Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 61

E Latou te Leʻi Ifo

E Latou te Leʻi Ifo

E leʻi umi talu ona mavae atu le taimi na fai ai le miti a le tupu o Nepukanesa e faatatau i le faatagata, ona ia faia lea o se tupua telē mai i le auro. Na ia faatūina lenā tupua i le fanua laugatasi o Turu, ona valaauina lea o tagata faapitoa o le atunuu e aofia ai Sataraka, Mesako ma Apeteniko e faapotopoto i inā. Na avatu le faatonuga a le tupu e faapea: ʻO le taimi lava tou te faalogo ai i leo o pū, kitara, ma meafaifaaili e fai lona taga, ona outou ifo lea i le tupua. O so o se tasi e lē ifo i le tupua o le a lafo i le ogaumu aasa.’ Po o le a ifo talavou Eperu e toʻatolu i le tupua, po o le a latou tapuaʻi tau lava o Ieova?

Ona faatonuina lea e le tupu ina ia tā le musika. Na faapaʻuʻū faō tagata uma ma tapuaʻi atu i le tupua, seʻi vaganā ai Sataraka, Mesako ma Apeteniko. Na iloa e nisi o tagata le mea na tupu ma faapea atu i le tupu: ʻNa mumusu na tagata Eperu e toʻatolu e tapuaʻi i lau tupua.’ Na faatonuina e le tupu i latou e ō mai, ma na ia faapea atu: ʻO le a toe tuu atu se isi avanoa e tou te tapuaʻi ai i le tupua. Pe afai e tou te lē faia faapea, o le a lafo outou i le ogaumu. E leai se atua e mafai ona faasaoina outou.’ Na latou tali mai: ʻE matou te lē manaʻomia se isi avanoa. E mafai e lo matou Atua ona faasaoina i matou. Ae tusa foʻi pe e na te lē faasaoina i matou, le tupu e, e matou te lē tapuaʻi lava i le tupua.’

Na matuā ita Nepukanesa. Na ia faatonu ona tagata: ʻIa faafitu ona faaaasa le ogaumu nai lo o le mea e masani ai.’ Ona ia faatonu lea o ana fitafita: ʻIa saisai nei tagata ma lafo i latou i le ogaumu.’ O le  mataʻutia o le aasa o le ogaumu na feoti ai fitafita ina ua latalata atu i ai. Ona paʻuʻū lea o Eperu e toʻatolu i le afi. Ae ina ua vaai atu Nepukanesa i totonu o le ogaumu, o loo savavali i totonu o le afi ni tagata e toʻafā nai lo o le toʻatolu. Na fefe Nepukanesa ma fesili atu i ona tagata maualuluga: ʻPe e tatou te leʻi lafoina ea tane e toʻatolu i totonu o le afi? Ua ou iloa atu tane e toʻafā, ma o se tasi o i latou e foliga e pei o se agelu.’

Ona faalatalata atu lea o Nepukanesa i le ogaumu ma valaau atu: ʻInā ō mai ia i fafo, o outou o auauna a le Atua Silisili Ese!’ Na maofa tagata uma i le ō mai i fafo o Sataraka, Mesako, ma Apeteniko ae e leʻi mū o latou tino i le afi. E leʻi mū foʻi o latou lauulu, o latou ofu ma e leʻi namuasua foʻi i latou.

Na faapea atu Nepukanesa: ʻE malosi le Atua o Sataraka, Mesako, ma Apeteniko. Na ia auina mai lana agelu ma na faasaoina ai i latou. E leai se atua e pei o ia.’

E pei o talavou Eperu e toʻatolu, pe e te maumauaʻi e faamaoni pea iā Ieova e tusa lava po o le ā e tupu?

“E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.”—Mataio 4:10