Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 22

Ua Faataunuu e le Malo le Finagalo o le Atua i le Lalolagi

Ua Faataunuu e le Malo le Finagalo o le Atua i le Lalolagi

MANATU AUTŪ O LE MATAUPU

Ua faataunuu e le Malo folafolaga uma a le Atua e faatatau i le fanau a tagata ma le lalolagi

1, 2. (a) Aiseā e faigatā ai ona faaāta i nisi taimi le moni o le Parataiso? (e) O le ā e fesoasoani e faamalosia ai lo tatou faatuatua i folafolaga a le Tusi Paia?

UA TAUNUU se uso i le sauniga, ma ua matuā lēlavā mai i se aso pisi i le galuega. Sa ia feagai i le galuega ma se pule e inainā. E lē gata i lea, e iai foʻi ona popolega ona o luʻi i le tausiga o le aiga, ma se maʻi tigāina o loo aafia ai lana avā. I le taimi na amata ai ona tā le pese o le sauniga, sa ia maua le toʻa, ma lagona le fiafia ona ua ia faatasi ma uso ma tuafāfine i le Maota mo Sauniga. O lenei pese e faatatau i le faamoemoe i le olaga i le Parataiso, ma o upu o le pese ua mafai ai ona ia faaāta lona iai i lenā nofoaga. E fiafia o ia i lenei pese, ma a o latou pepese faatasi ma lona aiga, na faamāfanafanaina ai o ia ona o le faamoemoe mo le lumanaʻi.

2 O le toʻatele o i tatou na tupu ai lenā tulaga. O le mea moni, o le olaga i lenei faiga tuai o mea ua faigatā ai ona tatou faaāta le oo moni mai o le Parataiso. O nei “aso e sili ona faigatā,” ma e lē faatusaina lenei olaga i se Parataiso. (2 Timo. 3:1) O le ā e fesoasoani iā i tatou e vaai i lo tatou faamoemoe o se mea moni? E faapefea ona tatou iloa ua toeitiiti ona pulea lea e le Malo o le Atua o tagata uma? Seʻi o tatou iloiloina nisi o valoaga a Ieova e faatatau i ona tagata na faataunuuina i aso ua mavae. Pe a māeʻa lenā, ona tatou vaai lea po o ā ni tulaga e tutusa ai na valoaga ma isi valoaga faapena, ma mea mataʻina o loo faataunuuina e le Malo i aso nei. Ae o le vala mulimuli, o le a tatou iloiloina ai le auala e faataunuu ai na valoaga i le lumanaʻi.

Le Auala na Faataunuu ai e Ieova Ana Folafolaga i Aso ua Mavae

3. O le ā le folafolaga na faamāfanafanaina ai tagata Iutaia a o faaaunuua i Papelonia?

3 Seʻi faaāta le olaga sa iai tagata Iutaia i tuā i Papelonia i le senituri lona ono T.L.M. O le toʻatele sa ola aʻe o ni ē e faaaunuua e pei o o latou mātua, ma sa faigatā le olaga. Sa faifai tagata Papelonia iā i latou, ona o lo latou faatuatua iā Ieova. (Sala. 137:1-3) A o faagasolo tausaga, sa faaauau pea ona faatalitali tagata Iutaia faamaoni i le faamoemoe  matagofie lenei: Na folafola e Ieova o le a ia toe faafoʻisia ona tagata i o latou laueleele. Na faailoa atu e Ieova o le a matuā manaia le tulaga o lo latou nofoaga. Sa ia faatusaina foʻi le laueleele sa toe faafoʻisia ai tagata Iutaia, i le faatoʻaga parataiso o Etena. (Faitau le Isaia 51:3.) O na folafolaga, na faia e Ieova e aveesea ai ni masalosaloga sa iai i loto o ona tagata. I le ā le itu? Seʻi o tatou iloiloina nisi o faaaʻoaʻoga.

