Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 13

Na Toe Faalelei Iakopo ma Esau

Na Toe Faalelei Iakopo ma Esau

Sa folafola atu e Ieova iā Iakopo o le a ia puipuia o ia, e pei lava ona ia puipuia o Aperaamo ma Isaako. Sa nofo Iakopo i le nuu o Karana, ma o i inā sa faaipoipo ai. Na toʻatele lana fanau, ma sa mauʻoa foʻi o ia.

Ina ua mavae se taimi, ona faapea atu lea o Ieova iā Iakopo: ʻIa e toe foʻi i le nuu sa e fanau ai.’ O lea na toe foʻi ai Iakopo ma lona aiga, ma e umi le taimi na alu ai la latou malaga. A o latou iai i luga o le auala, na ō atu auauna a Iakopo ma fai atu iā te ia: ʻO loo sau lou uso o Esau, ma e 400 tamāloloa o loo latou ō mai faatasi.’ Na fefe Iakopo ona sa mafaufau o ia o loo sau Esau e osofaʻi o ia ma lona aiga. O lea na ia tatalo atu ai iā Ieova: ʻFaamolemole ia e faasaoina aʻu mai i loʻu uso.’ I le aso na sosoo ai, na auina atu ai e Iakopo meaalofa e tele mo Esau, e pei o mamoe, ʻoti, povi, kamela ma asini.

Ina ua pō le aso, sa vaaia ai e Iakopo se agelu. Na amata ona tauivi le agelu ma Iakopo mai i lenā taimi, seʻia oo lava i le taeao o le aso na sosoo ai. E ui lava sa manuʻa ai Iakopo, ae e leʻi fiu ai o ia. Na fai atu le agelu: ʻTuu mai aʻu seʻi oʻu alu.’ Ae na tali mai Iakopo: ʻE leai, seʻiloga lava ua e faamanuia mai iā te aʻu ona ou tuu atu lea o oe e te alu.’

O lea, na faamanuia atu ai le agelu iā Iakopo. Ua iloa nei e Iakopo e lē faataga e Ieova Esau e faia se mea leaga iā te ia.

 I lenā lava taeao, na iloa mamao atu ai e Iakopo Esau ma tamāloloa e 400 o loo faatasi ma ia. Na muamua atu Iakopo ma ifo faafitu i lona uso. Ae ua tamoʻe mai Esau ma fusi atu Iakopo. Na fetagisi lenei ʻauso e toʻalua ma toe faalelei. O le ā sou iloa, o ā faalogona o Ieova i le auala na faaleleia ai e Iakopo le mea na tupu?

I se taimi mulimuli ane i lenā aso, na toe foʻi ai Esau i lona nuu ae faaauau le faigāmalaga a Iakopo. E toʻa 12 atalii o Iakopo. O o latou igoa o Reupena, Simeona, Levi, Iuta, Tanu, Nafatali, Kato, Asera, Isakara, Sepulona, Iosefa, ma Peniamina. Na faaaogā e Ieova Iosefa, e faasaoina Ona tagata. E te iloa le auala na faia ai e Ieova lenā mea? Seʻi o tatou vaai.

“Ia alolofa atu pea i o outou fili ma tatalo pea mo ē ua sauāina outou; ina ia avea ai outou ma atalii o lo outou Tamā o i le lagi.”—Mataio 5:44, 45