Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 17

Toleniina o Tagata Talaʻi o le Malo

Toleniina o Tagata Talaʻi o le Malo

MANATU AUTŪ O LE MATAUPU

Le auala ua sauniunia ai e aʻoga faatiokarate tagata talaʻi o le Malo e faataunuu o latou faaeaga

1-3. Na faapefea ona faalautele e Iesu le galuega talaʻi, ma o ā fesili ua lāgā ai?

NA TALAʻI Iesu mo le lua tausaga i Kalilaia atoa. (Faitau le Mataio 9:35-38.) Na ia asiasi i le tele o aai ma nuu, aʻoaʻo atu i sunako, ma talaʻi atu le tala lelei o le Malo. Sa lolofi atu tagata i so o se nofoaga sa ia talaʻi ai. Sa ia mātauina ai le ʻtelē o le galuega o le seleselega,’ ma ua matuā manaʻomia foʻi se ʻaufaigaluega.

2 Na faalautele e Iesu le galuega talaʻi, e ala i le auina atu o ona aposetolo e 12 “e talaʻi le malo o le Atua.” (Luka 9:1, 2) Atonu na taumānatu le ʻauaposetolo po o le ā le auala e faia ai le galuega talaʻi. Na avatu e Iesu iā i latou le toleniga, e pei ona ia maua mai i lona Tamā faalelagi.

3 O lea, ua lāgā ai fesili nei: O le ā le toleniga na maua e Iesu mai i lona Tamā? O le ā le toleniga na avatu e Iesu i ona aposetolo? Po o toleniina e le Tupu faa-Mesia ona soo i aso nei i le auala e faia ai la latou faiva? Afai o lea, o le ā le auala ua ia faia ai faapea?

“E Pei Ona Aʻoaʻo Mai e le Tamā iā te Aʻu, o Mea ia Ou te Tautala Atu Ai”

4. O fea ma o anafea na aʻoaʻoina ai e Ieova lona Alo?

4 Na faailoa manino mai e Iesu sa aʻoaʻoina o ia e lona Tamā. I le taimi o lana faiva na ia fetalai ai: “E pei ona aʻoaʻo mai e le Tamā iā te aʻu, o mea ia ou te tautala atu ai.” (Ioa. 8:28) O anafea ma o fea na aʻoaʻoina ai Iesu? Na amata ona aʻoaʻoina le Alo Ulumatua o le Atua, ina ua māeʻa ona foafoaina o ia. (Kolo. 1:15) Sa faatasi Iesu ma lona Tamā mo le tele o tausaga, ma sa ia faalogo ma aʻoaʻoina mea mai i le “Aʻoaʻo Sili.” (Isa. 30:20) O le iʻuga, na aʻoaʻoina e Iesu le tele o mea e faatatau i uiga, galuega faapea fuafuaga a lona Tamā.

5. O ā taʻiala na avatu e Ieova i lona Alo e faatatau i lana faiva na faia i le lalolagi?

5 Sa aʻoaʻoina e Ieova lona Alo e faatatau i lana faiva i le lalolagi i le taimi talafeagai. Seʻi o tatou iloiloina se valoaga na faamatala ai le faiā a le Aʻoaʻo Sili ma lona Alo Ulu matua. (Faitau le Isaia 50:4, 5.) Na taʻua i le valoaga e fafagu e Ieova lona Alo mai i “lea taeao ma lea taeao.” E faailoa mai i lenā vala le gaoioiga e faia e se faiaʻoga, o le fafagu lea i luga o le tamaitiiti i le taeao ina ia aʻoaʻoina o ia. Na taʻua e se tasi o lomifefiloi o le Tusi Paia: ʻE peiseaʻī na ave e Ieova o ia [Iesu] i le aʻoga, ma aʻoaʻo o ia i le auala e faia ai le talaʻiga.’ I lenā aʻoga faalelagi, na aʻoaʻo ai e Ieova lona Alo “e tusa ma le mea e taʻu atu ma tautala atu ai.” (Ioa. 12:49) Na avatu foʻi e Ieova i lona alo taʻiala i le auala e aʻoaʻo ai. * A o iai Iesu i le lalolagi, sa ia faaaogā lelei le toleniga sa ia maua e faatatau i le auala e faia ai lana faiva. E lē gata i lea, sa ia aʻoaʻoina foʻi ona soo i le auala e faia ai la latou faiva.

6, 7. (a) O le ā le toleniga na avatu e Iesu i ona aposetolo? (e) O le ā le aogā na maua mai ai e le ʻauaposetolo? (i) O le ā le toleniga ua faamautinoa e Iesu ua maua e ona soo i aso nei?