4. Na faapefea ona faamautinoa atu e Ieova i tagata Iutaia o le a latou saogalemu i lo latou laueleele?

4 Saogalemu. E leʻi toe foʻi ē sa faaaunuua i se parataiso moni, peitaʻi o se laueleele sa tuufua mo le 70 tausaga, ma e toʻaitiiti nisi o i latou sa vaai muamua i ai. I taimi o le Tusi Paia, sa tele leona, luko, nameri ma isi manufeʻai. Atonu sa mafaufau se tamā o le aiga: ʻE faapefea ona ou puipuia laʻu avā ma laʻu fanau? Ae faapefea laʻu lafu mamoe ma le lafu povi?’ O mafaufauga faapena o se mea e masani ai. Ae seʻi mafaufau i le faamāfanafanaina o i latou o le a toe foʻi, i le folafolaga a le Atua o loo i le Isaia 11:6-9. (Faitau.) O na upu faafatusolo na faamautinoa atu ai e Ieova, o le a saogalemu tagata ma a latou lafumanu. O le uiga o le aai o leona i vao mamago, e faasino atu i le saogalemu o lafumanu a tagata Iutaia. E lē fefefe foʻi tagata faamaoni i manufeʻai. Sa folafola atu foʻi e Ieova i ona tagata o le a latou saogalemu i le laueleele o Iuta, e tusa lava po o le togāvao po o le vaomatua e latou te iai.Eseki. 34:25.

5. O ā valoaga na fesoasoani i ē na faaaunuua sa toe foʻi, e mautinoa ai o le a saunia e Ieova le tele o mea e latou te manaʻomia?

5 Fau ma soloi. Atonu o nisi sa taumānatu: ʻPo o le a mafai ona fafaga loʻu aiga? Ae o fea o le a matou nonofo ai? Po o le a iai foʻi ni galuega, ma pe e sili atu nai lo o le faapologaina i galuega mamafa a o faaaunuua ai i pulega a o tatou fili?’ Na taliina e Ieova na fesili e ala i valoaga na valoia e Isaia. Na folafola mai e Ieova o le a maua e ona tagata faamaoni le timu. O le iʻuga, “o meaʻai o fua ia o le eleele, e lololo ma gaʻoa,” o lona uiga e fau ma soloi meaʻai. (Isa. 30:23) Na folafola mai foʻi e Ieova e faatatau i fale ma galuega a ona tagata e faapea: “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi.” (Isa. 65:21, 22) Sa tele vala mananaia o o latou olaga, pe a faatusatusa i le taimi sa faaaunuua ai i Papelonia. Ae faapefea le faafitauli e sili ona ogaoga lea na māfua ai ona faaaunuua i latou?

6. O le ā le ituaiga o maʻi ua leva ona aafia ai tagata o le Atua, ae o le ā na faamautinoa atu e le Atua iā i latou na faaaunuua?

6 Mālōlōina faaleagaga. A o leʻi faaaunuua tagata o le Atua, ua leva ona latou mamaʻi faaleagaga. Na fetalai Ieova e faatatau i ona tagata e ala mai i le perofeta o Isaia: “Ua tigā le ulu atoa ma ua vaivai foʻi le lotoatoa.” (Isa. 1:5) Sa latou aafia i le tauaso ma le logonoa faaleagaga, ona o lo latou lē faalogo i faatonuga a Ieova, ma lē vaai i le malamalama  faaleagaga na ia saunia mai. (Isa. 6:10; Iere. 5:21; Eseki. 12:2) Afai e toe tupu na faafitauli i ē o le a toe foʻi mai, po o le a latou maua le saogalemu? Po o le a faigofie ona latou lē mauaina le finagalo malie o le Atua? Na faamautinoa atu e Ieova iā i latou: “O lea aso, o le a faalogo ai o ē e tutuli i upu o le tusi, o le a vāai foʻi mata o ē e tauaso mai i le mea pōuliuli ma le mea pogisa.” (Isa. 29:18) O le a faamālōlōina faaleagaga e Ieova ona tagata ua mamā ma salamō. Pe afai e latou te gauaʻi ma usiusitaʻi, o le a ia avatuina iā i latou taʻiala ma le malamalama e faasaoina ai i latou.

