Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 45

Se Malo ua Vaeluaina

Se Malo ua Vaeluaina

A o tapuaʻi pea Solomona iā Ieova, sa iai pea le filemu i le nuu o Isaraelu. Peitaʻi na faaipoipo atu o ia i le tele o fafine mai i isi nuu, ma na tapuaʻi nei fafine i tupua. Na faasolosolo lava ona suia Solomona, ma iʻu ai ina tapuaʻi atu foʻi o ia i tupua. Na matuā lē fiafia le finagalo o Ieova i lenei mea. Na ia faapea atu iā Solomona: ʻO le a aveesea Isaraelu mai i lou aiga ma vaeluaina i ni vaega se lua. O le a ou tuuina atu le vaega telē i se tasi o au auauna, ae o le vaega itiiti o le a pulea e lou aiga.’

Na faamanino mai e Ieova lana faaiʻuga i se isi auala. A o faimalaga i le ala se tasi o auauna a Solomona o Ierepoamo, na ia feiloaʻi ai i se perofeta e igoa iā Akia. Na saeia e Akia lona ofu i vaega e 12 ma faapea atu iā Ierepoamo: ʻO le a aveesea e Ieova le malo o Isaraelu mai i le aiga o Solomona ma vaeluaina i ni vaega se lua. Ia ave vaega nei e 10 auā o le a avea oe ma tupu i ituaiga e sefulu.’ Na faalogo Solomona i lenei mea ma manaʻo ai e fasioti Ierepoamo. O lea na sola ese ai Ierepoamo ma alu atu i Aikupito. A o faagasolo taimi, na maliu Solomona ae avea lona atalii o Reopoamo ma tupu. O lea, na mafaufau ai Ierepoamo ua saogalemu e toe foʻi i Isaraelu.

 Na faapea atu toeaina o Isaraelu iā Reopoamo: ʻO le a faamaoni tagata iā te oe, pe afai e lelei le auala e te feutagaʻi ai ma i latou.’ Ae na fai atu uō talavou a Reopoamo iā te ia: ʻE ao ona e sauāina tagata. Ia e faapologaina i latou.’ Na mulimuli Reopoamo i fautuaga a ana uō. Na sauā o ia i tagata, ma o lea na latou fouvale ai iā te ia. Na latou filifilia lea o Ierepoamo e avea ma tupu o ituaiga e sefulu, lea na taʻua o le malo o Isaraelu. Na taʻua isi ituaiga e lua o le malo o Iuta, ma na latou faamaoni pea iā Reopoamo. O lea, ua vaeluaina nei ituaiga e 12 o Isaraelu.

E leʻi manaʻo Ierepoamo e ō atu ona tagata i Ierusalema e tapuaʻi ai, auā o Ierusalema o loo i totonu o le malo o Reopoamo. Pe e te iloa le māfuaaga e leʻi manaʻo ai Ierepoamo e tupu lenā mea? Na popole o ia ina neʻi fouvale ona tagata iā te ia, ae latou lagolagoina Reopoamo. O lea na ia faia ai ni tamaʻi povi poʻa auro se lua ma faapea atu i ona tagata: ʻE mamao tele Ierusalema. E mafai lava ona outou tapuaʻi i inei.’ Na amata ona tapuaʻi atu tagata i nei tamaʻi povi poʻa auro, ma galo ai iā i latou Ieova.

“Ia aua neʻi amo faalēgatasi ma ē e lē talitonu. Auā e faapefea ona fesootaʻi le amiotonu ma le amioleaga? . . . E faapefea ona tofusia le tagata faamaoni ma lē ua lē talitonu?”—2 Korinito 6:14, 15