Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 52

O Kariota Afi a Ieova

O Kariota Afi a Ieova

Na faaauau ona osofaʻia e Peniata le tupu o Suria le nuu o Isaraelu. Ae o taimi uma na osofaʻia ai i latou, na lapataʻia ai e le perofeta o Elisaia le tupu o Isaraelu ma mafai ai ona ia sola ese. O lea na filifili ai loa Peniata e puʻe Elisaia. Na ia maua tala o loo iai Elisaia i le aai o Totana. O lea na ia auina atu ai le ʻautau a Suria e puʻe mai o ia.

Na taunuu atu le ʻautau a Suria i Totana ua pogisa. I le taeao na sosoo ai, na alu le auauna a Elisaia i fafo ma iloa ai ua siʻosiʻomia le aai e se ʻautau e toʻatele. Na matuā fefe o ia ma valaau: ʻElisaia, o le ā se mea e ta te faia?’ Na tali mai Elisaia: ʻE sili atu ona toʻatele o ē ua iā i taʻua nai lo o ē ua iā i latou.’ O le taimi lava lea na faapupula ai e Ieova mata o le auauna a Elisaia, ma ia iloa ai ua tumu vaega maugā o loo siʻomia ai le aai, i solofanua ma kariota afi o le taua.

Ina ua taumafai fitafita Suria e puʻe Elisaia, na ia tatalo: ʻIeova, faamolemole ia e faatauasoina i latou.’ Na faafuaseʻi lava ona lē iloa e fitafita le mea o loo latou iai, e ui o loo mafai ona latou vāai. Na fai atu Elisaia i fitafita: ʻE sesē le aai o loo outou iai. Ia mulimuli mai iā te aʻu. O  le a ou taʻitaʻia outou i le tagata o loo outou saʻilia.’ Ona latou mulimuli lea iā Elisaia seʻia oo i Samaria, lea na nofo ai le tupu o Isaraelu.

E toe iloa ane e fitafita Suria le mea ua latou iai, ae ua leai se isi gaoioiga e mafai ona latou toe faia. Na fesili atu le tupu o Isaraelu iā Elisaia: ʻPo ou te fasiotia loa i latou?’ Pe na faaaogā e Elisaia lea avanoa e toe taui atu ai mea leaga na taumafai nei tagata e fai iā te ia? E leai. Na faapea mai Elisaia: ʻAua e te fasiotia i latou. Ia avatu ni meaʻai ma i latou ma aauina atu i latou e ō.’ Ona saunia lea e le tupu o se faigaʻai tele mo i latou, ma aauina atu i latou e ō.

“O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”—1 Ioane 5:14