Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 71

Na Puipuia e Ieova Iesu

Na Puipuia e Ieova Iesu

Sa iai i se nuu i le itu i sasaʻe o Isaraelu ni tagata na talitonu e mafai e fetu ona taʻitaʻia i latou. I se tasi pō, na vaaia ai e ni tamāloloa mai i Sasaʻe se mea i le lagi e pei o se fetu pupula ma na latou mulimuli i ai. Na taʻitaʻia i latou e lenā “fetu” i Ierusalema. Na latou fesilisili solo i tagata: ʻO fea o iai le tamaitiiti lea o le a avea ma tupu o tagata Iutaia? Ua matou ō mai e ifo iā te ia.’

Ina ua faalogo Herota le tupu o Ierusalema e faatatau i le tupu fou, ona matuā popole ai lea o ia. Na ia fesili atu i le ʻaufaitaulaga sili: ʻO fea e fanau ai lenei tupu?’ Na latou faapea mai: ʻNa fai mai le ʻauperofeta o le a fanau o ia i Peteleema.’ Ona aami ai lea e Herota o nei tagata mai i Sasaʻe ma fai atu iā i latou: ʻIa ō i Peteleema ma saʻili le tamaitiiti. Ia toe foʻi mai e taʻu mai iā te aʻu. Ou te fia alu atu foʻi e ifo iā te ia.’ Ae e lē o le mea moni lenā sa manaʻo Herota e fai.

Na toe minoi le “fetu” ma na mulimuli atu i ai nei tagata mai i Sasaʻe seʻia oo i Peteleema. Na tū tonu le “fetu” i luga aʻe o se fale, ma na ō ai loa i totonu nei tamāloloa. Na latou maua ai Iesu ma lona tinā o Maria. Na latou ifo atu i le tamaitiiti ma avatu iā te ia meaalofa o auro, mea manogi, ma muro. Pe e moni na auina atu e Ieova nei tamāloloa e saʻili iā Iesu? E leai.

I lenā pō, na fetalai mai ai Ieova iā Iosefa e ala i se miti: ʻO loo manaʻo Herota e fasiotia Iesu. Ia e ave lau avā ma lou atalii ma sosola i Aikupito. Ia nonofo ai i inā seʻia ou toe fai atu ua saogalemu mo le toe foʻi mai.’ O le taimi lava lenā na ō ai loa Iosefa ma lona aiga i Aikupito.

Na fetalai Ieova i tamāloloa mai i le itu i Sasaʻe, e lē tatau ona latou toe foʻi iā Herota. Ina ua iloa e Herota e lē toe foʻi mai nei tamāloloa, ona matuā ita ai lea o ia. Talu ai e leʻi maua e Herota le mea o loo iai Iesu, ona ia faatonuina lea o le fasiotia o tamaiti uma i Peteleema e tutusa le matutua ma Iesu. Peitaʻi, sa saogalemu Iesu i Aikupito.

 Mulimuli ane, ona maliu lea o Herota. Na faapea atu Ieova iā Iosefa: ʻUa mafai nei ona e toe foʻi.’ Ona toe foʻi ai lea i Isaraelu o Iosefa, Maria ma Iesu, ma nonofo i le aai o Nasareta.

“E faapea foʻi laʻu upu e alu atu mai i loʻu gutu . . . , e taulau foʻi e tusa ma le mea na ou auina atu ai.”—Isaia 55:11

Faitau Atili

IESU—LE ALA, LE UPU MONI MA LE OLA

Ua Asiasi Atu Ē e Saʻiliʻili i Fetu iā Iesu

Aiseā na taʻitaʻia ai ē e saʻiliʻili i fetu e le fetu na latou vaaia i le itu i Sasaʻe, i le tupu sauā o Herota nai lo o Iesu?

IESU—LE ALA, LE UPU MONI MA LE OLA

Ua Latou Sosola Ese Mai i se Tupu Sauā

E tolu valoaga e fesootaʻi atu i le Mesia, ua faataunuuina i le amatamataga o le olaga o Iesu.