6 O le ā le toleniga na avatu e Iesu i ona soo, e pei ona taʻua i le amataga? E pei ona taʻua i le Mataio mataupu e 10, sa avatu e Iesu iā i latou taʻiala mo le faiva, e aofia ai le nofoaga e talaʻi ai (fuaiupu e 5, 6), le feʻau e faailoa atu (fuaiupu e 7), le manaʻoga ina ia faatuatuaina Ieova (fuaiupu 9, 10), le auala e faafeiloaʻi ai tagata (fuaiupu e 11-13), le auala e taulima ai teteega (fuaiupu e 14, 15), ma le auala e tali atu ai pe a sauāina i latou (fuaiupu e 16-23). * O le toleniga na avatu e Iesu, na faaauupegaina ai ona aposetolo e taʻimua i le talaʻia o le tala lelei i le uluaʻi senituri T.A.

7 Ae faapefea aso nei? Ua aumaia e le Tupu o le Malo o le Atua i ona soo, le tiute tauave tāua o le talaʻia lea o le “tala lelei o le malo i le lalolagi atoa e fai ma molimau i atunuu uma.” (Mata. 24:14) Po ua toleniina e le Tupu i tatou i le auala e faia ai lenei galuega tāua? Talu mai le taimi na avea ai o ia ma Tupu i le lagi, na ia faamautinoa e maua e ona soo le toleniga i le auala e talaʻi ai, ma faataunuu ai lo latou tiute tauave tāua.

Toleni e Avea ma Ē Faievagelia

8, 9. (a) O le ā sa avea ma fuafuaga autū o le Aʻoga o le Faiva Faatiokarate? (e) Ua faapefea ona fesoasoani le sauniga amata o le vaiaso iā te oe e faaleleia ai lau faiva?

8 Ua loa ona faaaogā e le faalapotopotoga a Ieova fonotaga, tauaofiaga, faapea sauniga e pei o le Sauniga o le Auaunaga, e toleni ai tagata o le Atua mo le faiva. Peitaʻi, na amata mai i vaitausaga o le 1940, ona faatulaga e uso sa taʻimua i le ofisa ulu toleniga, e ala mai i aʻoga eseese.

9 Aʻoga o le Faiva Faatiokarate. E pei ona taʻua i le mataupu ua mavae, na amata lenei aʻoga i le 1943. Pe pau le fuafuaga o lenei aʻoga, o le toleni o tagata aʻoga ina ia faaleleia a latou lauga i sauniga? E leai. O le fuafuaga autū na  iai o lenei aʻoga, o le toleni o tagata o le Atua e faaaogā le meaalofa o le tautala, e viia ai Ieova i le faiva. (Sala. 150:6) Na faaauupegaina e lenei aʻoga uso ma tuafāfine e faaleleia o latou tomai o ni faifeʻau talaʻi o le Malo. I le taimi nei, ua mafai ona maua nei toleniga, e ala mai i le sauniga amata o le vaiaso.

10, 11. O ai ua mafai ona auai nei i le Aʻoga o Kiliata, ma o le ā le fuafuaga o lenā aʻoga?

10 Aʻoga Faale-Tusi Paia a le Olomatamata o Kiliata. Na amata lenei aʻoga i le Aso Gafua o Fepuari 1, i le 1943. O lenei aʻoga sa fuafua e toleni ai paeonia ma isi auauna faataimi atoa mo le auaunaga faamisionare, i so o se vaega o le lalolagi. Peitaʻi, talu mai Oketopa i le 2011, e pau i latou ua mafai ona auai i le aʻoga, o ē o loo i le auaunaga faapitoa faataimi atoa e pei o paeonia faapito, ovasia femalagaaʻi ma a latou avā, sui o aiga Peteli, ma misionare i le oganuu e leʻi auai i le aʻoga.

11 O le ā le fuafuaga o mataupu e iloiloina i lenei aʻoga? Na faapea mai se tasi o faiaʻoga ua leva o lenei aʻoga: “Ia faamalosia le faatuatua o le ʻauaʻoʻoga e ala i le suʻesuʻeina māeʻaeʻa o le Tusi Paia, ma atiaʻe uiga faaleagaga e manaʻomia ina ia faafetaiaʻia ai luʻi i o latou faaeaga. E lē gata i lea, o se tasi o fuafuaga autū o lenei toleniga, o le faamalosia lea o le faanaunauga o le ʻauaʻoʻoga e auai i le galuega faaevagelia.”—Efe. 4:11.

12, 13. O le ā le aafiaga o le Aʻoga o Kiliata i le galuega talaʻi i le lalolagi aoao? Aumai se faataʻitaʻiga.

