Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 86

Faatūina e Iesu Lasalo

Faatūina e Iesu Lasalo

Na iai ni uō vavalalata e toʻatolu a Iesu na nonofo i Petania. O i latou o Lasalo ma ona tuafāfine e toʻalua o Maria ma Mareta. I se tasi aso, a o iai Iesu i le isi itu o Ioritana, na auina atu ai e Maria ma Mareta se feʻau faanatinati iā te ia e faapea: ʻUa maʻi tigāina Lasalo. Ia sau faavave faamolemole.’ Ae e leʻi alu Iesu i le taimi lenā. Na ia faatalitali mo isi aso e lua, ona faapea atu lea i ona soo: ʻSeʻi o tatou ō i Petania. O loo moe Lasalo, ma o le a ou alu e fafagu iā te ia.’ Na fai atu le ʻauaposetolo: ʻPe afai o loo moe Lasalo, o le a fesoasoani lenā iā te ia e toe malosi ai.’ Ona fetalai saʻo atu lea o Iesu: “Ua oti Lasalo.”

Ua taunuu Iesu i Petania, ma ua fā aso talu ona maliu Lasalo. E toʻatele tagata na ō atu e faamāfanafana iā Mareta ma Maria. Ina ua faalogo Mareta ua afio atu Iesu, ona ia faanatinati atu lea e faafeiloaʻi o ia. Na ia faapea atu: “Le Alii e, ana e iai i inei, semanū e lē oti loʻu tuagane.” Na fetalai atu Iesu iā te ia: ʻO le a toetū lou tuagane. Pe e te talitonu i lenā mea Mareta?’ Na tali mai Mareta: ʻOu te talitonu e toetū mai o ia i le lumanaʻi.’ Na faapea atu Iesu iā te ia: “O aʻu o le toetū ma le ola.”

Ona alu atu lea o Mareta iā Maria ma faapea atu: ʻO loo i inei Iesu.’ Ua tamoʻe atu Maria iā Iesu, ma na mulimuli atu i ai le motu o tagata. Na faapaʻū o ia i vae o Iesu ma tagi masūsū. Na ia faapea atu: ʻLe Alii e, ana e iai i inei, semanū o loo ola pea lo ma tuagane.’ Na vaaia e Iesu le matuā mafatia o Maria, ma na amata ai ona tagi o ia. Ina ua vaai atu le motu o tagata ua tagi Iesu, ona latou faapea ane lea: ʻVaai foʻi i le alofa faapelepele o Iesu iā Lasalo!’ Ae na tuufesili nisi: ʻAiseā na ia lē taofia ai le oo o le oti i lana uō?’ O le ā le gaoioiga o le a faia e Iesu?

Ua alu atu Iesu i le tuugamau, o se ana sa taatia ai se maa telē. Na fetalai atu o ia: “Ia aveese le maa.” Ae ua fai mai Mareta: ʻUa tatau ona manogi lona tino, auā o le lona fā lenei o aso.’ Peitaʻi na aveese pea le maa, ma na tatalo Iesu: ʻLoʻu Tamā e, ou te faafetai  atu ona ua e faafofoga mai iā te aʻu. Ua ou iloa, e te faafofoga mai pea iā te aʻu. Ae ua ou tautala atu ina ia iloa ai e nei tagata na e auina mai aʻu.’ Ona alaga atu lea ma le leotele Iesu: “Lasalo e, inā sau ia i fafo!” Na tupu se mea ofoofogia: Na sau i fafo Lasalo mai i le tuugamau, o loo fusi lona tino i ʻie lino. Na faapea atu Iesu: “Ia tatala o ia ma tuu atu e alu.”

Na faatuatua le toʻatele iā Iesu ona o le mea na latou vāai i ai. Ae na iai nisi na ō ma faamatala atu i le ʻau Faresaio. Talu mai lenā taimi, na taupulepule ai le ʻau Faresaio e fasioti Lasalo ma Iesu. Na alu faalilolilo i le ʻau Faresaio ia Iuta le Sekara, o ia o se tasi o aposetolo e toʻa 12 ma fesili atu: ʻE fia se tupe tou te totogiina ai aʻu pe afai ou te fesoasoani iā te outou i le saʻilia o Iesu?’ Na latou malilie e avatu iā te ia tupe siliva e 30, ma na amata ona suʻe e Iuta se avanoa e tuuina atu ai Iesu i le ʻau Faresaio.

“O le Atua moni, o le Atua e na te faaolaina i tatou; ma o Ieova le Alii Pule Silisili Ese, o ia e faasaoina le tagata mai i le oti.”—Salamo 68:20

Faitau Atili

IESU—LE ALA, LE UPU MONI MA LE OLA

Ua Toe Faatūina Mai Lasalo

Ua lē mafai e ē tetee atu iā Iesu ona faamaonia e leʻi tupu lenei vavega ona o ni vala matilatila se lua.

FAAA‘OA‘O I LO LATOU FAATUATUA

Mareta—“Ua Ou Talitonu”

Na faapefea ona faaalia e Mareta le faatuatua malosi e oo lava i le taimi na faanoanoa ai?

IESU—LE ALA, LE UPU MONI MA LE OLA

“O le Toetū ma le Ola”

O le ā sa uiga i ai Iesu ina ua ia fetalai o i latou e faatuatua iā te ia “e lē oti lava”?

IESU—LE ALA, LE UPU MONI MA LE OLA

Ua Latalata i le Paseka Mulimuli a Iesu

O le ā e uiga iai le lotomalilie o taʻitaʻi lotu e totogi tupe Iuta i tupe siliva e 30, ina ia faalataina ai Iesu?