Skip to content

Skip to secondary menu

Skip to table of contents

Molimau a Ieova

Faa-Samoa

Ua Pule le Malo o le Atua!

 MATAUPU 16

Faapotopoto mo le Tapuaʻiga

Faapotopoto mo le Tapuaʻiga

MANATU AUTŪ O LE MATAUPU

Le amataga ma le tāua o sauniga

1. O le ā le fesoasoani na maua e le ʻausoo ina ua latou faapotopoto faatasi, ma aiseā na latou manaʻomia ai lenā fesoasoani?

NA FAAPOTOPOTO le ʻausoo e faalaeiau le tasi i le isi, ina ua faatoʻā māeʻa le faatūina o Iesu. O le fefefe i o latou fili, sa latou lokaina ai faitotoʻa. Peitaʻi, sa mou atu lo latou fefefe ina ua faaali mai Iesu ma faapea mai: “Ia talia le agaga paia.” (Faitau le Ioane 20:19-22.) Mulimuli ane, na toe potopoto le ʻausoo ma na liligi ane ai e Ieova le agaga paia i o latou luga. Maʻeu le faamalosia ai o i latou e faia le galuega talaʻi!—Galu. 2:1-7.

2. (a) Ua faapefea ona aumaia e Ieova le malosi iā i tatou, ma aiseā e tatou te manaʻomia ai? (e) Aiseā e tāua ai le faatulagaga o le Tapuaʻiga a le Aiga? (Tagaʻi i le faaopoopoga ma le pusa “ Tapuaʻiga a le Aiga,” i le itulau e 175.)

2 E talitutusa faigatā na fesagaʻia e uso i le uluaʻi senituri ma i tatou i aso nei. (1 Pete. 5:9) E iai taimi e aafia ai nisi o i tatou i le fefefe i tagata. E tatou te manaʻomia le malosi mai iā Ieova, ina ia tumau ai i le talaʻiga. (Efe. 6:10) E tatou te maua le malosi mai iā Ieova e ala mai i sauniga. E tatou te auai i sauniga e lua i le vaiaso lea e aʻoaʻoina ai i tatou. O nei sauniga e taʻua o le Sauniga mo le Lautele faapea le Suʻesuʻega o le Olomatamata, ma le sauniga i le ogatotonu o le vaiaso e taʻua, La Tatou Faiva ma le Olaga Faa-Kerisiano. * Ua tatou olioli foʻi i sauniga e fā faaletausaga e pei o tauaofiaga itumalo, o fonotaga matagaluega e lua, faapea le Faamanatuga o le maliu o Keriso. Aiseā e tāua ai le auai i na sauniga uma? Na faapefea ona amata mai a tatou sauniga? O le ā se mea ua faailoa mai e faatatau iā i tatou, e tusa ai o la tatou vaaiga i sauniga?

Māfuaaga e Tatou te Auai ai i Sauniga

3, 4. O le ā e faatalitalia e Ieova mai i ona tagata? Aumai ni faataʻitaʻiga.

3 E finagalo Ieova e faapotopoto faatasi ona tagata e tapuaʻi atu iā te ia. O se faaaʻoaʻoga, i le 1513 T.L.M., na tuuina mai ai e Ieova le Tulafono i le nuu o Isaraelu. Na aofia ai i lenā Tulafono Sapati faalevaiaso, lea e mafai ai e aiga taʻitasi ona tapuaʻi atu iā te ia, ma aʻoaʻoina ai i latou i le Tulafono. (Teu. 5:12; 6:4-9) O le usitaʻia o lenā faatonuga, na faamalosia ai aiga ma faatumauina ai le mamā ma le malosi faaleagaga o le nuu atoa. Peitaʻi, e latou te leʻi mauaina le finagalo malie o Ieova, ona e latou te leʻi usitaʻia le  Tulafono e pei o le faapotopoto faatasi e lē aunoa mo le tapuaʻiga.—Levi. 10:11; 26:31-35; 2 No. 36:20, 21.

4 Seʻi mātau le faaaʻoaʻoga na faataatia e Iesu. Sa fai ma ana masani le alu i le sunako i le Sapati i vaiaso taʻitasi. (Luka 4:16) Ina ua mavae le maliu ma le toe faatūina aʻe o Iesu, na faaauau pea le masaniga a le ʻausoo o le faapotopoto faatasi e lē aunoa, e ui lava e latou te lē o toe ola i lalo o le tulafono o le Sapati. (Galu. 1:6, 12-14; 2:1-4; Roma 14:5; Kolo. 2:13, 14) E lē gata na maua e Kerisiano i na sauniga faatonuga ma faalaeiauga, ae na latou ofoina atu ai foʻi taulaga o viiga i le Atua e ala i tatalo, le faia o se sao faapea pesega.—Kolo. 3:16; Epe. 13:15.