12 O le ā le aafiaga o lenei aʻoga i le galuega talaʻi i le lalolagi aoao? Talu mai le 1943, e silia i le 8,500 i latou na toleniina i lenei aʻoga, * ma ua toleniina ai foʻi misionare o loo galulue i le silia i le 170 atunuu. Ua faaaogā lelei e misionare lenei toleniga, faataatia se faaaʻoaʻoga lelei o le maelega i le faiva, ma toleni foʻi isi ina ia faia faapea. O le tele o taimi, o loo galulue misionare i vaipanoa e lē toʻatele ai ni tagata talaʻi.

13 Seʻi mafaufau i le mea na tupu i Iapani, ina ua toetoe lava taofia le galuega talaʻi a o faagasolo le Taua Lona Lua a le Lalolagi. E oo ane iā Aokuso i le 1949, ua lē atoa se toʻasefulu o tagata talaʻi i Iapani. Peitaʻi, i le faaiʻuga o lenā tausaga, e toʻa 13 misionare ua galulue i Iapani, ae toʻatele isi misionare na auauna mulimuli ane ai. I le taimi muamua, sa uaʻi atu misionare e galulue i aai tetele, ona faasolo atu ai lea i isi aai. Na latou faalaeiauina a latou tagata suʻesuʻe e auai i le auaunaga paeonia. O lo latou maelega na maua ai iʻuga lelei. I le taimi lenei, ua silia i le 216,000 tagata talaʻi o le Malo i Iapani, ma o le silia i le 40 pasene o i latou o loo auauna o ni paeonia. *

14. O le ā ua faamaonia mai e nei aʻoga faatiokarate? (Tagaʻi foʻi i le pusa “ Aʻoga ua Toleniina ai Tagata Talaʻi o le Malo.”)

14 Isi aʻoga faatiokarate. Ua fesoasoani le Aʻoga mo le Auaunaga Paeonia, Aʻoga Faale-Tusi Paia mo Ulugalii Kerisiano,  ma le Aʻoga Faale-Tusi Paia mo Uso Nofofua, iā i latou e auai ai e atiaʻe lo latou itu faaleagaga, ma maelega ai i le galuega faaevagelia. * O nei aʻoga uma, ua matuā faamaonia ai o loo faaauupegaina e le Tupu ona soo e faataunuu la latou faiva.—2 Timo. 4:5.

Toleniina o Uso e Taulima Tiute Tauave Faapitoa

15. O le ā le itu ua taumafai ai tane o loo feagai ma tiute tauave e faataʻitaʻi ai iā Iesu?

15 E tusa ai ma le valoaga a Isaia, na faailoa mai e Iesu na aʻoaʻoina o ia e le Atua. I lenā “aʻoga” faalelagi, na aʻoaʻoina ai le Alo ina ia “iloa le tala e fai atu i lē ua vaivai.” (Isa. 50:4) Na faatatau e Iesu na aʻoaʻoga a o iai i le lalolagi, ma ia faafouina ai i latou na “tigāina ma mafatia i avega.” (Mata. 11:28-30) Ua faataʻitaʻi tane o loo taʻimua iā Iesu, i le mananaʻo e avea i latou ma puna o faalaeiauga mo uso ma tuafāfine. O lea, ua faavaeina ai le tele o aʻoga e fesoasoani i uso agavaa, e faaleleia le auala e auauna ai i o latou uso talitonu.

16, 17. O le ā le fuafuaga o le Aʻoga o le Faiva o le Malo? (Tagaʻi foʻi i le faaopoopoga.)

 16 Aʻoga o le Faiva o le Malo. O le vasega muamua o lenei aʻoga na amata iā Mati 9 i le 1959, i South Lansing i Niu Ioka. Na valaaulia ai ovasia femalagaaʻi ma auauna o faapotopotoga (ua taʻua nei o le sooupu o le ʻautoeaina), e auai i lenei toleniga mo le tasi le masina. Na faia mulimuli ane lenei aʻoga i isi gagana, ma na faasolosolo ona toleniina ai uso i le lalolagi aoao. *

Le uso o Lloyd Barry a o aʻoaʻo atu i le Aʻoga o le Faiva o le Malo i Iapani i le 1970

17 Na taʻua i le Yearbook o le 1962, le fuafuaga o le Aʻoga o le Faiva o le Malo: ʻI lenei lalolagi vevesi, e tatau i se ovasia i faapotopotoga a Molimau a Ieova ona pulea lelei lona olaga, ma uaʻi atu i le faapotopotoga atoa ona avea ai lea o ia ma faamanuiaga iā i latou. I le taimi e tasi, e lē tatau ona ia tuulafoaʻia lona aiga, ae ia faaaogā le mafaufau lelei. O se toleniga matagofie lea ua maua e auauna o faapotopotoga i le lalolagi aoao, e fesoasoani ai iā i latou e faatino taʻiala a le Tusi Paia i vala e tatau ona faataunuu e se ovasia.’—1 Timo. 3:1-7; Tito 1:5-9.

