Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 29

Na Filifilia e Ieova Iosua

Na Filifilia e Ieova Iosua

Ua lata ina oti Mose, ina ua mavae le tele o tausaga o ia taʻitaʻia le nuu o Isaraelu. Na faapea atu Ieova iā te ia: ʻE te lē taʻitaʻia tagata Isaraelu i le Nuu Folafolaina. Ae o le a ou faatagaina oe e vaai i le nuu.’ Ona talosaga atu lea o Mose iā Ieova ina ia filifili se taʻitaʻi fou e tausia tagata. Na faapea mai Ieova iā te ia: ʻIa e alu iā Iosua ma faailoa i ai o le a avea o ia ma taʻitaʻi.’

Na fai atu Mose i le nuu e lē o toe umi ona maliu lea o ia, ma ua filifilia e Ieova Iosua e taʻitaʻia i latou i le Nuu Folafolaina. Ona faapea atu lea o Mose iā Iosua: ʻAua e te fefe. O le a fesoasoani Ieova iā te oe.’ Mulimuli ane, ona alu ai lea o Mose i le tumutumu o le mauga o Nepo, lea na faaali atu ai e Ieova iā te ia le nuu na Ia folafola atu iā Aperaamo, Isaako ma Iakopo. Na maliu Mose ina ua 120 ona tausaga.

Na faapea atu Ieova iā Iosua: ʻIa ui atu i le vaitafe o Ioritana ma alu atu i Kanana. O le a ou fesoasoani atu iā te oe e pei ona ou fesoasoani iā Mose. Ia faamautinoa e te faitauina laʻu Tulafono i aso uma. Aua e te fefe. Ia e lototele. Ia alu ma fai le mea ua ou faatonuina oe e fai.’

 Na auina atu e Iosua ni tagata vāai e ō atu faalilolilo i le aai o Ieriko. I le tala o sosoo mai, o le a tatou aʻoaʻoina atili ai le mea na tupu i lenā aai. Ina ua toe foʻi mai nei tagata vāai, na latou faapea mai o le taimi lelei lea e ō ai loa i Kanana. I le aso na sosoo ai, na faapea atu ai Iosua i le nuu ina ia tatala faleʻie. Ona ia fai atu lea i ositaulaga o loo aveina le atolaau o le feagaiga e muamua atu i luma ma agaʻi atu i le vaitafe o Ioritana. Sa tatafe le vaitafe. Ae o le taimi lava na papaʻi ai vae o le ʻauositaulaga i le vai, ona lē toe tatafe ai lea ma amata ona tafe ese atu i le isi itu, ma mātūtū ai le mea na tafe ai le vai. Na ō atu le ʻauositaulaga ma tutū i le ogatotonu o le vai, a o savavali atu le nuu o Isaraelu i le isi itu o le vai. E mautinoa na faamanatu atu e lenei vavega iā i latou, le mea na faia e Ieova i le Sami Ulaula.

O lea ua iʻu lava ina taunuu tagata Isaraelu i le Nuu Folafolaina, ina ua mavae le tele o tausaga. Na mafai ona latou fausia ai fale ma aai. Na mafai ona latou totōina ai laau, togāvine ma togālaau ʻaina. O se nuu sa tafe ai le suāsusu ma le meli.

“O le a taʻitaʻiina pea oe e Ieova ma faamalieina oe e oo lava i le laueleele ua leai ni vai.”—Isaia 58:11