faia foaʻi tauofo ona o lo tatou alolofa iā Ieova, ma mananaʻo e “faia mea e lelei i lana silafaga.” (1 Ioa. 3:22) E fiafia le finagalo o Ieova i se tagata tapuaʻi e faia lana foaʻi mai i le loto. Seʻi o tatou iloiloina le fautuaga a Paulo i Kerisiano e faatatau i le auala e tatau ona faia ai foaʻi. (Faitau le 2 Korinito 9:7.) E lē faia faamalosi e se Kerisiano moni se foaʻi. Nai lo o lea, e na te faia se foaʻi ona ua ia “filifili i lona loto” e faia faapea. * E mafaufau muamua o ia i le manaʻoga ua tulaʻi mai faapea le auala e faatino ai lana foaʻi. E fiafia Ieova iā i latou e faia faapea, talu ai “e alofa le Atua i lē e foaʻi ma le lotofiafia.” Ua faapea mai se tasi faaliliuga: “E fiafia le Atua iā i latou e fiafia e foaʻi.”

E fiafia foʻi fanau iti i Mozambique e faia foaʻi

11. O le ā e uunaʻia ai i tatou e foaʻi le mea sili mo Ieova?

11 Lona lua, o le faia o foaʻi faaletino o se auala lea e tatou te faafetaia ai Ieova mo le tele o faamanuiaga ua tatou maua. Seʻi o tatou iloiloina se taʻiala tāua na aumaia i le Tulafono a Mose. (Faitau le Teuteronome 16:16, 17.) Pe a faia tausamiga e tolu faaletausaga a tagata Isaraelu, sa tatau i tane taʻitasi ona avatu a latou meaalofa “e tusa ma le faamanuia ua tuuina mai e Ieova.” O lea, a o leʻi auai i nei tausamiga, sa tatau i tane ona mafaufau loloto i faamanuiaga  ua latou maua, ona iloa ai lea o le meaalofa sili e latou te faia. I se tulaga talitutusa, o le mafaufau loloto i le tele o auala ua faamanuia ai i tatou e Ieova, e uunaʻia ai i tatou e avatu se meaalofa sili iā te ia. O meaalofa e faia ma le lotoatoa e aofia ai foaʻi faaletino, e faailoa atu ai lo tatou talisapaia o faamanuiaga ua foaʻi mai e Ieova iā i tatou.2 Kori. 8:12-15.

12, 13. E faapefea i a tatou meaalofa tauofo ona faailoa atu ai lo tatou alolofa i lo tatou Tupu, ma e faapefea ona faia a tatou foaʻi?

12 Lona tolu, o le faia o foaʻi tauofo e faailoa atu ai lo tatou alolofa i le tupu o Iesu Keriso. I le ā le itu? Seʻi mātau le fetalaiga a Iesu i ona aposetolo i lona pō mulimuli i le lalolagi. (Faitau le Ioane 14:23.) Na ia fetalai: “Afai e alofa mai se tasi iā te aʻu, e tausia e ia aʻu upu.” O “upu” a Iesu e aofia ai lana faatonuga e talaʻi le tala lelei o le Malo i le lalolagi atoa. (Mata. 24:14; 28:19, 20) E tatou te usitaʻia “upu” a Iesu e ala i le faaaogā o le taimi, malosi ma meafaitino e faaauiluma ai le galuega talaʻi o le Malo. O le faia  faapea, e faailoa atu ai lo tatou alolofa mo le Tupu faa-Mesia.

13 I le avea ai ma tagatānuu faamaoni o le Malo, e tatou te lagolagoina ai ma le lotoatoa le Malo, e ala i le faia o foaʻi tautupe. E faapefea ona faia neʻi foaʻi? E filifili e le tagata lava ia lana foaʻi, ma e latou te faia foʻi le mea sili. Peitaʻi, e iai nisi o o tatou uso e lē tele ni meafaitino. (Mata. 19:23, 24; Iako. 2:5) E ui i lea, e faamāfanafanaina i latou i le iloaina e tāua iā Ieova ma lona Alo meaalofa itiiti e latou te faia ma le lotoatoa.Mare. 12:41-44.

E Faapefea Ona Tatou Mauaina Tupe?

14. O le ā sa faia e Molimau a Ieova mo le tele o tausaga?

14 Sa faatauina e Molimau a Ieova a latou lomiga faale-Tusi Paia mo le tele o tausaga. Sa taugofie le tau o nei lomiga, ma e oo lava i tagata e lē tagolima sa mafai ona latou mauaina. Ae pe a manaʻo se tasi i se lomiga ae e lē mafai ona ia faatauina, e lotomalie le tagata talaʻi e tuu le lomiga iā te ia. Sa latou avatuina lomiga i tagata lotofaamaoni e naunau e faitau ma mauaina ai aogā.

15, 16. (a) O le ā le suiga sa faia e le Vaega Pule talu mai le 1990? (e) E faapefea ona faia a tatou foaʻi? (Tagaʻi foʻi i le pusa “ O Fea e Ave i ai a Tatou Foaʻi?”)