18. Ua faapefea ona maua e tagata uma o le Atua aogā mai i le Aʻoga o le Faiva o le Malo?

 18 Ua maua e tagata o le Atua aogā mai i Aʻoga o le Faiva o le Malo. I le ā le itu? Pe a faatatau e toeaina ma auauna o le faiva manatu e latou te aʻoaʻoina mai i le aʻoga, ona latou faataʻitaʻi ai lea iā Iesu i le avea ma puna o faalaeiauga mo uso ma tuafāfine. Pe e te talisapaia se faaupuga agalelei, le faalogologo lelei, ma se asiasiga faalaeiau mai i se toeaina, po o se auauna o le faiva manatu mamafa? (1 Tesa. 5:11) Ua avea na tane agavaa ma faamanuiaga i a latou faapotopotoga.

19. O ā isi aʻoga ua faatulaga e le Komiti Tauaʻoaʻoga a le Vaega Pule, ma o le ā le fuafuaga o na aʻoga?

19 Isi aʻoga faatiokarate. Ua vaavaaia e le Komiti Tauaʻoaʻoga a le Vaega Pule, isi aʻoga mo uso o loo feagai ma tiute tauave i le faalapotopotoga. O na aʻoga ua fuafua e fesoasoani ai i tane maufaatuatuaina e pei o toeaina, ovasia femalagaaʻi ma sui o Komiti o Lālā, e faaleleia le auala e faataunuu ai le tele o o latou tiute tauave. O mataupu faale-Tusi Paia e faia i nei aʻoga e faalaeiauina ai uso e faatumauina o latou tulaga faaleagaga, ma faatatau taʻiala faale-Tusi Paia i a latou feutagaʻiga ma mamoe tautele a Ieova o loo latou tausia.—1 Pete. 5:1-3.

Le vasega muamua o le Aʻoga mo Toleniga i le Faiva na faia i Malawi i le 2007

20. Aiseā na fetalai ai Iesu ua ʻaʻoaʻoina uma i tatou e Ieova,’ ma o le ā ua e maumauaʻi e fai?

20 Ua faamautinoa e le Tupu faa-Mesia ua maua e ona soo toleniga lelei. Na amata nei toleniga i le toleniina e Ieova o lona Alo, ona toleni ai lea e Iesu o ona soo. O lea, ua talafeagai ai le fetalaiga a Iesu ʻua aʻoaʻoina uma i tatou e Ieova.’ (Ioa. 6:45; Isa. 54:13) Seʻi o tatou faaaogā lelei toleniga ua tatou maua mai i lo tatou Tupu. Ia tatou manatua pea o le fuafuaga autū o nei toleniga, e fesoasoani e faatumau lo tatou malolosi faaleagaga, ina ia faataunuu atoatoa ai la tatou faiva.

^ pala. 5 E faapefea ona tatou iloa na toleniina e le Tamā lona Alo i le auala e aʻoaʻo ai? Seʻi mātau: O le faaaogāina e Iesu o le tele o talafaatusa e aʻoaʻo atu ai, na faataunuuina ai se valoaga na faia a o leʻi fanau mai. (Sala. 78:2; Mata. 13:34, 35) E iloa mai ai na finagalo Ieova e faaaogā e lona Alo le tele o talafaatusa e aʻoaʻo atu ai.—2 Timo. 3:16, 17.

^ pala. 6 I masina mulimuli ane, na tofia ai e Iesu le “isi toʻafitu sefulu, ma aauina atu i latou taʻitoʻalua” e talaʻi. Na ia toleniina foʻi i latou.—Luka 10:1-16.

^ pala. 12 O nisi e sili atu i le faatasi ona auai i le Aʻoga o Kiliata.

^ pala. 13 Mo nisi faamatalaga e faatatau i le sao o misionare na aʻoaʻoina i Kiliata i le galuega talaʻi i le lalolagi aoao, tagaʻi i le mataupu e 23 o le tusi Jehovah’s Witnesses—Proclaimers of God’s Kingdom.

^ pala. 14 Ua tuufaatasi le Aʻoga Faale-Tusi Paia mo Ulugalii Kerisiano ma le Aʻoga Faale-Tusi Paia mo Uso Nofofua, ma ua taʻua nei o le Aʻoga mo Tagata Talaʻi o le Malo.

^ pala. 16 Ua maua e toeaina aogā mai i le Aʻoga o le Faiva o le Malo. E eseese le uumi e faia ai nei aʻoga i nisi o tausaga. Talu mai le 1984, ua mafai foʻi ona maua e auauna o le faiva lenei toleniga.