Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 41

Tavita ma Saulo

Tavita ma Saulo

Ina ua uma ona fasiotia e Tavita o Koliata, ona tofia lea o ia e le tupu o Saulo e avea ma taʻitaʻi o lana ʻautau. E tele taua na manumalo ai Tavita, ma avea ai o ia ma tagata e sili ona taʻutaʻua. O taimi uma lava e foʻi mai ai Tavita mai le taua, e ō atu ai fafine e sisiva ma pepese: “Ua fasia e Saulo le faitau afe, a o Tavita e faitau sefulu afe.” Na amata ona lotoleaga Saulo iā Tavita ma manaʻo ai e fasioti o ia.

E lelei le tā kitara a Tavita. I se tasi aso a o ia tāina le kitara mo Saulo, na velo ai e le tupu o ia i le tao. Ae na vave ona ʻalo Tavita ma lele atu le tao ma tu i le puipui o le fale. Ina ua uma lenā, na toe taumafai Saulo mo le tele o taimi e fasioti Tavita. Na iʻu lava ina sola ese Tavita ma lafi i le toafa.

Na ave e Saulo se ʻautau e toʻa 3,000 tamāloloa ma ō e puʻe mai Tavita. Na ulu atu Saulo i le ana o loo lalafi ai Tavita ma ona tagata. Na femusuaʻi tagata o Tavita:  ʻO lou avanoa lenei e fasioti ai Saulo.’ Na tolotolo atu Tavita i le mea o loo iai Saulo ma sesele ese le pito o lona ofu tele. E leʻi iloa e Saulo le mea na tupu. Mulimuli ane na matuā leaga faalogona o Tavita, ona e na te leʻi faaalia le faaaloalo mo le tupu faauuina a Ieova. E na te leʻi faatagaina ona tagata e osofaʻia Saulo. Ina ua alu i fafo Saulo mai i le ana, na valaau atu Tavita iā Saulo, sa mafai ona ia fasiotia o ia ina ua maua le avanoa e faia ai. Pe na suia ai le manatu o Saulo e uiga iā Tavita?

E leai. Na faaauau pea ona saʻili e Saulo Tavita. I se tasi pō, na ō atu faalilolilo ai Tavita ma Apisai le tama a lona tuafafine i le mea o loo iai Saulo ma lana ʻautau. E oo foʻi iā Apineru o lē na puipuia Saulo, sa moe o ia. Na faapea atu Apisai: ʻO lo ta avanoa lenei. Tuu mai seʻi oʻu fasiotia o ia.’ Ae na tali atu Tavita: ʻE fasia lava e Ieova Saulo. Seʻi o ta aveina lana tao ma lana faguvai, ma ta ō loa.’

Na aʻea e Tavita se mauga na lata ane lea e iloa atu ai le mea o loo iai Saulo. Na ia valaau atu: ʻApineru, aiseā na e lē puipuia ai lou tupu? O fea le faguvai ma le tao a Saulo?’ Na iloa e Saulo le leo o Tavita ma ia tali mai: ʻSa e maua le avanoa e fasioti ai aʻu, ae e te leʻi faia faapea. Ou te iloa o le a avea oe ma tupu e sosoo ai o Isaraelu.’ Ona toe foʻi ai lea o Saulo i lona maota. Peitaʻi, e lē o tagata uma i le aiga o Saulo na feita iā Tavita.

“Afai e mafai iā te outou, ia nonofo filemu ma tagata uma. Le ʻaupele e, aua tou te tauimasui, ae ia tuu atu i le toʻasā.”—Roma 12:18, 19