Ina ua māeʻa ona filifilia e Iesu ona aposetolo e toʻa 12, ona ia sau lea i lalo mai i le mauga ma alu atu i se nofoaga sa faapotopoto ai se motu o tagata e toʻatele. Na ō mai tagata mai i Kalilaia, Iutaia, Turo, Saitonu, Suria, ma le isi itu o Ioritana. Na latou aumaia tagata sa mafatia i faamaʻi, ma o nisi sa faapuapuagatia e temoni. Na faamālōlō e Iesu i latou uma. Ona nofo ai lea o ia i luga o le mauga ma amata lana lauga. Na ia faamatala le mea e tatau ona tatou faia, pe afai e tatou te mananaʻo e avea ma uō a le Atua. E tatau ona tatou iloa e tatou te manaʻomia Ieova, ma aʻoaʻoina ina ia alolofa iā te ia. Ae e lē mafai ona tatou alolofa i le Atua pe afai e tatou te lē alolofa i isi tagata. E tatau ona tatou agalelei ma feutagaʻi i se auala tonu ma tagata uma, e oo lava i o tatou fili.

Na fetalai Iesu: ʻE lē lava le alofa tau lava o au uō. E tatau foʻi ona e alofa i ou fili ma faamagalo mai i le loto. Pe afai e lē o fiafia se tasi iā te oe, ia alu atu iā te ia i le taimi lava lenā ma faatoese i ai.  Ia feutagaʻi ma isi i le auala e te manaʻo e latou te feutagaʻi ai ma oe.’

Na avatu foʻi e Iesu le fautuaga aogā e faatatau i meafaitino. Na ia fetalai: ʻE sili atu ona tāua le avea ma uō a Ieova nai lo o le maua o le tele o tupe. E mafai e le tagata gaoi ona aveesea au tupe, ae e lē mafai e se tasi ona aveesea le lua faauōga ma Ieova. Aua e te toe popole i mea e te ʻai ai, inu ai, ma ofu ai. Ia vaavaai i manufelelei. E faamautinoa e le Atua e lava a latou meaʻai i taimi uma. E lē mafai e le popole ona toe faaopoopo ai nisi aso o lou ola. Ia manatua, e silafia e Ieova mea e te manaʻomia.’

E leʻi faalogo muamua le motu o tagata i se tasi o aʻoaʻo atu e pei o Iesu. E leʻi aʻoaʻoina i latou i nei mea e taʻitaʻi lotu, e pei o le ʻau Faresaio ma le ʻautusiupu. Aiseā na avea ai Iesu ma faiaʻoga sili? Talu ai o mea uma na ia aʻoaʻo atu e mai iā Ieova.

“Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou.”—Mataio 11:29