Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 73

Ua Saunia e Ioane le Ala

Ua Saunia e Ioane le Ala

Ina ua matua Ioane le tama a Sakaria ma Elisapeta, na avea o ia o se perofeta. Na faaaogā e Ieova Ioane e aʻoaʻo atu i tagata ua afio mai le Mesia. Ae nai lo o le aʻoaʻo atu i sunako po o nuu, na talaʻi atu Ioane i le toafa. Na ō mai tagata mai Ierusalema ma vaipanoa uma o Iutaia ina ia faalogologo i aʻoaʻoga a Ioane. Na ia aʻoaʻo atu ina ia faafiafia le finagalo o le Atua, e manaʻomia ona tuu mea leaga o loo latou faia. Ina ua uma ona latou faalogologo iā Ioane, na salamō le toʻatele mai i a latou agasala, ma na papatisoina i latou e Ioane i le vaitafe o Ioritana.

Na ola Ioane i se olaga faigofie. O ona ofu na fai mai i le fulufulu kamela. O ana meaʻai o sē akerise ma le meli vao. Na fia iloa e tagata po o ai Ioane. E oo lava i le ʻau Faresaio ma le ʻau Satukaio faamaualuluga na ō atu e vaai o ia. Na faapea atu Ioane iā i latou: ʻE manaʻomia ona suia o outou ala ma ia salamō. Aua neʻi outou manatu e faapitoa outou, ona ua outou fai mai o outou o fanau a Aperaamo. E lē faapea ai o outou o fanau a le Atua.’

Na ō mai le toʻatele o tagata iā Ioane ma fesili atu: ʻO le ā e manaʻomia ona fai ina ia faafiafia ai le finagalo o le Atua?’ Na faapea atu Ioane iā i latou: ʻPe afai e lua ni ou ofutino, ia avatu le isi ofutino i lē e leai sona ofu.’ Pe e te iloa le māfuaaga na ia fai atu ai lenā tala? Na manaʻo Ioane ina ia iloa e ona soo, e tatau ona latou alolofa i tagata ina ia faafiafia ai le finagalo o le Atua.

Na faapea atu Ioane i le ʻauaolafoga: ʻIa outou faamaoni ma aua tou te tāpā se mea e sili atu nai lo o le lafoga ua totogi atu.’ Na ia fai atu i fitafita: ʻAua tou te taliaina ni faiga faaalatua pe taʻu atu ni talapepelo.’

 Na ō atu foʻi le ʻauositaulaga ma le ʻau sa Levī iā Ioane ma fesili atu e faapea: ʻO ai oe? O loo fia iloa e tagata po o ai oe.’ Na tali mai Ioane: ʻO aʻu o le leo o lē e alaga i le toafa, lea e taʻitaʻia tagata iā Ieova e pei ona valoia e Isaia.’

Na matuā fiafia tagata i mea sa aʻoaʻo atu e Ioane. Na tuufesili isi po o Ioane o le Mesia. Ae na ia tali atu: ʻE iai se tasi e sili atu iā te aʻu o loo mulimuli mai. E lē aogā iā te aʻu ona ou tatala i nonoa o ona seevae. Ou te papatiso iā te outou i le vai, ae e na te papatiso iā te outou i le agaga paia.’

“Na sau lenei tagata e molimau, ina ia molimau i le malamalama, ina ia talitonu ituaiga o tagata eseese e ala iā te ia.”—Ioane 1:7

Faitau Atili

IESU—LE ALA, LE UPU MONI MA LE OLA

Ua Fanau Mai Se Tasi e Saunia le Ala

O le taimi lava na mafai ai ona toe tautala Sakaria, na ia faailoa atu ai se valoaga tāua.

IESU—LE ALA, LE UPU MONI MA LE OLA

Ua Saunia e Ioane le Papatiso le Ala

Ua taʻusalaina e Ioane nisi o le ʻau Faresaio ma le ʻau Satukaio, ina ua ō atu iā te ia e papatisoina ai i latou. Aiseā?

IESU—LE ALA, LE UPU MONI MA LE OLA

Ua Faateleina Galuega a Iesu, ae Faaitiitia Galuega a Ioane

Ua lotovale soo o Ioane le Papatiso, peitaʻi o loo fiafia pea Ioane.