Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 84

Savali Iesu i Luga o le Vai

Savali Iesu i Luga o le Vai

E lē gata sa mafai e Iesu ona faamālōlō ē mamaʻi ma toe faatutū ē ua maliliu, ae sa mafai foʻi ona ia faatonutonu le matagi ma le timu. Ina ua māeʻa ona tatalo Iesu i luga o se mauga, na ia vaai atu ai i lalo i le sami o Kalilaia ma iloa ai se matagi o loo agi malosi. Sa i totonu o le vaa ona aposetolo, ma o loo taumafai malosi e alo lo latou vaa a o agi malosi le matagi. Na alu ifo Iesu mai i le mauga ma amata ona savali i luga o le sami agaʻi i le vaa. Ina ua iloa atu e le ʻauaposetolo o loo savali mai se tasi i luga o le vai, ona latou fefefe ai lea. Peitaʻi na faapea atu Iesu iā i latou: ʻO aʻu lenei. Aua tou te fefefe.’

Na tali atu Peteru: “Le Alii e, afai o oe, ia e fai mai iā te aʻu ou te alu atu iā te oe.” Na faapea atu Iesu iā Peteru: “Inā sau ia!” O lea a o agi malosi le matagi, na oso ese ai Peteru mai i le vaa ma savali atu iā Iesu i luga o le vai. Ae a o latalata atu o ia iā Iesu, na ia vaai atu i le matagi ma fefe ai. Na ia lagona ua amata ona magoto ifo. Na alaga atu Peteru: “Le Alii e, ta fia ola!” Ona faaloaloa atu lea e Iesu o lona aao ma taofi iā te ia ma faapea atu: ʻAiseā ua e masalosalo ai? O fea lou faatuatua?’

Ua ō atu Iesu ma Peteru i le vaa, ma o le taimi lava lenā na uma ai le matagi. Seʻi mafaufau i faalogona o le ʻauaposetolo i lenā taimi. Na latou faapea atu: “E moni o oe lava o le Alo o le Atua.”

E lē na o le pau lea o le taimi na faatonutonu ai e Iesu le tau. I se isi taimi, a o folau atu Iesu ma le ʻauaposetolo i le isi itu o le sami, na alu ai Iesu ma tofā i le taumuli o le vaa. A o moe o ia, na agi malosi mai se matagi. Na fafati mai galu i le vaa, ma ua amata ona tumu le vaa i vai. Na fafagu e le ʻauaposetolo Iesu ma alalaga: ʻLe Aʻoaʻo e, o le a matou feoti. Ia fesoasoani mai!’ Ona nofo lea i luga o Iesu ma fetalai atu i le sami: “Ia malū!” O le taimi lava lenā na toʻa ai le matagi ma malū ai le sami. Na fesili atu Iesu i le ʻauaposetolo: ʻO fea ea lo outou faatuatua?’ Ua faapea ane le tasi i le isi: “E oo lava i le matagi ma le vai, ua usiusitaʻi iā te ia.” O lenā mea na aʻoaʻoina ai e le ʻauaposetolo, pe afai e latou te maufaatuatuaina atoatoa Iesu, e lē manaʻomia la ona latou fefefe i so o se mea.

“Pe ana ou lē faatuatua i le vaai atu i le lelei o Ieova i le nuu o tagata ola, semanū ua leai soʻu faamoemoe!”—Salamo 27:13

Faitau Atili

IESU—LE ALA, LE UPU MONI MA LE OLA

O se Tupu e Mafai Ona PuleaMalosiaga Faalenatura

O ā lesona ua aʻoaʻoina e le ʻauaposetolo ina ua savali Iesu i luga o le sami ma faatoʻafilemu le matagi?

FAAA‘OA‘O I LO LATOU FAATUATUA

Sa Tauivi Peteru Faasaga i le Fefe ma le Masalosalo

E telē se aafiaga o le masalosalo. Ae na fo‘ia e Peteru lona fefe ma ona masalosaloga e faatatau i le mulimuli atu iā Iesu.