7. (a) Na faapefea ona faataunuuina folafolaga a Ieova e faatatau i ona tagata na faaaunuua? (e) Aiseā e faamalosia ai lo tatou faatuatua ona o le faataunuuga o na vala?

7 Pe na tausia e Ieova ana folafolaga? E maua le tali i mea moni na tutupu. Na toe foʻi tagata Iutaia i lo latou laueleele ma na faamanuiaina i latou i le saogalemu, fau ma soloi o meataumafa, faapea le mālōlōina faaleagaga. O se faaaʻoaʻoga, na puipuia e Ieova i latou mai i o latou nuu tuaoi e sili atu ona malolosi ma toʻatele nai lo o i latou. E leʻi osofaʻia e manufeʻai a latou lafumanu. E ui na vaaia e tagata Iutaia se faataunuuga itiiti o valoaga e faatatau i se parataiso na valoia e Isaia, Ieremia ma Esekielu, peitaʻi, o mea na sa manaʻomia e tagata o le Atua i lenā taimi. O le mafaufau i mea na faia e Ieova mo ona tagata i tuā i inā, e mafai ona faamalosia ai lo tatou faatuatua. Peitaʻi, afai sa matagofie le faataunuuga itiiti o lenā valoaga, o le a faapeʻī la lona faataunuuga tele? Seʻi o tatou iloiloina mea ua faia e Ieova mo i tatou i aso nei.

Ua Amata Ona Faataunuu e Ieova Ana Folafolaga i o Tatou Aso

8. O le ā le ituaiga o “laueleele” ua olioli ai tagata o le Atua i aso nei?

8 E lē o faia aʻe tagata o Ieova i aso nei i se nuu patino, pe nonofo foʻi i se atunuu se tasi. Peitaʻi, o loo faia aʻe lenei nuu faaleagaga i Kerisiano faauuina, le “Isaraelu a le Atua.” (Kala. 6:16) Ua aufaatasi atu foʻi a latou aumea o “isi mamoe” i lenei “laueleele” faaleagaga, po o le parataiso faaleagaga o loo faia ai ma le autasi la latou tapuaʻiga iā Ieova. O la latou tapuaʻiga e aafia ai le auala e latou te ola ai. (Ioa. 10:16; Isa. 66:8) Ua tuuina mai e Ieova iā i tatou se “laueleele” faaleagaga. O lea, ua iai se faataunuuga faaleagaga o folafolaga a le Atua, e faatatau i se parataiso matagofie e pei o Etena. Seʻi o tatou iloiloina nisi o faaaʻoaʻoga.

9, 10. (a) Ua faapefea ona faataunuu le Isaia 11:6-9 i o tatou aso? (e) O le ā se faamaoniga o le filemu o tagata o le Atua i aso nei?

9 Saogalemu. I le valoaga i le Isaia 11:6-9, o loo faamatala mai ai se vaaiga matagofie i le nonofo filemu o manufeʻai, tagata, ma lafumanu. E iai se faataunuuga faaleagaga o lenā vaaiga matagofie. I le fuaiupu e 9, o loo taʻua ai le māfuaaga e lē faia ai e manufeʻai se mea e lamatia ai pe faaleagaina ai se mea: “O le a tumu le lalolagi i le poto e uiga iā Ieova e pei ona ufitia o le ilititai i le suāsami.” Pe e suia  amioga a meaola ona o le “poto e uiga iā Ieova”? E leai, o loo faasino atu i le suia o tagata ona o lo latou iloa o le Atua o Lē e Silisili Ese, ma aʻoaʻoina le auala e faataʻitaʻi ai i ona ala filemu. O le māfuaaga lenā e tatou te vaai ai i le parataiso faaleagaga i aso nei, o se faataunuuga o lenā valoaga. I lalo o le pulega a le Malo, ua aʻoaʻoina ai e soo o Keriso le auala e tuuesea ai o latou uiga faamanu, ae nonofo ma le filemu ma le autasi ma o latou uso ma tuafāfine faaleagaga.