Na faapotopoto faatasi soo o Iesu e faalaeiau ma faamalosia e le tasi le isi

5. Aiseā e tatou te auai ai i sauniga i vaiaso taʻitasi, faapea fonotaga ma tauaofiaga? (Tagaʻi foʻi i le pusa “ Faatasiga Faaletausaga e Autasia ai Tagata o le Atua.”)

5 I se tulaga talitutusa, o le auai i sauniga, tauaofiaga ma fonotaga, e faaalia ai lo tatou lagolagoina o le Malo o le Atua, e maua ai le malosi mai le agaga paia, ma faalaeiauina ai isi pe a faailoa atu lo tatou faatuatua. Ae e sili ai ona tāua, e tatou te maua ai le avanoa e tapuaʻi iā Ieova e ala i tatalo, pesega, faapea le faia o se sao i sauniga. E ui e eseese auala o loo faia ai sauniga i aso nei, mai i sauniga i taimi o Isaraelu ma Kerisiano i le uluaʻi senituri, ae o nei faatasiga e tutusa lava le tāua. Sa faapefea ona amata mai sauniga o loo faia i aso nei?

E Faalaeiauina e Sauniga le “Alofa ma Galuega Lelei”

6, 7. (a) O le ā le fuafuaga o sauniga? (e) O le ā le itu na eseese ai sauniga sa faia i vaipanoa eseese?

6 Ina ua amata ona suʻesuʻeina e le uso o C. T. Russell upu moni mai i le Afioga a le Atua, na ia iloa ai e tatau ona faapotopoto faatasi ma ē e tutusa o latou sini. I le 1879 na  tusi mai ai Russell: “Ua matou faamaopoopoina faatasi ma nisi i Pittsburgh se vasega e suʻesuʻeina le Tusi Paia i Aso Sa taʻitasi.” Sa faalaeiauina foʻi tagata faitau o le Watch Tower e faapotopoto faatasi, ma e oo ane i le 1881, ua faia sauniga i Pittsburgh i Pennsylvania i Aso Sa ma Aso Lulu taʻitasi. Na taʻua i le Watch Tower o Novema i le 1895, o le fuafuaga o nei sauniga e atiaʻe ai ʻfaiā faaleuso, le alofa faapea le fetufaaʻiga o manatu,’ ma maua ai le avanoa e fefaalaeiauaʻi ai.—Faitau le Eperu 10:24, 25.

7 Sa eseese uma auala na faia ai sauniga a Tagata Aʻoga o le Tusi Paia i vaipanoa eseese, mo le tele o tausaga. O se faaaʻoaʻoga, sa taʻua i se tusi mai i se vaega i le Iunaite Setete na lomiaina i le 1911: “E pe ā ma le faalima ona faia a matou sauniga i le vaiaso.” Sa faia i Aso Gafua, Aso Lulu, Aso Faraile ma e faalua ona faia i Aso Sa. Ae sa taʻua i se isi tusi mai se vaega i Aferika na lomiaina i le 1914: “E faia a matou sauniga mai i le Aso Faraile e oo i le Aso Sa, ma e faalua ona faia faapea i le masina.” A o faagasolo taimi, na amata ona manino mai le auala e faia ai sauniga e pei ona iai i aso nei. Seʻi o tatou talanoaina le auala sa faia ai nei sauniga taʻitasi.

8. O ā nisi o lauga faale-Tusi Paia sa faia i le lautele?

8 Sauniga mo le Lautele. Na amata ona lomia e le uso o  Russell le Watch Tower i le 1879. Ae i le tausaga na sosoo ai, na ia mulimuli ai i le faaaʻoaʻoga a Iesu o le femalagaaʻi e talaʻi mai i lea vaipanoa i lea vaipanoa. (Luka 4:43) A o ia faia faapea, na faataatia ai e le uso o Russell le auala e faia ai Sauniga mo le Lautele, lea ua iai i aso nei. I le taimi na faasilasila ai i le Watch Tower lenei malaga, na taʻua ai ʻo loo naunau le uso o Russell e faia ni lauga e faatatau i le Malo o le Atua.’ I le 1911, ina ua faavaeina faapotopotoga i nisi o atunuu, na faalaeiauina ai na faapotopotoga e auina atu a latou failauga agavaa i vaipanoa lata ane, e faasolo ai le faia o ni lauga se ono e faatatau i mataupu, e pei o le togiola ma le faamasinoga. I le faaiʻuga o lauga taʻitasi, e faailoa atu ai le suafa o le failauga faapea le matua o le lauga i le vaiaso e sosoo ai.

