Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 67

Pā o Ierusalema

Pā o Ierusalema

Seʻi o tatou toe foʻi i ni nai tausaga ua mavae. Sa iai se auauna a le tupu o Aretaseta e igoa iā Neemia. O ia o se tagata Isaraelu sa nofo i le aai o Peresia o Susana. Na sau le uso o Neemia mai i Iuta ma se tala lē lelei: ʻE lē o saogalemu tagata sa toe foʻi i Ierusalema. E leʻi toe fausia lava pā o le aai na faaleagaina e ʻau a Papelonia.’ Na lē fiafia Neemia. Na ia manaʻo e alu i Ierusalema e fesoasoani. O lea na ia tatalo ai ina ia faataga o ia e le tupu e alu.

Mulimuli ane, na mātauina e le tupu ua foliga faanoanoa Neemia. Na ia faapea atu: ʻO le taimi muamua lea ua ou vaaia ai oe ua e foliga faanoanoa. O le ā le mea ua tupu?’ Na tali mai Neemia: ʻAiseā o le a ou lē foliga faanoanoa ai, ina ua faatafunaina loʻu aai o Ierusalema?’ Na fesili atu le tupu: ʻO le ā se mea e te manaʻo ou te faia mo oe?’ Na faia lea e Neemia o se tatalo lē leoa, ona ia faapea atu lea: ʻFaamolemole ia tuu mai aʻu ou te alu i Ierusalema e toe fausia ona pā.’ Na faataga o ia e le tupu e alu, ma na faamautinoa e le tupu e saogalemu o ia i lana faigāmalaga umi. Na ia tofia foʻi Neemia e avea ma kovana o Iuta, ma avatu iā te ia laau e faaaogā mo le fausiaina o le pā o le aai.

Ina ua taunuu Neemia i Ierusalema, ona ia siakiina lea o pā o le aai. Na ia faapotopoto le ʻauositaulaga ma pule, ma fai atu iā i latou: ʻUa matuā leaga le tulaga o loo tatou iai. Ua manaʻomia ona amata le galuega.’ Na malilie tagata i lea manatu, ma amata loa ona toe fausia pā o le aai.

Ae na iai nisi fili o tagata Isaraelu sa taufaifai iā i latou, ma faapea atu: ʻE mafai e se alope ona soloia i lalo le pā o loo outou fausiaina.’ E leʻi amanaʻia e le ʻaufaigaluega na taufaifaiga ma faaauau pea ona galulue. Na faasolosolo ina maualuga ma malosi le pā.

Na mafaufau nei fili e sui le itu e ō mai ai ma osofaʻia faafuaseʻi Ierusalema. Ina ua faalogo tagata Iutaia i lenā fuafuaga, ona latou fefefe ai lea. Ae na faapea atu Neemia: ʻAua tou te fefefe. O loo faatasi Ieova ma i tatou.’ Na tofia e Neemia leoleo e puipuia le ʻaugalulue, ma e leʻi mafai ai e fili ona osofaʻia i latou.

 E na o le 52 aso, ae māeʻa le fausiaina o pā o le aai. Na aumaia e Neemia le ʻau sa Levī uma i Ierusalema mo le faapaiaga o le pā. Na ia tofia i latou i ni vaega se lua o tagata pepese. Na latou ō i luga o le pā e ui atu i fasitepu i le Faitotoʻa o le Vaipuna, ona savavali faataamilo lea i le aai, e ō le isi vaega i le itu taumatau ae ō le isi vaega i le itu agavale. Na latou iliina pū, tāina sumepalo ma kitara, ma pepese iā Ieova. Na ō Esera ma le isi vaega, ae ō Neemia ma le isi vaega seʻia oo ina latou toe feiloaʻi i le malumalu. Na ofoina atu e tagata uma, o tamāloloa, fafine ma tamaiti taulaga iā Ieova ma fiafia faatasi. Na lagonaina lo latou pepese fiafia mai i nofoaga mamao.

“O so o se auupega ua faia e faasagatau iā te oe e lē manuia.”—Isaia 54:17

Faitau Atili

VITIŌ MO FAATOMUAGA O TUSI O LE TUSI PAIA

Faatomuaga o le Tusi o Neemia

O le tusi o le Tusi Paia o Neemia, ua saunia mai ai lesona tāua mo tagata tapuaʻi moni uma i aso nei.