Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 56

Sa Naunau Iosia i le Tulafono a le Atua

Sa Naunau Iosia i le Tulafono a le Atua

E valu tausaga o Iosia ina ua fai o ia ma tupu o Iuta. I na taimi, sa faia ai e tagata faiga faataulāitu ma tapuaʻi i tupua. I le 16 o tausaga o Iosia, na ia taumafai ai e aʻoaʻoina le auala e tatau ona tapuaʻi ai iā Ieova. Ina ua 20 ona tausaga, na amata ai ona ia talepeina i lalo tupua ma fata faitaulaga i le nuu atoa. Ina ua 26 ona tausaga, na ia faia ai loa tapenapenaga ina ia toe faaleleia le malumalu o Ieova.

Na maua e le ositaulaga sili o Hilikia i le malumalu le tusi tāʻai o le Tulafono a Ieova, atonu o le tusi tāʻai lea na tusia e Mose. Na ave e Safana le failautusi a le tupu lenā tusi tāʻai iā Iosia, ma amata ona faitauina leotele. A o faalogologo atu Iosia, na ia iloa ai ua tele tausaga o lē usiusitaʻi tagata iā Ieova. Na faapea atu le tupu o Iosia iā Hilikia: ʻUa matuā ita lava Ieova iā i tatou. Ia e alu ma talosaga atu iā te ia. O le a taʻu mai e Ieova le mea e tatau ona tatou faia.’ Na tali mai Ieova e ala i le perofeta fafine o Ulata e faapea: ʻUa tuua aʻu e le nuu o Iuta. O le a faasalaina i latou, ae e lē faasalaina i le taimi o le pulega a Iosia, talu ai ua ia faamaulalo iā te ia lava.’

Ina ua faalogo le tupu o Iosia i lenā feʻau, ona ia alu lea i le malumalu ma faapotopoto le nuu o Iuta. Na ia faitau leotele atu i le nuu atoa le Tulafono a Ieova. Na taʻutino atu Iosia ma le nuu o le a latou usiusitaʻi iā Ieova ma o latou lotoatoa.

Ua tele tausaga e leʻi toe faamanatuina e le nuu o Iuta le Paseka.  Ae ina ua faitau atu e Iosia le Tulafono o loo taʻua ai e tatau ona faamanatuina le Paseka i tausaga taʻitasi, na ia faapea atu i le nuu: ʻO le a tatou faia se Paseka iā Ieova.’ Ona sauni lea o Iosia e faia le tele o taulaga, ma faia fuafuaga ina ia iai ni tagata pepese i le malumalu. Ona faamanatu lea e le nuu o le Paseka, ma sosoo ai lea o le Tausamiga o Falaoa e Lē Faafefeteina lea e fitu aso e faia ai. E leʻi faia lava se paseka faapenei talu mai aso o Samuelu. Na matuā naunau Iosia i le Tulafono a le Atua. Pe e te fiafia e aʻoaʻoina e faatatau iā Ieova?

“O lau afioga o le sulu lea i oʻu vae, ma le malamalama i loʻu ala.”—Salamo 119:105