Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 82

Aʻoaʻo e Iesu Ona Soo i le Auala e Tatalo Ai

Aʻoaʻo e Iesu Ona Soo i le Auala e Tatalo Ai

O mea uma sa faia e le ʻau Faresaio, sa faia ina ia faaofo ai tagata. Pe afai e latou te faia se gaoioiga agalelei, sa faia ina ia iloa atu e isi tagata. Sa latou tatalo i nofoaga faitele ina ia iloa atu i latou e tagata uma. Na latou aʻo faatauloto tatalo uumi ma faia i totonu o sunako ma magāala, ina ia lagona atu e isi tagata. O lea, na faateʻia tagata ina ua faapea atu Iesu iā i latou: ʻPe a outou tatalo, aua neʻi pei outou o le ʻau Faresaio. E latou te manatu o le a faafofogaina i latou e le Atua ona o le tele o upu o a latou tatalo, ae e lē o le tulaga lenā. O le tatalo o le va lea o oe ma Ieova. Aua le tausisi i upu masani. E finagalo Ieova ia e taʻu atu iā te ia mea o loo i lou loto.

ʻIa faapea ona outou tatalo: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le  lalolagi, e pei ona faia i le lagi.”’ Na fetalai atu foʻi Iesu, e ao ona tatalo mo a latou meaʻai mo le aso, ia faamagalo a latou agasala, ma isi mataupu e patino iā i latou.

Na fetalai Iesu: ʻIa tatalo atu pea. Ia talosaga atu pea i lo outou Tamā o Ieova mo mea lelei. O so o se matua lava e manaʻo e avatu mea lelei mo lana tama. Pe a talosaga atu lou atalii iā te oe mo se falaoa, po o le a e avatu iā te ia se maa? Pe a talosaga atu mo se iʻa, po o le a e avatu iā te ia se gata?’

Ona faamatala atu lea e Iesu o le lesona: ʻPe afai e tou te iloa avatu meaalofa lelei mo a outou fanau, pe e lē sili atu la ona foaʻi mai e lo outou Tamā o Ieova le agaga paia iā te outou? E pau le mea e manaʻomia ona e faia o le talosaga atu.’ Po o e usitaʻia le fautuaga a Iesu? O ā mea e te taʻua i au tatalo?

“Ia talosaga atu pea, ona foaʻiina mai ai lea iā te outou. Ia saʻili atu pea, ona outou maua ai lea. Ia tuʻituʻi atu pea ona tatalaina mai ai lea iā te outou.”—Mataio 7:7