10 O se faaaʻoaʻoga, na tatou iloiloina i lenei lomiga lo tatou solitū faa-Kerisiano, ona o faavae faale-Tusi Paia o o tatou talitonuga, faapea le sauāina o tagata o le Atua, ona o lo latou faia faapea. I lenei lalolagi vevesi, pe e lē mataʻina ea le auala ua lē faia ai e lenei nuu toʻatele so latou sao i nei fetauaʻiga, e ui lava e lamatia ai o latou ola? O se faamaoniga mataʻina lenā o le mauaina e tagatānuu o le Malo faa-Mesia o le filemu, lea o loo faamatalaina e Isaia. Na faailoa mai foʻi e Iesu, o le a mātaulia ona soo i le faaalia o le alofa o le tasi i le isi. (Ioa. 13:34, 35) I totonu o faapotopotoga, o loo faapalepale pea Iesu ma faaaogā le “pologa faamaoni ma le faautauta,” e aʻoaʻoina Kerisiano uma i le filemu, alofa ma le agalelei.Mata. 24:45-47.

11, 12. O le ā le ituaiga o oge ua aafia ai le lalolagi i aso nei, ae o ā auala ua saunia ai e Ieova le tele o mea mo ona tagata?

 11 Fau ma soloi. Ua mafatia le lalolagi i se oge faaleagaga. Na lapataʻi mai le Tusi Paia: “ʻFaauta foʻi! O le a oo mai aso,’ ua fetalai mai ai le Alii Pule Silisili Ese o Ieova, ʻou te auina atu ai le oge i le laueleele, o le oge e lē i meaʻai, ma le galala e lē i le vai, a o le fia faalogologo i afioga a Ieova.’” (Amo. 8:11) Po o mafatia tagata o le Atua i se oge faaleagaga? Na valoia mai e Ieova le eseesega o ona tagata ma ona fili: “E aai aʻu auauna, a o outou e tou te fia aai. E feinu aʻu auauna, a o outou e tou te fia feinu. E fiafia aʻu auauna, a o outou e tou te māsiasi.” (Isa. 65:13) Po ua e mātauina le faataunuuga o na upu?

12 Ua tatou maua le fau ma soloi o meaʻai faaleagaga. E ui i le galala faaleagaga o lenei lalolagi, ae ua tatou maua le anoanoaʻi o meaʻai faaleagaga, e ala mai i lomiga faale-Tusi Paia, lipine ua puʻeina ma vitiō, sauniga ma tauaofiaga, ma mataupu o loo i luga o la tatou tuatusi. (Eseki. 47:1-12; Ioe. 3:18) Pe e te lē fiafia ea i le vaaia o le faataunuuga o na valoaga a le Atua i aso taʻitasi o lou olaga? Po ua faamautinoa o loo fafagaina oe e lē aunoa i le laoai a Ieova?

E fesoasoani le faapotopotoga e fafagaina faaleagaga i tatou, ma maua ai le saogalemu ma le mālōlōina

13. Ua faapefea ona e vaaia le faataunuuga o le folafolaga a Ieova e faatatau i le pupula o mata ma le lelei o le faalogo faaleagaga a tagata?