15 I le 1990, na amata ai ona suia e le Vaega Pule le auala e ofoina ai a tatou lomiga. Na amata i lenā tausaga i le Iunaite Setete, ona lē toe faatauina lomiga, ae e lagolagoina uma e foaʻi tauofo. Na faamatalaina i se tusi na avatu i lenā atunuu e faapea: ʻUa mafai nei ona maua e tagata talaʻi ma tagata lautele mekasini ma lomiga, e aunoa ma le faatauina. E mafai foʻi ona faia se foaʻi a se tasi i la tatou galuega pe a manaʻo i ai. E ui i lea, e mafai lava ona latou mauaina lomiga e tusa pe e lē faia se foaʻi.’ O lenā faatulagaga ua faailoa manino atu ai, e lē o i tatou o ni ē “suʻe tupe i le afioga a le Atua.” (2 Kori. 2:17) A o faagasolo taimi, na amata ona faaaogā lenei faatulagaga mo foaʻi tauofo i ofisa o lālā i le lalolagi aoao.

16 E faapefea ona faia foaʻi tauofo? E iai i Maota mo Sauniga a Molimau a Ieova pusa e faia ai foaʻi tauofo. E mafai e tagata taʻitoʻatasi ona faaaogā na pusa e faia ai a latou foaʻi, pe lafo tuusaʻo foʻi a latou foaʻi i faalapotopotoga faaletulafono o loo faaaogā e Molimau a Ieova. E iai se mataupu i Le Olomatamata i tausaga taʻitasi, e aumaia ai taʻiala i le auala e faia ai na foaʻi.

Le Auala e Faaaogā ai Foaʻi

17-19. Faamatala le auala o loo faaaogā ai foaʻi mo le (a) galuega i le lalolagi aoao, (e) fausiaina o Maota mo Sauniga i le lalolagi aoao, (i) tupe faaalu mo le faapotopotoga.

17 Galuega i le lalolagi aoao. O nei foaʻi e faaaogā e faatupe ai le galuega talaʻi i le lalolagi aoao. E aofia ai le lomiaina o lomiga, le fausia ma le faaleleia o ofisa o lālā ma  aiga Peteli, faapea le faagaoioia o le tele o aʻoga faatiokarate. E faaaogā foʻi e tausia ai misionare, ovasia femalagaaʻi, ma paeonia faapito. E lē gata i lea, e faaaogā e saunia ai fesoasoani laveaʻi mo o tatou uso i taimi o mala faalenatura. *

18 Fausiaina o Maota mo Sauniga i le lalolagi aoao. E faaaogā foaʻi e fesoasoani ai i faapotopotoga, ina ia fausia pe toe faaleleia a latou Maota mo Sauniga. Pe a maua mai foaʻi tauofo, e mafai ona faaaogā e fesoasoani ai i isi faapotopotoga. *

19 Tupe faaalu mo le faapotopotoga. O nei foaʻi e fesoasoani i le faagaoioiga ma le faatumauina o le tulaga lelei o Maota mo Sauniga. E ono filifili foʻi toeaina e foaʻi se vaega o nei tupe i le ofisa o le lālā, e faaaogā ai mo nisi galuega i le lalolagi aoao. Pe a faia lenā vala, e tatau i toeaina ona faailoa atu le iʻugāfono i le faapotopotoga, ma pe a malilie i ai le faapotopotoga, ona lafo loa lea. I masina taʻitasi, e saunia ai e le uso o loo vaavaaia tupe a le faapotopotoga le tala o le tupe o le masina, ona faasilasila lea i le faapotopotoga.

20. E faapefea ona e faamamaluina Ieova i “au ʻoa”?

20 O le iloiloina o mea e aofia i le talaʻiga o le Malo ma le galuega o le faia o isi ma soo i le lalolagi aoao, e uunaʻia ai i tatou e ʻava iā Ieova i a tatou ʻoa.’ (Faata. 3:9, 10) O a tatou ʻoa e aofia ai le malosi, mafaufau, o uiga faa-Kerisiano ma o tatou tomai. E tatou te mananaʻo e faaaogā nei mea uma e lagolago ai le galuega o le Malo. Ae aua neʻi galo, o a tatou ʻoa e aofia ai foʻi a tatou meafaitino. O lea, ia tatou maumauaʻi e foaʻi le mea sili e tatou te mafaia. O a tatou foaʻi tauofo e faamamaluina ai Ieova, ma faailoa atu ai lo tatou lagolagoina o le Malo.

^ pala. 10 The Watch Tower o Iulai 15, 1915, itulau 218-219.

^ pala. 8 The Watch Tower o Aokuso 1, 1899, itulau e 201.

^ pala. 10 Na faapea mai se tasi o faitofā, o le upu Eleni mo le upu “filifili” “e faasino atu i le faaalu o le taimi e mafaufau ai i se mea.” Na ia faaopoopo mai: ʻE ui e maua le olioli i le foaʻi atu, ae e tāua lava le fuafua lelei.’1 Kori. 16:2.

^ pala. 17 Tagaʻi i le Mataupu e 20 mo nisi faamatalaga e faatatau i le faiva o le foaʻi atu.

^ pala. 18 Tagaʻi i le Mataupu e 19 mo nisi faamatalaga e faatatau i le fausiaina o Maota mo Sauniga.