Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 10

Ia Manatua le Avā a Lota

Ia Manatua le Avā a Lota

Sa nonofo faatasi Lota ma Aperaamo le uso o lona tamā, i le nuu o Kanana. E leʻi umi ae tele manu a Aperaamo ma Lota, ma ua lē lava ai le fanua e nonofo faatasi ai i laʻua. O lea na fai atu ai Aperaamo iā Lota: ʻE lē mafai ona ta toe nonofo faatasi i se nofoaga e tasi. Faamolemole filifili po o lē fea itu e te alu i ai, ona ou alu ai lea i le isi itu.’ E leʻi mafaufau Aperaamo mo sona lava lelei, a ea?

Na iloa atu e Lota se vaega matagofie o le laueleele, lea e lata i se aai e taʻua o Sotoma. Sa maua ai vai faapea le tele o vao. O lea, na ia filifilia ai lenā nofoaga ma na ō atu loa ma lona aiga ma nonofo ai i le aai o Sotoma.

Na matuā leaga tagata o Sotoma ma le aai na lata ane o Komoro. O le leaga tele o nei tagata na filifili ai Ieova e faaumatia nei aai. Ae na finagalo le Atua e faasaoina Lota ma lona aiga. O lea na ia auina atu ai ni agelu se toʻalua e lapataʻi i latou e faapea: ʻIa faavave! Ia ō ese mai i lenei aai, auā o le a faaumatia e Ieova.’

E leʻi vave ona alu ese Lota, ae na faifaiaga pea o ia. O lea, na fetagofi atu ai agelu e toʻalua i lima o Lota, lana avā ma ona afafine e toʻalua ma aveese i latou mai i le aai. Na faapea atu nei agelu: ʻIa sosola, ma aua neʻi outou toe tilotilo i tua. Pe afai e tou te toe tilotilo i tua, o le a outou feoti.’

O le taimi lava na latou oo atu ai i le aai o Soara, na faatotō ifo ai loa e Ieova le teiō ma le afi i aai o Sotoma ma Komoro. Na matuā  faaumatia na aai. Ina ua lē usiusitaʻi le avā a Lota ma toe tilotilo i tua, na liu tupua masima ai o ia. Ae na saogalemu pea Lota ma ona afafine, talu ai sa latou usiusitaʻi iā Ieova. E mautinoa na matuā faanoanoa i latou ona e leʻi usiusitaʻi le avā a Lota. E mafai ona tatou aʻoaʻoina mai i inei, le tāua o le usiusitaʻi i faatonuga a Ieova.

“Ia outou manatua le avā a Lota.”—Luka 17:32