13 Mālōlōina faaleagaga. Ua taatele le tauaso ma le logonoa faaleagaga i aso nei. (2 Kori. 4:4) Peitaʻi, ua faamālōlōina faaleagaga e Keriso ona soo. Po ua e mātauina nisi ua pupula o latou mata ma lelei la latou faalogo faaleagaga? Ua malamalama le toʻatele i le poto saʻo o le Afioga a le Atua, ma tuuesea aʻoaʻoga pepelo a lotu, lea na māfua ai ona latou lē malamalama i le upu moni. Pe a tupu lenā mea, ona taunuu ai lea o le folafolaga lenei: “O lea aso, o le a faalogo ai o ē e tutuli i upu o le tusi, o le a vāai foʻi mata o ē e tauaso mai i le mea pōuliuli ma le mea pogisa.” (Isa. 29:18) I le lalolagi aoao, e faitau afe ua faamālōlōina faaleagaga i tausaga taʻitasi. O le tuua e nei tagata o Papelonia le Aai Tele ma aufaatasi mai e tatou te tapuaʻi i le parataiso faaleagaga, o se faamaoniga manino lenā o le faataunuuina o folafolaga a le Atua.

14. O le ā e tatau ona tatou manatunatu i ai, ina ia faamalosia ai lo tatou faatuatua?

14 O loo iai i mataupu taʻitasi o lenei tusi, faamaoniga o le taʻitaʻia e Keriso o ona soo i le parataiso faaleagaga, i lenei taimi o le iʻuga. Ia tatou manatunatu loloto pea i auala eseese ua faamanuiaina ai i tatou i lenei parataiso faaleagaga. O le faia faapea, o le a faamalosia ai lo tatou faatuatua i folafolaga a le Atua i le lumanaʻi.

“Ia Oo Mai Lou Malo”

15. Aiseā e tatou te mautinoa ai o le a avea le lalolagi ma parataiso?

15 O le finagalo o Ieova ia avea le lalolagi atoa ma parataiso. Na ia tuuina Atamu ma Eva i le faatoʻaga, ma faatonuina i laʻua e faatumulia le lalolagi i a la fanau, ma tausia  meafaiola uma. (Kene. 1:28) Peitaʻi, na mulimuli Atamu ma Eva i le fouvalega a Satani, ma aafia ai a la fanau i le tulaga lē lelei atoatoa, agasala ma le oti. E ui i lea, e leʻi suia ai le finagalo o le Atua, auā e taunuu uma ana fetalaiga. (Faitau le Isaia 55:10, 11.) E tatou te mautinoa o le a faatumulia le lalolagi i fanau a Atamu ma Eva, ma o le a latou galueaʻiina le lalolagi, ma tausia foʻi ma le alofa foafoaga a Ieova i se lalolagi parataiso. I lenā taimi, o le a iai se faataunuuga tele o valoaga na avatu i tagata Iutaia na faaaunuua, e faatatau i se nofoaga e pei o se parataiso. Seʻi o tatou iloiloina nisi o faaaʻoaʻoga.

16. Ua faapefea ona faamatala mai i le Tusi Paia le saogalemu o le a tatou maua i le Parataiso?

16 Saogalemu. E faamāfanafanaloto le vaaia moni o le faataunuuga tele o vaaiga matagofie o loo taʻua i le Isaia 11:6-9. O le a maua e tane, fafine ma tamaiti le saogalemu i so o se vaipanoa e latou te iai i le lalolagi. O le a leai ni meaola po o ni tagata o le a avea ma faamataʻuga i isi. Seʻi faaāta le taimi o le a avea ai lenei lalolagi atoa ma ou aiga, o le a e taʻele i vaitafe, vaituloto ma le sami. O le a e faimalaga i atumauga, ma fealuaʻi ma le saogalemu i laufanua lafulemu. O le a e lē popole foʻi pe a oo i le pō. O le a faataunuuina le Esekielu 34:25, e faatatau i le mafai e tagata o le Atua ona “nonofo i le toafa ma le saogalemu ma momoe i le vaomatua.”

17. Aiseā e tatou te mautinoa ai o le a saunia e Ieova le tele o mea e tatou te manaʻomia, pe a pule le Malo i le lalolagi atoa?

