Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 Lesona 24

E Leʻi Tausisi i la Latou Folafolaga

E Leʻi Tausisi i la Latou Folafolaga

Na faapea atu Ieova iā Mose: ʻIa e sau iā te aʻu i le mauga. O le a ou tusia aʻu tulafono i papamaa ma tuu atu iā te oe.’ Na alu aʻe Mose i le mauga ma nofo ai i inā mo ao ma pō e 40. A o iai o ia i inā, na tusia ai e Ieova Tulafono e Sefulu i papamaa e lua ma tuu atu iā Mose.

Ina ua mavae sina taimi, na manatu ai tagata Isaraelu ua tuua e Mose i latou. Na latou fai atu iā Arona: ʻE matou te mananaʻo i se tasi e taʻitaʻia i matou. Ia e faia se atua mo i matou.’ Na tali atu Arona: ʻIa aveese a outou auro ma aumai iā te aʻu.’ Ona faaliusuavai lea e Arona o auro ma faia ai se faatusa o se tamaʻi povi. Na faapea atu tagata: ʻO le tamaʻi povi lenei o lo matou Atua o lē na taʻitaʻia i matou mai i Aikupito.’ Na amata ona latou tapuaʻi i le tamaʻi povi auro, ma na latou fiafia, pepese, sisiva ma aai. Pe na sesē le mea na latou faia? Ioe na sesē, auā na latou folafola e na o Ieova lava e latou te tapuaʻi i ai. Ae o lea ua latou lē tausia la latou folafolaga.

 Na silasila mai Ieova i le mea na tupu ma faapea atu iā Mose: ʻAlu ifo ia i lalo i le mea o loo iai tagata. Ua latou lē usiusitaʻi iā te aʻu, ma ua latou tapuaʻi atu i se atua sesē.’ Ona alu ifo lea o Mose mai i le mauga ma papamaa e lua.

A o latalata atu o ia i le mea o loo iai tagata, na ia faalogoina leo o tagata o loo pepese. Ona ia vaaia lea o tagata o loo sisiva ma ifo atu i le tamaʻi povi auro. Na matuā ita Mose. Na ia togi i lalo papamaa e lua, ma na matuā nutililii. Ona ia susunuina loa lea o le tamaʻi povi auro. Na ia fesili atu iā Arona: ʻO le ā le mea ua faia e lenei nuu iā te oe, ua e faia ai lenei mea matuā leaga?’ Na tali mai Arona: ʻAua e te ita. Ua e malamalama lelei i nei tagata. Na latou mananaʻo i se atua, o lea na ou togi ai a latou auro i le afi ma maua mai ai lenei tamaʻi povi.’ Ae sa lē tatau lava iā Arona ona faia lenā mea. Na toe alu Mose i luga o le mauga, ma talosaga atu iā Ieova e faamagalo tagata.

Na faamagalo e Ieova i latou sa malilie e usiusitaʻi iā te ia. Po ua e iloa nei le māfuaaga na tāua ai i tagata Isaraelu ona mulimuli i le taʻitaʻiga a Mose?

“Pe a e faia se tautoga i le Atua, aua e te faatuai ona avatu, auā e leai se isi e fiafia i ē e valelea. O le mea ua e tautō ai, ia e avatu.”—Failauga 5:4