Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 7

Le ʻOlo o Papelu

Le ʻOlo o Papelu

Ina ua uma le Lolo, na maua e atalii o Noa ma a latou avā ni fanau se toʻatele. Na faasolo ina toʻatele tagata o o latou aiga, ma ua ō atu ma nonofo i itu eseese o le lalolagi, e pei lava ona faatonu i latou e Ieova e fai.

Ae na iai o latou tauaiga e leʻi usiusitaʻi iā Ieova. Na latou faapea ane: ʻSeʻi o tatou faia se aai ma nonofo ai. O le a tatou faia se ʻolo e sili ona umī, e oo i le lagi lona maualuga. Ona avea ai lea o i tatou ma tagata taʻutaʻua.’

 E leʻi fiafia Ieova i le mea na faia e na tagata. O lea, na ia filifili ai e taofi i latou mai i le faia o le aai ma le ʻolo. E te iloa le auala na taofia ai i latou e Ieova? Na faafuaseʻi lava ona ia suia le gagana na tautatala ai na tagata. O lea na lē toe malamalama ai le isi tagata i le gagana o loo tautala ai le isi, ma taofia ai loa le galuega na latou faia. Na taʻua le aai lea na amata ona latou fausia o Papelu, o lona uiga o le “Fenuminumiaʻi.” Na amata ona ō tagata ma nonofo i isi vaega o le lalolagi. Ae na latou faia pea mea leaga. Pe na iai ni tagata na alolofa pea iā Ieova? O le a tatou iloa le tali i le tala o loo sosoo mai.

“O le fia sili, ma le faamaualuga, ma le ala leaga, ma le gutu faapiʻopiʻo, ou te ʻinoʻino i ai.”—Faataoto 8:13