17 Fau ma soloi. Seʻi faaāta le taimi o le a lē toe iai le mativa, mamaʻi ona o le lē lava o meataumafa, oge, ma isi lava faafitauli. O le ʻoa faaleagaga o loo olioli ai tagata o le Atua i aso nei, ua faamautinoa mai ai o le a faamalieina e le Tupu faa-Mesia ona tagatānuu i so o se vala. I le taimi na iai Iesu i le lalolagi, na ia fafagaina i nai falaoa ma iʻa, le faitau afe o tagata sa fia aai. O se faaataga lenā o le auala o le a ia faataunuu ai na folafolaga i le lumanaʻi. (Mata. 14:17, 18; 15:34-36; Mare. 8:19, 20) Pe a pule le Malo o le Atua i le lalolagi atoa, ona faataunuuina lea o se tasi lenei o valoaga: “O le a ia foaʻi mai lava le timu i au fatu e lūlūina i le eleele, ma o meaʻai o fua ia o le eleele, e lololo ma gaʻoa. E aai lau lafu i le fanua lafulemu.”Isa. 30:23.

18, 19. (a) O le ā le uiga iā te oe o le valoaga i le Isaia 65:20-22? (e) O le ā le itu o le a avea ai o tatou aso e pei “o aso o le laau”?

18 Ua faigatā ona maua e tagata i aso nei ni nofoaga lelei e nonofo ai, pe faia foʻi ni galuega e faamalieina ai. I lenei lalolagi piʻopiʻo, e galulue mamafa le toʻatele, ae itiiti faamanuiaga e latou te maua. Peitaʻi, o loo maua e tagata mauʻoa ma matapeʻapeʻa faamanuiaga uma. Seʻi faaāta le taimi o le a faataunuuina ai le valoaga lenei i le lalolagi atoa: “O le a latou fausia fale ma nonofo ai; e latou te totō foʻi togāvine ma latou aai i ona fua. O le a latou lē fausia ae e nonofo ai isi; o le a latou lē totō ae e aai ai isi. Auā e pei o  le umi o aso o le laau o aso o loʻu nuu; ma o le a matuā fiafia uma oʻu tagata ua filifilia i galuega a o latou lima.”Isa. 65:20-22.

19 O le ā le uiga o le avea o o tatou aso “e pei o le umi o aso o le laau”? Pe a e tūtū i lalo o se laau telē, atonu e te maofa i le umi ona ola o lea laau, ma atonu sa iai lava a o leʻi soifua mai ou tuaa. Pe afai e tumau ona tatou iai i le tulaga lē lelei atoatoa, e sili atu ona umi le ola o lenā laau nai lo o i tatou. Ae e maʻeu le agalelei o Ieova ona ua ia faamautinoa mai, o le a faapena le umi e tatou te feola ai pe a oo mai le Parataiso. (Sala. 37:11, 29) O le a oo mai le taimi o le a tatou ola ai e faavavau, ma vaai ai i laau e pei o le mutia, e fuga mai ma toe mamae atu.

20. O le a faapefea ona maua e tagatānuu faamaoni o le Malo le soifua mālōlōina lelei atoatoa?

20 Mālōlōina lelei atoatoa. I aso nei, ua aafia tagata uma i le agasala ma le oti. E peiseaʻī ua mamaʻi tagata uma i le agasala, ma e na o le taulaga togiola a Iesu e mafai ona faamālōlōina ai. (Roma 3:23; 6:23) A o faagasolo le Pulega i le Afe Tausaga, o le a faaaogā atoatoa e Iesu ma ana pule lagolago aogā o lana taulaga togiola, e faasolosolo ona aveesea ai le agasala mai i le fanau a tagata. O le a faataunuuina ai le valoaga a Isaia: “E lē fai mai foʻi se tasi ua nofo ai: ʻOu te maʻi.’ O le a faamagaloina agasala a i latou o ē o loo nonofo i le laueleele.” (Isa. 33:24) Seʻi faaāta le taimi o le a lē toe iai se tauaso, gūgū po o se pipili. (Faitau le Isaia 35:5, 6.) E mafai e Iesu ona faamālōlōina tagata i le itu faaletino, mafaufau, ma faaleleia foʻi le itu tau faalogona. O le a maua e tagatānuu faamaoni o le Malo le soifua mālōlōina lelei atoatoa.