9. O ā suiga na faia i le Sauniga mo le Lautele a o faagasolo tausaga, ma e faapefea ona e lagolagoina lenei sauniga?

9 I le 1945, na faailoa mai ai i le Watchtower le faia o Sauniga mo le Lautele i le lalolagi aoao, e aofia ai ni lauga faale-Tusi Paia se valu e faatatau i “faafitauli o aso nei.” I le tele o tausaga, sa faaaogā ai e failauga mataupu e saunia mai e le pologa faamaoni, pe faia foʻi e le tagata lana ia lava lauga. Ae i le 1981, na faatonuina ai failauga uma ina ia faavae a latou lauga i auivi ua tuuina atu i faapotopotoga. * E oo ane i le 1990, o nisi lauga i le lautele na manaʻomia ai ona fai se sao o le aofia, pe faia foʻi ni faataʻitaʻiga. Ae i le tausaga  lava lenā, na lē toe faia ai ni sao o le aofia ma ni faataʻitaʻiga i le lauga i le lautele, ae e na o le lauga lava. Iā Ianuari i le 2008, na suia ai le uumi o lauga i le lautele mai i le 45 minute i le 30 minute. E ui i le tele o nei suiga, ae o loo faamalosia pea lo tatou faatuatua i le Tusi Paia mai i nei lauga lava saunia, ma aʻoaʻoina ai i tatou i vala eseese o le Malo o le Atua. (1 Timo. 4: 13, 16) Po o e naunau e valaaulia au toe asiga faapea i latou e lē talitonu, e faalogologo i nei lauga faale-Tusi Paia?

10-12. (a) O ā suiga sa faia i le Suʻesuʻega o le Olomatamata? (e) O ā fesili e tatau ona tatou fesili ifo ai?

10 Suʻesuʻega o le Olomatamata. I le 1922, na auina atu ai e le Watch Tower Society uso asiasi e faia lauga i faapotopotoga, ma taʻimua i le talaʻiga. Na fautuaina le faia e lē aunoa o le suʻesuʻega o le Olomatamata. Sa taliaina le fautuaga ma amata ai loa ona faia suʻesuʻega o le Olomatamata i le ogatotonu o le vaiaso, po o le Aso Sa.

Suʻesuʻega o le Olo Matamata i Ghana, i le 1931

11 I le Watchtower o Iuni 15 i le 1932, na aumaia ai nisi taʻiala i le auala e faia ai lenei vaega o le sauniga. Sa faataʻitaʻi le auala na faia ai lenei sauniga i le auala na faia ai le suʻesuʻega i le Aiga Peteli. Na taʻua ai foʻi i le lomiga, e tatau ona taʻimua se uso i lenei vaega o le sauniga. E toʻatolu uso e nonofo i le pito i luma o le sauniga, ona auauaʻi lea e faitau palakalafa. E leai ni fesili o mataupu o le suʻesuʻega i lenā taimi. O lea, e fesili lē sa taʻimua i le aofia e fai mai ni fesili e faatatau i le mataupu o loo iloiloina. Pe a māeʻa lenā, ona tuu lea i le aofia e taliina na fesili. Ae pe a manaʻomia se isi faamalamalamaga atili, ona saunia lea e lē sa taʻimua se faamalamalamaga “puupuu ma manino.”

12 Sa faataga faapotopotoga taʻitasi e filifili so o se  lomiga o le Watchtower e mananaʻo e suʻesuʻe. Peitaʻi, i le Watchtower o Aperila 15 i le 1933, na fautuaina ai faapotopotoga uma e faaaogā lomiga fou ua maua. I le 1937, na aumaia ai le taʻiala e tatau ona faia le suʻesuʻega i Aso Sa. O le Watchtower o Oketopa 1 i le 1942, na toe aumaia ai isi fetuunaʻiga i le auala e faia ai lenei sauniga, e pei ona faia ai i aso nei. Muamua, na faailoa mai i le mekasini, o le a iai fesili i itulau taʻitasi o suʻesuʻega, ma e tatau ona faaaogāina na fesili. Na taʻua ai foʻi e tatau ona tasi le itula le umi o le suʻesuʻega, ma faalaeiauina ai uso e lē tatau ona toe faitauina se vaega o le palakalafa, pe a faia a latou tali. Peitaʻi, ia taumafai e tali “i a latou lava upu.” O loo faaauau pea ona avea le Suʻesuʻega o le Olomatamata, ma auala autū e saunia mai ai e le pologa faamaoni meaʻai faaleagaga i le taimi talafeagai. (Mata. 24:45) Ia fesili ifo: ʻPe ou te sauniuni mo le suʻesuʻega o le Olomatamata i vaiaso taʻitasi? Pe ou te taumafai e fai soʻu sao i le sauniga?’

