Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 72

A o Laʻitiiti Iesu

A o Laʻitiiti Iesu

Sa nonofo Iosefa, Maria, Iesu ma isi a la fanau tama ma teine i Nasareta. Na tausia e Iosefa lona aiga e ala i le galue o se kamuta, ma na ia aʻoaʻoina i latou e faatatau iā Ieova ma lana Tulafono. Na masani ona ō Iosefa ma lona aiga i le sunako e tapuaʻi ai, ma faimalaga atu foʻi i Ierusalema e faamanatu ai le Paseka i tausaga taʻitasi.

I le 12 o tausaga o Iesu, na alu ai se malaga umi a lo latou aiga i Ierusalema e pei ona masani ai. Na matuā faatumulia le aai i tagata na malaga atu e faamanatu le Paseka. Mulimuli ane, na toe foʻi Iosefa ma Maria ma le manatu o loo latou ō faatasi ma Iesu. Ae ina ua la saʻilia o ia i o la tauaiga, e la te leʻi maua o ia.

Na la toe foʻi i Ierusalema, ma saʻili le la tama mo aso e tolu. Na iʻu ina la ō atu i le malumalu. O i inā sa maua atu ai Iesu o loo nonofo faatasi ma aʻoaʻo, ma faalogologo lelei ma fai atu fesili tāua iā i latou. O le ofo tele o nei aʻoaʻo na latou tuufesili ai iā Iesu, ma na taufaiofo i latou i ana tali. Na latou iloa sa malamalama Iesu i le Tulafono a Ieova.

 Na matuā popole Iosefa ma Maria. Na fesili atu Maria: ʻLaʻu tama e, ua ma fiu ma lou tamā e suʻe oe. O fea sa e iai?’ Na tali mai Iesu: “Pe lua te lē iloa ea e tatau ona ou iai i le fale o loʻu Tamā?”

Na toe foʻi Iesu faatasi ma ona mātua i Nasareta. Na aʻoaʻoina e Iosefa Iesu i le auala e faia ai galuega faakamuta. O le ā sou manatu, o le ā le ituaiga o tagata sa iai Iesu a o talavou? A o tuputupu aʻe Iesu, na faateleina foʻi lona atamai ma ua alofaina o ia e le Atua atoa ma tagata.

“Loʻu Atua e, ou te fiafia e fai lou finagalo, ua i totonu foʻi iā te aʻu lau tulafono.”—Salamo 40:8