Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 28

Ua Tautala le Asini a Palaamo

Ua Tautala le Asini a Palaamo

Ua toetoe 40 tausaga o iai tagata Isaraelu i le toafa. E tele aai malolosi na latou faatoʻilaloina. O loo latou nonofo i fanua laugatasi o Moapi i le itu i sasaʻe o le vaitafe o Ioritana, ae o lea ua oo i le taimi e latou te ulu atu ai i le Nuu Folafolaina. Na popole Palako le tupu o Moapi, ina neʻi faoa e tagata Isaraelu ona laueleele. O lea na ia valaaulia ai se tamāloa e igoa iā Palaamo e alu atu i Moapi, e faamalaia tagata Isaraelu.

Ae na faapea atu Ieova iā Palaamo: ʻE lē tatau ona e faamalaiaina le nuu.’ O lea na musu ai Palaamo e alu i Moapi. Na toe valaaulia foʻi o ia e le tupu o Palako, ma folafola e avatu iā te ia so o se mea lava e manaʻo i ai. Ae e leʻi manaʻo Palaamo e alu. Ona faapea atu lea o le Atua: ʻE mafai ona e alu, ae e na o mea lava ou te taʻuina atu e mafai ona e tautala atu ai.’

Na alu Palaamo i lana asini ma agaʻi atu i Moapi. Na fuafua o ia e faamalaia tagata Isaraelu, e ui na faatonuina o ia e Ieova e aua le faamalaiaina le nuu. E faatolu ona faaali ane se agelu a Ieova iā Palaamo i luga o le auala. E leʻi iloa atu e Palaamo le agelu, ae na iloa atu e le asini. O lea na liliuese ai le asini mai i le auala ma taumafai e alu atu i se fanua. Na toe alu atu le asini i se pā maa ma omia ai le vae o Palaamo. Mulimuli ane, ona taoto ai lea o le asini i le ogatotonu o le auala. I na taimi uma, na sasa ai e Palaamo le asini i se laau.

Na faatautala e Ieova le asini a o taoto i le ogatotonu o le auala. Na fesili atu le asini iā Palaamo: ʻAiseā ua e sasaina ai pea aʻu?’ Na tali mai Palaamo: ʻUa pei aʻu o se vale ona o le mea ua e faia. Pe ana iai saʻu pelu ua ou tapēina oe.’ Na fai atu le asini: ʻE tele tausaga o e tiʻetiʻe iā te aʻu. Pe na iai se taimi na ou agaleaga ai iā te oe?’

Ona faapupula lea e Ieova mata o Palaamo ma ia iloa atu ai le agelu. Na faapea mai le agelu: ʻNa faatonuina oe e Ieova ina ia aua neʻi e faamalaiaina Isaraelu.’ Na tali atu Palaamo: ʻUa ou sesē. O le a ou toe  foʻi i loʻu aiga.’ Ae na faapea mai le agelu: ʻE mafai ona e alu atu i Moapi, ae ia e taʻu atu na o mea e faailoa atu e Ieova.’

Pe na aʻoaʻoina e Palaamo se lesona mai i le mea na tupu? E leai. Ina ua māeʻa le mea na tupu, na faatolu ona ia taumafai e faamalaia le nuu o Isaraelu, ae o na taimi taʻitasi na uunaʻia o ia e Ieova e faamanuia i le nuu. E leʻi umi ae osofaʻia e tagata Isaraelu Moapi ma fasiotia ai Palaamo. Maʻimau pe ana usitaʻi Palaamo iā Ieova i le taimi muamua, a ea?

ʻIa leoleo iā te outou i le manaʻo tele, aua e lē ola se tasi i le tele o ana mea ua iā te ia.’—Luka 12:15