13, 14. O le ā le amataga mai o le Suʻesuʻega Faale-Tusi Paia a le Faapotopotoga, ma o le ā se vala e te fiafia ai i lenā sauniga?

13 Suʻesuʻega Faale-Tusi Paia a le Faapotopotoga. E oo ane i le amataga o vaitausaga o le 1890, ua tele lomiga o le Millennial Dawn ua uma ona tatala. O lea, na fautuaina ai e le uso o H. N. Rahn lea sa nofo i le aai o Baltimore i Maryland i le Iunaite Setete, e faapotopoto faatasi se vaega e faia se suʻesuʻega faale-Tusi Paia e faaaogā ai lomiga o le Millennial Dawn. O lenā suʻesuʻega faale-Tusi Paia na taʻua o le “Dawn Circles.” I le taimi muamua, sa faia nei suʻesuʻega i fale o aiga e faataʻitaʻi ai. E oo ane iā Setema i le 1895, ua tele aai i le Iunaite Setete ua faia ai nei suʻesuʻega. I le Watch Tower o lenā masina, na fautuaina ai Tagata Aʻoga uma o le Tusi Paia e faia lenā suʻesuʻega. Na aumaia ai foʻi le taʻiala e tatau ona faia le suʻesuʻega e se tasi e lelei le faitau. A māeʻa ona ia faitauina fuaiupu taʻitasi, ona faatali lea mo ni sao a le aofia. Pe a māeʻa loa ona iloiloina fuaiupu taʻitasi o le palakalafa, ona ia faitauina lea o mau faasino. Ae i le faaiʻuga o le mataupu, e faia ai sao a tagata taʻitoʻatasi e toe autalu ai le mataupu atoa.

14 E tele taimi na suia ai le igoa o lenei sauniga. Sa iai le taimi na taʻua ai o le Berean Circles for Bible Study. O lenei igoa e faavae mai i le faaaʻoaʻoga a tagata Perea i le uluaʻi senituri, o le suʻesuʻeina māeʻaeʻa o Tusitusiga Paia. (Galu. 17:11) A o faagasolo taimi, na toe suia foʻi le taʻu i le Suʻesuʻega Tautusi a le Faapotopotoga. Peitaʻi, ua suia nei i le Suʻesuʻega Faale-Tusi Paia a le Faapotopotoga, lea ua auai faatasi ai le faapotopotoga atoa. A o faagasolo tausaga, e tele tusi, polosiua ma mataupu o Le Olomatamata sa iloiloina i nei suʻesuʻega. O loo faaauau pea ona faalaeiauina  i latou uma e auai ina ia faia ni o latou sao. O lenei sauniga, ua fesoasoani e faaloloto ai lo tatou poto i le Tusi Paia. Po o e sauniuni e lē aunoa i lenei vaega o le sauniga, ma faia taumafaiga ina ia faia sou sao?

15. O le ā le fuafuaga sa iai mo le Aʻoga o le Faiva Faatiokarate?

15 Aʻoga o le Faiva Faatiokarate. Na faapea mai Carey Barber, lea na auauna i le ofisa ulu i Brooklyn i Niu Ioka: “I le pō o le Aso Gafua o Fepuari 16 i le 1942, na valaaulia ai uso i le aiga Peteli i Brooklyn i le aʻoga lea ua taʻua nei, o le Aʻoga o le Faiva Faatiokarate.” Na avea mulimuli ane le uso o Carey ma sui o le Vaega Pule. Na ia faamatalaina le aʻoga, o “se tasi lea o vala sili o feutagaʻiga a Ieova ma ona tagata i aso nei.” Na matuā telē le aogā o lenei toleniga, i le faaleleia o le aʻoaʻo a uso ma o latou tomai i le talaʻiga. O lea, sa amata ai i le 1943 ona faaaogā i faapotopotoga i le lalolagi aoao le tusi Course in Theocratic Ministry. I le Watchtower  o Iuni 1 i le 1943, na taʻua ai o le fuafuaga o le Aʻoga o le Faiva Faatiokarate, e fesoasoani i tagata o le Atua e “toleni ai i latou ina ia faaleleia le auala e molimau atu ai e faatatau i le Malo.”—2 Timo. 2:15.

