Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

Le Tusi Mai le Vaega Pule

Le Tusi Mai le Vaega Pule

Uso Pele e:

I le avea ai ma tagata tapuaʻi o Ieova, e tatou te naunau i lana Afioga le Tusi Paia. E matou te talitonu o loo iai talafaasolopito e saʻo aʻiaʻi, taʻitaʻiga maufaatuatuaina mo le olaga, faamaoniga faamāfanafanaloto o le alofa o Ieova mo tagata. (Salamo 119:105; Luka 1:3; 1 Ioane 4:19) E matou te matuā naunau e fesoasoani i isi ina ia aʻoaʻoina upu moni tautele o loo iai i le Afioga a le Atua. O lea, ua matou fiafia ai e faailoa atu lenei tusi, “Lesona E te Aʻoaʻoina Mai i le Tusi Paia.” Seʻi o matou faamatala puupuu atu lenei tusi.

O le tele o faamatalaga o loo i lenei tusi ua saunia mo tamaiti. Peitaʻi, e mafai foʻi ona faaaogā e fesoasoani ai i tagata matutua o ē e naunau e aʻoaʻo atili nisi mea e faatatau i le Tusi Paia. Talu ai o le Tusi Paia o se tusi mo tagata uma, e mautinoa o le a aogā iā i tatou uma le iloiloina o nei lesona, lea e fesoasoani ina ia tatou maua ai le fiafia moni.

O loo faamatalaina i lenei tusi tala mai i le Tusi Paia e faatatau i tagata, mai lava i le taimi na foafoaina ai ma faasolo mai ai. Na faia taumafaiga uma ina ia faamatalaina nei tala o le Tusi Paia i se auala manino ma faigofie, ma taumafai i le tele e mafai ai e faamatala nei tala e tusa ai ma le faasologa o mea na tutupu.

Peitaʻi, o lenei tusi e lē na o le tau ina faamatala o tala o le Tusi Paia. Ua tusia faamatalaga ma ata i se auala e pei o loo tutupu moni mea o loo i tala o le Tusi Paia, ma iloa tonu ai faalogona o i latou o loo faamatalaina i na tala.

Ua fesoasoani lenei tusi iā i tatou e iloa ai o le Tusi Paia o se tusi e faatatau i tagata, o ē na usiusitaʻi iā Ieova ma i latou e leʻi usiusitaʻi iā te ia. E uunaʻia ai foʻi i tatou ina ia aʻoaʻoina ni lesona mai i a latou faaaʻoaʻoga. (Roma 15:4; 1 Korinito 10:6) Ua vaevaeina lenei tusi i vaega  e 14. I le amataga o vaega taʻitasi, o loo iai se autaluga o nisi o lesona e mafai ona tatou aʻoaʻoina.

Pe afai o oe o se matua, atonu e mafai ona e faitau faatasi ma lau tama se lesona ma talanoa e faatatau i ata o loo iai. Ona oulua faitau faatasi lea i mau o le Tusi Paia o loo faavae mai ai lenā lesona. Fesoasoani i lau tama ina ia iloa pe faapefea ona fesootaʻi le mau o loo ia faitau i ai i le Tusi Paia, ma le lesona o loo i le tusi. E ono aogā foʻi lenā auala pe a fesoasoani i se tagata matua, ina ia maua se aotelega o le feʻau o le Tusi Paia.

E matou te faamoemoe o le a fesoasoani lenei tusi i tagata lotofaamaoni uma, o ē lāiti ma ē matutua, e aʻoaʻoina ni lesona mai i le Afioga a le Atua ma faatatau i o latou olaga. O le iʻuga, o le a mafai foʻi ona latou tapuaʻi iā te ia o ni sui o lona aiga pele.

O outou uso,

Vaega Pule o Molimau a Ieova