21. O le ā o le a tupu i le oti, ma aiseā e faamāfanafanaina ai oe i lenā folafolaga?

21 Ae faapefea le iʻuga e lē maʻalofia o le agasala, po o le oti? O le “fili mulimuli” lenei e lē mafai e tagata ona faatoʻilaloina. (1 Kori. 15:26) Ae pe e faigatā ona faatoʻilaloina e le Atua lenei fili? Na valoia mai e Isaia: “O le a faaumatia e ia le oti e faavavau, o le a soloiesea foʻi e le Alii Pule Silisili Ese o Ieova loimata mai i mata uma.” (Isa. 25:8) Pe e mafai ona e faaāta lenā taimi? O le a lē toe faia ni maliu, lē toe iai ni fanuatanu, faapea loimata ona o le faanoanoa. Peitaʻi, o le a maligi o tatou loimata ona o le olioli, a o faataunuuina e Ieova lana folafolaga i le toe faatutūina mai o ē ua feoti. (Faitau le Isaia 26:19.) O le a faamālōlōina tigā uma na faapogaia e le oti.

22. O le ā e tupu pe a māeʻa ona faataunuuina e le Malo faa-Mesia le finagalo o le Atua i le lalolagi?

22 E oo ane i le iʻuga o le Afe Tausaga, ua māeʻa ona faataunuu e le Malo le finagalo o le Atua i le lalolagi, ma ua toe tuu atu e Iesu le pulega i lona Tamā. (1 Kori. 15:25-28) Ua lelei atoatoa tagata, ma ua sauni mo le tofotofoga mulimuli pe a toe tatala mai Satani mai i le tō. Pe a māeʻa lenā,  ona tuʻimomomoina lea e Keriso o le gata tuai, ma i latou e lagolagoina o ia. (Kene. 3:15; Faaa. 20:3, 7-10) Peitaʻi, o le a maua e i latou e alolofa faamaoni iā Ieova se lumanaʻi matagofie. E leai ni upu e sili atu ona lelei e faamatala ai na vaaiga matagofie, nai lo o faamatalaga o loo taʻua i le Tusi Paia. Na folafola mai o le a maua e tagata faamaoni le “saʻolotoga mamalu o le fanau a le Atua.”Roma 8:21.

O le a faataunuuina uma e le Malo folafolaga a Ieova e faatatau i le fanau a tagata ma le lalolagi

23, 24. (a) Aiseā e tatou te mautinoa ai o le a faataunuuina folafolaga a le Atua? (e) O le ā ua e maumauaʻi e fai?

23 E lē faavaeina na folafolaga i ni miti po o ni moomooga faivavale. E mautinoa o le a faataunuuina folafolaga a Ieova. Aiseā? Ia manatua upu a Iesu na talanoaina i le uluaʻi mataupu o lenei tusi. Na ia aʻoaʻo ona soo e tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:9, 10) E moni le Malo o le Atua, ma o loo pule foʻi i le lagi i le taimi lenei. Ua atoa nei le 100 tausaga o faataunuuina e le Malo folafolaga a le Atua, i auala ua tatou vaaitino ai i totonu o le faapotopotoga. O lea, ua tatou mautinoa ai, o le a faataunuuina uma folafolaga a le Atua, pe a oo mai le Malo ma faaali lona mana uma i le lalolagi.

24 E tatou te iloa o le a oo mai le Malo. E tatou te iloa foʻi o le a faataunuuina folafolaga uma a le Atua. Aiseā? Talu ai UA PULE LE MALO O LE ATUA. Ia tatou fesili ifo: ʻPo o pule le Malo o le Atua iā te aʻu?’ Seʻi tau ina avea i tatou ma tagatānuu faamaoni o le Malo i le taimi lenei, ona mafai ai lea ona tatou maua aogā mai i lenā pulega lelei atoatoa ma amiotonu e faavavau.