16, 17. Pe e na o tomai o le aʻoaʻo atu sa mafai ona aʻoaʻoina mai i le Aʻoga o le Faiva Faatiokarate? Faamatala.

16 I le taimi muamua, sa faigatā i nisi ona talanoa atu i luma o tagata. Sa faafalepuipui le tamā o le uso o Clayton Woodworth, Jr., faatasi ma le uso o Rutherford faapea ma isi i le 1918. Na faapea mai le uso o Clayton e faatatau i le taimi muamua na ia auai ai i le aʻoga i le 1943: ʻSa ou matuā popole lava, ma na atagia mai lea i oʻu foliga ma loʻu leo.’ A o faasolo ina faaleleia ona tomai, sa tele foʻi ona faaeaga e faia ai lauga. E lē gata sa aogā le aʻoga e faaleleia ai lana failauga, ae sa ia aʻoaʻoina ai foʻi le tāua o le lotomaulalo ma le faalagolago iā Ieova. Na ia faapea mai: “E lē o le failauga le mea autū. Ae o le vala e sili ona tāua, o lona  sauniuni lelei ma faalagolago iā Ieova. O le faia faapea, o le a uaʻi atu ai le aofia ma latou maua ai se mea aogā.”

17 O le 1959 na mafai ai ona auai tuafāfine i le aʻoga. E manatua e le tuafafine o Edna Bauer le taimi na ia faalogo ai i lenā faasilasilaga i se fonotaga. Na ia faapea mai: “Ou te manatua le fiafia tele o tuafāfine, ona ua tatala mai le avanoa.” A o faagasolo tausaga, e toʻatele uso ma tuafafine ua faaaogā le avanoa ia iai i le Aʻoga o le Faiva Faatiokarate ma ia aʻoaʻoina i latou e Ieova. I aso nei, e faaauau ona tatou maua toleniga faapea i la tatou sauniga amata o le vaiaso.—Faitau le Isaia 54:13.

18, 19. (a) E faapefea ona tatou maua taʻiala aogā i le taimi nei, mo le faataunuuina o la tatou faiva? (e) Aiseā e tatau ai ona tatou pepese i sauniga? (Tagaʻi i le pusa “ O le Peseina o Upu Moni.”)

18 Sauniga o le Auaunaga. Na amata mai i le 1919, ona faia lenei sauniga e faamaopoopo ai le galuega talaʻi. I lenā taimi, e lē auai le faapotopotoga atoa i lenei sauniga, ae e na o i latou e tufatufaina lomiga. Na amata mai i le 1923, ona faatasi ona faia i le masina le Sauniga o le Auaunaga, ma na mafai ona auai ai le faapotopotoga atoa. E oo ane i le 1928, ua faalaeiauina faapotopotoga e faia Sauniga o le Auaunaga i vaiaso taʻitasi. Ae i le 1935, na faalaeiauina ai e le Watchtower faapotopotoga uma e faavae mai le Sauniga o le Auaunaga i faamatalaga mai i le Director (lea na taʻua mulimuli o le Informant, ma na suia i le La Tatou Faiva o le Malo). Na avea lenei sauniga o se tasi o vala o sauniga a le faapotopotoga i vaiaso taʻitasi.

19 O loo tatou maua i aso nei taʻiala aogā i le auala e faataunuuina ai la tatou faiva i la tatou sauniga e faia i le ogatotonu o le vaiaso. (Mata. 10:5-13) Pe a e agavaa e maua sau kopi o le polokalame mo le sauniga, pe e te suʻesuʻeina ma faatatau fautuaga o loo iai pe a e auai i le faiva?

Le Sauniga e Sili Ona Tāua i le Tausaga

Talu mai le uluai senituri, ua faapotopoto ai Kerisiano i tausaga taʻitasi ina ia faamanatuina le maliu o Keriso (Tagaʻi i le palakalafa e 20)

20-22. (a) Aiseā e tatau ai ona faamanatuina le maliu o Iesu? (e) O le ā le aogā o le auai i le Faamanatuga i tausaga taʻitasi?

20 Sa faatonuina soo o Iesu e faamanatu lona maliu seʻia oo i le taimi e taunuu mai ai. E faamanatu i tausaga taʻitasi le maliu o Keriso, e pei o le tausamiga o le Paseka i aso anamua. (1 Kori. 11:23-26) O lenei sauniga e auai ai le faitau miliona i tausaga taʻitasi, ma e faamanatu ai pea i Kerisiano faauuina lo latou faaeaga e pule faatasi ma Keriso i le Malo. (Roma 8:17) O lenei foʻi vala e uunaʻia ai isi mamoe, e faaalia le faaaloalo loloto ma le faamaoni i le Tupu o le Malo o le Atua.—Ioa. 10:16.

21 Na iloa e le uso o Russell ma ana aumea le tāua o le faamanatuina o le maliu o le Alii, ma na latou iloa foʻi e tatau ona faatasi ona faia le Faamanatuga i le tausaga. Na taʻua i le Watch Tower o Aperila i le 1880: ʻNa avea ma masaniga a le toʻatele i Pittsburgh le faamanatuina o le Faamanatuga, ma sa taumafaina ai le areto ma le uaina, lea e faaāta ai le tino ma le toto o lo tatou Alii.’ Mulimuli ane,  sa faia faatasi tauaofiaga ma le Faamanatuga. I le 1889, o le taimi muamua lenā na faamauina ai i latou na auai i faatasiga, ma e 225 i latou na auai i lenā tauaofiaga, ae toʻalua sefulu lua na papatiso ai.

22 I aso nei, ua lē o toe avea le Faamanatuga ma vaega o tauaofiaga. Peitaʻi, ua tatou valaaulia i le taimi lenei so o se tasi i o tatou vaipanoa, e tatou te faamanatuina faatasi le Faamanatuga i le Maota mo Sauniga po o se isi vaipanoa. I le 2013, e silia i le 19 miliona i latou na faamanatuina le maliu o Keriso. O se faaeaga iā i tatou le auai i le Faamanatuga, ma valaaulia isi e tatou te auai faatasi i lenā pō tāua. Pe e te naunau e valaaulia le toʻatele e auai i le Faamanatuga i tausaga taʻitasi?

O Tatou Uiga Faaalia

23. O le ā lau vaaiga e faatatau i le faapotopoto faatasi i sauniga?

23 E lē vaai auauna a Ieova i le auai i sauniga o se avega mamafa. (Epe. 10:24, 25; 1 Ioa. 5:3) O se faaaʻoaʻoga, sa naunau le tupu o Tavita e alu i le fale o Ieova e tapuaʻi ai. Sa ia fiafia foʻi e alu i le fale o Ieova e faatasitasi ai ma isi tagata e alolofa foʻi iā Ieova. (Sala. 27:4; 35:18) E faapena foʻi Iesu. Talu mai lava le taimi sa laʻitiiti ai o ia, sa ia naunau e alu e tapuaʻi i le fale o lona Tamā.—Luka 2:41-49.

O le malosi o lo tatou faanaunauga e auai i sauniga, e faamaonia ai le moni o le Malo o le Atua iā i tatou

24. O ā avanoa e tatou te maua pe a auai i sauniga?

24 O le auai i sauniga, e faaalia ai lo tatou alolofa iā Ieova ma lo tatou faanaunauga e faalaeiau o tatou uso talitonu. E faaalia foʻi lo tatou naunau e aʻoaʻoina i tatou e avea ma tagatānuu o le Malo e ala i le auai i sauniga, fonotaga ma tauaofiaga, lea e tatou te maua ai toleniga. O sauniga foʻi e tatou te maua ai le tomai ma le malosi, e tumau ai i le galuega e sili ona tāua o loo faia e tagata o le Atua i aso nei, o le faia ma le toleniina lea o soo o le Tupu o Iesu Keriso. (Faitau le Mataio 28:19, 20.) O le malosi o lo tatou faanaunauga e auai i sauniga, e faamaonia ai le moni o le Malo o le Atua iā i tatou. O lea, seʻi faaauau pea ona tatou faatāuaina sauniga.

^ pala. 2 E ese mai i sauniga a le faapotopotoga i vaiaso taʻitasi, ua faalaeiauina foʻi aiga ma tagata taʻitoʻatasi e faatulaga se taimi e faia ai suʻesuʻega a le tagata lava ia, po o le tapuaʻiga a le aiga.

^ pala. 9 E oo mai le 2013, ua maua auivi o lauga lautele e silia ma le 180.